Acts 12
12
Amyuutkataghalleq
1Nani tamaani pilleghmi Umiilgem Herod‑em amyuutkesagutkii ilangi ugpeqat. 2John‑em anglegutanga James tuqutestekaa savigpagkun. 3Umiilgem Herod‑em liigiksamigu Jews‑eneng efqughtilleni tawaten pilleghmikun, qelghutkaa Peter tugusqelluku. (Tawaten pikaaftuq Neqenghaghqengnguluki Yeast‑aliimangilngughmeng Neqekrangllameng.) 4Peter tuguyatgu, Umiilgem Herod‑em qelghutkaa 16‑eghyagnun pilluwaghtenun kelengakesqelluku estamakaghtiita kipullgutaqluki. Yugtuqami nanqigsukaa kingunganeng Passover‑em.
5Enkaam Peter anusimingllaghvigmetestekaa. Iwernga ugpeqat yughaatkeghllakaat Kiyaghneghmun.
Peter‑em Anusimingllaghvigmeng Aanellgha
6Peter qavaalghii maalghuk kelengakistek akulegkeni, petugngalghiillu malghugneghteggun qiipraghutetgun. Allameng anusimingllaghvigem amiga kelengakistelek. Whaa aghtekan Herod‑em tagitesnaqngukanga yugnun nanqigtesqelluku. 7Atanghem yaqulga aliighaghtekaq, enkaam nighuk kuukgutkaq anusimingllaghvigem ilunganun. Yaqulgem Peter tuuyngakun aghulalluku, teghtughlluku pikaa, “Egmiinaq maketen!” Tawaninginaq qiipraghutet ifkaquutkat iigganeng. 8Taagken yaqulgem pikaa, “Pilugugluten kaamgegken aatikek.” Peter pisqellghatun pikaq. Yaqulgem pilaataqaa, “Qaasligken aallukek maligtinga.” 9Enkaam Peter‑em maligtekaa. Ugpequmangitngwaaqaqsaqanga aanutelleni, yeghlegi sumeghtaghaqaq esghaghwaaghniluni. 10Sivuliitlu tuunglighhiillu kelengakistet naghughlluki kaatkak savikenghaaghmun amigmun. Amik ellmineng qelpeghyan, aanlutek igleghteghngaagmek tumetgun yaqulek aviitqaghtekaq.
11Taagken Peter‑em liigikngwaaqaa samatni enkaam pikaq, “Taawa ipanguftuq Atanghem kayagsimaa yaquleni iqitutesqellunga Herod‑meng, Jews‑etlu salleghqiitneng.”
12Liigikluku samatni Mary‑nkunun aglaqaq, John Mark‑em naanganun. Tawani yulghun qerngughulluni yughaateghllagulghii qerngaghmi. 13Peter eslaklighqun amigkun tenglugtughyan aghnaghaam qepghaghtem, Rhoda‑m qelpeghusaghtuqaa. 14Liisuqsamigu Peter‑em menga, quyaghllagem angtalanganeng qelpeghutegpenaan, yeghlegi ilutmun iitqaghlluni aapqaa qakma Peter manughamenniluku. 15Iwernga pikaat, “Temngi piiten!” Iwernga sagiqutkii ipanguniluku. Taagken pikaat, “Yaqulkenghitaguwha.”
16Qakma Peter tenglugtuumanginaqaq. Qelpeghusaqmegteggu ellnganguftuq enkaam saghiighayukat. 17Peter‑em apaqukii qallegnaniisqelluki, enkaam ungipamsugutngwaaqii Atanghem aanutellghaneng anusimingllaghvigmeng. Pikiillu, “Aapqaghnakefsinga James‑munllu ugpeqaalgutemnnunllu tawaten pimanilunga.” Taagken aanluni natmun pikaq.
18Aghtaghaghaqaallu kelengakistet aviilngaqaat Peter, alingrughumaghmeng kukriqegkat samatanga. 19Herod‑em ivaghtesimayaqanga iwernga naalkumangitkaat. Enkaam kelengakistet aapqughaaghtesluki nalluksatgu tuququghtestekii.
Taam kingunganeng Herod Judea‑meng Caesarea‑lluni tamaanteghraakaq.
Herod‑em Tuqullgha
20Umiilgem Herod‑em ugumiyaguteghllagukangi Tyre‑eghmiitlu Sidon‑eghmiitlu, iwernga tamaakumiit yuget kayagtekiit Blastus‑mun akuzitunnaqaghtesqelluteng Herod‑mun. Blastus igleghutistekegkanga Umiilgem Herod‑em mangteghaghllagan. Kaalluteng aaptekaat Blastus akuzitutaghtesqelluteng umiilegmun. Tawaten pikaalghiit neqengnanighnayukameng Herod‑em nunanganeng.
21Tawani aghneghmi pivigkameggni Herod‑em umiilgusit aatkani aatqughluki aqumluni aqumutaghllagegmikun akuzikaq. 22Taaqsan akuzineghmeng yuget akilghuukat, “Yugunghituq akuzilghii, naliqaat kiyaghneghet!” 23Tawaninginaq Atanghem yaqulgan qinuyugtesteghllakaa Herod, qayughllak tugukliqanga quulvalleq Kiyaghneghem pinga. Unguvaghmi kingugtaaghllagluni tuqukaq.
24Taawa Kiyaghneghem ungipii mingisimanginaqat enkaam wata yuuk ugpeghtuutkaq.
25Taakuk Barnabas‑enkuk Saul‑enkuk apeghiighyamegnegu qepghaqaghtek Jerusalem‑emi, Antioch‑mun uteghniqak kelqelluku John Mark.
Currently Selected:
Acts 12: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
