1 Peter 5

Aflengakelleghqiit Kiyaghneghem Yugi

1Sameng piighsuganka Elder‑et yughaghvigpesinilnguut. Whangallu Elder‑nguunga, esghapakaqegkegkallu Christ‑am ikfiqellgha, ilasaghqaagungallu Christ‑am aangelleghllaganun Kiyaghneghem aliightekagu. 2Enkaam qeleghyugamsi Elder‑eni whaten: Penniighniightengutek Kiyaghneghem penniighitnun; neghyukutkaqii elpesinun aflengakesqelluki. Aflengakiteki qayughllak aflengaksukesi, nakaan qayughllak piyaghqaategpesineng. Kiyaghneghem tawaten pisqesugiisi. Aflengakiteki nakaan akileghtuusangepigesnaghnalusi, iwernga qayughllak kayusighyugukesi. 3Agghitkaqegpenaki aflengakegkasi, iwernga maligsugnaghqitek ellngitnun. 4Enkaam Igleghutistengat Penniighniightet tagikan allgeghullequsi pinighnapiglleghhiimeng qaghpameng qelmeghiisaghqaanghilngughmeng.

5Tawateghpigaq elpesi uyuqlighni malighqutaqlusi siivanlleghnun. Qamagllusi qusevgutullusi qayughllak Akuzitet Igaqegkat pikaagut,

“Kiyaghneghem kipullegmun ayuqii qukaayugneghet,

iwernga kayusighaqii qusevegngalghiit.”

6Enkaangam elpesineng katam qusevegngatek Kiyaghneghmun aghtughyaghqaanghiteghllagmun. Taagken quulvaghlleqiisi nakmikegkamini aghneghmi. 7Qamaglluki sumeghyalitkegkasi pegteki ellnganun, qayughllak aflengakngwiisi.

8Liisimalusi, kelengalusi. Anguyagsi Tughneghaq igleghanguuq uginilghiitun lion‑etun, ivaghiiquq kina naafqennaluku. 9Ayaklighteggu Tughneghaq ayepsugilngughqun ugpeqilleghpesigun, liisimakluki ugpeqaalgutesi nunataghhaanilnguut tawaten ellngitlu ikfiqnguut. 10Iwernga natengiighhaq ikfiqelleghpesi kingunganeng, Kiyaghneghem piniqingaghllagem tamanganun, ellngan katam nallghusaalleqiisi sameng tamaghhaaneng. Ugpeqillesi iknaqughsaghlleqii, ayepsugighsaghlleqii, aghuliilkaaghtesleqii. Kiyaghneghem nakmikegkaqiisi Christ‑akun ilatesqellusi kenlengilngughmun aangelleghllagminun. 11Qamaglluku aghtughyaghqaanghilleq ellngan pikaa quunperugllak! Amen.

Peter‑em Taaqniitangi Akuzitet

12Silas ataasiighmelnguuguq ugpeqaalguta; igaataqaanga takestaaghhaghteggun latamkun elpesinun. Latanka Kiyaghneghem piniqellepiiganeng ayuqut. Ungipaatamsillu kayemamsillu kiyaghtekestiisqellusi piniqellghani.

13Ugpeqaalgutesi Babylon‑melnguut, elpesistun Kiyaghneghem nakmikegkaqii. Ellngitallu, ighneghmallu Mark‑em piniqiisinguq. 14Quyakutaqitek naalleghqun Christ‑am piniqellghakun.

Nekeggmelleq tamaghhaghpesinilli Christ‑am piliitkiitni.

Currently Selected:

1 Peter 5: ess

Highlight

Copy