2 Corinthians 12

Paul‑em Esghaghwaallgha

1Qukaayugsaghqaagunga, aneghneghqusiinghiteghngaan. Paninang ungipaannaqamsi esghaghwaallemneng, Atanghemllu aliighquqaaneng whangamnun. 2Liisimakaqa yuuk Christ‑amelnguq. Qula estamat siipneqluki ayumiqulleghni agani naghughtekani Kiyaghneghem mayuutqaghtekaqaa pingayaanun qilagem. Nallukngwaaghaqa yuuk yugusiminitutanga nalighmeng yugusimineng aanꞌngakaatanga, iwernga Kiyaghneghem liisimakaa. 3Liisimakaqa taana yuuk Kiyaghneghem mayuutqaghtekaqaa Paradise‑mun. Nallukngwaaghaqa yuuk yugusiminitutanga nalighmeng yugusimineng aanꞌngakaatanga, iwernga Kiyaghneghem liisimakaa. 4Tawani nagatkaqii sangwaat apeghyaghqaanghilnguut. Tamaakut iinghutkaagut yugmun akuzitkesaghqaaluteng. 5Qukaayugutkennaqaqa taana yuuk, iwernga qukaayugutkennaqenghitunga whangamneng iwerngaqun kayaalliqusiqegkaghhiinamneng. 6Qukaayugutkesukuma whangamneng, temngingunaanghitunga qayughllak apeghlleqaqa ipapilleq. Iwernga qukaayugutkennanghitunga whangamneng, qayughllak yugnun sumeghtaghaatkesugtunga elqughllunga esghapallghitgunllu nagatellghitgunllu whanga.

7Kiyaghneghem aliightekaqeghngaaki whangamnun uglaapiglleghhiit sangwaat qilagmi, qukaayugtestesunghitaanga. Enkaam Kiyaghneghem qusevegtesqellunga sikughllungestaanga yugusimkun. Taana sikughlluk ungipaghtenguuq Tughneghaghmeng. Taam ikfiqestaanga qusevegngasqellunga. 8Pingayuneng ketwell Ataneghmun yughaghaqunga iqitesqelluku. 9Iwernga piinga, “Kayusilqa naamaaq elpenun suflughtesqelluku taana ikfiqelleq qayughllak aghtughyaghqaanghilqa iknaqelleghpigaagwaquq kayaalliqneghpeni.” Enkaam quyakusiqluku qukaayugtaqunga kayaalliqusimneng whangamnitesqelluku Christ‑am aghtughyaghqaanghillgha. 10Taana apalluqluku quyaaqunga kayaalliqnganemni, seghlequullengnemni, piyaqliinemni, amyuutkellengnemni, allaaghhiinaghmengllu seghleliinemni Christ‑a apalluqluku. Qayughllak kayaalliqnganemni taawa iknaqaqunga.

Paul‑em Sumeghyalitkegkangi Corinth‑eghmiit Ugpeqiit

11Akuzinguunga temngitwhastun, iwernga elpesi tawaten pistaghpesinga. Elpesi pinitun akuzitkesaghqaqsaghaghpesinga ilagpesinun. Qaywa sasiinghiteghngaaghma, tamaakut “aangwaaghet apostle‑et” aangwaaghunghitut whangamneng. 12Elpesinillunga nekeglluwaan uglaapiglleghhiit allaaghhiinaat allaaghlluwhaghtillghet pikaqanka. Tamaakut ipapighqaatnga apostle‑epiigutka. 13Sakaqsingi ugpeqat ilangitnilnguut yughaghviget elpesinun pimangilkemneng? Ataasighhiinaq allanguuq, akilguqumangitamsi. Seghevutaghtengnga anagsimakumsi! 14Laalighfiknaqaqamsi pingayiitkun, iwernga ughleghiighutkestesunghitunga elpesinun. Elpesi sumeghmikaqamsi, nakaan saghyasi. Taghnughhaqelghiistun ayuqamsi. Taghnughhaat aflengakiyaghqaanghitut angayuqameggneng, iwernga angayuqat aflengaksaghqaqiit taghnughhateng. 15Tuunyaghqaaghtamsi sameng tamaghhaaneng whanga pimneng, talwa whangamneng tuunellequnga elpesinun. Piniqataghanemsi, llangaqa elpesi piniqepagigataghpesinga.

16Elpesillu whangallu liisimakaghput ughleghiightesimangitamsi. Iwernga ilagpesi anaggusimaniitnga. Piiqut puughneqguunnilusi iqlengiqellemkun. 17Naten tawaten pistemsi? Sakengegkaazinga elpesineng kayagtaqngamki yuget elpesinun? 18Kayagtekaqaqa Titus elpesinun pisqelluku, ugpeqaalgutfutlu maligutesqaqa. Titus‑em puughtekaqisii? Nakaa, Titus‑lu whangkutung qepghaqaghpung ataasiiguq, ataasikun taghneghakun.

19Sumeghpesinii‑i elpesinun ipapighqennaqutkestegneguu anaggutellghinnilutung? Nakaa! Kiyaghneghem nagaquumanghani, akuziiqukung Christ‑am akuzisqellghatun. Piniqegkamni, sangwaa qamaglluku piiqaghpung iknaqughsaghnaluku ugpelleghsi. 20Sumeghyalitkaqamsi elpesinun kaaskuma esghaqumsi allaknayukamsi whanga sighimakellemneng. Elpesillu whanga esghaqufsinga allaknayukafsinga sighimakelleghpesineng. Sumeghyalitkaqamsi aghivatngunayukafsi, aqinakutngunayukafsi, sakraatutngunayukafsi, ellnginaayugutngunayukafsi, seghlequughutngunayukafsi, yiillgitngunayukafsi, qukaayugutngunayukafsi, suuglliqutngunayukafsi. 21Sumeghyaliiqunga alla takukumsi Kiyaghneghma kayngusaaknayukanganga sivugpesini apalluqluki seghleghqellesi. Enkaam qivghughllagllequnga qayughllak uglalghiini elpesi seghleghqumanginaagusi avuteghqegpenasi. Paninang sumeghtaghaghaqusi sex‑meng pelunginneghilngughmeng, sex‑a seghletun atuqaqaghsi, sex‑ellghetlu anagngalghiit nuqetusigatasi.

Currently Selected:

2 Corinthians 12: ess

Highlight

Copy