Romanos 3

1Mʉʉba maka jara b̶uud̶eeba ab̶auba naka kʉ̃risiai: «¿Sakãe judio ẽbẽra mukĩra chi kakua tõoima? ¿Bibuara b̶uuwãeka judiowãe bai mau judio bai bad̶amaarã?» 2Makawãema. Ãread̶e judiorã bai ãrea biꞌia b̶uu. Naa mʉʉba jaraaruu maka panuu Dachi Akõreba ichi bed̶ea maarãmaa deasiid̶eeba. 3Maamina ãchid̶ebena chi nureerãba chi waud̶ai panuu kĩra waud̶aabasii. ¿Maud̶eeba chi Dachi Akõreba waui jarad̶a wauwẽka? 4Makawãema. Dachi Akõreba waui jarad̶a biawãra joma waui. Ẽbẽrarã setaa jarabadamina Dachi Akõreba waubarii ichiba jara b̶uu kĩra. Ichi Bed̶ead̶e naka b̶ʉ kub̶uu:

«Jomaurãba kuitaad̶ai bichiba jara b̶uu jipa b̶uu;

ab̶auba bichi ʉ̃rʉbena kachirua jaraaruud̶e bichiba kuitaabiai bichi jipa nii».#Salmos 51:4.

5Mʉ berrearuu ẽbẽrarã berreabadau kĩra. Chi nureerãba jarabadau kachirua wau panuud̶eeba Dachi Akõre jipa nii arakʉd̶e unubiabadau abadau. Maud̶e Dachi Akõreba kastikaaruubʉrã, ichi jipa niiwãe abadau. ¿Chi maka jara panuurãmaa kãare jarad̶aima? ¿Jãarãba jarad̶aika Dachi Akõre jipa niiwãe dai#3:5 Dai. Nama Pabloba judiorã ʉ̃rʉbena jara b̶uu. kastikaid̶eeba? 6¡Biawãra makawãema! Dachi Akõre maka jipa niiwãe basirã, ¿saka nau iujãad̶ebenarã nebʉra jipa ichiai basma? 7Chi nureerãba jarabadau setaa jara panuud̶eeba chi Dachi Akõre setaa jarakau arakʉd̶e unubiabadau. Kʉ̃risiabadau ãchiba setaa jara panuu kakua ẽbẽrarãba Dachi Akõremaa aude biꞌia berread̶ai. Maud̶eeba ãchimaarã, Dachi Akõreba nebʉra ichiabai b̶uu. 8Makarã ¿dachiba kachirua waud̶ai panuka ẽbẽrarãba Dachi Akõremaa biꞌia berread̶amera? Chi nureerãba ãchi kʉ̃risia kachiruad̶eeba jarabadau daiba maka jaradea panuu. Chi maka jara nuree Dachi Akõreba biawãra nebʉra barau ai.

Ẽbẽra jipa nii wãꞌãe

9Maud̶eeba ¿kãare jarad̶aima? ¿Jarad̶aika dai chi judiorã waabenarã audeara biꞌia nuree? ¡Makawãema! Mʉʉba nau kartad̶e kuitaabiasii judiorãba maud̶e judiowãerã bid̶a kachirua waubadau. 10Maud̶eeba Dachi Akõre bed̶ead̶e naka b̶ʉ kub̶uu:

«Ẽbẽra jipa nii ab̶a bid̶a wãꞌãe.

11Ẽbẽra ab̶a bid̶a wãꞌãe kuitaai kãare jipa b̶uu. Ẽbẽra ab̶a bid̶a Dachi Akõre jʉrʉkau.

12Joma o ãyare wãsid̶au. Joma Dachi Akõre daad̶e kachirua paneesid̶au.

Ẽbẽra ab̶a bid̶a biꞌia waukau. Biꞌia waubarii ab̶a bid̶a wãꞌãe.#Salmos 14:1-3.

13Ãchiba kachirua berreabadau ẽbẽra biud̶a jau b̶ubadau ewa nub̶uu kĩra b̶uu. Ãchi iiba setaa jarabadau.#Salmos 5:9.

Ãchiba jara panuud̶eeba waabenarã kachirua waubadau damaba kaaruu kĩra.#Salmos 140:3.

14Kĩramaa panuud̶eeba ãchi iiba kachirua jarabadau.#Salmos 10:7.

15Barikia kakua mia beabadau.#3:15 Barikia kakua mia beabadau. Griego bed̶ead̶e naka b̶u kub̶uu: ãchi jʉ̃rʉ isa wãbadau oa chebid̶ai baita.

16Ãchi wãaduumaacha waabenarã biꞌiwãe panabiad̶aped̶a nebʉrad̶e b̶aebiabadau.

17Waabenarã ome jirukaraayuwãe duanad̶ai adua panuu.#Isaías 59:7-8.

18Maarãba Dachi Akõre b̶aꞌãra bid̶a wapead̶akau».#Salmos 36:1.

