1 Corinthians 11

1Enkaam whangamtun piiqitek, katam whanga maligtellemtun Christ‑a.

Aghnat Nasqughiitighluteng Maniguusaghqaagut

2Usuqamsi neqamikegkefsinga, atuqegkesillu apeghtuusanka. 3Iwernga liigikesugamsi Christ‑a naasquutinguuq tamaghhaanun yugnun, yuguuqlu naasquutilghii nuliighmineng. 4Nasqughiitighluni yuuk yughaqumi nalighmeng ungipaqumi Kiyaghneghem ungipaaneng yughaghvigmi, quulvaghyaghqaqenghitaa naasquutilghi. 5Enkaam aghnaq nasqughiitighpenani yughaqumi nalighmeng ungipaqumi Kiyaghneghem ungipaaneng, quulvaghyaghqaqenghitaa naasquutilghii. Tawaten pikumi qigughwaaqastun meqesluni ayuqellequq. 6Aghnaq nasqughiitighyunghilkumi, kepughli nuyiighulluni. Iwernga aghnani kayngunalghiinguuq qigulleqlu nuyiighullunillu kepulleq, enkaam nasqughiitighngali. 7Yuuk nasqughiitighyaghqaanghituq maniguuskumi qayughllak Kiyaghneghem nangaghneghatun ulimaaghuuq, Kiyaghneghem aangellgha esghiisqelluku. Iwernga aghnaq ulimaaghuq yugem aangellgha esghiisqelluku. 8Liisimakegkesi yuuk aghnameng ulimaaghunghilnguq, iwernga aghnaq yugmeng ulimaaghulghii. 9Yuuk ulimaaghunghituqlu aghnamun iwernga aghnaq ulimaaghuuq yugmun. 10Taana apalluqluku aghnaq nasqughiitighyaghqaaguq, enkaam yaqulget liigiklitgu yuuk aghnamun naasquutingutanga. 11Iwernga neqamikiteggu Atanghem uspeqellgha, yugenkuk aghnaankuk aklukutngaak. 12Aghnaqsuggaaq yugmeng ulimaaghughngaan, taagken kenlanga yuuk qamaglluni allgeqaaguq aghnameng, iwernga aghnatlu yugetlu qamaglluteng Kiyaghneghmeng pinguut.

13Sumeghtaghaatkaghtegguqun: ipa anaggutngaa aghnam nasqughiitangunani yughallgha Kiyaghneghmun? 14Yuget quunpeng ugpeqaqaat nuyiightekaghnguq yuuk ukavaghtaquq ellmineng, 15iwernga aghnam nuyaghllani quulvaasiqaa. Nasqughiitaghqaaluni ellnganun pikaaguq. 16Paninang kina aaghtiiraaghyugukumi nasqughiitameng, ungipaanneqigtaghllakun taanata apostle‑eni apeghtuusaqaqegkefut, Kiyaghneghem yugan atuqaqaat apeghtuusaq naansaghngaaghmeng.

Atanghem Neghestillgha

17Whaken apeghtughyugamsi qerngughutaqelleghpesineng maniguutelleghmun. Usuqepagningitamsi qerngughutaqelleghpesinun qayughllak aqnighquutaghaghaqusi pinighqutegpenasi. 18Ungipaataqaatnga qerngughunneghpesininguq ilasi aafqemeraaghutaqut, ataasistun pigpenateng. Ugpeqekestaghluku lliighaqa. 19Entaqun aafquutelleghpesigun liigiksaghqaqasi nalisi ipa qaatkutngatangi Ataneghmun.

20Enkaam qerngughunneghpesini Atanghem Neghestillghanun, neghyaghtuunghitaqaghsi. 21Neghuunneghpesini tamaghhaghpesi neragkiighaqusi neqegpesineng, ilasi utaqagpenaki. Enkaam ilasi iyataghaqut, ilasi suumaqut. 22Neghigatsii‑i, meghigatsii‑i negpesini? Nalighmeng ugumikestekii Kiyaghneghem yugi? Kayngusaghaatesnaqutkaqestekii avangilnguut? Sameng pilamsi? Usuqlamsii? Nakaa, usuqnaanghitamsi!

23Sangwaa liitkaqa Ataneghmeng apeghtuusaqaqaqa elpesinun. Atanghem Jesus‑em ighivgaghmi tawani uveghpagutelleghqamini tugukaa neqekrangllaq. 24Iqamsiqayugviksamigu Kiyaghneq, aavgughluku, pikaq, “Una yugusiqaqa elpesinun pinguuq. Neghaqiteggu neqamikusiiluku whangamneng.”

25Neneghmeng taaqsameng, tawateghpigaq tuguluku qayuusiq wine‑eghraghaghmeng imalek, pikaq, “Una qayuusiq Kiyaghneghem nutaghaaguq akequsaa aamkun. Awen meghaqiteggu neqamikusiiluku whangamneng.” 26Enkaam quunpeng neneghpesini taagken neqekrangllameng, meneghpesinillu taagken qayuusimeng, kelgutngwaaqaghsi Atanghem tuqullgha kenlanga alla tagilleghqaanun.

27Kina alngunak temngi neghegkumi Atanghem neqekrangllaaneng, meghegkumillu Atanghem qayuusiineng, quulvaghnaanghitaa Atanghem yugusiillu aawallu. 28Tamaaken apalluqluku sivukluni yugem avuteghqutkelliki seghleghqelleni alla piyaghqaafqiita pinaluki. Enkaam neghelghaaq neqekrangllameng, meghelghaaqlu qayuusimeng. 29Kina alngunak neghelghii neqekrangllameng, meghelghiillu qayuusimeng, Atanghem yugusii liigiknaqegpenaan sameng pisiitanga nanqigtellengyaghqaaquq Ataneghmeng. 30Taana apalluqluku uglaghtusi kayaalngughnillu qinuyugngalghiinillu enkaam qafsinat tuqulaghaatkaagut. 31Iwernga ipapighqelluta nanqigtekumta whangkunneng katam enkaam avuteghqutkegkumteki seghleghqelleput, Atanghem nanqiggnaanghitiinkut tawaten pikumta. 32Iwernga Atanghem apeghtughyuneghminikut naten kiyaghtelleghqameng, nanqigtaqiinkut. Aghyuughyaghqaafqaamta pinaluta nanqigtikumi ugpeqingigalngughneng.

33Enkaam ugpeqaalgutemni qerngughunneghpesini neghnalusi Atanghem Neqenghaghqellghaneng neghekestaghpenasi, utaqatutaqlusi. 34Iyatalghiit tamaakut nemeggni neghlit enkaangam Atanghem nanqiggneghilliki. Aglaquma elpesinun ilangi aaptekasi kiimsighnaaghanka.

Currently Selected:

1 Corinthians 11: ess

Highlight

Copy