2 Corinthians 13
13
Kinguliit Kelengasaallghet
1Una pingayiitkaa laalighhnaqelleghma elpesinun. Akuzitni Igaqegkani igaqngaaq whaten, “Yuuk anaggusimanikatgu, maalghuk nalighmeng pingayut liisimakistet ipapighqesaghqaqaat anaggutellgha.” 2Tuunglighhaani laalighfikaqngamsi kelengasaaqaqamsi tamaakut sivunghani seghleghqelghiit. Ilangitlu kelengasaaqaqanka, taginqigtekuma aghyuughmiglleqniluki seghleghqumanginaqata. Tamaanneghiteghngaaghma kelengasaaghnaqanka. 3Whangamnun ipapighqestesukesi Christ‑a akuziiqutanga whangamkun. Christ‑a kayaanneghituq aghyuughmikumisi, itupill aghtughyaghqaanghituq. 4Qaywa Christ‑a kayaatkaayaghtuq qaquuraghaqngamegteggu, maaten kiyaghtengnguuq Kiyaghneghem aghtughyaghqaanghillghakun. Whangkutallu kayaatukut katam Christ‑am kayaatkaayallghatun. Iwernga elpesinitkumta kayusiilleqamsi Kiyaghneghem aghtughyaghqaanghillghakun.
5Yuvghiightek elpesineng liigikesqelluku ugpeqepiigutsi Jesus Christ‑a. Liigikenghistegguu‑u Jesus Christ‑a kiyaghtengngutanga ilugpesini? Ilugpesininneghitngukan, taawa ugpeqepiillghitaghsi. 6Sunanguq liigikiteggu Kiyaghneghmun itagnaqumaniluta. 7Yughaghaqukut Kiyaghneghmun kayusiitesqellusi anaggutefqaafsi pisqellusi. Iwernga yughaangunghitukut ipapighqennaluku elpesinun Kiyaghneghmun itagnaqumaniluta. Itupill whangkuta yughaatkaqamsi elqughutngaan pisqellusi, qaywa yuget pighngiinkut itagnaqellghinniluta Kiyaghneghmun. 8Kipullginaaghpagningitaghput ipapilleq; itupill ilapgayaghqaqaghput. 9Quyaaqukut kayaannemta, iknaqnguneghpesini. Enkaam yughaatkaqamsi veghunneqigtesqellusi kiyaghtesqesullghanun Kiyaghneghem. 10Tamaaken apalluqluku lataaqamsi elpesinun pivagilgama qayughllak nanqigsunghilkemsi aghyuughmigyaghqaalusi. Atanghem qelqaqaanga nanqigtestengulunga elpesinun. Enkaam nanqigsugamsi kayusiinnalusi ugpeqilleghtughtesqellusi, nakaan kayaalisqellusi.
11Ugpeqaalgutemni, tawatenꞌngam piinga. Quyangatek. Veghutek kiyaghtesqesullghanun Kiyaghneghem. Pisqesullemtun pitek. Kiyaghtek itagnaqullusi, nekeggmetullusi. Enkaam Kiyaghneq tenemenga piniqellghemllu nekeggmellghemllu elpesinilli.
12Quyakututaqitek agleghnalghiikun naalleghqun.
13Qamaglluteng ugpeqaalgutet piniqiisinguq. 14Nangllegtallgha Atanghem Jesus Christ‑am, piniqellghallu Kiyaghneghem, qerngaghmetellghallu Agleghnalghiim Taghnegham elpesinilli.
Currently Selected:
2 Corinthians 13: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
