1 Thessalonians 5
5
Apeghiighsaghlusi Atanghem Tagilleghqaanun
1Ugpeqaalgutemnni, elpesinun latatkenniitut qakun tamaakut piyaghqaatangi. 2Qayughllak elpesi liisimakngwaaghaghsi Aghnegha Atanghem tagiyaghqaaguq waakenghillghaghulluni tagillghatun teglegniightem unugmi. 3Yuget whaten pimaluki, “Nekeggmellelguukutlu paqniitukutlu,” naafqellghem kaatqaghlleqii katam aghnam ighniyullghan aqnighqellghatun. Yuget anagnaanghitaat taana naafqelleq. 4Iwernga elpesi ugpeqaalgutemnni, mamlegllagmenneghitusi enkaam Aghneghan Aghneghem waakenghillghaghhnaanghitiisi tegleghniightetun. 5Qamagllusi avaqutaqiisi nighugem, avaqutaqiisillu aghneghem. Unugem pikenghitiinkut nalighmeng mamlegllagem. 6Enkaam qavaafqaamta pilta ilangistun, itupill teghumalta, liisimaluta. 7Tamaakut qavalghiit qavaghaqut unugmi, tamaakut meghelghiit suumaqut unugmi. 8Iwernga Atanghem pikiinkut enkaam liisimaluta kiyaghtelta. Paqniighsaasilleghqamnnun sakimamteggun aatelteggu sighimalleq yugulilleghmun. 9Kiyaghneghem piyukelqenghitaa ikfiqesqelluta sakraalleghmeng, iwernga yugulillengesugiinkut Atanemteggun Jesus Christ‑akun. 10Jesus‑em tuqumatkegkaqiinkut ellminitesqelluta unguvayaghngaamta, tuqukaayaghngaamta tagikumi. 11Tamaakut apalluqluki kayemututaqiteklu kayutkutaqiteklu whaa maaten pilleghpesistun.
Kinguliit Apeghtughallghet Quyakellghetlu
12Ugpeqaalgutemnni, siivakiteki Ataneghmun qepghalghiit akulegpesini. Ellngan nakmikegkaqii igleghutistengulukillu apeghtughistengulukillu elpesinun. 13Siivakeghllagaqitekillu piniqaqitekillu apalluqluki qepghallghit. Nekeggmetullusi pitek.
14Ugpeqaalgutemnni, kelengasaaghteki ighsanitalghiit, ilutughsaghteki alingtalghiit, kayusighteki kayaalnguut, negkeghlluwaan piiqiteki qamaglluki. 15Wataghllak akisaqunaki seghletun pistesi iwernga pinitun piiqiteki ilasi, qamagllukillu yuget.
16Quyamanginaghlusi, 17yughaamanginaghlusi, 18iqamsiqayuglusi tamaghhaani nekegneghmi. Taakunguut Kiyaghneghem piyukellghi elpesinun Christ Jesus‑em piliitkiitnun.
19Qaamtegpenakek Agleghnalghiik Taghneghak, 20sasiinghinnigpenaki uuknaliqillghet. 21Iwernga sangwaa qamaglluku nanghiiqwaaqiteggu enkaam tuguklighaqluki sangwaat pinilghiit, 22iqitngatek tamaghhaaneng seghleghmeng.
23Kiyaghneghem nekeggmellelitistem iighwightengngwaaghlusi pelungighllisi. Avutngitesliki taghneghasi, unguvasisi, yugusisi Ataneghput Jesus Christ‑a tagikan. 24Tagsiqlightegpesi pilleqii tamaakut qayughllak ataasiighmetuq.
25Ugpeqaalgutemnni, yughaatkaqluta.
26Quyakaqiteki ugpeqaalgutesi naaghluki Kiyaghneghem piniqellghakun.
27Qelghamsi Atanghem pilleghqalitellghakun ukut latat atightiisqelluki tamaghhiitnun ugpeqaalgutegpesinun.
28Piniqellgha Atanghem Jesus Christ‑am elpesinilli.
Currently Selected:
1 Thessalonians 5: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
