2 Corinthians 2

1Taawa umyugagka ataasiighsimaagka alla elpesinun pikuma quyanghitesaghqaafqaafsi pinalusi. 2Qayughllak quyanghitestekumsi kitumngam whanga qaqayugtesleqanga? Alla kitum pinaanghitanga iwerngaqun elpesi quyanghitestekama. 3Tamaaken apalluqluku latakaqamsi qayughllak elpesinun piyunghilnguunga quyanghitesnayukafsinga, elpesi quyanghitesnayukafsinga, elpesi quyastistemni. Ipapighqutkengngwaaqa una, whanga quyanganemni taawa elpesillu qamagllusi quyangaaqusi. 4Latakaagunga elpesinun elngaatall aangluku qivghullelighlunga qamagun ilumkun, qiyamaghma alla quyanghitestefqaafsi pinalusi taawanginaq liigikesqelluku piniqelleghllaka elpesinun.

5Taana yuuk seghleghqelghii tawani, seghleghqenghituq whangamnun. Yeghlegi elpesinun seghleghqengnguuq iwernga nakaan tamaghhaghpesinun. Uniighmighsunghitaqa sameng pillemkun. 6Tawatenginaq aghyuughilleghsi itagnaghtuq. 7Maaten seghevullukungꞌngam kayemiteggu wata iilqennayukan repall iilqayugllagnayukan. 8Maniguututaqa elpesinun liigikestesqelluku ipapestaaq piniqniluku elpesinun. 9Taana apalluqluku latakaqamsi: liisimaknaluku qaatkutngwaaqutsi samun tamaghhaanun. 10Kina seghevunneghpisigu sameng elpesinun pillghaneng whangallu seghevutaqaqa. Sangwaa alngunak seghevusaghqaq seghevusugaqaqa elpesi apalluglusi Christ‑a tawantepiglleghhiistun, 11Tughneghaam aaghqutaqnayukanginkut qayughllak liisimakegkefut sangutanga yataaghqegkaa.

Paul‑em Nulqaviightellgha Troas‑mi

12Kaasalghiinga Troas‑mun ungipaqnaluku Pinilghii Ungipaa Christ‑am, Atanghem pilleghqangestengngwaaghumakanganga. 13Iwernga pengegllakaagunga qayughllak ugpeqaalgutka Titus aviilnguq tamaani. Enkaam unilluki aghulaqunga Macedonia‑mun.

Kayaalqiilleq Christ‑akun

14Iwernga iqamsiqanaghhalek Kiyaghneq! Iiwleng igleghutngwiinkut kayaalqiingalleghqun Christ‑akun. Kiyaghneghem whangkutgun mingitestengngwaa liisimalleni nani alngunak katam neqnilghiim tepengllaasim tepangan mingitellghatun. 15Qayughllak whangkuta tepkegtastun neqnighsaasistun ayuqukut Christ‑am aghqutkegkaatun Kiyaghneghmun. Tepevut mengitnguuq yugulikanunllu iflakanunllu. 16Tamaakunun iflakanun tepkiinkut tuqullghem tuqutikayugem; iwernga yugulikanun tepkaa unguvallengestikayugem. Kinangam qepghaghyaghqaawa tawatelngughmeng qepghaqameng? 17Uglapiglleghhiistun kinkustun ayuqenghitukut salin qepghaghyaghqaanghilngughestun tamaaken qepghaqameng. Pinilghiit ungipat piiqiit ilangistun qepghaqastun ayuqniluki allgeghutusighqat kiyaghtaaghusighqamun. Iwernga whangkuta ataasiighmelluta ipapighqelluta qepghaghaqukut; aapghaqaput ungipat Kiyaghneghem pisqellghatun, kayagtellghatun ungipaghtengulutallu qepghaghtengulutallu Christ‑amun.

Currently Selected:

2 Corinthians 2: ess

Highlight

Copy