1 Corinthians 5

Anagngalghii Atuqutelleq

1Nagaqughaqaqa nalighpesinguq atami nulighha nulighqelghiistun ayuqaa. Seghlepiglleghhiimeng seghleghqengnguuq talwa ugpeqaanghilnguut atuqesnayanghitaat taana seghleghqelleq. 2Paninang yuukutkaqetsii elpesineng katam? Qivghughllagyaqlegestun! Elpesi iqisaqlegestun yuuk taana akulegpesineng. 3-5Uyavanteghllagyaghngaaghma sumeghtaghaatkeghllawaaqa. Tawanlengughestun elpesini agghitkegkaqaqa naten pilleghqameng taana yuuk aatghakun Atanemta Jesus‑em. Ugpeqani, allameng qerngughuskufsi, tawanlengughestun umyugaghmiklunga, aghtughyaghqanghillghakun Jesus Christ‑am yuuk taana elpesinitestegpenaan allamengllu pinakesi. Tuuniteggu Tughneghaghmun, piyukelleghmitun yugusii naafqelligu, enkaam taghneghakek yugulillengesqellukek Ataneq taginqigtekan.

6Piniiyugtelleghsi seghleghuuq. Liisimakaghsi whaten pilleq, “Yeast‑am ghhuughtesteghllakayuwaa akuutaq.” 7Tamaaken apallukluku seghleghqellghet akulegpesinilnguut iqiteki. Tawaten pikufsi pelungillequsi akuutastun yeast‑angilngughestun. Ipa pelungitusi qayughllak Christ‑a Passover‑em penniighaghaqaa aghqutkegkaaguq seghleghqellemnnun. 8Katam Jews‑et iqitellghistun yeast‑at mangteghameggneng yataaghqutfagilgamegteggu Passover‑em neqenghaghqellgha, tawateghpigaq seghleghqelleput iqilleqaput. Enkaangam pelungillequkut, ipapighqengngallequkutlu.

9Ilangitgun latama ilatngasnanighamsi ugpeqanun anagngalghiikun atuqullghiinun. 10Akuzitkengngunghitanka uum nunam yugi anagngalghiikun atuqullghiit, nalighmeng pakigneghet, wayaghniightet, nalighmeng tamaakut maniguutkayuget kiyaghnengllaqanun. Iqisukufsi tawatelngughneng yugneng nuna unisaghqaqaghsi. 11Iwernga latamkun ilatesnaniqaqamsi tamaakunun ugpeqaalgutnguniluteng pilghiinun sex‑kun seghleghqengngukata, nalighmeng pakigneghukata, maniguutkayugukata kiyaghnengllaqanun, seghlequughutngukata yulgutmeng, meghestengukata, wayaghniightengukatallu. Talwa neghelgusighpenaki tawatelnguut.

12-13Whanga nanqigsaghqaqenghitanka ugpeqaanghilnguut; Kiyaghneghem nanqigsaghqaqii. Iwernga elpesi nanqigsaghqaqsaghasi ugpeqaalgutesi. Akuzitet Igaqegkat piit, “Seghleghqesta iqiteggu akulegpesineng.”

Currently Selected:

1 Corinthians 5: ess

Highlight

Copy