Acts 16

Timothy‑m Maligtekangi Paul‑enkut

1Paul Derbe‑tkaq enkaam taagken nagneqaq Lystra‑mun, tamaani nallaqaa ugpeqaq yuuk aatqelghii Timothy‑meng. Naangallu ugpeqaalghii Jews‑a, naqam atanga Greek‑a. 2Ugpeqat qamaglluteng Lystra‑melnguutlu Iconium‑emelnguutlu akuzitkaqegkangat Timothy piniipiggniluku. 3Paul‑em kelqesukaa Timothy kayutnguluku enkaam circumcise‑estekaa. Tawaten pistekaa tugukliisqelluku Jews‑enun, qayughllak tamaanlenguut Jews‑et liisimakegkangat atanga Greek‑ngulghii.

4Taagken igleghanguluteng neghllagnun kaanneghmeggni ugpeqat qaatkutesqaqegkangit apostle‑etlu, Elder‑etlu liilightuusangllaqiitnun Jerusalem‑emi. 5Enkaam ugpeqat wata ugpeqiighataghaqat, nulamanginaqatlu aghhutanga tamaghhaan.

Paul‑em Esghaghwaallgha Troas‑mi

6Paul‑enkut igleghtekat akulegkenkun Phrygia‑mllu, Galatia‑mllu, qayughllak Agleghnalghiim Taghnegham ungipaghtesimangilkangi ungipameng Asia‑mi. 7Tughwaaghluteng Mysia‑mun nagneghnaqegkaayalghiit Bithynia‑mun, iwernga Jesus‑em Taghneghagkenka pisneghitkii. 8Enkaam Mysia naghughlluku tesamavek Troas‑mun pikat. 9Unugmi tawani Paul‑em esghaghwaalleghqun esghaqaa yuuk Macedonia‑ghmii tagsighralghii. Yugem maniguutepiglluni pikaa, “Tagiluten Macedonia‑mun kayusiitaghtikut!” 10Legan Paul‑em esghaghwaallghan kingunganeng yataaghqukut Macedonia‑mun pinaluta, qayughllak liigikegkefut Kiyaghneghem ungipaqisukanginkut Pinilghiineng Ungipaneng tamaani.

Lydia‑m Ugpellgha

11Enkaam telanangameng nangaqaghtukut Troas‑meng Samothrace‑mun. Unaamingani Neapolis‑mun piikut. 12Taagken quutkun kaatukut neghllagmun Philippi‑mun Macedonia‑melngughmun Rome‑eghmiit nelikiitnun. Qafsinat aghneghet tamaantukut. 13Tamaansimaluta Sabbath‑ngughsagu mingllutem amigllagakun aanluta kiiwegnun piikut, Jews‑et tawani yughaataqnayukata. Aghnam ilangi tawantuteftut enkaam aqumuulluta aleghqughaput. 14Ataasiq nagallghii Lydia‑nguftuq, Thyatira‑ghmii, akilpegaqayuk esnegrukegtameng qiipaghaghmeng, maniguutkayuk Kiyaghneghmun. Atanghem liigikestengngwaaqii Paul‑em akuzitangi Lydia‑mun enkaam ugpeqegkii. 15Qamaglluteng nengllugutkullghiit paaptaayeyameng Lydia‑m aqelqangllaghiinkut, “Sumeghpesini ipapik ugpeghumakuma Ataneghqun, whangkunnitaghhnayanghitsii?” Enkaam sagiqusinkut ellngitnitukut.

