Romanos 1

Nau kartad̶e Pabloba naa b̶ʉd̶a

1Mʉ Pablobʉ, Jesucristo baita bari trajabariibʉ. Dachi Akõreba mʉ jʉrʉ adausii Jesucristoba bʉid̶a b̶uamera maud̶e b̶usii chi bed̶ea bia Dachi Akõre ʉ̃rʉbena jaradead̶e wãmera.

2Mau bed̶ea bia Dachi Akõreba nabẽraed̶e deai jara b̶uasii. Ichi baita berreabadaurãba mau ʉ̃rʉbena Ichi Bed̶ea arakʉd̶e b̶ʉsid̶au. 3-4Mau bed̶ea bia ichi Warr ʉ̃rʉbena jara b̶uu. Ichi Warr Dachi Mechiu Jesucristo nau kakuad̶e Israeld̶ebena rey Davidd̶ebena need̶abʉ.#Jeremías 23:5-6. Maud̶e ichi biu b̶uad̶a chokae jiradusiid̶e Dachi Akõre Jauriba unubisii mau Dachi Akõre Warr joma poyaa nii.#Salmos 2:7.

5Jesucristod̶eeba Dachi Akõreba mʉ b̶usii ichiba bʉid̶a b̶uamera. Ichid̶eeba maka b̶usii joma druachabenarãba Jesucristod̶e ijãad̶amera, ichi bed̶ea waud̶amera maud̶e ichimaa biꞌia berread̶amera. 6Machi sid̶a Dachi Akõreba iusii Jesucristod̶e nuread̶amera.

7Mʉʉba nau karta b̶ʉʉruu joma Romad̶ebena ãbarã baita. Dachi Akõreba machi kʉ̃ria b̶uu maud̶e iusii ichi ẽbẽrarã nuread̶amera. Mʉʉba kʉ̃ria b̶uu Dachi Bajãad̶ebena Akõreba Dachi Mechiu Jesucristo ome ãchi sõbiad̶eeba machi aid̶a panad̶ai maud̶e jirukaraayuwãe panabiad̶ai.

Pablo Romad̶aa wã kʉ̃ria b̶uad̶a

8Naa mʉʉba jaraaruu: Jesucristod̶eeba mʉʉba joma machi baita Dachi Akõremaa ichíturu kid̶ibai abarii machiba Jesucristod̶e ijãa panuu ʉ̃rʉbena druachabenarãba berrea panuud̶eeba. 9Dachi Akõreba kʉ̃ria b̶uu joma mʉ sõd̶eeba wau b̶uu chi bed̶ea bia ichi Warr ʉ̃rʉbena jaradea b̶uud̶eeba. Ichiba kuitaa b̶uu mʉʉba ʉtaa id̶iiruucha machi baita ʉtaa id̶ibarii. 10Mʉʉba ʉtaa id̶ibarii ichiba kʉ̃ria b̶uubʉrã mʉ ida machi ichiad̶e wãbimera. 11Biawãra mʉʉba machi ichia kʉ̃ria b̶uu Dachi Akõre Jaurid̶eeba aid̶ai baita. Maka machi karr chaarea nuread̶ai. 12Mʉʉba kʉ̃ria b̶uu dachiba arab̶au Cristod̶e ijãa panuud̶eeba chiya aid̶a panad̶ai karr chaarea panad̶ai baita.

13Ãbarã, mʉʉba kʉ̃ria b̶uu machiba kuitaad̶ai biawãra b̶es ãrea machimaa wãi kʉ̃risia b̶uabarii. Maamina wabid̶a poyaa wãwẽa b̶uu. Machimaa wã kʉ̃ria b̶uu mʉʉba jaradea b̶uud̶eeba arabenarãba Jesucristod̶e ijãad̶amera waabenarã druad̶ebenarãba ijãaped̶aad̶a kĩra.#1:13 Arabenarãba Jesucristod̶e ijãad̶amera. Griego bed̶ead̶e naka b̶ʉ kub̶uu: ne jõ chi b̶ee uru b̶uai. 14-15Mʉʉba chi bed̶ea bia Jesús ʉ̃rʉbena jomaurãmaa jaradeai b̶uu. Ne kuitaa nureerãmaa, ne adua nureerãmaa, karta kuitaa nureerãmaa maud̶e karta adua nureerãmaa jaradeai b̶uu.#1:14-15 Karta kuitaa nureerãmaa maud̶e karta adua nureerãmaa. Griego bed̶ead̶e naka b̶ʉ kub̶uu: griegorãmaa maud̶e waabenarãmaa. Maud̶eeba machi Romad̶ebenarãmaa bid̶a jaradead̶e wã kʉ̃ria b̶uu.

16Mʉ kĩra nejasiakau chi bed̶ea bia Jesús ʉ̃rʉbena jaradeai baita, chi mau bed̶ea ijãaduu Dachi Akõreba ichi poyaad̶eeba joma karibabariid̶eeba; naa judiorã karibai maud̶e judiowãerã sid̶a. 17Mau bed̶ea biad̶eeba Dachi Akõreba kuitaabia b̶uu dachi karibai, ichiba jara b̶uu kĩra.#1:17. Ichiba jara b̶uu kĩra. Griego bed̶ead̶e naka b̶u kub̶uu: Dachi Akõre jipa niid̶eeba. Jesucristod̶e ijãaruubʉrã maka b̶uai. Dachi Akõre bed̶ead̶e naka b̶ʉ kub̶uu:

«Chi jipa nii, Dachi Akõred̶e ijãa niid̶eeba chokae nibai».#Habacuc 2:4.

