Acts 9

Saul Ugpelghii

1-2Saul Jerusalem‑emelluni taawa paninang alingsiqukii tuququghnaqniluki maligsaaghtengi Atanghem. Qenwat Damascus‑esukaq, luuraq Jesus‑em maligsaaghtengi yugetlu aghnatlu tamaannayukata. Esghaqumiki taginnaluki Jerusalem‑emun anusiminglliisqelluki. Enkaam high priest‑mun piluni latangllaatesqegkaq pilleghqalitesqelluni igleghutistengitnun synagogue‑et Damascus‑melngughnun, tawaten pinaluni.

3Enkaam Saul aghulaqegkaq Damascus‑mun. Iiwenllu kaasaghtughaquq, qilagmeng nighugllagem kukegtekaa. 4Uullghaghlluni nagaquqaa ma whaten pilghii, “Saul, Saul, sangama amyuutkumanginaghsinga?”

5Saul‑em aaptekaa, “Kinanguzin Ataneq?” Mem kiimsiqaa, “Jesus‑nguunga amyuutkegkan. 6Makelluten aglaa Damascus‑mun, tawani kitum ungipaalleqaaten naten pilleghqaghpeneng.”

7Yuget igleghalgutangi aghuliiqat tawani, akuzipagningunateng nagatkaat ma, naqam kina alngunak esghaamangilkangat. 8Saul makesalghiimi esghaanneghituq qayughllak ayaamalghii. Enkaam tasluqluku aglaatkaat Damascus‑mun. 9Pingayut aghneghet ayaangakaq, talwa neghumangilnguqlu, meghumangilnguqlu.

10Taawanguq Damascus‑mi, yuuk ugpeqingalghii Jesus‑meng, aatgha Ananias. Esghaaghwaalleghqun Atanghem tuqluqaa, “Ananias.” Kiimsiqaa, “Ay, Ataneq?”

11Atanghem pikaa, “Tumenun aglaa aatqelghiinun, ‘Taklaghrukegtaq.’ Taagken Judas‑enkunun aapsaghtughhu yuuk, Saul‑nguuq, Tarsus‑meng pinguuq, yughaghaquq. 12Esghaghwaaghqun esghamaa yuuk itelghii, aatgha Ananias, saafsaqminigu esghaghyagunneqigtuq.”

13Iwernga Ananias‑em pikaa, “Ataneq, nagaqughaqaqa taana yuuk uglapiglleghhiineng, apeghnaqepigtaqaat seghletun pilleghllaga yugpenun Jerusalem‑emi. 14Pilleghqangegkaaguq chief priest‑eneng tagiluni Damascus‑mun tugulaghnaluki qamaglluki yughaqayuget ateghpegun.”

15Iwernga Atanghem pikaa, “Aglaa, takugu qayughllak nakmikumaaqa ungipaqesqellunga Gentile‑enun, umiilegnun, Israel‑eghmiinunllu. 16Liigikesnaqngwaaqa aangluku ikfiqelleghmeng whanga apalluqlunga.”

17Enkaam Ananias‑em takukaa Saul. Iteghluni saafsimaan pikaa, “Anglegutemni Saul, Atanghem Jesus‑em esghaqaghpek tumeni taginguluten, kayagtaanga elpenun. Kayagutaaten saaftesqelluten esghaasagunneqigtesqelluten, imiisqellutenllu Agleghnalghiigneng Taghneghagneng.” 18Tawaninginaq iqallugem qaltesugningi iyegkeneng ifkaquutkat, enkaam esghasagutkaq. Taagken makelluni paaptaayekaq. 19Taam kingunganeng neghyalghiimi iknaqsuugtekaq.

Saul Ungipaqilghii Damascus‑mi

Saul ugpeqanitkaq Damascus‑mi qafsinat aghneghet. 20Mulugpenani synagogue‑ni ungipaqegkaa Jesus, Ighneqniluku Kiyaghneghmun. 21Nagatullghiim saghiighayagutkaat repall ellmeggneng aapqughaghutkat, “Unangunghitaa‑a yuuk Jerusalem‑emi amyuqetiqeghllakaq yughaqayugneng Jesus‑em aatghakun? Maavek taginguyalghii tawaten pinaluni, ugpeqat tugulaghnaluki, aglannaluki chief priest‑enun.”

22Saul‑em ungipaqilleghmikun wata liigikestaghaqaa Jesus, Christ‑angutanga repall Jews‑et Damascus‑melnguut aaghtiiraaghpagningitkaat.