Paul‑enkuk Silas‑enkuk Anusimingllaghvigmi

16Ataasimi aghneghmi kiiwem esnenganilngughmun yughaatfigmun aglaamaluta, nallaghaghput qepghaghtelaaq aghnaghaq ilumikun tughneghalek. Taam tughneghaam uuknaliqutkestaqegkangi sangwaat sayaghqat sivutghulluki. Enkaam piliitestengita aklungighisiqngukangat. 17Taam aghnaghaam maligsaaghiinkut Paul‑llu whangkuta akilghuumaghmi, “Ukut yuget qepghaghtekii Aangelleghpigaam Kiyaghneghem! Ungipaataqiisi naten yugulillengelleghqameng!” 18Qafsinegllak aghneq tawaten piiq. Qenwatlu Paul‑em qinuyagulluku tughneghaq ilunganilnguq qiivluku pikaa, “Aatghakun Jesus Christ‑am qelghamken aanesqelluten ellnganeng!” Tawaninginaq tughneghaq ilunganeng aanegkaq. 19Piliitestengita liigiksamegteggu allgeghututkesaghqaananiimatseng aghnaghaq, Paul‑enkuk Silas‑enkuk akuqaqagket. Qamughsiighmeng aglaatkagket igleghutistenun akilpegaghvigmelngughnun. 20Taagken igleghutistet aglaallukek Rome‑eghmiit nanqigtistengitnun pikiit, “Yugek ukuk Jew‑nguuk, seghleliighqiinguuk maani. 21Apeghtughiiquk kiyaghtaalleghmeng whangkuta Rome‑eghmiini liilightuusamta iinghutkiitneng. Tamaaken apalluqluku apeghtuusiik atuqnaanghitaput.” 22Enkaam yulghun ilatqaghtaalluni sughukagket Paul‑enkuk Silas‑enkuk. Nanqigtistet qelghutkagket aatkiik qesugumeng mataghqughluki anagulghesqellukek. 23Anaguleghtaaneghmeng taaqlukek anusimingllaghvigmun kanaghtekagket. Taagken anusimingllaghvigem umiilganun maghqatutngwaaghesqegkagket. 24Anusimingllaghvigem umiilgan tawaten kayagsatni iluklighpigaghmun qamavek kanaghtekakek. Taagken umughllagmeng unaghsimeng tukughusighlukek, maghqatkiit taakut tukughutet qapragyaghqaagpenakek.

25Nani tamaani unugem qukaani Paul‑enkuk Silas‑enkuk yughaamaagmek ilagaqak usuqilleghmeng Kiyaghneghmun, anusimingllaghat tawanlenguut nagatkagket. 26Nuuskagllagan nuna tuyepeghtaqaq, repall anusimingllaghvik tunemaghtuumaan aghulatkaa. Tawaninginaq amiget qelpeghaghtaatkat, anusimingllaghanengllu qiipraghutet ilefkaghaghtaatkat. 27Anusimingllaghvigem umiilga taghtughyalghiimi, amiget qelpatuteftut. Sumeghmini anusimingllaghat qimaguusimaniluki savigpani nusugluku ellmineng tuqunnaqegkaq. 28Iwernga Paul‑em iglagtupiglluni pikaa, “Tuqunnaqegpenang elpeneng qayughllak qamaglluta whaantutukut!”

29Anusimingllaghvigem umiilga keneghmeng tungsighluni iitqaghtekaq. Alingruughem ungelegsimaghmi Paul‑enkuk Silas‑enkuk manugkenkun segesqughtekaq. 30Taagken aanututkellukek aaptekakek, “Yugegni ukughtek, naten salunga yugulillengnayaghsinga?”

31Pikaak, “Ugpeqigu Ataneq Jesus enkaam yugulillengellequten, nengllugutetenllu yugulillengellequt.” 32Taagken Paul‑enkuk Silas‑enkuk ungipaqegkaak Ataneq ellnganunllu nengllugutanganunllu. 33Tawani unugmi anusimingllaghvigem umiilgan ughvughteqii taakuk yugek anagulellghegkenka kiingik. Taagken nengllugutkullghiit paaptaayenginaamaghmeng pikat. 34Paul‑enkuk Silas‑enkuk ellmeggnun aglaallukek neghestekagket. Nengllugutkullghiit quyateghllakat qayughllak ugpeqegkangat Kiyaghneq.

35Aghsagu Rome‑eghmiit nanqigtistengita kevgaqegkiit umiilwaateng ungipaasaghtiisqelluku anusimingllaghvigem umiilga whaten, “Paul‑enkuk Silas‑enkuk aanestikek.”

36Enkaam anusimingllaghvigem umiilgan Paul pikaa, “Nanqigtistet kayagutiistek aaneslamtegnguq enkaam aanelghaatek, aghulaqitek nekeggmellutek.”

37Iwernga Paul‑em umiilwaaghet pikii, “Rome‑eghmiingughngaamtung yugtuqami anaguleghtaakaqiinkung, talwa ipapighqutkegpenaan sameng anaggusimatfung. Taagken anusimingllaghiinkung. Enraghngam whaa maaten aksaqluku aanesnaqinkuung? Yeghlegillu! Ellmeggneng nanqigtistet tagiluteng aaneslinkung.”

38Paul‑em tawaten piyisteng umiilwaaghet ungipaasaghtuqiit nanqigtistet. Enkaam nanqigtistet alingegkat Paul‑enkuk Silas‑enkuk nagaqughlukek Rome‑eghmiingutkek. 39Taagken takulukek qivghuklukek aanestekagket anusimingllaghvigmeng, aghulaqesqegkagketlu. 40Enkaam Paul‑enkuk Silas‑enkuk anusimingllaghvigmeng aanyamek, Lydia‑nkunun pikak. Tawani laalighfikluki ugpeqat kayemluki aghulaqegkak.

Currently Selected:

Acts 16: ess

Highlight

Copy