1 Thessalonians 3
3
1Iwernga esghaatusigatutemnneng qavngaghhaaneng pelleghngatutelleghput nuqetutepagningiitaghput. Enkaam agghitkaagukut whanga ellnginaghma Athens‑mennalunga, 2kayagtekaqaghpungllu Timothy elpesinun. Ugpeqaalgutkaghpung, qepgalgusighaqiinkung Kiyaghneghmun. Ungipaqilgusighaqiinkung Pinilghiineng Ungipaneng Christ‑ameng ayuqelghiineng. Kayagtekaqaghpung iknaqughsaghyaghtiisqelluki ugpeqillesi, kayemesqellusillu, 3qayughllak iilqayugtesunghilkemsi ugpeqilleghpesineng seghleliillesi apalluqluki. Iwernga liisimakaghsi ugpeqani whangkuta seghleliighyaghqaagukut. 4Elpesinilluta ungipaatngwaaqaqamsi amyuqetaatkellengelleqniluta; enkaam liisimakaghsi taawa ipa ikfiqutkegkaqaghput amyuqetaatkelleq. 5Tamaaken apalluqluku aghtughyagusama nuqenneghmeng, kayagtekaqaqa Timothy elpesinun liigiknaluku ugpeqilleghsi natetaqutanga. Pengkaqamsi qayughllak Tughneghaam nanghiiqumanayukangisi ugpeqinaniisqellusi, enkaam qepghalleghput temngisugnighsimanayukan.
6Iwernga Timothy‑m uteghnighluni ungipaatiinkung quyanalghiimeng ungipameng ugpeqilleghpesinengllu piniqelleghpesinengllu. Ungipaataqiinkungllu iiwleng neqamikaqnilutung pinitun, esghaghyugaqnilutungllu katam whangkutung esghaghyullemtestegetun elpesi. 7Ugpeqaalgutemnni, seghleliighllagumaluta, ikfiqeghllagumaluta ilutughtukut qayughllak nagneghutngukesi ugpeqilleghsi. 8Whaa aneghtaghaghtukut qayughllak aghuliilkaalghiisi Ataneghqun. 9Enkaam iqamsiqayugvikngwaaghput Kiyaghneq elpesineng. Elpesi apalluqlusi quyaghllaguukut sivungani Kiyaghnemta. 10Taakunginaghhaagneng yughaatkengngwaamsi unugtuumaan, aghneghtuumaan alla esghaghyaghqaalusi, ilayaghqaaluki ugpeqilleghpesi aklukegkiit.
11Kiyaghnemta, Atam ellmineng katam, Atanemtallu Jesus‑em qantaghaqun elpesinun piyaghqaaghteslikut! 12Atanghem, piniqsaliitutestaghaghlisi. Piniqelleghsillu tevughasligu tamaghhaanun yugnun, katam whangkuta piniqellemtestun elpesi. 13Tawaten ayepsugighsaghlleqii ilusi avutngitesqellusillu pelungitesqellusillu sivungani Kiyaghnemta Atam, Atanemta Jesus‑em tagillghani. Tawani kelqelleqii qamagtengngwaaghluki ellmi yuni.
Currently Selected:
1 Thessalonians 3: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
