Hebreos 4

1Dachi Akõreba biawãra jara b̶uu dachi wabid̶a ichiba kʉrrjĩrubiaimaa poyaa wãd̶ai panuu. Maamina kauwa panásturu. Makawãebʉrã machid̶ebena ab̶a bid̶a aria wãabai. 2-3Chi bed̶ea bia Dachi Akõreba kʉrrjĩrubiai ʉ̃rʉbena dachiba ũrisid̶au nabẽraed̶ebenarãba ũriped̶aad̶a kĩra. Dachiba sõd̶eeba ijãa panuud̶eeba Dachi Akõreba kʉrrjĩrubiaimaa wãd̶ai. Maamina nabẽraed̶ebenarãba ũrid̶aped̶a ijãad̶aabasiid̶eeba mau bed̶eaba karibaabasii. Ãchi ʉ̃rʉbena Dachi Akõreba naka jarasii:

«Kĩru b̶uud̶e mʉʉba biawãrad̶eeba naka jarasii: “Mʉʉba kʉrrjĩrubiaimaa jãarã wãd̶aabai”».#Salmos 95:11.

Maka jarasii nau iujãa waud̶ad̶eed̶ebena ichiba waui b̶uad̶a joma uru b̶umina.#4:2-3 Ichiba waui b̶uad̶a. Mauba kuitaabi b̶uu Dachi Akõreba dachi kʉrrjĩrubiai sid̶a wausii. 4Dachi Akõre bed̶ead̶e bari panabadau ewari ʉ̃rʉbena naka b̶ʉ kub̶uu:#4:4 Bari panabadau ewari. Griego bed̶ead̶e naka b̶ʉ kub̶uu: séptimo día.

«Dachi Akõreba joma mau wau b̶uasiid̶eeba 7 ewarid̶e kʉrrjĩrusii».#Génesis 2:2.

5Maamina Dachi Akõreba ichi bed̶ead̶e naka jara b̶uu:

«Mʉʉba kʉrrjĩrubiaimaa jãarã wãd̶aabai».#Salmos 95:11.

6Chi bed̶ea bia Dachi Akõreba kʉrrjĩrubiai ʉ̃rʉbena naed̶e ũriped̶aad̶aba ijãad̶aabasii. Maud̶eeba ichiba kʉrrjĩrubiaimaa need̶aabasii. Maamina chi nuree wabid̶a Dachi Akõreba kʉrrjĩrubiaimaa poyaa need̶ai. 7Maud̶eeba Dachi Akõreba ewari maucha b̶usii ichiba kʉrrjĩrubiaimaa need̶amera. Mau ewari Dachi Akõreba trʉ̃ jarasii «id̶i». Mau ewari b̶usiid̶e ãrea bad̶akare ichiba Davidd̶eeba mau ʉ̃rʉbena berreasii. Mau bed̶ea naed̶e b̶ʉd̶a naubʉ:

«Id̶i Dachi Akõre bed̶ea ũriiduud̶e machi sõ chaarearã́sturu».#Salmos 95:7-8.

8Josueba israeld̶ebenarã Dachi Akõreba biawãra kʉrrjĩrubiaimaa adoed̶a basirã Dachi Akõreba june kʉrrjĩrubiai ʉ̃rʉbena berreabai basii. 9Maud̶eeba bari panabadau ewari ẽbẽrarã Dachi Akõred̶erã baita wabid̶a b̶uu. 10Ẽbẽra Dachi Akõreba kʉrrjĩrubiaimaa wãaruubʉrã, ichiba wau b̶uad̶ad̶ebena kʉrrjĩrui Dachi Akõreba joma wauped̶a kʉrrjĩrud̶a kĩra. 11Maud̶eeba dachiba aude jʉrʉd̶ai panuu Dachi Akõreba kʉrrjĩrubiaimaa wãd̶ai baita. Makarã ab̶a bid̶a b̶aebai chi nabẽrarã ijãaped̶aad̶a b̶aeped̶aad̶a kĩra.

12Biawãra Dachi Akõre bed̶ea chokae nii maud̶e poyaabarii nii. Ichi bed̶ea espada muriacha peed̶ea kĩra b̶uu. Ichi bed̶eaba dachi kʉ̃risia maud̶e dachi sõba wau kʉ̃ria b̶uu joma arakʉd̶e kuitaabiabarii dachi kʉ̃risia, dachi jauri maud̶e dachi sõ id̶u tõoruu kĩra. 13Dachi Akõreba chi ichiba waud̶a joma unubarii. Ab̶a bid̶a wãꞌãe ichiba unukau. Ichiba ne joma dod̶aa unubarii, dachiba mera uru panuu sid̶a arakʉd̶e unubarii. Ichiba ichiaruud̶e joma dachiba wauped̶aad̶a ichimaa jarad̶ai.

Jesús dachi Paare Mechiu

14Dachi Akõre Warr Jesús, dachi Paare Mechiu bajãad̶aa wãsii. Ichid̶e ijãa panuu a panuud̶eeba biawãra ijãa panad̶ai panuu. 15Jesús dachi Paare Mechiuba kuitaa b̶uu dachi meserãaswãe nuree. Jʉbawãe niiba mau kachiruad̶e b̶aebii chaa b̶uasii dachi kachiruad̶e b̶aebii chaa b̶uabarii kĩra. Makasmina Jesusba kachirua waubasii. 16Maud̶eeba Dachi Akõremaa wapead̶awẽa id̶id̶ai panuu ichi rey ãkau kub̶uumaa ara kaita wãaduu kĩra. Maka ichiba dachi kĩra chuburiai maud̶e ichiba karibamera ʉtaa id̶iiduud̶e ichi sõbiad̶eeba karibai.

Currently Selected:

Hebreos 4: cmi

Highlight

Copy

Compare