1 Corinthians 12

Tunusat Agleghnalghiigneng Taghneghagneng

1Ugpeqaalgutemni, liitesugamsi Agleghnalghiim Taghnegham tunusaaneng. 2Neqamikaghsi salin ugpellghillusi maniguutestaataqaqegkangisi kiyaghnengllaqanun akuzingigalngughnun. Aaghqutaqestekaalghiisi. 3Tamaaken apalluqluku liigikesugamsi kina alngunak whaten pilghii, “Jesus seghleghuuq,” Agleghnalghiim Taghnegham akuzistengngunghitaa tawaten. Iwernga kina alngunak whaten pilghii, “Jesus Atanghuuq,” Agleghnalghiim Taghnegham akuzistengngwaa tawaten.

4Agleghnalghiim Taghnegham tunusii allaghhiinaagut, iwernga tunusat qamaglluki taam ataasim Taghnegham tunusaqii. 5Uglapigtuq allaaghhiinaq qepghaatilleghqaq ilamun, iwernga taana ataasiq Ataneq qepghaatellengaquq. 6Uglaapigtuq allakullghii Kiyaghneghem qepghaqaa, iwernga taam ataasim Kiyaghneghem pistaqii whangkunnun. 7Agleghnalghiim Taghnegham liitestekayugaa aghtughyaghqaanghilleni ugpeqatgun tunusalitkamikun. Tunusat kitumun alngunak pinighqusighqaagut. 8Taam ataasim Taghnegham yugem ilangi akuzistaqii peghqinelleghmikun, ilangi liisimalleghmikun. 9Taam ataasim Taghnegham ugpeqillelitaghaqaqii ilangi yuget, ilangi aghtughyaghqaanghillelitaqii naallghutiyaghqaaluki aqnighneghneng. 10Taghnegham tuunegkaqii ilangi yuget allaaghlluwhaghtisighqameng. Ilangan yugem tugukliqaqaa ungipaqilleghqaq Kiyaghneghem ungipaaneng. Ilangan yugem tugukliqaqaa liigikilleghqaq Agleghnalghiim Taghnegham nalighmeng tughneghaat igleghutngutanga kina. Agleghnalghiim Taghnegham akuzistaqii ilangi yuget allaaghhiinakun ulukun. Enkaam ilangitnun mumighqughtestaqii akuzillghet. 11Qamaglluteng tamaakut tunusat ataasikaghtaghhaghmeng taagken ataasigneng Taghneghagneng pinguut. Tuunyukani tamaakut naliitneng tunusaghqami tuunaqii.

Ataasiq Yugusiq Nalighneghtuqaq

12Katam yugusiq ataasiq nalighneghtughllak, qamaglluteng nalighneghet yugusim pikegkangi. Qaywa uglaghngaaghmeng ataasiiguq yugusiq, Christ‑allu tawatetuq. 13Qamaglluki ugpeqat nalighnequghii Christ‑am yugusiin. Ilaput Jews‑nguut, ilangi Gentile‑et, ilangi qepghaghtelaaghet, ilangi qepghaghtelaaghunghitut. Iwernga qamaglluta paaptaayekaagukut taaggun ataasikun Agleghnalghiignekun Taghneghagnekun, Christ‑amun yugusiliitesqelluta. Qamaglluta tugukliqaqagput ataasik Taghneghak.

14Yugusiq ataasiinghituq nalighneq, nalighneghtupigtuq. 15Itegat whaten pighngaaghmeng, “Iiggengunghilnguunga, yugusim pikenghitaanga.” Taaqnaanghitngwaaghtut yugusimenneghmeng. 16Siguta whaten pighngaaghmi, “Iiyngunghitunga, yugusim pikenghitaanga.” Taaqnaanghitngwaaghtuq yugusimenneghmeng. 17Yugusiq iyeraaghinaayaqumi, natenꞌngam nagaqughnayaghta? Nalighmeng siguteraaghinaayaqumi, natenꞌngam naaghunnayaghta sapagnimeng? 18Iwernga Kiyaghneghem ulimamangitii yugusiput tawatelluki. Nakmikegkamineng nalighnelightuqaqii. 19Yugusiq ataasiiyaqumi nalighneq yugusiinayanghituq. 20Ipapestaaq yugusiq nalighneghtupigtuq.

21Tamaken apalluqluku iyem pinanghitii iigget, “Aklukenghitamsi.” Tawateghpigaq naasqum pinanghiti itegat, “Aklukenghitamsi.” 22Ipapestaaq yugusimta natangi kayaatesugnilnguut megnunapigtut. 23Yugusimta natangi sumemnni megnunapagilnguut, elngaatall aflengakaqaput. Yugusimta natangi esghaghtesugigalkeput pilugugngaaqaput, 24ilangi tamaakut esghaghyaghngaaghmeng ayuqelghiit pilugugigataput. Kiyaghneghem ulimaaqngamigu yugusiq, megnunaghataghaghtestekaqii megnunapagitesugnilnguut. 25Enkaam yugusiq qepghaqayuguuq qerngaghmi. Nalighneghem qamaglluteng aflengakaqiit ilateng tawatengwaaq. 26Ataasiq aqninghani qamaglluteng aqniqayuguut. Ataasiq usuqellengenghani qamaglluteng quyakayuguut.

27Qamagllusi ugpeqani Christ‑am yugusiqiisi, nalighnequghiisi. 28Kiyaghneghem ugpeqanun nakmikegkaqii sivukluki Apostle‑et aangelleghpigaaluki, tuunglighhii uuknaliqistet (ungipaqilghiit Kiyaghneghem ungipaaneng) pingayii apeghtughistet, taagken allaaghlluwhaghtistet, tamaakutlu aghtughyaghqaanghillelitkat naallghutimun, kayusighiyaghqat ilameggneng, pinilghiit igleghutistet, tamaakutlu allaaghhiinaastun akuzikayuget. Kiyaghneghem tuunyukani tamaakut naliitneng tunusaghqami tuunaqii. 29Qamagllusi Apostle‑ngutsii, uuknaliqestengutsii, apeghtughistengutsii? Qamagllusi aghtughyaghqaanghillelitkaatsii allaaghlluwhaghtisighqameng, 30naallghutikayugutsii? Qamagllusi allaaghhiinaastun akuzikayugutsillu mumighquqayugutsillu allaaghhiinaghneng akuzilleghneng? Nakaa! 31Iwernga piyukiteki aangataghalghiit Agleghnalghiim Taghnegham tunusii.

Whaa maaten apeghnaqaqa pinighataghalghii taakuneng.

Currently Selected:

1 Corinthians 12: ess

Highlight

Copy