1 Corinthians 10

Jews‑et Usputaqluki Kelengasaatet

1Ugpeqaalgutemni, sumeghtaghaatkesqesuganka Jews‑et, maligsaaghikat Moses‑meng. Egypt‑meng aghulaqaqngameng qamaglluteng maligtekaqaat qilawaaq, maghyaghqughilghii tuumkaghqiitgun. Kaasata Kavilngughmun Kelliimun, Kiyaghneghem pelleghtekaqegkanga meq aghviisqelluki yaywaaseng. 2Qamaglluteng paaptaayekaalghiit qilawaaghqunllu Kavilngughqunllu Kelliikun maligsaaghtenguluteng Moses‑mun. 3Qamaglluteng neghegkaagut manna‑meng, 4meghegkaagut ataasimeng taagken meghmeng Kiyaghneghem Taghneghagkenka tuunegkaaneng. Meghegkaqaat meq maaqegkaq uyghagmeng. Taam uyghagem maligsaaqaqegkangi Kiyaghneghem Taghneghagkenkun. Uyghak taana Christ‑anguuq. 5Tawaten Kiyaghneghem aflengakegkaqeghngiisteng, paninang allulluteng efqughsimangilkangat ellnga. Enkaam tumangani Kiyaghneghem tuqustaqluki yugusighqwaaghit mingitkaalghiit kilgaani.

6Tamaana qamaglluni pillghat whangkunnun usputaaguq, kelengasaaghiinkut ellngistun piyukefqaan seghleq pisqelluku. 7Manigughtengughtegpenasi kiyaghnengllaqanun ilangistun. Akuzitni Igaqegkani igaqegkaaguq, “Yugetlu aghnatlu neghaqut, meghaqut taagken aghulaaqut.” Tawaten maniguutkaagut gold‑meng ulimaaghmun kaawaghaghmun. 8Seghleghqefqaamta sex‑kun ilangistun. Allgeghnegha seghleghqellghita 23,000 yuuk tuqulaghaatkaaguq ataasimi aghneghmi. 9Nanghiiqunaqefqaamteggu Atanghem nuqenneghtullgha pilteggu, ilangistun. Nemeghyat tuququqaqiit ilangi sivuneput qayughllak nanghiiqukaqegkangat Ataneq. 10Akuzilgaghpenasi ilangistun. Yaqulgem tuqustikayugem tuququqaqii ilangi sivuneput qayughllak akuzilgaatkaqegkangat Kiyaghneq.

11Qamaglluki tamaakut sivunemta atuqegkiit, usputaghqaakaagut whangkunnun. Igaqegkaagut kelengasaatnguluteng whangkunnun kiyaghlleghhiinun kingulighni aghneghni, ellngistun pifqaamta pisqelluta. 12Enkaam kina alngunak sumeghmini pikumi ugpelleni aghuliinniluku, kelengali luuraq seghleghqesaaghtuq. 13Qamaglluteng nanghiiqullesi allakaayagunghitut yugnun. Iwernga Kiyaghneq atasiighmetuq, nanghiiqulleghmun qaasghutesaghqaqenghitii iknaqellesi, iknaqellelitaqnaaghiisi nuqetusighqameng. Enkaam iqitaqellequsi taagken nanghiiqulleghmeng.

Piliitestekaakufsi Christ‑amun Tughneghaat Maliggnaanghitasi

14Piniqegkamni, maniguutegpenasi kiyaghnengllaqanun. 15Aleghqughamsi sumeghnelgulusi, sumeghtaghaatkennakesi sameng pilqa. 16Iqamsiqayagunnemteggu qayuusimelnguq wine‑a Atanghem Neqenghaghqellghani, nengighaqukut Christ‑am aawaneng. Iiggemnneng aavgughluku neqekrangllaq nenemteggu, nengighaqukut Christ‑am yugusiineng. 17Neqekrangllaq aavguqaaghngaaghmi ataasiiguq. Uglaghllagyaghngaamta, ataasimeng taagken neghaqukut. Enkaam kelgutaqaa nalighnequghniluta ataasimun yugusimun.

