Romanos 10
10
1Ãbarã, mʉʉba sõd̶eeba kʉ̃ria b̶uu Dachi Akõreba israeld̶ebenarã karibai. Maud̶eeba mʉʉba ichimaa ʉtaa id̶i b̶uabarii. 2Mʉʉba jaraaruu ãchiba Dachi Akõre biawãra kuitaa kʉ̃ria panuu. Maamina Dachi Akõreba kʉ̃ria b̶uu ʉ̃rʉbena biꞌiwãe kʉ̃risia panuu. 3Ãchiba unud̶akau saka Dachi Akõreba ẽbẽrarã ichi jipa nuree baara duanui, ichiba bed̶ea dead̶a kĩra. Maumaarã mau ida b̶ud̶aped̶a ara ãchiba wau panuuba jʉrʉ panuu Dachi Akõre puuru jipa b̶uu bad̶ai baita. 4Maamina maka nuread̶ai baita, ãchi ley waubachid̶au audeara, Cristoba joma wausii. Chi Cristod̶e ijãaduu Dachi Akõreba jipa nuree unubarii.
5Moisesba b̶ʉsii saka ẽbẽrarã poyaa jipa nuread̶ai, chi Dachi Akõreba ichimaa b̶ʉbisiid̶eeba. Naka b̶ʉsii: «Chi Moisesba b̶ʉd̶a wau b̶uu, mauba nibai».#Levítico 18:5. 6Maamina chi Cristod̶e ijãa b̶uu Dachi Akõre daad̶e jipa nuree baarabena bai baita naka jara b̶uu: «Bichi sõd̶eeba jararã́se: “¿Kai bajãad̶aa wãi b̶uma?”#Deuteronomio 30:12. (Cristo nau iujãad̶aa neebii baita). 7Maud̶e kʉ̃risiarã́se: “¿Kai biud̶arã panabadaumaa wãi b̶uma?” (Cristo chokae jiradubii baita)». 8Maamina Dachi Akõre bed̶ead̶e naka b̶ʉ kub̶uu: «Bichiba Dachi Akõre bed̶ea kuitaai aude chaareawẽa b̶uu.#10:8 Bichiba Dachi Akõre bed̶ea kuitaai aude chaareawẽa b̶uu. Griego bed̶ead̶e naka b̶ʉ kub̶uu: Ichi bed̶ea bichi kaita b̶uu. Bichi iiba ichi bed̶ea jarai b̶uu maud̶e bichi sõd̶eeba ijãai b̶uu».#Deuteronomio 30:11-14. Ichi bed̶ea daiba naka jaradea panuu jomaurãba ijãad̶amera: 9Bichi iiba Jesús jomaurã Mechiu aaruubʉrã, maud̶e Dachi Akõreba ichi chokae jiradubid̶a bichi sõd̶eeba ijãaruubʉrã, ichiba karibai. 10Biawãra chi mauba sõd̶eeba ijãaruubʉrã, chi Dachi Akõre daad̶e jipa nuree baara b̶uai. Iiba Jesús jomaurã Mechiu aaruubʉrã Dachi Akõreba karibai.
11Dachi Akõre bed̶ead̶e naka b̶ʉ kub̶uu: «Chi ichid̶e ijãa b̶uuba bari ijãa b̶uabai».#10:11 Bari ijãa b̶uabai. Griego bed̶ead̶e naka b̶ʉ kub̶uu: Nejasiawẽma. Isaías 28:16; 1 Pedro 2:6. 12Dachi Akõre jomaurã Mechiud̶eeba judiorã maud̶e judiowãerã sid̶a arab̶aud̶e waubarii. Ichimaa chi chuburia id̶iiduu joma karibabarii. 13Dachi Akõre bed̶ead̶e naka b̶ʉ kub̶uu: «Chi Dachi Mechiumaa chi chuburia id̶iiduu joma karibai».#Joel 2:32.
14Maamina ẽbẽrarãba wabid̶a Dachi Mechiu Jesucristod̶e ijãad̶awẽa panuud̶e ¿saka ichimaa chi chuburia ʉtaa id̶id̶aima? Ichi ʉ̃rʉbena wabid̶a ũrid̶awẽa panuud̶e ¿saka ijãad̶aima? Maud̶e ab̶au bid̶a ãchimaa jaradead̶e wãwẽebʉrã ¿saka ichi ʉ̃rʉbena ũrid̶aima? 15Dachi Akõreba ab̶a bid̶a bʉiwẽebʉrã, ¿saka jaradead̶e wãd̶aima? Dachi Akõre bed̶ead̶e naka b̶ʉ kub̶uu: «Chi bed̶ea bia jarad̶e needuu ãrea biꞌia nuree».#10:15 Griego bed̶ead̶e naka b̶ʉ kub̶uu: Chi bed̶ea bia jarad̶e needuu jʉ̃rʉ ãrea biꞌia nuree. Isaías 52:7. Griego bed̶ead̶e chi b̶ee kartad̶e b̶ʉ kub̶uu: chi jirukaraayuwãe b̶uabibarii bed̶ea jarad̶e needuu.
16Maamina joma judiorãba chi bed̶ea bia Cristo ʉ̃rʉbena ijãad̶aabasii. Isaías kartad̶e naka b̶ʉ kub̶uu: «Dai Mechiu, daiba jaraped̶aad̶a ¿kaiba ijãasma?»#Isaías 53:1. 17Biawãra ẽbẽrarãba Cristo ʉ̃rʉbena naa ũrid̶ai panuu, poyaa ijãad̶ai baita.#10:17 Cristo ʉ̃rʉbena. Griego bed̶ead̶e chi b̶ee kartad̶e b̶ʉ kub̶uu: Dachi Akõre bed̶ea. 18Maamina mʉʉba id̶iiruu: ¿Judiorãba mau bed̶ea ũrid̶aabaska? Biawãra ũrisid̶au. Dachi Akõre bed̶ead̶e naka b̶ʉ kub̶uu:
«Ichi ʉ̃rʉbena joma nau iujãad̶e jarasid̶au. Mau bed̶ea kaitawẽ jarad̶e wãsid̶au».#Salmos 19:4.
19Mʉʉba waya id̶iiruu: ¿Judiorãba mau bed̶ea kuitaad̶aka baska? Maerã, kuitaasid̶au judiowãerãba kuitaaped̶aad̶a kĩra. Maud̶eeba Moisesba Dachi Akõred̶eeba judiorãmaa naa jarasii:
«Chi mʉʉba jʉrʉ adaud̶awãe puuru kariba b̶uud̶eeba mʉʉba machimaa jiwaabiai mʉ kʉ̃riad̶amera.
Chi kĩrabawẽa b̶uu puuru kariba b̶uud̶eeba mʉʉba machi kĩrubikabiai mʉ kʉ̃riad̶amera».#Deuteronomio 32:21.
20Maud̶e Isaiasba Dachi Akõred̶eeba wapeawẽa naka jarasii:
«Chi mʉ jʉrʉd̶awẽa panad̶aba mʉ unusid̶au. Chi mʉ ʉ̃rʉbena id̶id̶awẽa panad̶arãmaa mʉ ʉ̃rʉbena kuitaabiasii».#Isaías 65:1.
21Maamina israeld̶ebenarã ʉ̃rʉbena Isaiasba naka jarasii:
«Ewaricha mʉ jua deabachii ẽbẽrarã sõ chaarea nuree maud̶e mʉʉd̶e ijãad̶akaurã mʉʉmaa need̶amera».#Isaías 65:2.
Currently Selected:
Romanos 10: cmi
Highlight
Share
Compare
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All Rights Reserved
