Hechos 9

Sauloba Jesusd̶e ijãad̶a

1-2Mau ewarid̶e Sauloba wabid̶a Dachi Mechiud̶e ijãa nuree kenai baita b̶uabachii. Paare mechiu b̶uumaa wãped̶a id̶isii karta b̶ʉkua deamera. Mau karta Damasco puurud̶e judiorã araa ãbua imibadau decha adooi kʉ̃risia b̶uasii. Kartad̶e b̶ʉ b̶uasii chi ãchi tãed̶e Jesús Od̶e nibad̶a mukĩrarã maud̶e wẽrarã sid̶a jidauped̶a Jerusalend̶aa joma adooi b̶uu, jʉ̃a bʉikad̶ai baita. 3Sauloba mau karta adoeped̶a wãsii. Damasco puuru kaita neeruud̶e maka b̶uud̶e bajãad̶ebena ichi ad̶u ʉ̃d̶aa puri chebiwãsii. 4Mauba Saulo jeed̶a b̶aebisii. Maud̶e bed̶ea ũrisii. Mau bed̶eaba jarasii:

—Saulo, Saulo, ¿sakãe mʉ kachirua waui baita wãraa b̶uma?

5Maud̶e Sauloba id̶isii:

—Mʉ Mechiu, ¿bichi kaima?

Chi bed̶eaba panausii:

—Mʉ Jesusbʉ. Chi bichiba mʉ kachirua waui baita wãraa b̶uu. Chi subariimaa ʉ̃rʉ tʉaruud̶e, bichi ara du ab̶a puꞌuai.#9:5 Chi subariimaa ʉ̃rʉ tʉaruud̶e, bichi ara du ab̶a puꞌuai. Griego bed̶ead̶e ãrea kartad̶e mau wãꞌãe. 6Jiraduped̶a Damasco puurud̶aa wãse.#9:6 Chi b̶ee kartad̶e versículo 6 naka b̶ʉ kub̶uu: Maabae wapeaba uri kub̶uuba Sauloba naka jarasii. Jamaria ab̶auba jarai bichiba kãare waui b̶uu.

7Chi Saulo ome wãaduu ãrea perasid̶au. Ãchiba bed̶ea ũrisid̶amina ab̶a bid̶a unud̶aabasii. 8Saulo jeed̶abena jiradusii, maamina ichi dau bũasiid̶e, poyaa unuubasii. Maabae chi ichi ome wãaduuba ichi juad̶e jidaud̶aped̶a Damasco puurud̶aa adoesid̶au. 9Aria ichi ewari õbea dau pãriu b̶uasii, kowẽa b̶uasii maud̶e dowẽa b̶uasii.

10Damasco puurud̶e Jesucristod̶e ijãabarii ab̶a Ananías abadau b̶uasii. Dachi Mechiuba mau daumaa unubiiruba naka jarasii:

—¡Ananías!

Ichiba panausii:

—Mʉ nama b̶uu, mʉ Mechiu.

11Dachi Mechiuba jarasii:

—Jiraduped̶a Judas deemaa wãse. Mau de calle Jipa B̶uu abadaud̶e kub̶uu. Ara baaruud̶e jarase bichiba ẽbẽra Saulo Tarso puurud̶ebena ichiad̶e nee b̶uu. Ichiba Dachi Akõremaa ʉtaa id̶imaa b̶uu. 12Mʉʉba ichi unubisii mukĩra Ananias abadau ichimaa neeped̶a ichi ʉ̃rʉ jua kub̶uuruu ichi dauba waya unumera.

13Maud̶e Ananiasba jarasii:

—Mʉ Mechiu, mʉʉba jãu ẽbẽra ʉ̃rʉbena ũri b̶uu. Ãreaba jarabadau Jerusalend̶e ichiba bichi ẽbẽrarã ãrea kachirua wau b̶uu. 14Mau awara paare mechiurã trʉ̃d̶eeba nau puurud̶aa nee b̶uu chi bichid̶e ijãa nuree joma jidau uad̶oi baita.

