1 Thessalonians 4

Kiyaghtelleq Efqughnalghii Kiyaghneghmi

1Ugpeqaalgutemnni, alaghrang whaten pinaqamsi, liitivikegkaqaghpekut naten kiyaghtelleghqameng efqughnaghlusi Kiyaghneghmun, esgha tawaten kiyaghlleghhiisi. Aatghakun Atanghem Jesus‑em kayemamsi wataqaaghaq tawaten pisqellusi. 2Liisimakasi sangwaat qelghutkaput elpesinun pisqelluki Ataneghqun Jesus‑kun. 3Whatetuq Kiyaghneghem piyukellgha elpesinun: pelungitesugiisi seghleghqestesunghitiisi atuqutelleghqun. 4Liitesugiisillu tamaghaghpesi nuqetutesqelluki yugusisi pinilleghmun enkaam kiyaghllequsi pelungillusi, efqughnaghlusi Kiyaghneghmunllu yugnunllu. 5Ilapgategpenasi yugusighpesi atuqiyullghanun ugpeqaanghilnguut pillghistun nallukilghiit Kiyaghneghmeng. 6Kitum alngunak sakusiiqefqaan piligu ugpeqaalgutmi inglunga atuqilleghmun. Atanghem aghyuughllaglleqii tawaten pikayuget. Sivunghani kelengasaaghllakaqamsi tamaaken. 7Kiyaghneghem nakmikegkaqiinkut kiyaghtesqelluta pelungilluta, seghleghqellngunaamta. 8Enkaangam kitum alngunak qaatkenghilkumiki tamaakut apeghtuusat, Kiyaghneghuuq qaatkenghilkanga nakaan yuuk. Kiyaghneghuuq tuunistezi Agleghnalghiigneng Taghneghagneng.

9Kitum alngunak latanghisaghngaaghmisi ayuqiisi ungipaannalusi piniqesqelluki ugpeqaalgutesi, qayughllak Kiyaghneghem apeghtuqaqiisi piniqutesqellusi. 10Ipanguuq piniqasi qamaglluki ugpeqaalgutesi tamaghhaani Macedonia‑mi. Iwernga ugpeqaalgutemnni, qelghamsi piniqutaghiisqellusi. 11Pinaqellghaghsi qamaglluku kiyaghtek nekeggmellelighlusi, elpesi sayaghqasi piiqiteki, avelghaghluki ilagpesi sayaghqiit. Qepghaghtek allgeghusaghqaalusi aklukegkaghpesineng katam whangkuta qelellemtestun. 12Tawaten pikufsi neghyuknaanghitasi kinkut alngunak aklukegkaghpesinun, ugpeqaanghilnguutlu siivakelleqiisi.

Atanghem Tagillgha

13Ugpeqaalgutemnni, liisimakesugamsi ugpeqaneng qavalghiineng qivghukefqiita pisqelluki sighimallghilngughestun. 14Ugpeqaghput Jesus tuquluni unguvaqaaguq. Enkaam ugpeqaghput Kiyaghneghem tagilleqii Jesus‑kun tamaakut qavaqat ugpeqiluteng ellnganeng.

15Ungipaatngwaaghamsi Atanghem apeghtuutkaaneng. Ataneq tagikan, whangkuta paninang unguvalghiini ingyaghaghnaanghitaput tamaakut qavaqat. 16Ataneq ellnga katam qilagmeng ukigllequq, yuget nagaqughlleqaat iglagtuqaq qelelleq, menga archangel‑em, qalghightaatangallu Kiyaghneghem. Tamaakut ugpeqiluteng Christ‑ameng tuqulaghaatkat unguvaghyuggaaghllequt. 17Taagken whangkuta unguvalghiini unegtekani, Kiyaghneghem qerngughutesluta, ellngitnun, ghhataghaghtaatesleqiinkut qilagwaaghnun paayghesqelluku Ataneq eslami. Enkaam Ataneghmellequkut quunperugllak. 18Tamaaken apalluqluku ilutughsaasiqaqiteki taakut akuzitet.

Currently Selected:

1 Thessalonians 4: ess

Highlight

Copy