1 Corinthians 7

Aapqughaallghet Nengughutelleghmeng

1Aaptekaqaghpesinga nengughutelleghmeng latagpesigun. Ukusta kiimsiitenka. Pinightuq yuuk nuliingunani. 2Iwernga yuuk tamaghhaghmi nuliilguyaghqaaguq, aghnaq tamaghhaghmi ugilguyaghqaaguq, qayughllak nanghiiqullengnayukafsi sex‑kun seghleghqelleghmun. 3Yugem efqughsaghqaqaa nuliini. Tawateghpigaq aghnam efqusaghqaqaa ugini atuqutelleghmegni. 4Aghnam ellnginaghmi yugusini pikenghitaa, uginganllu pikaa. Tawateghpigaq yugem ellnginaghmi yugusini pikenghitaa, nulighhanllu pikaa. 5Nengughsimakufsi ighsakutegpenasi. Wetkuqun itagnaqullusi atuqusaghqaafqaafsi qafsinat unuget yughaghataghaghnalusi. Taagken atuqunneqiglleghhaasi nanghiiqullengnayukafsi Tughneghaghmeng qayughllak nuqesaghqaananiqaalghiisi.

6Qelghunghitamsi nulightiisqellusi nalighmeng ugiighesqellusi. Iwernga piyukufsi pilghaasi. 7Whangamtuntuq nulightufqaafsi, aghnanillu ugiifqaafsi. Iwernga allakutukut. Kiyaghneghem nuliilgustekayugii ilangi yuget, ugilgustekayugii ilangi aghnat. Iwernga itagnaghtestekayugii ilangi yuget nuliingunaki, aghnatlu ugingunaki. Kiyaghneghem allakullghii tunusaq tuunegkayuwaa yugnunllu aghnanunllu.

8Unata pikegka nulightuumangilngughnun, ugiighumangilngughnunllu, ugingighanunllu: Pinighnayaghtusi nulightunghisaqufsi whangamtun, aghnanillu ugiinghisaqufsi. 9Iwernga yuuk pinighataghaghnayaghtuq nulightughluni nuqetepagningilnguq aghnaghyulleghmineng. Aghnaqlu pinighataghaghnayaghtuq ugiighluni nuqetepagnengilnguq yugyulleghmineng. Pinighataghaghnayaghtusi nengughllusi nanghiiqullengelleghqaghpesineng seghleghqelleghmun sex‑kun.

10Ukut akuzitet whangamneng pingunghitut, qelghusaagut Ataneghmeng nengughtekanun. Aghnaq iqisaghqaanghituq ugimineng. 11Iwernga iqiskumi, allaneng ugiighyaghqaanghituq nalighmeng ugiminun lliinqiglli. Yugemllu iqitesaghqaqenghitaa nuliini.

12Una qelghusaq whangamneng pinguuq ilangitnun. (Atanghem sameng piighsimangitaa.) Yuuk ugpeqaq ugpeqaanghilngughmeng nuliilgukumi ellminisulghiimeng, iqitesneghilligu. 13Aghnaqlu ugpeqaq ugpeqaanghilngughmeng ugilgukumi ellminisulghiimeng, iqinneghilli. 14Inqun yuuk ugpeqaanghilnguq aaftengngwaaqaaguq Kiyaghneghmun qayughllak nulighha ugpeqaalghii. Aghnaqlu ugpeqaanghilnguq aaftengngwaaqaaguq Kiyaghneghmun qayughllak uginga ugpeqaalghii. Tamaaken apalluqluku taghnughhiit pelungitutlu aaftengngwaaqaagutlu. 15Iwernga naliq ugpeqaanghilnguq iqisukumi, iqilli. Taagken ugpeqaq yuuk nalighmeng aghnaq itemli tawatelngughmeng nengughtelleghmineng. Kiyaghneghem nekeggmellusi kiyaghtesqesugaqiisi. 16Ugpeqami aghnami, ugigpeniskuvek kayusiitaqsaaghan yugulilleghmun. Nalighmeng ugpeqami yugmi, nuliighpeniskuvek kayusiitaqsaaghan yugulilleghmun.

