1 Peter 1
1
1Ukut latat Peter‑meng pinguut apostle‑nganeng Jesus Christ‑am, Kiyaghneghem nakmikegkiitnun yugnun aghulaquutestekat Pontus‑mun, Galatia‑mun, Cappadocia‑mun, Asia‑mun, Bithynia‑munllu. 2Neghighluku Kiyaghneghem Atam nakmikegkaqiisi ellminun yugulusi, Agleghnalghiimllu Taghnegham pelungighsaqaqiisi. Tawaten pikaaguk qaatkutesqellusi Jesus Christ‑amun, ukmangiightesqellusillu aawakun. Kiyaghneghem kayusillghallu nekeggmellghallu wata nulalik elpesinun.
Ugpeqat Sighimallghat
3Usuqelteggu Kiyaghneq, Atanga Atanemta Jesus Christ‑am! Apalluqluku nangllegtalleghllani allgenqigtestiinkut unguvaghtelleghmikun Jesus Christ‑a tuqulleghmeng. Taam sighimallengesteghllagiinkut nalluneqniilngughmeng. 4Enkaam utaqangwaaput piliisaghqaput quyastelleghllaget Kiyaghneghem aflengakegkangi yugminun. Aflengakngwii qilagmi elpesinun enkaam aghunaanghitut, naavnaanghitut, ghevnaanghitutlu. 5Kiyaghneghem aghtughyaghqaanghilleghmikun paqniighsaghlleqiisi ugpeqilleghpesigun. Enkaam kenletghuutelleghmi aliighlleqaa yugulilleq yataghqegkaq elpesinun.
6Taam quyamastiisi, qaywa maaten natengiighhaq allaaghhiinaghmeng seghleliighyaghngaaghpesi. 7Tamaakut seghleliighet nanghiiqusiigut ipapighqennalusi ugpeqillepiilgutsi. Ugpeqilleghsi megnunaghataghalghiinguq gold‑nneng. Gold‑et nanghiiquneghmegteki keneghqun naafqegkayuguut. Paninang kenghet atuqaqiit pelungighnaluki. Tawateghpigaq ugpeqilleghsi nanghiiquyaghqaaguq. Aghuliiskan pelungilluni, allgeghlleqaghsi usuqelleq, nighughqelleq, quulvalleq Kiyaghneghmeng aliightekagu Jesus Christ‑a. 8Esghiigateghngaaghpesigu piniqaghsi, esghanghiteghngaaghpesigu maaten ugpeqaghsi. Enkaam quyaghllaguusi repall aapghwaaghpagningitaghsi angtalanga quyalleghpesi, 9qayughllak allgeghtengngukesi yugulillgha unguvasighpesi. Taananguuq apallaa ugpeqilghiisi Christ‑akun.
10Neghighluku uuknaliqistet liigikngwaaghnaqegkaqaat taana yugulilleq. Uuknaliqutkegkaqaat tunusaq Kiyaghneghem tuunyaghqaa elpesinun. 11Taghneghakek Christ‑am uuknaliqistet ilungitnitkaaguk. Ungipaatekestaqaqii ikfiqelleghqaaneng Christ‑am, quulvallengelleghqaghllaganengllu ikfiqellghan kingunganeng. Enkaam uuknaliqistet liigiknaqutkegkaqaat kinanguyaghqaatanga Christ‑a, qakunllu tamaakut piyaghqaatangi. 12Kiyaghneghem uuknaliqistet liigikestekaqii uuknaliqutkegkiit ellngitnun pingunghinniluki, iwernga elpesinun pinguniluki. Agleghnalghiik Taghneghak kayagtekaaguk qilagmeng. Ellngan aghtughyaghqaanghillghakun ungipaqilghiit Pinilghiineng Ungipaneng ungipaatkaqiisi tamaaken. Talwa yaqulget liigiksupigtekaqiit tamaakut.
Ugpeqat Kiyaghsaghqaagut Pelungilluteng
13Enkaangam umyugasi apeghiighsaghwaaghluki ayuqiteki salleghqamun. Umyugasi whateghlluwaaghuluki, sighimakngwaaghteggullu tunusaq yugulillengelleq Kiyaghneghem tuunyaghqaa Jesus Christ‑a tagikan. 14Qaatkullusi Kiyaghneghmun qayughllak avaqutaqiisi. Enkaam atuqegpenaki seghleghet piyukellesi atuqnguyaqesi. Tawatesaghtusi nallukutegpesineng naten Kiyaghneghem kiyaghtesqesullghan ayuqutanga. 15Kiyaghneq nakmikestezi, pelungitutanganeng elpesillu pelungitek salleghpesigun tamaghhaakun. 16Akuzitni Igaqegkani igaqngaaq, “Pelungitek qayughllak whanga pelungitunga.”
17Yughaneghpesini Kiyaghneghmun Atakniiqaghsi. Nanqigtaqaa atunengwaaq yuuk tamaghhaan salleghtulngatun. Enkaam talluqiteggu nunataamalusi nunami whani. 18Liisimakaghsi sivunghani kiyaghtekaagusi sasiigpenasi katam sivuneghpesistun. Iwernga Kiyaghneghem itemutkaqiisi taagken sasiinghilngughmeng kiyaghtaalleghmeng. Tukfillghitiisi silver‑meng nalighmeng gold‑meng naavegkayugmeng, 19iwernga tukfiqaqiisi megnunapiglleghhiimeng aawaneng Christ‑am. Ellnga penniighaghaghtun ayuquq sallwhaaghhiilnguq. 20Kiyaghneghem nakmikegkaqaa Christ‑a talwa sivungani nuna ulimallghilluku. Maaten kingulighni aghneghni aliightekaqaa elpesi apalluqlusi. 21Christ‑akun ugpeqaghsi Kiyaghneq. Ellngan unguvaghtekaqaa Christ‑a tuqulleghmeng, quulvaghllakaqaallu. Tamaaken apalluqluku ugpeqilleghsi, sighimalleghsi Kiyaghneghmun ayuquq.
22Qaatkutelleghqun ipapighqelleghmun pelungightekaqasi unguvasisi, enkaam piniqepiigasi ugpeqaalgutesi. Piniqutekestaghtek ilugpesineng qamaken. 23Allgenqigtekaagusi. Unguvalleghraghaghsi tuqukayugmeng pingunghituq, iwernga tuqungigalngughmeng pinguuq. Allgenqigtekaagusi Kiyaghneghem akuzitangitgun, unguvalghiit, kenlengilnguut. 24Akuzitni Igaqegkani igaqngaaq,
“Qamaglluteng yuget vegaaghestun ayuqut,
pinighnallghillu piitesighaghestun ayuqut.
Vegaaghet palighaqut, piitesighaatlu ifkaghaqut,
25iwernga akuzitangi Kiyaghneghem quunpekaghqaagut.”
Taakusta akuzitet Pinilghiit Ungipat ungipaqegkangit elpesinun.
Currently Selected:
1 Peter 1: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
