2 Corinthians 11

Paul‑llu Apostle‑esighwaaghetlu

1Sighimakamsi nekeggmetutesqellunga akuzikuma temngitwhalghiistun natengiighhaq. Nekeggmetuteqaghtengnga. 2Qungyaghaqunga Kiyaghneghem qungyaqellghatun elpesi, qayughllak tuusimaamsi Christ‑amun. Pelungilngughestun ugiighnaqelghiistun aangꞌghusimaamsi ellnganun, ugikesqelluku ellnginaa. 3Iwernga alingutkaqamsi anguyagem puughhnayukangisi, katam tawaten nemeghyam peghqiniqutkelluku puughtellghatun Eve. Enkaam elpesi piniqnanighwaaghnayukafsigu Christ‑a. 4Ungipaqaqngamteki Pinilghiit Ungipat elpesinun, ugpeqegkaqaghsi Jesus, tuguklighagsillu Agleghnalghiik Taghneghak. Iwernga nagasukestaghluki ayuqegkaqasi ungipaqiyaghtulghiit ilanganeng Jesus‑em. Tuguklighiyugtusillu ilanganeng taghnegham, ugpeqsukaqasillu ilangi pinilghiit ungipat.

5Tamaakut ungipaqistet apostle‑nguniluteng piiqut. Sumeghmeggni aangwaaghuniiqut apostle‑et. Iwernga liisimakanka aangwaaghunghitut whangamneng. 6Akuzillgiteghngaaghma, liisimaghllagtunga. Uglaghngaan liigikestaqamsi liisimallemneng.

7Elpesinun akileghtughsaqumangitunga ungipaqaqngamki Pinilghiit Ungipii Kiyaghneghem. Tawaten pikaagunga qusevegllunga quulvaghnalusi. Seghleghqesingaa‑a tawaten pilunga? 8Ugpeqat ilangitnilnguut yughaghviget akileghtuqaqaatnga elpesinillunga. Wayaqallghuughanka maningitneng kayusiinnalusi. 9Elpesinitaqngama ughleghiightellghitamsi kayusiitesqellunga aklukegkamneng. Ugpeqaalgutet Macedonia‑meng tagitkaqaatnga sameng tamaghhaaneng aklukegkamneng. Enkaam aapfikellghitamsi aklukegkamneng, aapfiknaanghitamsi. 10Kitum alngunak Achaia‑mi aghuliighhnaanghitaa qukaayugtelqa taagken. Tawaten piinga Christ‑am ipapighqellghakun whangamnilngughqun. 11Kayutengllanghitutemneng elpesinun, sumeghpesinii‑i piniqenghinnilusi pitsi whangamnun? Kiyaghneghem liisimakaa piniqilqa elpesinun.

12Taawa ighsakiivikumanginaghnaqamsi manigpesineng. Tawaten piiqunga qukaayuggnaniisqelluki apostle‑esighwaaghet whangkutestun qepghaghnilghiit akileghtuusangunateng. 13Tamaakut yuget apostle‑esighwaaghuut puughtilghiit yugneng iqlengiqelleghmegteggun. Yugnun sumeghtaghaatkestaqut Christ‑amun apostle‑epiikniluteng. 14Taamengwhaqun. Talwa Tughneghaq allangughtaquq ellmineng katam aliighyaghqaaluni kuukgutngalghiitun yaqulegtun. 15Enkaam saghiighaniitut Tughneghaam qepghaghtengi tawaten pikumeng. Yugnun sumeghtaghaatkestaqut elqughutngalghiinguniluteng qepghaghtengi Kiyaghneghem. Iwernga kenlemi Kiyaghneghem aghyuughlleqii elqughutngalghiimeng aghyuulleghmeng anaggutellghitnun.

