Hechos 28

Pablo Malta islad̶e

1Dai iikaa neesid̶aud̶e, kuitaasid̶au mau iujãa isla b̶uu Malta abadau. 2Chi ariabenarãba dai ãrea biꞌia irsibisid̶au. Kui che nub̶uud̶eeba maud̶e kũrasãa nub̶uud̶eeba ãchiba tʉbʉ aoko nub̶ud̶aped̶a daimaa jarasid̶au tʉbʉ kãd̶e need̶amera. 3Pabloba bakuru põasãa araa peped̶a chi tʉbʉ aoko nub̶uud̶e jirakuasii. Maabae wãsiaba dama arabena wãaruuba Pablo juad̶e kaa jira b̶eesii. 4Mau damaba Pablo juad̶e jirab̶u unusid̶aud̶e chi mau islabid̶arãba ãchi chiya berrea bara b̶eesii: «¡Jãu ẽbẽra mia beabariibʉ! Mard̶e biubasmina, Dachi Akõre kĩra nii wẽraba#28:4 Dachi Akõre kĩra nii wẽraba. Chi Maltad̶ebenamaarã, mau chi «Dachi Nebʉra Jipa Ichiabarii» Dachi Akõre kĩra nii wẽra abachid̶au. ichi ida chokae nibabiibai».

5Maud̶e Pabloba chi dama tʉbʉd̶e neapetasii maud̶e ichi kachirua b̶eebasii. 6Jomaurãba ichia duanasii Pablo ooroi kuitaa maebʉrã maka b̶uud̶e biui kuitaa, maamina maka ichia panuud̶e Pablo b̶istĩika bid̶a kachiruabasii. Maud̶eeba ãchiba kʉ̃risia june kũrisiad̶aped̶a jarasid̶au Pablo dachi akõre nii.

7Mau islad̶e chi mechiu Publio abachid̶au. Mau Publioba dai panuu kaita drua uru b̶uasii. Mauba dai ichi ded̶e ewari õbea ãrea biꞌia irsibisii. 8Maka panuud̶e Publio akõre ãmi che b̶uud̶eeba maud̶e kʉa b̶uud̶eeba kʉd̶ad̶e b̶uasii. Maud̶e Pabloba mau ichiad̶e wãsii. Dachi Akõremaa ʉtaa id̶iped̶a ichi jua ʉ̃rʉ kub̶uped̶a aribiabisii. 9Maud̶eeba waabenarã ẽpermo nuree neeped̶aad̶a Pabloba aribiabiasii. 10Mau ẽbẽrarãba dai chi mechiurã kĩra biꞌia wausid̶au. Waya jãbad̶e atausid̶aud̶e dai wãꞌãe panad̶a ãchiba joma deasid̶au.

Romad̶e neeped̶aad̶a

11Jed̶ako õbea bad̶akare, dai jãba Alejandría puurud̶ebenad̶e atausid̶au. Mau jãba islad̶e jed̶ako õbea b̶uasii kui pũatu baraa chebarii ewari basiid̶eeba. Chi jãba kũumaa Dachi Akõre kĩra juaba eraped̶aad̶a ome topanasid̶au, Romad̶ebenarã akõre mechiurã Cástor maud̶e Pólux abadau.#28:11 Chi nuree kartad̶e naka b̶ʉ kub̶uu: Dióscuros. Mau jara b̶uu mau ome dachi akõre mikisu basii. Mau ewarid̶e ẽbẽrarãba ãchi Dachi Akõre kĩra juaba kaped̶aad̶a jãba kũd̶e waubachid̶au. 12Wãaduud̶e Siracusa puurud̶e neesid̶au. Ewari õbea aria panasid̶au. 13Mau puurud̶ebena dai mar iikaa kaita wãaduud̶e Regio puurud̶e basid̶au. Norema surd̶ebena chi pũatu pũa kob̶eesiid̶eeba, mau norema Puteoli puurud̶aa neesid̶au. 14Aria daiba chi nuree ãbarã unusid̶au. Maarãba daimaa jarasid̶au ãchi baara 7 ewari panad̶amera.

Maad̶akare Roma puurud̶aa wãsid̶au. 15Ãbarã Romad̶ebenaba dai wãaduu ũrisid̶aud̶e biꞌia irsibid̶e neesid̶au. Waabenarã Apio puurud̶aa neesid̶au maud̶e waabenarã Tres Taberna puurud̶aa neesid̶au. Pabloba maarã unusiid̶e Dachi Akõremaa ichíturu kid̶ibai aped̶a, maarã kakua kĩrajʉʉsii. 16Roma puurud̶e neesid̶aud̶e chi jʉ̃a duanuu kokoroarã jaradea ua b̶uabarii juad̶e duanusii.#28:16 Chi jʉ̃a duanuu kokoroarã jaradea ua b̶uabarii. Griego bed̶ead̶e chi b̶ee kartad̶e mau wãꞌãe. Ichiba Pablo du ab̶a ichi ded̶e ida b̶eebisii. Kokoroa ab̶a b̶usii ichi nu b̶uamera.

