1 Corinthians 9

Paul Ellmineng Usputaqelghii

1Itemngaanga, piyukellemtun piyaghqaagunga. Apostle‑nguunga esghaatkaq Jesus‑meng Atanemnneng. Qepghaatellemkun ellnga ugpeqaagusi elpesi. 2Talwa ilangita apostle‑epigunghinnighngaatnga elpesi liisimakaghpesinga apostle‑epiiguunga Ataneghqun, qayughllak kiyaghtaalleghpesi Christ‑amun kelguskanga. 3Taakusta aapghaqegkenka seghleqistemnun.

4Barnabas‑lu whangkutung tungsighnaanghistuung neghyaghqamengllu meghyaghqamengllu elpesineng apeghtuqamtegneng? 5Navek pinemtung kelqepagningitestegnekii ugpeqat nuliipung ilangistun apostle‑et, Atanghem anglegutangistunllu, Peter‑etunllu? 6Barnabas‑lu whangkutuung ellnginaghhaamtung qepghaasimanginaghyaghqaqestegneguu neqekaghqaghpung? 7Pilluwaghtem tukfighyaghqaqenghitii saghyani pilluwaghtengilluni. Tawateghpigaq grapes‑meng piitesighaghtem neghegkayugii ilangi piitestekani. Penniighniightemllu penniighmi mamaan ilanga pikayugaa.

8Taakut usputat yugem apeghtuusaqii, iwernga Kiyaghneghem Liilightusaanillu apeghtuusat tawatetut. 9Igaqegkaaguq Liilightuusani, Kiyaghneghem tuunegkaakun Moses‑mun: “Sugrugiitalighpenan ox‑a wheat‑et tutmaghtesneghpesiki qantiit sigiqesqelluki.” Kiyaghneghem sumeghmikenghitaguu ox‑a? 10Sangami Kiyaghneq tawaten pii? Ox‑nginaghhaaq suumqaguu? Nakaa, whangkutallu suumqaqiinkut. Ipapestaaq whangkunnunllu igaqegkaaguq, qayughllak piitesighaghvigmeng yataaghqistenunllu saghnastenunllu neghyukegkayugaaput nengighqaput. 11Kiyaghneghem akuzitangi piisaghqastun ayuqut. Whangkutung piitesighaghvikegkaqamsi, enkaam taghneghasi quyastekaagut.

Tungsipaglleqestuung tungsighvikegkumsi aklukegkamtegneng? 12Apeghtughistem ilangi elpesineng allgeghutngukata aklukegkameggneng, whangkutung wataqaaghaq piyaghqaghpigaayaghtukung. Yeghlegi qepghaghyukaagukung maningeregaghnalutung aklukegkamtegneng allgeghunnalutung. Ilangani manipagitaqukung. Talwa tamaani aapsugigatamsi akileghtiisqellutung. Unata apalluqa, kitumun alngunak whaten pisunghitukung, “Paul ungipaqiiquq Pinilghiineng Ungipaneng akileghtuusangepigesnaghnaluni.” 13Liisimakasi Temple‑em qepghaghtengi neghegkayuget neqmeng Temple‑mun tuunegkameng. Aghqefigemllu qepghaghtengi nengiqayuguut aghqutkaghqameng. 14Tawatetuq Atanghem qelghusaa: Ungipaghtetlu Pinilghiineng Ungipaneng aklukegkateng allgeghsaghqaqiit tamaakuneng ugpeqikaneng Pinilghiineng Ungipaneng.

15Elpesineng sameng alngunak allgeghusigatunga pikaghqaqsaqemneng. Sumeghtaghaatkegpenanga sameng alngunak tungsighnilunga maaten. Quyaaqunga akileghtiisqigalnguunga elpesinun ungipaqinemni Pinilghiineng Ungipaneng. Ungipaqinaqnguunga akileghtuusiiteghngaaghma talwa paneghyaghngaaghma. Enkaam kitum alngunak pinaanghitaanga, “Paul ungipaqiiquq Pinilghiineng Ungipaneng akileghtuusangepigesnaghnaluni.” 16Iwernga aangaayugusighqiitunga ungipaqinemni Pinilghiineng Ungipaneng, qayughllak Kiyaghneghem qelqaqaanga ungipaqisqellunga. Seghleghwaaghunayaghtunga qaatkenghisaqumkun Kiyaghneq. 17Nakmikegkaqsaqumkun una qepghaqaq whangamneng akileghtuusaghqalgunilunga pinayaghtunga, iwernga Kiyaghneghem nakmikegkaqutanganeng piyaghqaqaqa akileghtuusiiteghngaaghma. Alla naten pilleghqiitunga. 18Sangaawa akileghtuusaqa? Akileghtuusaqaqa una, quyapigtaqunga akileghtuusangunanga ungipaqinemni Pinilghiineng Ungipaneng, qaywa akileghtughyaghqaqsaghngaaghpesinga.

19Qepghaghtelaaghunghisaghngaaghma, whangamneng katam qepghaghtelaaghughtekaagunga kitumun alngunak, yugmun uglalghiimun ugpeqesqelluku Christ‑a. 20Jews‑eninnemni kiyaghtaqunga ellngistun, ugpeqesqelluku Christ‑a. Kiyaghhnemni Gentile‑eni Liilightuusatgun kiyaghtaaghni, ellngistun kiyaghtaqunga liisimakeghngaamkun qaatkutellemkun Liilightuusatgun yugulillengyaghqaanghiteghngaaghma, ugpeqesqelluku Christ‑a. 21Gentile‑eninnemni nallukilghiini Liilightuusaneng, ellngistun kiyaghtaqunga nallukelghiistun Liilightuusat, ugpeqesqelluku Christ‑a. Qaatkengngunghinniluki pingunghitanka Kiyaghneghem Liilightuusii, iwernga qaatkengngwaanka Christ‑am Liilightuusii. 22Kayaalngughni kiyaghhnemni ellngistun lliighaqunga, ugpeqesqelluku Christ‑a. Enkaangam kinkustun alngunak kiyaghtaqunga natesaghngaata, naten alngunak yugulillengesqelluki. 23Tawaten piiqunga nagaqiisqeqeghlluki Pinilghiineng Ungipaneng, qayughllak quyastellengaqelghiingallu ugpeqenghatgu Christ‑a.

24Qamaglluteng ketanqustet sivuliiyukayuguut, iwernga ataasighhaq kayaalqiikayuguuq. Kiyaghtaalleghpesini Christ‑amun, ketanqustestun kayaalqiinaqaqitek. 25Ketanqustet ulapaqut yugusiteng iknaqughhnaluki qayughllak qaghpangyugaqelghiit avayameng ququngalegmeng. Tamaakut palighyaghqaagut. Iwernga qaghpa ugpeqat allgeghsaghqaat quunpekaghqaaguq. 26Ketanqustestun taklaghruketun ketanqwaaqunga kaannalunga kenlemun. Nalighmeng tenglugtestun, tenglugpagaataghaqunga kayaalqiinalunga. 27Ungipaqiiqunga naten kiyaghtelleghqameng Christ‑amun. Whangallu kiyaghtengnguunga ellnganun enkaam yugusimnun qaatkestaqunga, luuraq pinghilkuma Kiyaghneghem iqinnayukanganga ellmineng.

Currently Selected:

1 Corinthians 9: ess

Highlight

Copy