2 Corinthians 1
1
1Ukut latat Paul‑meng pinguut, apostle‑nganeng Christ Jesus‑em Kiyaghneghem piyukellghakun, Timothy‑mengllu pinguut ugpeqaalgutemnneng.
Kiyaghneghem yugitnun qerngughutkayugnun yughaghvigani Corinth‑em, tamaghhiitnunllu Kiyaghneghem yugitnun iingunaghhaani Achaia‑m.
2Yeqay Kiyaghneghem Atamta, Atanemtallu Jesus Christ‑am tuunlisi quyastelleghmengllu nekeggmelleghmengllu.
Paul Iqamsiqayulghii Kiyaghneghmun
3Usuqelteggu Kiyaghneq Atanga Atanemta Jesus Christ‑am, nangllegtapiglleghii Ata, Kiyaghneghmeng tagiiquq qamaglluni kayutkaghqaq! 4Kayusighaqiinkut qamaglluta seghleliillemnni, enkaam whangkutallu kayusighyaqlegwaaput tamaakut allaaghhiinaghmeng seghleliilghiit, atuqluku ataasiq taana kayusilleq allgeghtekaghput Kiyaghneghmeng. 5Katam ilatngallemtestun Christ‑am uglaapiglleghhiinun ikfiqellghanun, enkaam Christ‑akun ilatngallequkut Kiyaghneghem kayusilleghllaganun. 6Ikfiqegkumta, kayusilleghpesinunllu yugulilleghpesinunllu pillghuuq; kayusillengegkumta taawa elpesillu kayusillengellequsi enkaam tuunellengellequsi nekeggmellelighlusi suflughsaghqaaluki tamaakut ataasit ikfiqellghet suflughtekaput. 7Enkaam sighimakilleghput elpesinun aghuliituq; liisimakaghput taana katam ilatngalleghpesigun ikfiqellemnnun, elpesillu ilatngaasi kayusilleghmun allgeghtekamnnun.
8Ugpeqaalgutemnni, nallukesunghitamsi seghleliilleghmeng nanghiiqamnneng Asia‑mi. Elngaatall seghleghllaguuq uqigtupigtekaaguq, repall sighimananiqaagukut kiyaghtelleghqamnneng. 9Ipapestaaq tuqunaqniluta piyaghtukut. Iwernga tawaten aneghtukut whangkunneng sighimakefqaamta pisqelluta, taawanginaghhaq Kiyaghneq sighimakesqelluku unguvaghtestikayuk tuqukaneng. 10Elngaatall seghlepestaaghmeng tuqum tevneghaneng yuguliinkut, yugulilleqiinkutlu. Enkaam ellngakun sighimanguukut ellngan yugulilaataghlleqiinkut, 11elpesi kayusiisimaluta yughalleghpesigun. Yughaatkilleghllagsi whangkunneng kiimsillengellequt, enkaam Kiyaghneghem quyasleqiinkut; uglapiglleghhiitlu iglagtughlluteng iqamsiqayugvikelleqaat whangkunneng.
Paul‑em Allangughtekanga Qakiqniqelleni
12Una esgha qukaayugusighput, sumeghtaghallemta ungipaatiinkut kiyaghtaalleghput whani nunami ipapighqengngaaqlu piniqingaaqlu, kiyang elpesinun. Tawaten piiqukut Kiyaghneghem piniqingalghiikun kayusillghakun, nakaan yugem peghqinellghakun. 13Qamaglluteng lataput elpesinun piyaqniitut atightughyaghqaalutengllu liigiksaghqaalutengllu. Sighimakaqamsi liigikngwaaghesqelluku 14sangwaa maaten liigikegkaghpesi nalighneghhiinaa, enkaam Aghneghani Atanghem Jesus‑em elpesi qukaayugutkelleqaghpesikut katam whangkuta qukaayugutkellemtestun elpesi.
15Qayughllak ipapighqutkegkaqaqa qamaglluku tamaana, sivuklunga elpesinun laalighhnalunga pikaayaghtunga, quyastellengnayukafsi malghughqengngaan. 16Laalighfiksukaqamsi aglaatkelluku Macedonia‑mun, uteghniitkellukullu tamaaken, kayutengnalunga elpesineng igleghalleghqamnun Judea‑mun. 17Sumeghpesinii tawaten qakiqniqellemni ataasiighneghisingaa? Sumeghpesinii qakiqniqelqa nunam yugatun ayuqaa, tawaninginaq piyaghqaq, “Aa‑a,” “Nakaa?” 18Ipapestaaq Kiyaghneq ataasiighmetuq, akequsaqa elpesinun “Aangꞌghunghituqlu” “Nakaaghunghituqlu”. 19Kiyaghneghem Ighnegha, Jesus Christ‑a ungipaqegkaghput elpesinun Silas‑lu Timothy‑llu whangallu, “Aangꞌghunghituqlu” “Nakaaghunghituqlu”; iwernga ellngani quunpeng “Aangꞌghuuq”. 20Ellnganguuq “Angelleq” tamaghhiitnun Kiyaghneghem akequsiitnun. Tamaaken apalluqluku whangkuta “Amen‑aaghaqukut” ellngakun usuqnemteggu Kiyaghneq. 21Kiyaghneghem ayepsugighsaghiinkut, maligulluta elpesinun Christ‑akun; Kiyaghneghem ellngan katam aaftiinkut; 22nalluniighiinkut ellminun pinguluta, tuunaaklu Taghneghagni ilumnnun nallangiisaalukek tamaghhaanun akequsaqegkaminun whangukunnun.
23Tuqlughaqa Kiyaghneq liisimakistenguluku qayughllak liisimakegkanga qaamna iluka! Corinth‑esugunghitunga seghleliighqesnayukamsi. 24Igleghunnaqutkengngunghitaghput ugpeqilleghsi; qepghalgusighyugamsi quyamasqellusi, qayughllak aghuliitusi ugpeqilleghpesigun.
Currently Selected:
2 Corinthians 1: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
