Acts 11

Peter‑em Aapqangi Cornelius‑enkut Ugpeqanun Jerusalem‑emi

1Apostle‑etlu ugpeqatlu Judea‑melnguut nagaquqiit Gentile‑enunllu ugpequmaniluki Kiyaghneghem akuzitangi. 2Peter kaasan Jerusalem‑emun, Jews‑et ugpeqat circumcise‑eghiyukat Gentile‑et ugpeqiitneng seghlequuqaat Peter, pikaat, 3“Sangan circumcise‑emangilnguut iteghvikluki nengitnun neghelgusighsiki?” 4Liigikesqelluki Peter‑em esghaghwaalleghmineng kenlanga aapqaa sangwaa qamaglluku apeghiiqaq.

5“Joppa‑mi yughaamalunga esghaghwaaqaagunga. Esghaghaqa qiipaghaghllagsugni estamatgun tekerqaakun ukigtekangat qilagmeng whangamnun. 6Tawavek yuvghiighwaaghyaqegka imaqeftuq allaaghhiinaghneng teghikusaneng, reptile‑eneng, qawaagneng tengaakayugneng. 7Taagken ma nagaqughaqa whaten pilghii, ‘Peter, makelluten tuqutiluten neghi!’ 8Iwernga kiimsighaqa, ‘Yeghlegillu Ataneq! Neghigatanka tamaakut ukmanginneghilnguut neqet iinghutkat.’

9“Mem pilaataghaanga qilagmeng, ‘Kiyaghneghem ukmangiqaqii tamaakut, ukmanginneghinniluki sumeghtaghaatkesaghqaqenghitaten.’ 10Tawaten pikaaguq pingayuneng ketwhell. Taagken qamaglluteng taakut aga qilagmun mayuutaqutlu, 11whaa yuget pingayut kaatut tukumnun, kevgaaftut whangamnun Caesarea‑meng. 12Agleghnalghiim Taghnegham qaqilqafqaama maligtesqii. Ukutlu aghvinlek yuget ugpeqaalguteput maligutut Joppa‑meng Caesarea‑mun. Kaalluta Cornelius‑enkunun iteghaatukut. 13Cornelius‑em aapghaa yaqulegmeng esghaatelleni nemini, yaqulgemnguq whaten pii, ‘Joppa‑mun aqfastigu yuuk aatqelghii Simon Peter‑meng. 14Ungipaalleqiisi nengllugutkullghiini naten yugulillengelleghqameng.’ 15Enkaam akuziiqungallu Agleghnalghiim Taghnegham iitghii tawatengwaaq whangkunnun itelleghmitun Pentecost‑em Aghneghani. 16Taagken neqangughaqa Atanghem pillgha whaten, ‘John paaptaayelaqaaguq meghqun, iwernga elpesi paaptaayellequsi Agleghnalghiignekun Taghneghagnekun.’ 17Enkaam Kiyaghneghem tuunumakaki Gentile‑et taagken ataasimeng tunusameng tuunegkamineng whangkunnun ugpeqaqngamteggu Ataneq Jesus Christ‑a, whanga kinanguzinga aghuliighhnaqsaghqaaluku Kiyaghneq tawaten pillghaneng Gentile‑enun?”

18Tawaten Peter‑em piyisteng qallegnanighluteng, yeghlegi usuqegkaat Kiyaghneq. Pikat, “Taawa liigikaghput Kiyaghneghem talwa Gentile‑et pilleghqalisimakangi avuteghqesqelluki seghleghqellghitneng, unguvallengesqellukillu kenlengilngughmeng unguvalleghmeng!”

Ugpeqat Antioch‑melnguut

19Stephen‑em tuqutellgha kenlekluku Jews‑et amyuutkegkiit ugpeqat, enkaam anakat Jerusalem‑emeng. Aghulaquutkat kenlanga Phoenicia‑mun, Cyprus‑mun, Antioch‑munllu. Igleghutkelluku ungipaqegkiit Pinilghiit Ungipat Jews‑nginaghhaghnun. 20Iwernga ilangi ugpeqat Cyprus‑mengllu Cyrene‑mengllu Antioch‑etkat, kaalluteng ungipaqegkaat Ataneq Jesus talwa Jews‑ngunghilngughnun. 21Atanghem aghtughyaghqaanghillgha ellngitnitkaalghii, enkaam uglapestaaq yuuk ugpeghtuulluni qiivuutkaq Ataneghmun.

22Ugpeqat Jerusalem‑emelnguut nagalluku Peter, Barnabas kayagtekaat Antioch‑mun. 23-24Kaasalghiimi uglaapiglleghhii yuuk ugpeghtuulluni ayuqeftuq, enkaam quyaghllakaq qayughllak liigikegkaa Kiyaghneghem piniqingalleghllaga yugnun. Barnabas pinilghiingulghii yuuk, imighngaghllaklu Agleghnalghiigneng Taghneghagneng, ugpeqillelegllaklu. Taagken allangughtefqiita ataasiighmetekestiisqegkii Ataneghmun. Wataqaaghaq ilangitallu yuget ugpeqegkaat Ataneq.

25Taagken Barnabas‑em Saul ivaghyaghtuqaa Tarsus‑mun. 26Naalkesamigu kelqegkaa Antioch‑mun. Ataasiq ayumiqulleq tamaantelleghmegni ilataqlutek ugpeqanun apeghtughikak yulghuteghllagnun. Tamaani Antioch‑mi ugpeqat atighyuwhaaqiit, “Christian‑et.”

27Tamaani ilangi uuknaliqistem Jerusalem‑emeng Antioch‑mun tagikat. 28Ataasiq Agabus‑nguftuq, nekevluni uuknaliqegkaq Taghneghagnekun neqangisagllagnaqniluku tamangani. Taawa neqangisagllakaq Claudius Umiilegpigaaluku. 29Ugpeqat ugpeqaalguteteng Judea‑melnguut kayusighyukiit pitutalmegestun. 30Enkaam qerngughtiluteng manimeng tuyughikat elder‑enun Jerusalem‑emelngughnun Barnabas‑enkugnekun Saul‑enkugnekun.

Currently Selected:

Acts 11: ess

Highlight

Copy