15Maamina Dachi Mechiuba jarasii:

—Wãse. Mʉʉba ichi jʉrʉ adausii mʉ ʉ̃rʉbena berreamera judiowãerãmaa, ãchi reyrãmaa maud̶e israeld̶ebenarãmaa. 16Mʉʉba ichimaa kuitaabii saka ãrea dauchia jãadua b̶uai b̶uu mʉ ʉ̃rʉbena berreai baita.

17Ara makʉd̶e Ananias Saulo b̶uumaa wãsii. Chi ded̶e ed̶a wãped̶a ichi jua Saulo ʉ̃rʉ kub̶uped̶a jarasii: «Ãba Saulo, Dachi Mechiu Jesús, chi bichiba od̶e unubid̶aba, mʉ neebisii waya bichi dauba unumera maud̶e Dachi Akõre Jaurid̶eeba b̶eemera».

18Ara makʉd̶e Saulo daud̶ebena b̶eda kara kĩra panuu b̶aesid̶au. Maud̶e waya biꞌia unu b̶eesii. Jiraduped̶a boro eabisii. 19Maabae koped̶a kakua waya meserãa b̶eesii.

Saulo Damasco puurud̶e b̶uad̶a

Ewari aribia b̶eebasii Damascod̶ebena Cristod̶e ijãabadaurã baara. 20Maud̶e judiorã araa ãbua imibadau decha ichiba jaradea b̶eesii Jesús biawãra Dachi Akõre Warr nii. 21Joma mau ũriiduuba kuitaa kʉ̃risiad̶aabasii. Ãchiba naka id̶i duanasid̶au: «¿Nauwãeka chi Jerusalend̶e Jesusd̶e ijãabadaurã kenai baita wãraa b̶uad̶a? ¿Nama nee b̶uuwãeka ãchi paare mechiurãmaa jʉ̃a b̶uu adooi baita?»

22Maamina Sauloba ewaricha arakʉd̶e kuitaabiabachii Jesús biawãra Dachi Akõreba Dachi Karibabarii deai jarad̶a. Mauba Damasco puurud̶ebena judiorãba kuitaa kʉ̃risiad̶aabasii.

Saulo miruwãd̶a

23Ewari aribia baaruud̶e judiorã Damasco puurud̶ebenarãba Saulo bead̶ai baita bed̶ea deasid̶au. 24Maud̶eeba ãyadaa maud̶e ẽsabud̶e chi puurud̶e ed̶a wãbadau jʉ̃a panasid̶au. Maamina ãchiba kʉ̃risia panuu Sauloba kuitaasii. 25Maud̶eeba ẽsabud̶aa chi Jesusd̶e ijãabadaurãba Saulo ẽ mechiud̶e ed̶a joad̶aped̶a, maabae chi puuru mooba ad̶u karaad̶a chob̶ea nub̶uud̶e ʉ̃rʉʉba ed̶aa bʉisid̶au.

Saulo Jerusalend̶aa wãd̶a

26Saulo waya Jerusalend̶aa wãsiid̶e chi Jesusd̶e ijãabadaurã ome b̶uai kʉ̃ria b̶uasii.#9:26 Saulo Jerusalend̶aa waya wãi naed̶e drua awarad̶e año õbea b̶eesii. Gálatas 1:17-19. Maamina ichi wapea panasid̶au. Ãchiba ijãad̶aabasii ichiba biawãra Jesusd̶e ijãa b̶uu. 27Maamina Bernabeba Saulo adoesii chi Jesusba bʉid̶arãmaa. Maabae ichiba nebʉrʉsii saka Sauloba Dachi Mechiu od̶e unusii, Dachi Mechiu ichi ome berread̶a maud̶e saka Sauloba Damasco puurud̶e Jesús ʉ̃rʉbena wapeawẽa berreabachii. 28Maka Saulo ãchi ome b̶eesii. Maud̶e Jerusalend̶e Dachi Mechiu Jesús ʉ̃rʉbena wapeawẽa berrea nibabachii. 29Judiorã chi griego bed̶ead̶e berreabadaurã ome Jesús ʉ̃rʉbena berreabachii maamina ichi bead̶ai kʉ̃ria panasid̶au. 30Ãbarãba mau kuitaasid̶aud̶e Saulo Cesarea puurud̶aa adoesid̶au. Maad̶akare ichi puuru Tarso puurud̶aa bʉisid̶au.

