1 Corinthians 4

Christ‑am Apostle‑ngi

1Sumeghtaghaatkitekut qepghaghtekniluta Christ‑amun. Qepghaghtenguukut apeghtughilghiit ipapighqelleghmeng Kiyaghneghem apeghtuutkaaneng whangkunnun. 2Christ‑am qepghaghtengi ataasiighmesaghqaagut. 3Whanga, ataasiighmennilunga qepghaghta pikufsinga, nalighmeng ataasiighmenneghinnilunga kitum alngunak pikanganga, sumeghtaghaatkennaanghitaqa. Talwa whangamneng nanqigsigatunga. 4Nallukaqa sameng anaggusimatka, iwernga anaggutellghinnilunga pinghitunga. Atanghhiinaam nanqigsaghqaqaanga. 5Enkaangam wiin nanqigtegpenaan kina alngunak sallghaneng. Atanghem taginqigtekumi kukegsaghqaqii yuget ilungit aliighqelluki sangwaat iighngayalghiit tesqamani. Aliighqesaghqaqii sangameng saaqutangi. Taagken usuqsaghqat tamaakut usuqellengyaghqaagut Kiyaghneghmeng.

6Ugpeqaalgutemni, elpesi apalluqlusi Apollos‑lu whangkutung usputaqnguukung. Usputaagukung elpesinun liitesqelluku una igaqnalghii sameng pisiitanga. “Qaatkaqiteki sangwaat igaqngalghiit Akuzitni Igaqekani.” Nalighhiinaghpesi aangaayugutkesaqunaan ataasiq yuuk, aallgha ugumikluku. 7Kitum pinighataghaghtestisi ugpeqaalgutegpesineng? Sangwaa qamaglluku Kiyaghneghmeng pikaghsi. Kiyaghneghem tuunumakangisi, aangaayugtegpenasi. Ungipaghpenasi whaten, “Sangwa qamaglluku whangamneng pikaqaqa.”

8Allgeghtengngwaaghumaaghsi aklukegkaghsi qamaglluku! Aklungighingwaaghlusi ayuqusi! Whangkungunasi umiilgughsimaasi! Umiilgulghiisituq, enkaam umiilgutilgusighnayaghamsi! 9Sumeghtaghallemni Kiyaghneghem nekegtekaqiinkut apostle‑eni ukalighpigaaluta yugneng. Anusimingllaghastun ayuqukut, tuqusaghqastun. Yuget qamagtengngwaaghluteng, yaqulgetlu esghapagaqiinkut. 10Whangkuta nallungughtekaagukut Christ‑a apalluqluku, iwernga elpesi sumeghpesini peghqinepiguusi ugpeqani. Yuget waakigatiinkut, iwernga sumeghpesini elpesi nagataqiisillu quulvaghaqiisillu, whangkuta pingigatiinkut. 11Whavemun kenlanga neqangisagaqukut, meghyaghqiisagaqukut, aatkiisagaqukut. Yuget qevutkaqiinkut. Nengitukut, igleghtaagukut quunpeng. 12Qepghaghaqukutlu qevuulluta maningnaluta kiyaghtaaghusighqameng. Seghlequulghiit whangkunneng pinitun aleghqughaqaput. Ugpeqaatemnneng amyuutkenghinkut akuzilgiigatukutlu akisigataputlu. 13Iqlengiqutkenghinkut pinitun aleghqughaqaput tawaten pifqiita pisqelluki. Whavemun kenlanga sumeghtaghaatkaqiinkut sakwaaghestunllu sasiinghilngughestunllu. 14Latangunghitunga kaynguyuggnalusi. Iwernga piniqepigllusi whanga katam taghnughhaqelghistun liilightughyugaqamsi kiyaghtaalleghqaghpesineng. 15Qaywa apeghtughistetupigsaghngaaghpesi Christ‑ameng, atatughllanghitusi. Ugpeqsuwhaghaqngafsigu Jesus Christ‑a nagaqughluki Pinilghiit Ungipat, tawanita atastun lliiqanga elpesinun. 16Enkaangam kiyaghtesupigtamsi whangamtun. 17Tamaaken apalluqluku Timothy kayagtengngwaaqa elpesinun. Ighneqelghiistun ayuqaqa Ataneghqun. Ataasiighmelnguq ugpeqaq piniqepigtaqa. Neqangughhnaaghiisi naten whanga kiyaghtaqellemneng Christ‑amun. Tawatelnguq kiyaghtaalleq apeghtuusaqaqaqa ugpeqanun tamanganilngughnun.

18Ilasi aangaayugneghughtaqut, qayughllak sumeghmeggni laalighhnaanghinnilunga pikaqaatnga Corinth‑mun. 19Iwernga Atanghem piyukelqegkagu, elpesinun piyaghtungestaghtunga. Taagken liigikelleqanka aangaayugneghet aangaayugtelleghmegestun piyaghqaatangi. 20Kiyaghneghem Ataneghpagullgha akuzitetgun ayuqenghituq iwernga aghtughyaghqaanghilleghqun ayuquq. 21Kaaskuma sasqesugestengnga? Anagutalighlungaa aghyuughlamsii, nalighmeng piniqlusi, pinitungwaaq pilamsii?

Currently Selected:

1 Corinthians 4: ess

Highlight

Copy