1 Corinthians 8

Aapqugaallghet Aghqutkegkaneng Neqneng

1Kiimsighyuganka aapqughaallesi neqneng aghqutkegkaneng kiyaghnengllaqanun. Ipanguuq whaten pilleghsi, “Liisimallelguukut qamaglluta.” Tawatelnguq liisimalleq aangaayugtestikayuguuq, iwernga piniqellghem iknaqughtengngwaa ugpelleghput. 2Yuuk pillguyugneq, esghaghhuta taana paninang liisaghqaghtuqaq. 3Iwernga Kiyaghneghem piniqisteni whaten piyaghqaqii, “Whanga pikanka.”

4Enkaam neghelleqestaa aghqutkegkameng kiyaghnengllaqanun? Liisimakaput kiyaghnengllaqat kiyaghneghunghitut. Ataasighhaaguq Kiyaghneq, alla kiyaghneghituq. 5Ilangita yuget ugpeqaqaat kiyaghneghtuniluku, ataneghtuniluku qilaklu nunallu. 6Iwernga whangkuta liisimakaghput ataasighhaaguq Kiyaghneq, ellnga Atanghuuq. Sangwaa qamaglluni ellnganeng pinguuq, kiyaghtengnguukut ellnganun. Liisimakaghputlu ataasighhaaguq Ataneq, Jesus Christ‑anguuq. Ellngakun sangwaa qamaglluni ulimakaaguq, unguvanguukutlu ellngakun.

7Ilangita ugpeqat nallukiit kiyaghnengllaqat kiyaghnepigunghitulangi. Tamaaken apalluqluku ugpeqaqiit neqet aghqutkaqniluki kiyaghnepignun. Enkaam neneghmeggni aghqutkegkameng sumeghtaghaghaqut, “Seghleghqunga.” 8Iwernga neqa pitngunghituq. Kiyaghneghem usuqataghaghnaanghitiisi neghelleghpesigun neqmeng. Aghqutkegkameng neghenghilkumta sangwaa alngunak iflanaanghitaghput Kiyaghneghmeng ayuqelghii. Talwa negheghngaamta allgeghunnanghitukut ellnganeng.

9Ugpeqaghllagni elpesi, piyukelleghpesistun piyaghqaalghiisi, liigikngategpesineng taana ipapighqelleq apeghtuusaqegkaqa. Iwernga kelengalusi kayaalnguut ugpellghit ayuqniighqegpenaki ellngita sumeghtaghallghitni anaggutngalghiimeng. 10Naliita esghaqumiten neghumaluten kiyaghnengllaqat temple‑ngitni, ellngallu neghyugyaaghtuq sumeghtaghalleghmini anaggutngayaghngaan. 11Enkaam liisimalleghpek seghleghqestesaaghaa kayaalnguq ugpellgha iflasluku, ugpeqaalgutkan Christ‑am tuqutkegkaa. 12Enkaangam ayuqniighqegkufsiki sumeghtaghallghitni anaggutngalghiimeng, seghleghqellequsi ellngitnunllu Christ‑amunllu. 13Enkaam neghellemkun aghqutqegkameng seghleghqesnayukamkun ugpeqaalgutka, allamengllu neghnaanghitunga sameng tamaaken.

Currently Selected:

1 Corinthians 8: ess

Highlight

Copy