Kiyaghtek Kiyaghneghem Kiyaghtesqesullghatun

17Kiyaghneghem ataasikaghtaghpesi ugpeqistaqngisi Christ‑ameng, nengughtekaatsii nalighmeng nengughsimangitsii? Circumcise‑ekaatsii nalighmeng pimangitsii? Qepghaghtelaaghuyaghetsii nalighmeng qepghaghtelaaghunghitetsii? Almesiqlusi tawaten nagneghtek qayughllak Atanghem tawatetestekaqiisi. Qamaglluki ugpeqat taagken apeghtughaqanka. 18Yuuk circumcise‑ekaq ugpeghaqngami, allangughtefqaami pilghaaq. Circumcise‑emangilnguqlu ugpeqaq, circumcise‑enaqefqaami pilghaaq. 19Circumcise‑elleqlu circumcise‑enghitelleqlu pitngunghituk. Pitnguyaghqaqta taana qaatkelluki Kiyaghneghem Liilightuusii. 20Ataasikaghtaghpesi ugpeqiiqngafsi, natetelleghpesistun almesiqiteggu. 21Qepghaghtelaaghuyaghsiin Kiyaghneghem tuqlughaqngaten? Sumeghtaghaatkegpenaan. Iwernga qepghaghtelaaghunanighnaqngukuvek, saaqsin legan tawaten pilghaaten. 22Qepghaghtelaaq nakmikegkaa Atanghem, ellngan itemngalghiikaa. Tawateghpigaq qepghaghtelaaghunghilnguq yuuk nakmikegkaa Christ‑am, ellngan qepghaghtelaaqaa. 23Kiyaghneghem tukfighpakaqiisi, enkaam qepghaghtelaaghughtegpenasi yugnun. 24Ugpeqaalgutemni, tamaghhaghpesi aghuliisaghqaagusi ilatngalleghpesigun Kiyaghneghmun almesiqlusi tawaten tuqlullghatun.

Apeghtuusaq Nengughsimangilngughnun

25Aaptaqaghpesinga naten sumeghtaghaatkaqutangi ugiighumangilnguutlu nulightuumangilnguutlu. Atanghem ungipaasimangitaanga Liilightuusameng tamaakunun yugnun, iwernga ungipaannaqamsi sumeghtaghallemneng. Kiyaghneghem nangllegtallghakun apostle‑ngughtekaagunga. Tamaaken apalluqluku neghyuknakefsinga.

26Seghleliighllagughtuq nuna maaten. Sumemni whanga itagnaghyaghqaaguq yuuk almesiqluni. 27Nulightuumaziin? Iqitestegpenaan nulighhen. Nulightuumangilkuvek, nulightughnaqegpenang. 28Iwernga nulightuquvek seghleghqengngunghituten. Ugiighumangilnguq ugiiqumi, seghleghqengngunghituq. Iwernga nulightuqufsi, aghnatlu ugiiqumeng piyaqliighataghaghyaghqaagusi whani kiyaghtaalleghmi. Piyaqliightesunghitepigtamsi tawaten.

29Ugpeqaalgutemni, unata pikegka: Ataneghput tagiyaghtungestaghtuq. Taana apalluqluku nengughtekat qepghaallitgu Ataneq nengughsimangilngughestun. 30Qivghulghiitlu qepghaallitgu qivghunghilngughestun. Quyangalghiitlu qepghaallitgu quyanghilngughestun. Tamaakutlu tukfightughllakayuget qepghaallitgu avangilngughestun. 31Kiyaghtengngulusi nunami whani, megnukataghaghpenaan nunam sanqutanga. Qayughllak nuna almesiqluni aviighusaghqaaguq.

32Kiyaghtaalleghmengtuq whaken sumeghtaghaatkegkiilnguusi. Nulightuumangilnguq qepghalleghqaghtaaghatuq Atanghem qepghaqaaneng qayughllak efqughsugaqegkanga. 33Nuliilek qepghaghataghaqayuguuq kiyaghtaallghem qepghaqaaneng qayughllak efqughsugaqegkanga nuliini. Enkaam sumeghtaghallgha malghughqengngaaquq. 34Tawateghpigaq aghnatlu ayuqut. Aghnat ugingiitkat, ugiighumangilnguutlu qepghalleghqaghtaaghatut Atanghem qepghaqaaneng, qayughllak yugusitengllu taghneghatengllu tuunyugaqiit iinguniita Ataneghmun. Iwernga ugilek qepghaghataghaqayuguuq kiyaghtaallghem qepghaqaaneng qayughllak efqughsugaqegkanga ugini. Ellnganllu sumeghtaghallgha malghughqengngaaq. 35Tawaten piimsi kayusiinnalusi. Nengughtesnaninghitamsi. Iwernga nakmikesugaqa pinilleghpigaq elpesinun qepghaatesqelluku Ataneq uglafqusingunasi.

36Nuliighqalgem atuqsugyaguskumigu nuliighqani, nengughllik. Enkaam nengughtekumek seghleghqengngunaanghituk. 37Iwernga yugem liisimakngwaaqumigu naten pilleghqani, nuqetutngukumigullu atuqsulleghmineng nuliighqani, pinitun pinguuq. Kitum alngunak nulightiisqughaanghilkumigu, nulightughyunghilkumi pinitun pinguuq. 38Nuliighqalek nengughlluni pinitun pinguuq, iwernga nuliighqalek nengughhneghilkumi pinighataghatun pinguuq.

39Aghnaq allaneng ugiighyaghqaanghituq ugini kiyaghlluku. Iwernga ugini tuqukan, piyukelleghmineng ugiighyaghngaaghmi itagnaghtuq, taawanginaq ugpeqaghhiinaghmeng. 40Iwernga quyangaaghataghaghyaghqaaguq ugiinqiggneghilkuni. Taakusta sumeghtaghallghenka. Ugpeqaqa Kiyaghneghem Taghneghakek whangamnituk.

Currently Selected:

1 Corinthians 7: ess

Highlight

Copy