23Saul ungipaqilqinaghyan tawaten qafsinegyagllak aghneq, Jews‑et wataqaaghaq ugumiyagutkaat, repall qerngughulluteng agghitkegkaat tuqunnaluku. 24Enkaam aghneghtuumaan, unugtuumaan Damascus‑em amigllalghutngani kelengakegkaat tuqunnaluku. Iwernga Saul‑em nagaquqaa tawaten agghillghat. 25Enkaam unugmi ataasimi, Saul‑em maligsaaghtengita pasketeghrugllagegnekun mingllutmeng eslatmun ukigtekaat.

Saul Jerusalem‑ellghii

26Taagken Saul kaasami Jerusalem‑emun ilannaqegkaayaalghii Jesus‑em maligsaaghtengitnun. Taawanginaq iingunaghhaghmeng alikegkaat, qayughllak aygughikegkaat ellngallu maligsaaghtengughsimatanga. 27Iwernga Barnabas‑em Saul aglaalluku apostle‑enun aapqaa Saul‑mun tumemi esghaamaniluku Ataneq, aleghquutkaaniluteklu. Aapqaallu Damascus‑mi ungipaqaaniluku tetugpenani Aatghakun Jesus‑em. 28-29Enkaam tugukliqaat. Taagken kenlanga Saul ugpeqanitkaq. Igleghutkelluku Jerusalem‑emi, ungipaqikaq tetugpenani aatghakun Atanghem. Iwernga ilangita Jews‑et Greek‑estun akuzikayuget aaghtiiraaqaan tuqusukaqegkangat. 30Ugpeqat liigiksamegteggu Jews‑enun tuqunnaqniluku Saul, aglaatkaat Caesarea‑mun, taagken kayagtekaat Tarsus‑mun.

31Qamaglluteng ugpeqat Judea‑mi, Galilee‑mi, Samaria‑millu amyuutkestengngunateng kiyaghtekat. Ugpellghit iknaqughtekat, alingaqelghiit qaatkunneghitelleghqameggneng Ataneghmun, Agleghnalghiimllu Taghnegham kayusiingukangi enkaam ugpeqat nulakat.

Peter Lydda‑llghiillu, Joppa‑llghiillu

32Peter‑em igleghatkelluku laalighfikuqii Kiyaghneghem yugi naansaghngaata. Ataasimi aghneghmi laalightekaq Lydda‑melngughnun. 33Tamaani esghaqaa yuuk aatgha Aeneas, pingayuneng inglulek ayumiqulleq makesigalnguq uniighngatmiineng. 34Peter‑em pikaa, “Aeneas, Jesus Christ‑am naallghutaaten, makelluten allighan iimggu.” Tawaninginaq Aeneas maketkaq. 35Uglapiglleghhiit Lydda‑ghmiitlu Sharon‑eghmiitlu esghaghyamegteggu Aeneas naallghulluni, ugpeghtuutkat Ataneghqun.

36Joppa‑minguq taawa ugpeqaq aghnaq aatgha Tabitha, (Greek‑stun Dorcas, whaten pisiq, quyngiq), quunpeng kayusighimaghllak, kiyang tamaakunun aklumalghiinun. 37Taagken qinuyugluni tuqukaq enkaam ughvughqelluku qemtamun mayuutkaat. 38Joppa‑ghmiit ugpeqat nagaquqaat Peter Lydda‑menniluku. Lydda, Joppa‑meng qantaghaghhanlenguq, enkaam ugpeqat kevgaqegkagket maalghuk yugek Peter‑mun tagiragkiighesqelluku Joppa‑mun. 39Peter‑em yataaghqelluni maligtekakek. Kaasan qemtamun mayuutkaat. Legan iteghtuq ugingighat qiyamaghmeng kanglluqaghlluku kelguvikegkaat aatkaneng Dorcas‑em ulimaaghaneng. 40Peter‑em aanesqughluki segesqughlluni yughaqaq. Taaqluni yughaneghmeng qiivluku yugusiq pikaa, “Tabitha, maketen.” Tabitha esghaatkelluku esghaghyamigu Peter aqumegkaq. 41Peter‑em iiggakun tuguluku nekevestekaa. Taagken tuqluqii ugpeqatlu ugingighatlu esghiisqelluku unguvaamatanga. 42Qamagtengngwaaghluteng Joppa‑ghmiit nagaquqaat Tabitha‑m unguvallgha enkaam uglapiglleghhiim ugpeqegkaat Ataneq. 43Peter mulukaq Joppa‑mi, Simon‑enkunitkaq sanaghtistemi.

Currently Selected:

Acts 9: ess

Highlight

Copy