2 Corinthians 7
7
1Piniqegkamni ilakumtaamni, Kiyaghneq tamaakuneng akequsangllaqaatanganeng whangkunnun, ukmangighsaalteki allaaghhiinaat nukeggnii yugusimtallu taghneghamtallu. Pelungightengngwaaghelta qayughllak alikaghput Kiyaghneq.
Paul‑em Quyallgha
2Ilaliiqaghqut ilugpesigun. Kina alngunak anagngalghiimeng pingigataghput, ugpeqillgha naafqumangitaghput, talwa puughneqguusimangitaghput. 3Ungipaatngunghitamsi tamaakuneng avutkennalusi. Sivunghani ungipaatkaqamsi piniqepiggnilusi, enkaam kiyaghtelgusighlleqamsi nalighmeng tuqulgusighlleqamsi. 4Neghyukeghllaglusi ayuqamsi, qukaayugutkepigtamsi. Kayemeghllagaqaghpesinga. Enkaam seghleliilleghllamnni paninang tevughaaqunga quyalleghmeng.
5Kaataqngamta Macedonia‑mun, meghnaalipagningitkaagukut. Seghleliiqaagukut tamangani, yuget aaghtiiraaqaqiinkut, teggellghiiqaagukutlu. 6Iwernga Kiyaghneghem ilutughsaghaqii iilqengngalghiit, enkaam ilutughsaghiinkut tagistelleghmikun Titus whangkunnun. 7Ilutughtekaagukut tagiiqngan Titus, iwernga ilutughllengataghaghtukut ungipaasinkut elpesinun ilutughsaamaniluni. Ungipaatiinkut elpesinun esghaghyupiggnilunga, qivghuknilunga seghleliighqelleghpesineng, kayusighyupiggnilungallu. Tawaten pilleghpesi wanlegi quyasteghllagaanga.
8Qaywa latamkun qivghusteghngaamsi, avuteghqutkengngunghitanka latanka. Sivukun avuteghqesaghtunga qayughllak latama qivghustaghtekangisi. 9Quyangunghitunga latamnun qivghusimanilusi. Iwernga quyaghllaguunga qivghulleghpesi allangughtestekaqegkangi kiyaghtaallesi. Qivghulleghsi Kiyaghneghem atuqegkaqaa elpesinun, enkaam naten alngunak whangkuta aqnightellghitamsi. 10Kiyaghneghem atuqaqaa qivghulleq yugnun avuteghqelluki seghleghqellghitneng, yugulillengesqelluki. Kitum alngunak avuteghqutkennaanghitaa yugulilleq. Iwernga qivghulleq nunameng pi tuqustiiquq. 11Esghaqaghtegguqun sangutanga Kiyaghneghem apeghiiqaa qivghulleghpesigun. Qivghulleghpesi efqughutesugllagiisi Kiyaghneghmun. Elngaatall ipapighqennaqutkegkaayaghtusi anaggutellghinnilusi. Ugumiyagutkaqaghsi anaggutelleq, alingruuqaagusillu. Esghaghyupigtekaqaghpesinga, pinitun pikaagusi, aghyuuqaqaghsillu anaggutkaq. Tawaten pilleghpesigun ipapighqegkaagusi apalliinnilusi.
12Enkaam qaywa tawaten latayaghngaamsi, apalluqngunghitaqa anaggutkaq, nalighmeng tawavek seghletun pikaanun. Itupill latakaqamsi liigikngwaaghesqellusi Kiyaghneghem esghaamanghani tuunꞌngwaaghlusi whangkunnun ayuqelghiisi. 13Tamaaken apalluqluku ilutughtengngaakut.
Ilutughtengnginaghpenaamta, iwernga quyaaghataghaghtukut esghaghluku Titus‑em quyamallgha. Qamagllusi sumeghyalingiitesimaaghsi. 14Qanatkegkaqamsi Titus‑mun efquqnilusi. Elpesinun piiqngami liitkaqii ipangutangi sameng pillghenka elpesineng ayuqelghiit, enkaam kaynguyagutellghitanka qanatkillghenka. Iiwleng ipapighqelluta aleghqughaqamsi. Tawateghpigaq ipanguut qanatkilleghput Titus‑mun. 15Enkaam Titus‑em wanlegi piniqaaghtiisi sumeghtaghaatkenneghminigu qaatkutngalleghsi ellminun. Upughatkaqegkesillu alingellelighlusi, ungellegtellelighlusi. 16Quyaghllaguunga qayughllak neghyukeghllaglusi ayuqamsi samun tamaghhaanun!
Currently Selected:
2 Corinthians 7: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