18Sumeghtaghaatkaghtekiqun Israel‑eghmiit; neneghmeggni aghqutkegkameng, ilataqut maniguullghiinun Kiyaghneghmun aghqefigegni. 19Sumeghpesinii kiyaghnengllaqat kiyaghnepiwaat? Neqetlu aghqutkegkat kiyaghnengllaqanun, maniguusipiwaaqaat? 20Nakaa! Nallukilghiit Kiyaghneghmeng aghqerraaghaqut tughneghaghnun, nakan Kiyaghneghmun. Ilatngastesunghitamsi tughneghaghnun. 21Christ‑amun piliitestekaakufsi tughneghaat maliggnaanghitasi. Tamaaken apalluqluku Atanghem qayuusiineng meghegkufsi, tughneghaatlu qayuusiitneng meghnaanghitusi. Tawateghpigaq Atanghem Neqenghaghqellghani neghegkayugukufsi neqekrangllameng Atanghem tipelegkeni, tughneghaatlu tipelngitni neghnaanghitusi neqmeng. 22Whangkuta Christ‑am piliitkiitni tughneghaat maliggnaqegkumteki, Kiyaghneq qungyaghtesleqaghput. Neqamikluku ellnga iknaqeghllagtuq whangkunneng.

23Ilasi pikaagut, “Itagnaghtuq sangwaa piyukelqa piyaghngaamkun.” Iwernga whanga piimsi, ilangi sallesi pininghitut. Aa‑a, entaqun, “Itagnaghtuq sangwaa piyukelqa piyaghngaamkun,” iwernga ilangan salleghpesi kayuusiinnaanghitii ugpellesi. 24Kina alngunak ellnginaayugtefqaami piiqli, yeghlegi ilanillu sumeghtaghaatkaqluki.

25Sangwaa alngunak kemekrak tukfiqaghsi estugaghmeng neghaqiteggu sumeghtaghaatkegpenaan aghqutkegkaatanga kiyaghnengllaqanun. 26Qayughllak igaqegkaaguq Akuzitni Igaqegkani, “Nuna, sangwaatlu qamagtengngwaaghluki tawanlenguut Atanghem pikii.”

27Ugpeqaanghilnguum neghyaghtiisqegkangisi piyukufsi pilghaasi. Sangwaa alngunak ketfaghtuqaat neghaqiteggu sumeghtaghaatkegpenaan aghqutkegkaatanga kiyaghnengllaqanun. 28,29Iwernga kitum pikangisi, “Taana aghqutkegkaaguq kiyaghnengllaqanun,” neghegpenaan, ungipaatistegpesi ugpellgha kayaalisnayukafsigu, qayughllak ellngani anaggutngalghiinguuq.

Entaqun sumeghtaghaghnayalghiisi, “Sangamatuq piyukellemtun piyaghqaanghisinga? Sangamatuq kitum ineghqughaghaqanga allatun sumeghtaghaqayugem whangamneng? 30Iqamsiqayugvikegkumkun Kiyaghneq neghyaghqamneng, sanganꞌngam kitum seghlequughlleqanga neghegkuma iqamsiqayugutkegkamneng?”

31Enkaam qamaglluku salleghsi quulvaasiqaqiteggu Kiyaghneghmun, talwa neghellesillu meghellesillu. 32Sagpenasi seghleghqestiyaghqameng Jews‑enun, Gentile‑enun, ugpeqanunllu. 33Efqughhnaqutkaqanka yulgutenka sallemkun alngunak. Whanganginamnun pinilleghqaq pingigataqa, iwernga pinighqelleghqiitnunllu yulgutma piiqunga, uglalghii yugulillengesqelluku.

Currently Selected:

1 Corinthians 10: ess

Highlight

Copy