Galatians 1

1Ukut latat Paul‑meng pinguut, apostle‑meng. Yuget nakmikellghitaatnga apostle‑ngulunga, talwa kayagtellghitaatnga. Apostle‑nguughtekaagunga Jesus Christ‑akunllu Kiyaghneghqunllu Atakun, unguvaghtestikaq ellnganeng tuqulleghmeng. 2Lataaqamsi ugpeqani Galatia‑melngughni. Qamaglluteng ugpeqaalgutma maanlenguut piniqiisinguk whangamnun maligulluteng.

3Kiyaghneghem Atamta, Atanemtallu Jesus Christ‑am nanglleklisillu nekeggmellelguslisilillu.

4Christ‑a ellmineng aghqutkegkaaguq seghleghqellemnnun, itemunnaluta whaken seghleghmeng kiyaghtaalleghmeng. Kiyaghnemta Atam piyukellghatun pikaaguq. 5Enkaam Kiyaghneq usuqellengli quunperugllak kenlengunaan. Amen.

Ataasiinaaguq Pinilghii Ungipaq

6Saghiighayagutamsi aawallu pegtaghtaghsi tuqlughistezi nangllegtallghakun Christ‑am, tuguklighiisi allaneng “pinilghiineng ungipaneng”. 7Avaqraggiituq alla “pinilghiineng ungipaneng”. Iwernga ilangita yuget teggellghiightestaqiisi allangughhnaqutkelleghmegteggun Pinilghiit Ungipat Christ‑ameng ayuqelghiit. 8Qaywa yaqulek qilagmeng, nalighmeng nalimta whangkuta ungipaqegkumteki “pinilghiit ungipat” allanguluki ungipaqegkamnneng elpesinun, taana ungipaqilghi Kiyaghneghem nanqiglligu aghyuulleghmun. 9Sivunghani ungipaatkaqamsi, whaa ungipaannaqlaataghamsi, kitum alngunak ungipaqegkumiki “pinilghiit ungipat” allanguluki ugpeqegkaghpesineng, Kiyaghneghem nanqiglligu aghyuulleghmun.

10Tawaten akuzillemkun efqughhnaqutkengngunghitanka yuget. Nakaa, Kiyaghneghhiinaaguq efqughsukaqa. Paninang yugnun efqughtinaqutkengngukuma, Christ‑amun qepghaghtengunaanghitunga.

Naten Paul‑em Apostle‑ngughtellgha

11Ugpeqaalgutemni, una liisimakesugaqa elpesinun, Pinilghiit Ungipat ungipaqaqegkenka yugneng pingunghitut. 12Nagaquqaqenghitanka yugneng, talwa kitum alngunak apeghtuutkumangitii whangamnun. Jesus Christ‑am aliightekaqii whangamnun.

13Nagaquqaqaghsi natesaatka maligtengnguluki Jews‑et kiyaghtaallghit. Elngaatall nangllegyullngunanga amyuutkegkaqanka ugpeqat, taakunginaghhaagneng aviighutesnaqutkegkaqanka. 14Ingyaqaqanka allulluki angtaalgutenka atuqnguluki Jews‑et kiyaghtaallghit, qayughllak sagiqneghllaguyaghtunga sivunemta nangaghneghitnun.

15Iwernga allgeghumangillunga Kiyaghneghem nakmikegkaqaanga, nangllegtalleghmikun tuqluqaqaanga. 16Enkaam whangamnun aliightekaqaa kinangutanga Ighneni ungipaqesqelluku Gentile‑enun. Kinkunun alngunak akuzitkesaghtullghitaqa taana, 17talwa Jerusalem‑etellghitunga akuzitkennaluku apostle‑ngughtekanun sivumni. Yeghlegi Arabia‑mun piinga. Tagtalmi uteghnightunga Damascus‑mun. 18Tamaani pingayut ayumiqullghet atughluki Jerusalem‑etunga aleghqughnaluku Cephas (Peter). Ellnganitunga akimigaq unuk. 19Kina alla apostle‑a aleghqunghitaqa iwerngaqun James, Atanghem anglegutanga.

20Aapqanka ukut ipanguut, Kiyaghneghem liisimakaanga iqlengiqngunghitunga.

21Taagken igleghaanga Syria‑munllu Cilicia‑munllu. 22Tamaani Judea‑mi ugpeqat Christ‑akun salin nalliigalkangatnga gginasaghqughlunga. 23Taawanginaq liisimakaat nagaqulleghteng whaten, “Yuuk amyuqetiqestekegkaghput, naafqiinaqutkegkaqlu ugpeqillemnneng Christ‑ameng maaten whaa ungipaqiiquq ugpeqilleghmeng Christ‑akun!” 24Enkaam Kiyaghneq usuqaqaat whanga apalluqlunga.

Currently Selected:

Galatians 1: ess

Highlight

Copy