1 John 4

Nanghiiquteki Taghneghat

1Piniqegkamni, ugpeqegpenaki qamaglluki taghneghat. Yeghlegi liigiknaqaqiteki Kiyaghneghmeng pingutangi, qayughllak uglapiglleghhiit uuknaliqistesighwaaghet mingisimaat nunami. 2Esgha whaten liisimaksaghqagsi Kiyaghneghmun Taghneghaqutkek: tamaghhaghmi taghnegham aapqagu Jesus Christ‑a yuguluni allgeqaaniluku, Kiyaghneghtaaguq. 3Iwernga tamaghhaghmi taghnegham mesiighaaskagu Jesus yuguluni allgeqaanghinniluku Kiyaghneghtaanghituq. Taakuk taghneghak anguyakilghiimeng Christ‑ameng pinguuk nagaquqaghpesineng tagiiyaghqaanilukek. Taawa maaten kaatngwaaghlutek nunamun ayuquk.

4Taghnughhaghni, elpesi Kiyaghneghem pikutanganeng, kayaalqegkaqasi tamaakut qayughllak ilugpesinilnguq aghtughyaghqaanghitaghaghtuq nunamelngughmeng. 5Tamaakut nunam pikii, apeghtuusiit nunameng pinguut, enkaam nunam yugan nagataqiit. 6Iwernga whangkuta Kiyaghneghem pikiinkut, enkaam kitum liisimakilghiim Kiyaghneghmeng nagataqiinkut. Tamaakut ilangita Kiyaghneghem pikenghilkangan nagasigatiinkut. Enkaam tawaten esgha liisimaksaghqagput Taghneghakek ipapighqellghem nalighmeng taghneghakek ipangunghilnguum.

Kiyaghneq Piniqellghuuq

7Piniqegkamni, yeqay piniqututelta qayughllak piniqelleq Kiyaghneghmeng pinguuq. Kina alngunak piniqingalghii taghnughhaqaa Kiyaghneghem, liisimakaallu Kiyaghneq.

8Kitum alngunak piniqinghilnguum nallukaa Kiyaghneq, qayughllak Kiyaghneq piniqellghuuq. 9Kiyaghneghem kayagtekaqaa taananginaghhaq Ighneni nunamun, unguvallengesqelluta ellngakun. Tawaten pilleghmikun Kiyaghneghem kelgutkaqaa piniqelleni whangkunnun. 10Piniqelleq akuzitkegkegka whangkuta piniqelqenghitaghput Kiyaghneghmun. Yeghlegi Kiyaghneghem piniqelqaa whangkunnun kelgutkaa kayagtelleghmikun Ighneni iqitusiiluku seghleghqellemnnun.

11Piniqegkamni, Kiyaghneghem piniqellgha whangkunnun tawateskan whangkutallu piniqutusaghqaagukut. 12Kitum alngunak esghiigatngwaaghaa Kiyaghneq; piniquskumta Kiyaghneq kiyaghtengnguuq ilumnni, piniqellghallu iighwighyaghqaaguq ilumnni. 13Kiyaghneghem tuunegkaqiinkut ellmi katam Taghneghagmineng enkaam liisimakaghput kiyaghtengnguuq whankunni, whangkuta ellngani. 14Esghaqaqaghput Ighnegha. Enkaam ungipaqngwaaghput Kiyaghneghmun kayagtekaqniluku Yugulighistenguluku tamaghhaanun yugnun. 15Kitum alngunak aapqagu Jesus Ighneqniluku Kiyaghneghmun, Kiyaghneq kiyaghtengnguuq ellngani, ellnga Kiyaghneghmi. 16Enkaam whangkuta liisimakaghputlu ugpeqaghputlu Kiyaghneghem piniqillgha whangkunnun.

Kiyaghneq piniqellghuuq, enkaam kina alngunak kiyaghlleghhii piniqelleghmi kiyaghtengnguuq Kiyaghneghmi, Kiyaghneq ellngani. 17Enkaam piniqelleq iighwightekaaguq ilumnni ilutusqelluta Nanqigtillghem Aghneghani. Tawatetukut qayughllak Christ‑atun ayuqelghiikut nunami whani. 18Piniqelleghmi alingelleq aviituq qayughllak iighwiqam piniqellghem ighlleqayuwaa alingelleq. Enkaangam piniqelleq iighwiimangituq tamaakuni paninang alingegkayugni, qayughllak alingellelguuq aghyuulleq.

19Piniqiiqukut qayughllak Kiyaghneghem sivukluni piniqegkaqiinkut. 20Kina pikumi, “Piniqaqa Kiyaghneq,” naqam ugumikluku ugpeqaalgutni, iqlengiqestenguuq. Qayughllak kitum alngunak piniqenghilkumigu ugpeqaalgutni esghaqayuni, piniqnaanghitaa Kiyaghneq esghiigalkenni. 21Una qelghusaqaa Christ‑am whangkunnun, kitum piniqegkumigu Kiyaghneq, piniqsaghqaqaa ugpeqaalgutnillu.

Currently Selected:

1 John 4: ess

Highlight

Compare

Copy