Paul‑em Ungipaqegkangi Ikfiqelleni

16Alla piimsi, kitum alngunak sumeghtaghaatkenghillinga temngitwhangulunga. Iwernga tawaten sumeghtaghaatkengngukufsinga, tugukliqaghtengnga temngitwhangulunga. Taagken whangallu qukaayugtevleghaghllequnga. 17Qukaayugutkelqa whangamneng Ataneghmeng pingunghituq. Itupill akuzinguunga temngi pilghiistun. 18Uglalghiit ugpeqaanghilngughestun qukaayugtaqut qepghaqameggneng, enkaam whangallu tawaten qukaayugllequnga. 19Sumeghpesini peghqinepiggnilusi piiqusi. Enkaam quyakusiqluku nagataqasi temngitwhalghiit. 20Tuguklighaqasi qelellghit nikimqun elpesi qepghaghtelaaghet ellngitnun. Kagukaqestaqusi, teglegvikestaqusi, ukaliqestaqusillu, talwa gginaghpesigun qasaghtestaqlusi. 21Kaynguyugtunga kayaatepigtukut tawaten pilleghqamnneng elpesinun tamaakustun apostle‑esighwaaghestun.

Kina alngunak qukaayugsaghqaakan, whangallu qukaayugllequnga. Iwernga tawaten pilleghqaq temngitwhanguuq. 22Taakut apostle‑esighwaaghet, Hebrew‑ngwaat? Whangallu Hebrew‑nguunga. Israel‑eghmiingwaat? Whangallu Israel‑eghmiinguunga. Abraham‑em kingunqakii? Whangallu kingunqaanga. 23Christ‑am qepghaghtekakii? Iwernga whanga pinighataghaghtunga qepghaghta ellngitneng. Taawa akuziinga nallekaghnilngughestun. Qepghaghataghaqaagunga ellngitneng, anusiminglaghvigmetaaghaqaagungallu ellngitneng. Kagsagmillengegkaagunga kestekaanghilngughmeng, uglaghngaan tuquvzighaataqaagunga. 24Tallimagyagneng Jews‑et igleghutistengita kagsagmigtestaataghaatnga. (39‑ngwaaqut ataasit kagsagmillghet.) 25Rome‑eghmiit umiilwaaghita pingayuneng anaguleghtestekaqaatnga. Ataasimeng ilangita yuget milughpagaataghaatnga. Pingayuneng angyiighututaqaanga enkaam ataasimeng unulqusiq, aghnelqusiq uughhutkaqaanga kelliini. 26Uglapiglleghhiimi igleghallemni elngaatall yakughniightunga kiiwni, wayaghniighteneng, talwa yulgutemnengllu, Gentile‑enengllu. Yakughniightungallu neghllagni, kilgaani, kelliinillu. Talwa yakughniightunga ugpeqaalgutesighwaaghneng. 27Ughleghiighllakaagunga, piyaqliighaqlunga. Ilangani qavaghpenanga, iyataghngaaqlunga, meqsugngaaqlunga. Awen neqngitaqlunga, azigutiitaqlunga, ghhuutaqlungallu aatkiitem. 28Tamaakut saaghwitgun, aghhutanga tamaghhaan sumeghyalitkegkaqanka ugpeqaalgutet tamaghhitni yughagvigni. 29Ugpeqaalgutem ugpeqillgha kayaanneghani, whangallu kayaataqunga. Ugpeqaalguta kitum seghleghqesneghagu, sakritaqunga.

30Qukaayuggnaqngukuma, qukaayugllequnga kayaalliqusimneng. 31Kiyaghneghem liisimakaanga iqlengiqnaanghitunga. Ellnga Atakaa Atanghem Jesus‑em, usuqsaghqaq quunperugllak. 32Damascus‑mellunga, governor‑em tugustesukaqaanga. (Umiilgem Aretas‑em governor‑ngughtestekaqaa.) Enkaam tugusqellunga pilluwaghteni kelengakistekaqii neghllagem amigllagitni. 33Iwernga ilakumtaaghma ukigtekaqaatnga pasketegnekun mingllutem qergesegkenkun enkaam anakaagunga governor‑meng.

Currently Selected:

2 Corinthians 11: ess

Highlight

Copy