1 John 5
5
Ugpeqilleq Ighneghaneng Kiyaghneghem
1Kitum alngunak ugpeqngukumigu Jesus, Christ‑angutanga, avaqutaqaa Kiyaghneghem, kitum alngunak piniqegkumigu Ata piniqsaghqaqii avaqutii. 2Whaten liisimaksaghqaqaghput piniqilleghput Kiyaghneghem avaqutiitnun: piniqellemteggun Kiyaghneq, qaatkellemteggunllu qelghusii. 3Una piniqellghuuq Kiyaghneghmun: qaatkutelleghput qelghusaanun. Qelghusii piyaqnaghllagunghitut, 4qayughllak tamaghhaghmi avaqutaliitkaan Kiyaghneghem kayaalqegkaqaa nuna. Whaten esgha kayaalqesaghqaghput nuna, ugpeqillemteggun. 5Kinangaawa kayaalqiista nunameng? Kitum alngunak ugpeqegkumigu Jesus Ighneqniluku Kiyaghneghmun, taanata kayaalqiista.
Pingayut Aapghistet
6Jesus Christ‑anguuq tagikaq. Tagikaaguq meghqunllu aawhkunllu. Tagimangituq meghhiinaghqun iwernga meghqunllu aawhkunllu tagikaaguq. 7Taghnegham aapghaa taana ipanguniluku qayughllak Taghneghak ipapighqellghulghiik. 8Taawa pingayuguut aapghistet, Taghneghak, meq, aakwh; taakut qamaglluteng itagnaqulluteng ayuqut. 9Ugpeqngukumteki yuget aapqiit whangkunnun, ipapestaaq ugpeqataghaghyaghqaqaput Kiyaghneghem aapqii. Kiyaghneghem apellgha Ighneghmun ipanguuq. 10Enkaam kitum alngunak ugpeqegkumigu Ighnegha Kiyaghneghem qama ilunganituq Kiyaghneghem aapqaa. Iwernga kitum alngunak ugpeqenghilkumigu Kiyaghneq iqlengiqestengllaghlleqaa, qayughllak Kiyaghneghem aapqaa Ighneghmineng ugpeqenghilkanga. 11Una Kiyaghneghem aapqaqaa, Kiyaghneghemnguq tuunegkaqiinkut kenlengilngughmeng unguvalleghmeng, taana unguvalleq Ighneghanituq. 12Kitum alngunak tugukliqumigu Ighneq, unguvallelguuq; kitum alngunak tugukliimangilkumigu Ighnegha Kiyaghneghem unguvallengellghituq.
Kenlengilnguq Unguvalleq
13Latasiqanka tamaakut elpesinun ugpeqilghiinun aatghaneng Ighneghan Kiyaghneghem, elpesinun liisimakesqelluku kenlengilnguq unguvalleghsi. 14Nalluneqsukigataghput Kiyaghneq; liisimakaghput nagataqiinkut aapnemteggu sameng alngunak piyukellghakun ayuqelghiimeng. 15Liisimakegkumteggu nagatellgha sameng alngunak aaptellemnneng, liisimakaghput allgeghutaqukut tungsiqamnneng ellnganeng.
16Kitum esghaqumigu ugpeqaalgutni seghleghqelghii tuqumun ayuqenghilngughmeng yughaatkelligu enkaam Kiyaghneghem tuunligu unguvalleghmeng. Akuzitkengngwaanka yuget seghleghqellghita tuqumun piyaghqaqenghilkangitneng. Seghleghqellelguuq tuqumun ayuqelghiimun. Iwernga yughaatkesqengngunghitaqa tawaten seghleghqelghii. 17Qamaglluni seghletun pilleq seghleghqellghuuq. Iwernga seghleghqellelguuq tuqumun ayuqenghilngughmeng.
18Liisimakaghput kina alngunak Kiyaghneghem avaqutaa seghleghqumanginaghnaanghituq, qayughllak Ighneghan Kiyaghneghem aflengakngukanga enkaam Tughneghaam seghletun pinaanghitaa.
19Liisimakukut Kiyaghneghem pikiinkut qaywa Tughneghaam igleghutngughngaagu qamaglluku nuna.
20Liisimakaghput Ighneghan Kiyaghneghem tagiluni liigikestekaqiinkut liisimakesqelluku Kiyaghnepik. Kiyaghnepigmetukut Ighneghanitutemnneng Jesus Christ‑ami. Taanata Kiyaghnepiklu kenlengilnguqlu unguvalleq.
21Taghnughhaghhaghni, iqitngalusi kiyaghnesighwaaghneng!
Currently Selected:
1 John 5: ess
Highlight
Share
Compare
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.
