Acts 10

Peter‑enkuk Cornelius‑enkuk

1Caesarea‑minguq taawa yuuk aatgha Cornelius. Umiilgat Rome‑em pilluwaghtengita Italy‑meng pit. 2Yuuk pinilghii, kayusighimaghllak aklumalghiinun, yughatuqaqlu Kiyaghneghmun. Nengllugutkullghiit, qepghaghtekullghiit maniguutkayuget Kiyaghneghmun. 3Ataasimi aghneghmi 3‑klaagmi esghaghwaaqaq. Whateghlluwaaq esghaqaa Kiyaghneghem yaqulga itelghii, yaqulgem tuqluqaa, “Cornelius!”

4Alingruughumaghmi esghapagtughluku yaqulek aaptekaa, “Ataneq, sameng pizin?”

Yaqulgem pikaa, “Kiyaghneghem nagaquumii yughalleghten, efquqepigtaallu kayusighillghen aklumalghiinun enkaam neqamikaaten. 5Joppa‑mun aqfastigu yuuk aatqelghii Simon Peter‑meng. 6Simon‑enkunituq sanaghtistemi, mangteghaa esnemetuq.” 7Yaqulgem tawaten piluku unitkaa. Taagken Cornelius‑em tuqluqakek maalghuk qepghaghtegni, pilluwaghtallu. Taana pilluwaghta Cornelius‑em kayutanga maniguutkayuk Kiyaghneghmun. 8Tagiyata ungipaatngwaaqii esghaghwaalleghmineng, taagken kevgaqegkii Joppa‑mun.

9Unaamingani aghneghem qukaani kevgat kaasaghtughaqutlu Joppa‑mun, Peter mayuqaq mangtegham qaaynganun yughaghnaluni. 10Taagken iyataqaq, sameng neghyukaq. Sama neqmeng yataaghqumaluki Peter esghaghwaaqaq. 11Esghaqaa qilak qelpelghii, taagken esghaqaa qiipaghaghllagsugnilnguq ukigtekangat nunamun estamatgun tekerqaakun. 12Taawanguq imaqeftuq allaaghhiinaghneng teghikusaneng, reptile‑eneng, qawaagnengllu tengaakayugneng. 13Taagken mem pikaa, “Peter, makelluten tuqutiluten neghi!”

14Iwernga Peter‑em pikaa, “Yeghlegillu, Ataneq! Neghigatunga iinghutkameng ukmanginneghilngughmeng teghikusameng.”

15Mem pilaataqaa, “Kiyaghneghem ukmangiqaqii taakut, ukmanginneghinniluki pigpenaki.” 16Tawaten pikaq pingayuneng ketwhell. Taagken tawaninginaq taana iingunaghmi qilagmun mayuutkaq.

17Peter‑em kukriqutkegkaa sameng pisiitanga esghaghwaalleni. Tawaten pimaluku Cornelius‑em kevgiita liitkaat Simon‑em mangteghaa naantulanga, enkaam manughaanun kaatkat. 18Qamavek aaptekiit, “Whani aqelqaanghitaa yuuk aatgha Simon Peter?”

19Peter‑em paninang sumeghtaghaatkumaluku esghaghwaalleni, Taghnegham pikaa, “Uyuq, yuget pingayut ivaghaqaaten. 20Ukigluten qaqilqafqaavek maligtiki, qayughllak whanga kayagtanka elpenun.” 21Enkaam Peter‑em ukigluni pikii, “Whanganguuq ivaqaghsi. Sameng pistengnga?”

22Kiimsiqaat, “Cornelius‑em kevgaqiinkut, umiilguuq Rome‑em pilluwaghtengitnun. Yuuk pinighllagtuq maniguutkayuk Kiyaghneghmun, qamagllutengllu Jews‑et siivakepigtaqaat. Kiyaghneghem yaqulgan pikaqaa Cornelius, ‘Aqfastigu Peter elpesinun pisqelluku, nagatesqelluku sameng pilleghqaa elpenun.’” 23Taagken Peter‑em iitghesqegkii, tawanillu qaviisqegkii.

Unaamingani yataaghqelluni maligtekii Cornelius‑em kevgii, ugpeqatlu ilangi Joppa‑meng maligutkat. 24Taagken unaamingani kaatkat Caesarea‑mun. Cornelius‑em ilakwaanillu ilakumtaanillu tagilaghaatesluki ellmeggnun utaqakaat Peter. 25Peter iitghaquqlu Cornelius‑em payeghluku segesqughfikegkaa manigughnaluku. 26Iwernga Peter‑em nekevestutkelluku pikaa, “Nekevi, whangallu yuguunga.” 27Iitghutkelluku Peter‑em aleghquqaa Cornelius. Iteghyalghiimi taawa yuuk qerngughuteghllagumalghii tawani. 28Peter‑em pikii, “Liisimakngwaaghaghsi whangkuta Jews‑eni Liilightuusamta ineghtekaqiinkut ilatefqaamta pisqelluta Gentile‑enun, talwa laalighfikesnaniqaqii. Iwernga Kiyaghneghem kelguvikaanga kina alngunak ukmanginneghinniluku sumeghtaghaatkefqaan pisqelluku. 29Aqfasafsinga tagiinga qaqilqagpenanga. Sangama piiqestengnga?”

