Hebreos 2

Kauwa panásturu Cristo ida b̶ud̶aabai baita

1Maud̶eeba chi biawãra bed̶ea ũriped̶aad̶ad̶e kauwa ãrea nibad̶ai panuu ãyaa wãrãad̶amera. 2Dachi Akõreba naed̶e waubi b̶uad̶a bed̶ea angelerãd̶eeba deasii. Mau bed̶ea ẽbẽrarãba joma ũribaba waud̶ai panasii. Joma chi mau bed̶ea waud̶aka bad̶a, maud̶e kʉ̃riad̶aa bad̶a sid̶a Dachi Akõreba kastikakuabachii ara chi kachirua wauped̶aad̶a kĩra. 3Ara mau kĩra Dachi Akõreba karibai ʉ̃rʉbena bed̶ea dachiba ida b̶uuduubʉrã, ¿Dachi Akõreba kastikaid̶ebena dachirã saka karibad̶aima? Mau bed̶ea ãrea biꞌia b̶uu Dachi Mechiu Jesusba naed̶e jaradeasii. Chi ũriped̶aad̶aba dachimaa mau bed̶ea biawãra abachid̶au. 4Mau awara Dachi Akõreba ẽbẽrarãba ne poyaa waud̶akau mechiu aꞌawaraa waubiasii. Ichiba kʉ̃ria b̶uad̶a kĩra ichi Jauriba waubi b̶uu ichid̶irãcha dead̶akasii. Joma maud̶eeba kuitaabiasii mau bed̶ea biawãrabʉ.

Jesucristo dachi kĩra nibad̶a

5Chi drua wid̶i neei b̶uu daiba jara panuu,#2:5 Chi drua wid̶i neei b̶uu daiba jara panuu. Hebreos 1:10-12. Dachi Akõreba angelerã juad̶e mau b̶uubasii. 6Maumaarã Dachi Akõre bed̶ead̶e naka b̶ʉ kub̶uu:

«Chacha, mukĩra ¿kãarema, bichiba mau ʉ̃rʉbena kʉ̃risiai baita?

Ẽbẽra#2:6 Ẽbẽra. Griego bed̶ead̶e naka b̶u kub̶uu: ẽbẽra warr. ¿kãarema, bichiba mau nui baita?

7Bichiba chi mau angelerã audeara kaebeu b̶usii.

Nau iujãad̶e mau biꞌia b̶usii maud̶e chi mechiu b̶usii».#2:7 Griego bed̶ead̶e chi b̶ee kartad̶e nau sid̶a b̶ʉ kub̶uu: Mau b̶usii joma bichiba waud̶a ichi juad̶e ua b̶uamera.

8Bichiba joma ichi juad̶e b̶usii.

Dachi Akõreba maka joma ichi juad̶e b̶usiid̶eeba, ichi juad̶e b̶uubad̶a wãꞌãe. Daiba wabid̶a unud̶aabai joma ichi juad̶e b̶uu. 9Maamina Jesús unu panuu. Dachi Akõreba ichi angelerã audeara nau iujãad̶e kaebeu b̶usii. Dachi Akõreba ichi sõbiad̶eeba maka wausii Jesús jomaurã kakua biumera. Ãrea biꞌiwãe b̶uaped̶a biusiid̶eeba Dachi Akõreba ichi biꞌia b̶usii maud̶e chi mechiu b̶usii.

10Dachi Akõreba joma wausii. Ichid̶eeba joma duanuu. Dachi Akõremaarã biꞌia b̶uasii Jesús ãrea biꞌiwãe b̶uasii, Dachi Jipa Karibabarii nibamera. Ichid̶eeba Dachi Akõreba ichi warrarã ãrea jʉrʉ adausii ichi biꞌia irsibid̶amera. 11Jesusba ẽbẽrarã biꞌia b̶ubarii Dachi Akõre baita. Ichiba, mau ẽbẽrarã bid̶a arab̶au Akõre uru panuu. Maud̶eeba Jesús kĩra nejasiakau ãchi ichi ãbarã ai baita. 12Dachi Akõre bed̶ead̶e naka b̶ʉ kub̶uu:

«Mʉʉba bichi ʉ̃rʉbena mʉ ãbarãmaa berreai. Joma araa ãbua imiiduud̶e mʉʉba bichi ʉ̃rʉbena biꞌia berreai».#Salmos 22:22.

13Maud̶e naka b̶ʉ kub̶uu:

«Mʉʉba ichid̶e ijãa b̶uai».#Isaías 8:17.

Maud̶e nau sid̶a b̶ʉ kub̶uu:

«Mʉ nama b̶uu, maud̶e warrarã Dachi Akõreba mʉʉmaa dead̶a mʉ ome ãbua duanuu».#Isaías 8:18.

14Maarã kiuru maud̶e oa nureed̶eeba Jesús sid̶a arab̶aud̶e maarã ẽbẽra kĩra neesii ichi biuruuba jʉbawãe nii poyaai baita. Jʉbawãe niiba poyaa biubiabarii. 15Jesusba jʉbawãe nii poyaasiid̶eeba, biud̶ai baita wapea nuread̶a ichiba joma karibakuasii. Ewaricha biud̶ai wapea panuud̶eeba ãchi kĩra nomaa panasid̶au bari trajabadaurã kĩra. 16Biawãra Jesusba angelerã karibad̶e neebasii, maumaarã chi Abraham kĩra Dachi Akõred̶e ijãabadaurã karibad̶e neesii.#2:16 Griego bed̶ead̶e naka b̶ʉ kub̶uu: Abrahamd̶ebena imiiduurã karibad̶e neesii. 17Ichi neesiid̶e ne jomad̶e dachi kĩra nibasii, ẽbẽrarã kĩra chuburiabarii Paare Mechiu bai baita.#2:17 Dachi kĩra. Griego bed̶ead̶e naka b̶ʉ kub̶uu: ichi ãbarã kĩra. Biawãra Dachi Akõre daad̶e joma jipa waubarii b̶eesii. Maud̶eeba ara ichi ida beabisii ẽbẽrarãba kachirua waubadau Dachi Akõreba kĩraba b̶uarãamera. 18Jʉbawãe niiba waa jara b̶uasiid̶e Jesús ãrea biꞌiwãe b̶uasii. Maud̶eeba Jesusba chi jʉbawãe niiba waa jarabia b̶uabarii aid̶ai kuitaa b̶uu.

Currently Selected:

Hebreos 2: cmi

Highlight

Copy

Compare