31Maumisa Judea druad̶e, Galilea druad̶e maud̶e Samaria druad̶e ãbarã jirukaraayuwãe duanasid̶au maud̶e ne baraakuasid̶au. Dachi Mechiu wapea panuud̶eeba nibasid̶au maud̶e Dachi Akõre Jauri poyaad̶eeba ãbarã aude baraasii.

Ẽbẽra Eneas abadau aribiad̶a

32Mau ewarid̶e Pedro ẽbẽrarã Dachi Akõred̶erã ichia nibabachii joma mau druad̶e. Ewari ab̶a ãbarã Lida puurud̶e nuree ichiad̶e wãsii. 33Aria ẽbẽra Eneas abadau unusii. Mau ẽbẽra b̶akara bʉʉ niid̶eeba 8 año kʉd̶ad̶e b̶uasii. 34Maud̶e Pedroba jarasii:

—Eneas, Jesucristoba bichi aribiabisii. ¡Jiraduse! Bichi kʉd̶a tõse.

Ara makʉd̶e Eneas jiradusii. 35Lida puurud̶e panabadaurã maud̶e Sarón druad̶e panabadaurã jomaurãba Eneas aribiabid̶a unusid̶aud̶e, Dachi Mechiud̶e ijãasid̶au.

Dorcas chokae jiradud̶a

36Mau ewarid̶e Jesusd̶e ijãabarii wẽra Tabita abadau Jope puurud̶e b̶uasii. Griego bed̶ead̶e ichi trʉ̃ Dorcas abachid̶au.#9:36 Tabita. Mau trʉ̃ arameo bed̶ead̶e Dorcas abadau. Griego bed̶ead̶e jara panuu «b̶ii». Mau neekauba ne biꞌia wau b̶uabachii. Chi nejarr barauwãe nuree ãrea aid̶akuabachii. 37Ewari ab̶a Dorcas ẽpermaped̶a biusii. Maabae chi kakua jeraad̶aped̶a pieza ʉtʉbenad̶aa adoesid̶au. 38Jope puuru Lida kaita b̶uasii. Chi Jesús baara nibabadaurãba ũrisid̶au Pedro Lidad̶e b̶uu. Maud̶eeba ẽbẽra ome ichimaa bʉisid̶au naka chi chuburia id̶id̶amera: «Daimaa isa neese».

39Ara makʉd̶e Pedro ãchi ome wãsii. Neesid̶aud̶e ichi chi biud̶a nub̶uumaa adoesid̶au. Aria joma pẽdrãarã jẽa duanasid̶au. Ãchiba Pedromaa Dorcasba paru kaapirukua b̶uad̶a unubisid̶au. 40Maud̶e Pedroba joma awara wãbiasii. Õdarrd̶e kob̶eeped̶a Dachi Akõremaa ʉtaa id̶isii Dorcas chokae jiradubimera. Ʉtaa id̶iped̶a chi biud̶a nub̶uumaa ichiaruud̶e jarasii:

—Tabita, ¡jiraduse!

Ara makʉd̶e mau chi dau bũasii. Pedro unusiid̶e akʉ b̶eesii. 41Pedroba ichi juad̶e jidauped̶a jiradubisii. Maabae ãbarã maud̶e pẽdrãarã iukuaped̶a Dorcas chokae jiradud̶a unubiasii. 42Joma Jope puurud̶e mau ʉ̃rʉbena kuitaasid̶au. Maka ãreaba Dachi Mechiud̶e ijãasid̶au. 43Maabae Pedro Jope puurud̶e ãrea b̶eesii ẽbẽra Simón abadau ded̶e. Mau Simonba ãnimara e poabibarii basii.

Currently Selected:

Hechos 9: cmi

Highlight

Compare

Copy