30Cornelius‑em pikaa, “Whaten lliighumaan akuwaaq piiqellemtun yughaamalunga 3‑kellaagmi, yuuk manumkun nekevuq aatkii nighugllaget. 31Whaa piinga, ‘Cornelius! Kiyaghneghem yughalleghten nagaquumii, neqamikiillu aklumalghiinun kayusighilleghten. 32Joppa‑mun kina kevgaqigu aqfasqelluku Simon Peter. Simon‑enkunituq sanaghtistemi, mangteghaa esnemetuq.’ 33Enkaam tawaninginaq aqfasqamken, quyakamken tagilghiiten. Liisimakluku Kiyaghneghem nayuqellgha qamaglluta whaanlengughni nagaqughyugaghput sangwaa qamaglluku Atanghem elpenun aapghesqegkaa whangkunnun.”

Peter‑em Akuzillgha

34Taagken Peter‑em pikii, “Taawa ipa liigikaqa Kiyaghneq taniillghiteftuq, tawatengwaaq pikayuguftaa tamaghhaghllagan yuuk ataasistun. 35Tuguklighyaghqaqaa kina alngunak nakumiinguyaghngaan alikilghii ellmineng, pinitunllu pikayuk. 36Liisimakaghsi Kiyaghneghem ungipaa ungipaqegkaq Israel‑eghmiinun, taana Pinilghii Ungipaq yuget nekeggmellengusighqaqaat Kiyaghneghmun Jesus Christ‑akun. Jesus Christ‑a, Atanqaa tamaghhaghwaaghmi yugem. 37Liisimakaghsi taana ungipaq mingitkaaguq Judea‑lqaaghaghmi, piinliqaq Galilee‑mi John‑em ungipaqaqngagu paaptaayelleq. 38Liisimakaghsi Jesus Nazareth‑eghmii, Kiyaghneghem imiqaa Agleghnalghiigneng Taghneghagneng, aghtughyaghqaanghilleghmengllu. Navek alngunak pineghmini pinitun piiqegkangi yuget, naallghuquqiillu tamaakut Tughneghaam aaghqutaqegkii, qayughllak Kiyaghneq Jesus‑melnguq. 39Whangkuta apostle‑eni liisimakistenguukut tamaghhaanun tawaten pillghanun Jews‑et nunangitni, Jerusalem‑emillu. Tuqutkaqaat tuquuqaalluku qaquurakun. 40Iwernga pingayiitangani aghneghem Kiyaghneghem unguvaghtestekaqaa tuqulleghmeng, esghaghtestekaqaallu yugnun. 41Iwernga qamaglluni yugem esghaamangitaa. Whangkuta esghaqaqaghput qayughllak Kiyaghneghem nakmikegkaqiinkut liisimakistenguluta. Talwa neghelgusiqaqaghputlu meghelgusiqaqaghputlu kingunganeng unguvaghtestellghan tuqulleghmeng. 42Taagken kayagtekaqiinkut ungipaqesqelluku Pinilghii Ungipaq, aapghesqegkaaguqlu Kiyaghneghmun nakmikegkaqniluni nanqigtistenguluni unguvalghiinunllu tuqukanunllu. 43Qamaglluteng uuknaliqistet pikaagut, kitumnguq alngunak ugpeqegkumigu aatghakun, seghevutellengyaghqaaguq seghleghqelleghmineng.”

Gentile‑et Allgeghutellghat Agleghnalghiigneng Taghneghagneng

44-46Peter paninang akuzimaluku qamaglluki nagallghiit ungipameng Agleghnalghiim Taghnegham iitqii, enkaam allaaghlluwhatun akuzistekiillu usuqistekiillu Kiyaghneghmeng. Circumcise‑ekat ugpeqat Joppa‑meng maligutkat Peter‑mun saghiighayukat nagasamegteki tawaten akuzillghiit. Liigikegkaat Kiyaghneghem Agleghnalghiik Taghneghak tunusaqegkek talwa Gentile‑enun.

Taagken Peter‑em pikii, 47“Ukut yuget allgeghutut Agleghnalghiigneng Taghneghagneng whangkuteghpigaghestun. Kitumngam paaptaayesnanighnaqaki meghqun?” 48Taagken qelqii paaptaayesqelluki Aatghakun Jesus Christ‑am. Taam kingunganeng ellmeggnitaghiisqegkaat Peter.

Currently Selected:

Acts 10: ess

Highlight

Copy