Hebreos 1

Dachi Akõre Warr mechiu nii

1Nabẽraed̶e Dachi Akõreba dachi nabẽrarãmaa b̶es ãrea bed̶ea ne jomad̶e berreabachii. Ichi baita berreabadaurãd̶eeba maka berreabachii. 2Maamina nau kaad̶ebena ewarid̶e ichi Warrd̶eeba dachimaa berreasii. Ichi Warrd̶eeba Dachi Akõreba joma wausii maud̶e mau b̶usii joma uru b̶uamera. 3Ichi Warrba Dachi Akõre kĩrawãrea ted̶echoa unubiabarii. Ara ichid̶eeba Dachi Akõre saka nii kuitaabiabarii. Ichi bed̶ea poyaabarii b̶uuba joma waud̶a ichi juad̶e arakʉd̶e uru b̶uu.

Ichiba dachi kachirua jeraaped̶a Dachi Akõre Mechiu jua biare bajãad̶e akʉ b̶eesii. 4Dachi Akõreba angelerã audeara ichi mechiu b̶usii. Maka Dachi Akõreba ichi trʉ̃ad̶a ãchi trʉ̃ad̶a audeara biꞌia b̶uu. 5Dachi Akõreba ángel ab̶aumaa bid̶a naka jaraabasii:

«Bichi mʉ Warrbʉ. Id̶i bichi mʉ Warr aaruu».#1:5 Id̶i bichi mʉ Warr aaruu. Griego bed̶ead̶e naka b̶ʉ kub̶uu: Id̶i mʉʉba bichi unusii maebʉrã Id̶i mʉ bichi akõre basii. Salmos 2:7.

Maud̶e jãarã ʉ̃rʉbena nau jaraabasii:

«Mʉ ichi akõre bai, maud̶e ichi mʉ warr bai».#2 Samuel 7:14.

6Maud̶e Dachi Akõreba ichi Warr ara ab̶a nii nau iujãad̶aa bʉisiid̶e naka jarasii:

«Joma Dachi Akõre angelerãba Maumaa biꞌia berread̶ai panuu».

7Angelerã ʉ̃rʉbena Dachi Akõre bed̶ead̶e naka b̶ʉ kub̶uu:

«Ichiba angelerã wausii pũatu kĩra nuread̶amera.#1:7 Griego bed̶ead̶e pũatu maud̶e jauri arab̶au bed̶eabʉ. Maud̶eeba waabenarã traducciond̶e mau versiculod̶e naka b̶ʉ kub̶uu: Ichi angelerã wausii jauri nuread̶amera.

Maarã wausii tʉbʉ aoko kĩra nuread̶amera».#Salmos 104:4.

8Maamina ichi Warr ʉ̃rʉbenáturu Dachi Akõreba naka jarasii:

«Dachi Akõre, bichi ewaricha jomaurã rey b̶uai. Bichi puuru jipa ua b̶uai.

9Bichiba chi jipa waubadau kʉ̃riasii. Kachirua kĩramaasii.

Maud̶eeba Dachi Akõre, bichi Akõreba joma bichi baara panuurã audeara bichi chi mechiu b̶usii. Maka bichi ãrea kĩrajʉʉbisii».#Salmos 45:6-7.

10Maud̶e naka jarasii:

«Dachi Mechiu, arab̶aed̶eed̶e bichiba nau iujãa maud̶e bajãa wausii.

11Joma mau wãꞌãe bai maamina arab̶aud̶e bichi b̶uai. Mau joma chi sore bai, paru chi sore babarii kĩra.

12Paru sore ẽetaped̶a chiwid̶i jʉ̃ʉruu kĩra bichiba joma mau ãyaa b̶uped̶a chiwid̶i waui.

Maamina bichi ara bichíturu nibai. Bichi biukau».#Salmos 102:25-27.

13Dachi Akõreba ángel ab̶aumaa bid̶a jaraabasii:

«Mʉ jua biare akʉ b̶eese ab̶a bichi kĩramaarã mʉʉba joma bichi juad̶e b̶uuruud̶aa».#1:13 Bichi juad̶e b̶uuruud̶aa. Griego bed̶ead̶e naka b̶ʉ kub̶uu: bichi jʉ̃rʉ ekare b̶uuruud̶aa. Salmos 110:1.

14Makarã, ¿Angelerã kairãma? Maarã joma Dachi Akõre baita nureed̶eeba, ãchi bʉikabarii chi ichiba karibai b̶uurã aid̶ad̶amera.

Currently Selected:

Hebreos 1: cmi

Highlight

Copy

Compare