Ẽbẽrarã Dachi Akõre daad̶e nebʉra bara nuree ʉ̃rʉbena

18Dachi Akõreba bajãad̶ebena kuitaabi b̶uu kachirua wau nuree maud̶e jipawãe nuree ichi kĩrubid̶eeba mau joma kastikai. Ãchiba kachirua wau panuud̶eeba chi biawãra bed̶ea ida kuitaabid̶akau. 19Dachi Akõre ʉ̃rʉbena poyaa kuitaad̶ai b̶uu ãchiba mau ãrea kuitaa panuu, ichiba mau kuitaabia b̶uud̶eeba. 20Nau iujãa wausiid̶eed̶ebena, maarãba chi ichiba waud̶a unu panuud̶eeba kuitaa panuu ichi ewaricha ne joma poyaa waubarii maud̶e ichi Dachi Akõre. Mau joma waud̶a unu panuud̶eeba ẽbẽrarã chi Dachi Akõre ʉ̃rʉbena unud̶akau mau biꞌia unubadau. Maud̶eeba kachirua waubadaurãba adua panuu poyaa jarad̶aabai panuu. 21Maarãba Dachi Akõre kuitaa panasid̶amina ichimaa biꞌia berread̶aabai maud̶e ichíturu kid̶ibai ad̶aabasii. Maumaarã kʉ̃risiaswãe nuree kĩra paneesid̶au. Maka paneed̶aped̶a pãriud̶e paneesid̶au. 22Kʉ̃risia kuitaa nuree asid̶amina kʉ̃risiaswãe paneesid̶au. 23Chi Dachi Akõre biukaraa nii maud̶e biꞌia nii ida b̶usid̶au. Maabae chi ẽbẽra biud̶a kĩra juaba ne kaped̶aad̶amaa ʉtaa id̶i kopaneesid̶au. Ibanarã, ãnimara jʉ̃rʉ kimare nuree maud̶e ãnimara iorod̶e ursu nuree kĩra juaba kaped̶aad̶amaa ʉtaa id̶i kopaneesid̶au.

24Maud̶eeba Dachi Akõreba ida b̶usii ãchi sõd̶e kachirua wau kʉ̃ria b̶uu waud̶amera. Maud̶eeba maarãba mia pera wau paneesid̶au. 25Dachi Akõre biawãra ida b̶ud̶aped̶a chi seta wau paneesid̶au. Dachi Akõreba joma waud̶amina ichi audeara ichiba waud̶ad̶e ijãa paneesid̶au maud̶e maumaa biꞌia berrea paneesid̶au. Maamina dachiba Dachi Akõremáburu ewaricha biꞌia berread̶ai panuu. Biꞌia b̶uu maka b̶uai.#1:25 Biꞌia b̶uu maka b̶uai. Griego bed̶ead̶e naka b̶ʉ kub̶uu: amén.

26Maud̶eeba Dachi Akõreba ida b̶usii mia pera waud̶amera. Wẽra mukĩra ome b̶uai b̶uu ida b̶ud̶aped̶a arab̶au wẽra ome paneesid̶au. 27Ara mau kĩra mukĩra wẽra ome b̶uai b̶uu ida b̶ud̶aped̶a arab̶au mukĩra ome chiya kʉ̃riad̶aped̶a mia pera wau paneesid̶au. Mau kachirua wau panuu kakua Dachi Akõreba ãchi nebʉra kastikai, ichiba kastikai b̶uu kĩra.

28Maarãba Dachi Akõre ida b̶uped̶aad̶ad̶eeba ichiba maarã ida b̶usii kachirua kʉ̃risiad̶aped̶a maka wau panad̶amera. 29Ne joma kachirua waubadau. Mia pera b̶uu waubadau, ne joma uru panad̶ai kʉ̃riabadau, waabenamaa kachirua waubadau, waabenarãba uru panuu kakua kachirua kʉ̃risiabadau, mia beabadau, berreayaa panabadau, waabenarã setaa kũruabadau maud̶e waabenarã ʉ̃rʉbena kachirua kʉ̃risiabadau. 30Waabenarã ʉ̃rʉbena kachirua berreabadau, Dachi Akõre kĩramaabadau maud̶e waabenarã daad̶e kachirua berreabadau. Waabenarã audeara chi bibuara nuree a kʉ̃risiabadau maud̶e maka jarabadau. Waabenarã kachirua waud̶ai baita jʉrʉbadau. Ãchi akõrerã bed̶ea ũrid̶akau. 31Kʉ̃risiaswãe nuree. Ãchiba bed̶ea deaped̶aad̶a waud̶akau. Kʉ̃risiaswãe nuree maud̶e waabenarã kĩra chuburiad̶akau.#1:31 Waabenarã kĩra chuburiad̶akau. Griego bed̶ead̶e mau chaarea b̶uu biꞌia ũrid̶amera. 32Maarãba biꞌia kuitaa panuu Dachi Akõreba chi maka wau nuree ãrea kastikai.#1:32 Dachi Akõreba chi maka wau nuree ãrea kastikai. Griego bed̶ead̶e naka b̶ʉ kub̶uu: Dachi Akõreba jara b̶uu chi maka wau b̶ee biud̶ai panuu. Maamina ara maka wau nibabadau maud̶e waabenarãba ara mau kĩra kachirua wauduud̶e mau biꞌia b̶uu a kʉ̃risiabadau.

Currently Selected:

Romanos 1: cmi

Highlight

Compare

Copy