19Mau bed̶ea Dachi Akõre bed̶ead̶e b̶uu chi mau b̶ʉd̶a ũri nureerãmaa jara b̶uu. Maka ab̶au bid̶a poyaa kachiruaswãe b̶uu a jarad̶aabai. Mau Moisesba b̶ʉsiid̶eeba kuitaa panuu joma nau iujãad̶ebenarã Dachi Akõre daad̶e nebʉra bara panuu. 20Biawãra Moisesba b̶ʉd̶a wau b̶uud̶eeba ẽbẽra ab̶a bid̶a Dachi Akõreba chi ichid̶irã jipa nuree baara duanuubai. Mau Moisesba b̶ʉd̶ad̶eeba kuitaabia b̶uu dachiba kachirua waubadau.

Dachi Akõreba Jesucristod̶eeba ẽbẽrarã chi ichid̶irã jipa nuree baara duanubarii

21Maamina id̶ibae Dachi Akõreba kuitaabiasii mau Moisesba b̶ʉd̶a awara saka ẽbẽrarã chi ichid̶irã jipa nuree baara duanubarii#3:21 Ẽbẽrarã chi ichid̶irã jipa nuree baara duanubarii. Kajuma bed̶ead̶e b̶ʉ kub̶uu: justificar. Nau sid̶a jara b̶uu «Dachi Akõreba dachi nebʉraswãe nuree abarii». ara ichiba jara b̶uad̶a kĩra. Moisesba b̶ʉd̶ad̶e maud̶e Dachi Akõre baita berreabadaurãba b̶ʉped̶aad̶a kartad̶e bid̶a mau ʉ̃rʉbena b̶ʉ kub̶uu. 22Maka Dachi Akõreba waubarii ara ichiba jara b̶uu kĩra, Jesucristo dachi kakua biusiid̶e, ichi ũribaba nibad̶a unubiasiid̶eeba. Maka ichiba joma chi Jesusd̶e ijãaduurã chi ichid̶irã jipa nuree baara duanubarii. Ab̶a bid̶a kĩra awara unukau. 23Biawãra jomaurãba kachirua waubadaud̶eeba, Dachi Akõre biꞌia niid̶ebena awara nuree. 24Maamina Dachi Akõreba ichi sõbiad̶eeba ẽbẽra ab̶a chi ichid̶irã jipa nuree baara duanubarii, ne kaebea bari dearuu kĩra. Maka unubarii Jesucristoba kachiruad̶ebena karibasiid̶eeba. 25Dachi Akõreba Jesucristo b̶usii ichi oa chemera, dachi kachirua kakua. Mau ijãaduud̶e Dachi Akõreba dachi kachirua perdonabarii. Maka unubia b̶uu Dachi Akõre jipa nii, dachi karibai baita. Cristo neei naed̶e kachirua wauped̶aad̶a Dachi Akõreba joma dauchia jãadua b̶uud̶eeba kastikawẽa b̶uasii. 26Id̶ibae ichiba Jesucristod̶eeba dachi kariba b̶uu, ichi jipa niid̶eeba. Ichiba jaraaruu maka waubariid̶eeba, chi Jesusd̶e ijãaduu joma chi ichid̶irã jipa nuree baara duanubarii.

27Maud̶eeba ¿kãare ara dachi ʉ̃rʉbena biꞌia berread̶aima? Poyaa biꞌia berread̶aabai. ¿Sakãe? Poyaa biꞌia berread̶aabai, Moisesba b̶ʉd̶a wau panuud̶eeba chi ichid̶irã jipa nuree baara duanuubaid̶eeba, maumaarã Jesusd̶e ijãa panuud̶eeba maka duanui. 28Dachiba jaradea panuu Jesusd̶e ijãa panuud̶éburu, Dachi Akõreba dachi chi ichid̶irã jipa nuree baara duanui. Maka jarakau Moisesba b̶ʉd̶ad̶e ijãa panuud̶eeba.

29Maebʉrã ¿Dachi Akõre judiorãd̶éturu b̶uka? ¿Ichi judiowãerãd̶ewãeka? Biawãra judiowãerãd̶ebʉ, 30Dachi Akõre ab̶aburu niid̶eeba. Ichiba joma Jesusd̶e ijãaduu chi ichid̶irã jipa nuree baara duanubarii. Mukĩra chi kakua tõo nureerãba maud̶e mukĩra chi kakua tõowẽa nuree bid̶a Jesusd̶e ijãaduubʉrã chi ichid̶irã jipa nuree baara duanubarii. 31Jesusd̶e ijãa panuud̶eeba ¿Moisesba b̶ʉd̶a ida b̶u panuka? Makawãema, maumaarã mau Moisesba b̶ʉd̶a biꞌia b̶uu unubadau.

Currently Selected:

Romanos 3: cmi

Highlight

Compare

Copy