Romanos 2

Dachi Akõreba jomaurã kastikai ʉ̃rʉbena

1Maka b̶uud̶e ab̶auba kʉ̃risiabai b̶uu Dachi Akõre daad̶e nebʉraswãe nii. Chi aude jipa wau b̶uu a b̶uuba maka kʉ̃risiabai b̶uu. Ab̶auba kachirua wau b̶uu a jaraaruud̶e ara ichi ʉ̃rʉbena jara b̶uu, ichia bid̶a ara mau kĩra waubariid̶eeba. 2Dachiba kuitaa panuu Dachi Akõreba chi kachirua waubadaurã kastikabarii, chi bed̶ea biawãraba. 3Maka bichiba waabenarãba kachirua wau panuu aaruubʉrã, maamina ara mau wau b̶uubʉrã, kʉ̃risiabai b̶uu Dachi Akõreba mau nebʉra kastikaabai. 4Bichiba ida b̶u b̶uu Dachi Akõre dachi ome ãrea sõbia b̶uu, joma dauchia jãadua b̶uu maud̶e kachirua waud̶a isa kastikakau. ¿Bichiba adua b̶uka Dachi Akõre bichi ome sõbia b̶uabariid̶eeba maud̶e chi ichiba kʉ̃ria b̶uud̶eeba bichi kachirua waubarii ida b̶ubarii ichimaa neemera?

5Maamina sõ chaarea niid̶eeba bichiba kachirua ida b̶ukau Dachi Akõremaa neebai baita. Maud̶eeba Dachi Akõreba kastikai ewarid̶e ichi kĩrubid̶eeba aude kastikai. Mau ewarid̶e Dachi Akõreba unubii saka jomaurã jipa kastikai. 6Ichiba jomaurãmaa deai ãchiba wauped̶aad̶a kĩra. 7Chi nureerãba biꞌia wau panuu Dachi Akõreba maarã biꞌia unumera, biꞌia jaramera maud̶e ewaricha ãchi ome chokae b̶uamera. Maarã biawãra chokae panabiai. 8Maamina chi nureerãba waabenarã audeara biꞌia panad̶ai baita jʉrʉbadau. Maud̶eeba chi biawãra bed̶ea ijãad̶ai kʉ̃riad̶akau kachiruad̶e panad̶ayua. Mau ẽbẽrarã Dachi Akõreba ichi kĩru kub̶uuba ãrea kastikai. 9Ichiba ichiaruud̶e joma kachirua wau nuree ãrea biꞌiwãe nuread̶ai maud̶e jirukaraa nuread̶ai. Naa judiorã maud̶e judiowãerã sid̶a maka nuread̶ai. 10Maamina joma biꞌia wau nuree Dachi Akõreba biꞌia unui, biꞌia jarai maud̶e jirukaraayuwãe b̶uabiai. Naa judiorã maud̶e judiowãerã sid̶a maka waui. 11Dachi Akõreba ẽbẽrarã joma ara mau kĩra nebʉra ichiai.

12Chi Moisesba b̶ʉd̶a adua nureerãba kachirua waubadaud̶eeba mau adua panumina Dachi Akõreba kastikai. Maud̶e mau Moisesba b̶ʉd̶a kuitaa nureerãba kachirua waubadaud̶eeba Dachi Akõreba ara mau Moisesba b̶ʉd̶aba maarã kastikai. 13Moisesba b̶ʉd̶a ũri panuud̶eeba ẽbẽrarã Dachi Akõre daad̶e jipa nuread̶aabai, maumaarã mau joma wau panuud̶eeba Dachi Akõreba maarã nebʉraswãe nuree ai. 14Judiowãerãba mau Moisesba b̶ʉd̶a adua panumina ãchi kʉ̃risiad̶eeba mau Moisesba b̶ʉd̶ad̶e jara b̶uu kĩra b̶esed̶e waubadau. Maka wauduud̶e, unubiabadau ãchiba kuitaa panuu kãare biꞌia b̶uu maud̶e kãare kachirua b̶uu. 15Ara ãchiba wau panuud̶eeba unubia panuu mau Moisesba b̶ʉd̶ad̶e jara b̶uu sõd̶eeba kuitaa panuu. Ãchi kʉ̃risiad̶e kuitaa panuu biꞌia wauduud̶e jirukaraayuwãe panabadau. Maumaarã kachirua wauduud̶e, kĩra nomaa panabadau. 16Jomaurãba chi ãchi sõd̶e mera uru panuu Dachi Akõreba nebʉra ichiai ewarid̶e Jesucristod̶eeba mau ichiai. Mʉʉba chi bed̶ea bia jaradea b̶uu kĩra ara maka b̶uai.