Pabloba Romad̶e chi nuree judiorãmaa jarad̶a

17Ewari õbea basiid̶e Pabloba Romad̶ebena judiorã chi mechiurã iubiasii. Joma imisid̶aud̶e Pabloba jarasii:

—Ãbarã, mʉ ab̶au bid̶a dachi judiorãmaa biꞌiwãe wau b̶uasmina, maud̶e dachi nabẽraed̶ebenarãba waubadau kachirua berreawẽa b̶uasmina, mʉ Jerusalend̶e jʉ̃a b̶ud̶aped̶a, maabae romad̶ebenarã juad̶e b̶usid̶au. 18Romad̶ebenarãba mʉʉmaa ãrea id̶isid̶aud̶e mʉ nebʉraswãe nii unusid̶au, mʉ bead̶ai baita. Maud̶e mʉ enatad̶ai kʉ̃ria panasid̶au. 19Maamina judiorãba mau kʉ̃riad̶aabasiid̶eeba, mʉʉba chi chuburia id̶isii chi Romad̶ebena chi aude mechiumaa mʉ nebʉra ichiamera. Mau waubasii mʉʉba ara mʉ judiorã puurud̶ebenarã jidea kʉ̃ria b̶uasiid̶eeba. 20Maud̶eeba mʉʉba machi unu kʉ̃ria b̶uasii machi ome berreai baita. Dachi Akõreba Dachi Karibabarii deai jarad̶a joma israeld̶ebenarãba esed̶au panuu.#28:20 Griego bed̶ead̶e nau sid̶a jara b̶uu: Mʉʉba ijãa b̶uu biud̶arã chokae jiradud̶ai joma israeld̶ebenarãba ijãa panuu kĩra. Hechos 23:6; 24:15; 26:6-8. Ichi kakua mʉ naka kaenaba jʉ̃ b̶uu.

21Maud̶e ãchiba jarasid̶au:

—Judead̶ebenarãba daimaa bichi ʉ̃rʉbena karta urubʉid̶awẽa panuu. Dachi ãbarã judiorã ab̶au bid̶a jãmauba neewẽa b̶uu, bichi ʉ̃rʉbena kachirua berreai baita. 22Maamina daiba kuitaa panuu joma druacha mau kʉ̃risia wid̶i ʉ̃rʉbena kachirua berrea panuu. Maud̶eeba ũri kʉ̃ria panuu bichiba saka kʉ̃risia b̶uu.

23Maud̶e ãchiba ewari ab̶a b̶usid̶au. Mau ewari neesiid̶e ẽbẽrarã ãrea Pablo b̶uumaa neesid̶au. Daped̶eed̶ebena ab̶a kewaraad̶aa Pabloba berreamaa b̶uasii Dachi Akõreba ichid̶irã ichi juad̶e ua b̶uu ʉ̃rʉbena. Moisesba b̶ʉd̶ad̶eeba maud̶e Dachi Akõre baita berreabadaurãba b̶ʉped̶aad̶ad̶eeba jaradea b̶uasii Jesusd̶e ijãad̶amera. 24Pabloba jarad̶a chi nureeba ijãasid̶au, maamina waabenarãba ijãad̶aabasii. 25Maud̶eeba kĩru berread̶aped̶a wãuriiduu basii. Maud̶e Pabloba naka jarasii:

—Dachi Akõre Jauriba machi nabẽraed̶ebenarãmaa biawãra bed̶ea Dachi Akõre baita berreabarii Isaiasd̶eeba naka jarasii:

26“Naarã puurumaa naka jarad̶e wãse:

Machiba ũri panumina kuitaad̶aabai. Ãrea unu panumina kuitaad̶aabai.

27Ãchiba sõd̶eeba poyaa kuitaad̶awẽe maud̶e kʉʉrʉ kiape nureed̶eeba ũrid̶awẽe maud̶e dauba biꞌia unud̶awẽe.

Maka duanuuwãe basirã, unud̶ai basii, ũrid̶ai basii maud̶e sõd̶eeba kuitaad̶ai basii.

Maabae mʉʉd̶e ijãad̶aped̶a mʉʉba ãchi aribiabiai basii”.#Isaías 6:9-10.

28»Jãu kuitásturu: Dachi Akõreba dachi karibai ʉ̃rʉbena jara nuree judiowãerãmaa bʉisii. Ãchiba mau biꞌia ũrid̶ai.

29Pabloba maka jarasiid̶e judiorã ãchi du ab̶a kĩru berrea panuu ãyaa wãurisid̶au.#28:29 Griego bed̶ead̶e chi b̶ee kartad̶e mau versículo wãꞌãe.

30Mau maad̶akare Pablo año ome Romad̶e b̶uasii. Chi de chibarimaa chi nejarra deabachii aria b̶uai baita. Chi ichi ichiad̶e wãaduu joma biꞌia irsibibachii. 31Ichiba wapeawẽa berreabachii Dachi Mechiu Jesucristod̶eeba, Dachi Akõreba ichid̶irã ichi juad̶e ua b̶uu ʉ̃rʉbena. Maud̶e ab̶au bid̶a ichimaa makarã́bad̶e ad̶aka basii.

Currently Selected:

Hechos 28: cmi

Highlight

Compare

Copy