Judiorãba Moisesba b̶ʉd̶ad̶e jara b̶uu kĩra waud̶akau

17Machíturu judiorã abadau. Dachi Akõre biꞌia kuitaa panuu abadau. Kʉ̃risia panuu ichiba machi aid̶akuai Moisesba b̶ʉd̶a uru panuud̶eeba. 18Mau uru panuud̶eeba kuitaa panuu Dachi Akõreba kãare kʉ̃ria b̶uu maud̶e kãare jipa b̶uu. 19Machiba kʉ̃risia panuu Dachi Akõred̶e ijãad̶akaurãmaa poyaa biꞌia jaradea panad̶ai dau pãriu nuree jipa adoeduu kĩra, pãriud̶e nuree ʉ̃d̶aad̶aa adoeduu kĩra. 20Moisesba b̶ʉd̶a uru panuud̶eeba kʉ̃risia panuu joma kʉ̃risia kuitaa uru panuu maud̶e biawãra bed̶ea sid̶a kuitaa panuu. Maud̶eeba kʉ̃risia panuu chi kʉ̃risiaswãe nureerãmaa maud̶e chi wabid̶a ãrea adua nureerãmaa bid̶a poyaa jaradea panad̶ai. 21Machiba waabenarãmaa maka jaradea panuubʉrã, ¿sakãe ara machi du ab̶a jaradead̶awẽma? Machiba jaradeabadau nechiruabai b̶uu. Maamina machi nechiruabadau. 22Machiba jaradeabadau junebena miakãid̶a ome kãi b̶eebai b̶uu. Maamina machi junebena miakãid̶a ome kãi b̶eebadau. Machiba kʉ̃riad̶akau Dachi Akõre kuenda juaba ne kaped̶aad̶amaa ʉtaa id̶id̶ai. Maamina mau juaba kaped̶aad̶a de mechiud̶e mau nechiruabadau. 23Moisesba b̶ʉd̶a machiba ãrea kuitaa panuu abadau. Maamina mau Moisesba b̶ʉd̶ad̶e jara b̶uu ijãad̶awẽa panuud̶eeba, machi kakua waabenarãba Dachi Akõre ʉ̃rʉbena kachirua berreabadau. 24Maud̶eeba Dachi Akõre bed̶ead̶e naka b̶ʉ kub̶uu: «Judiowãerãba Dachi Akõre ʉ̃rʉbena kachirua jarabadau machi judiorãba kachirua waubadau kakua».#Isaías 52:5; Ezequiel 36:20-23.

25Moisesba b̶ʉd̶a machiba wauduubʉrã, machi mukĩra chi kakua tõod̶a biꞌia b̶uu, ẽbẽrarã Dachi Akõred̶erã. Maamina mau Moisesba b̶ʉd̶a waud̶awẽebʉrã, machi Dachi Akõre daad̶e mukĩra chi kakua tõod̶awẽa nuree kĩra nuree.#2:25 Mukĩra chi kakua tõod̶awẽa nuree kĩra nuree. Mau jara b̶uu «Dachi Akõre ẽbẽrarãwẽma». 26Maud̶e judiowãeba mau Moisesba b̶ʉd̶a wau b̶uubʉrã, mukĩra chi kakua tõowẽa b̶umina Dachi Akõre daad̶e mukĩra chi kakua tõo nii kĩra nii. 27Machi judiorã mukĩra chi kakua tõobadau unubiad̶ai baita ẽbẽrarã Dachi Akõred̶erã. Maud̶e Moisesba b̶ʉd̶a kuitaa panuu. Maamina mau Moisesba b̶ʉd̶a waud̶awẽa panuu. Maud̶eeba chi mukĩra chi kakua tõowẽa b̶uuba mau Moisesba b̶ʉd̶a wauruubʉrã, kuitaabiai machi judiorãmina nebʉra bara nuree. 28Ab̶a bid̶a judiowãema, chi judiorãba waubadau wau b̶uud̶eeba. Maud̶e mukĩra chi kakua tõod̶a ara nau kakuad̶ebenawãema. 29Maumaarã Dachi Akõremaarã, chi sõ jipa nii, mau biawãra judiobʉ. Chi Moisesba b̶ʉd̶ad̶e b̶u kub̶uu kĩra mukĩra chi kakua tõod̶a abarii biawãra judiowãema, maumaarã chi Dachi Akõre Jauriba maka sõd̶e jipa nibabibariibʉ.#Jeremías 4:4; Ezequiel 36:26-27. Ẽbẽrarãba chi sõ jipa nii ʉ̃rʉbena biꞌia jarad̶akamina Dachi Akõreba mau ʉ̃rʉbena biꞌia jarabarii.

Currently Selected:

Romanos 2: cmi

Highlight

Compare

Copy