Hechos 13

Dachi Akõre Jauriba Saulo maud̶e Bernabé bʉikad̶a

1Ãbarã Antioquía puurud̶ebena tãed̶e Dachi Akõre baita berreabadaurã, maud̶e Cristo ʉ̃rʉbena jaradeabadaurã nureasii. Bernabé, Saulo, Lucio Cirened̶ebena maud̶e Simón b̶uasii. Simón trʉ̃ «Chi Parr» abachid̶au. Manaén sid̶a b̶uasii. Ichi Galilea druad̶ebena jaradea ua b̶uabarii Herodes ome ãbua warisii.#13:1 Galilea druad̶ebena jaradea ua b̶uabarii Herodes. Mau Herodes «Antipas» abachid̶au.

2Earab̶a ãbarãba chiko kod̶akau ewari wau panuud̶e Dachi Mechiumaa biꞌia berrea panasid̶au. Maka panuud̶e Dachi Akõre Jauriba ãchimaa jarasii: «Bernabé maud̶e Saulo mʉʉba iusii. Maud̶eeba ãchi awara adáusturu chi mʉʉba waubia b̶uu waud̶amera».

3Maarãba chiko kod̶akau ewari waud̶aped̶a, Dachi Akõremaa ʉtaa id̶id̶aped̶a ãchi jua Bernabé maud̶e Saulo ʉ̃rʉ kub̶usid̶au. Maabae bʉisid̶au.

Saulo maud̶e Bernabé wãped̶aad̶a

4Ãchi Dachi Akõre Jauriba bʉikasiid̶eeba Seleucia puurud̶aa wãsid̶au. Maad̶akare jãbad̶e Chipre isla kub̶uud̶aa wãsid̶au. 5Salamina puurud̶e need̶aped̶a judiorã araa ãbua imibadau decha Dachi Akõre bed̶ea jaradeasid̶au. Ãchi aid̶ai baita Juan Marcos ãchi baara nibasii.#13:5 Griego bed̶ead̶e naka b̶ʉ kub̶uu: Juan. Ichi Bernabé ẽbẽrarãd̶ebena basii. Colosenses 4:10.

6Joma mau druad̶e nid̶aud̶e Pafos puurud̶e neesid̶au. Aria judio Barjesús abadau unusid̶au. Mau Barjesús jaibana basii. Setaa jarabachii ichi Dachi Akõre baita berreabarii. 7Ichi Chipred̶ebena chi jaradea ua b̶uabarii Sergio Paulo abadaumaa b̶uabachii. Mau Sergio Paulo kʉ̃risia kuitaa b̶uasii. Ewari ab̶a ichiba Bernabé maud̶e Saulo iubisii Dachi Akõre bed̶ea ũri kʉ̃ria b̶uasiid̶eeba. 8Maamina ãchiba jaradea panuud̶e jaibana Barjesusba setaa jarabachii chi jaradea ua b̶uabariiba Dachi Akõre bed̶ea ijãarãamera. (Barjesús trʉ̃ griego bed̶ead̶e Elimas abadau). 9Maabae Saulo, Dachi Akõre Jauri ichi baara b̶uabachiid̶eeba, Elimasmaa apii ichiaped̶a naka jarasii:

10—Jʉbawãe nii warr, ¡bichiba ne joma jipa b̶uu kʉ̃riakau! ¡Kachirua waui baita b̶uabarii maud̶e setaa jarabarii! ¿Sakãe ara bichiba Dachi Mechiu biawãra bed̶ea seta a b̶uma? 11Jãabae dai Mechiuba ichi poyaad̶eeba bichi nebʉra kastikai. Bichi dau pãriu b̶eei. Ewari ãrea b̶uai ʉmada unuwẽa b̶ee.

Ara makʉd̶e Elimas dau pãriusii maabae ichi juad̶e erta inibad̶ai jʉrʉ kob̶eesii. 12Sergio Pauloba mau unusiid̶e ãchiba Dachi Mechiu ʉ̃rʉbena jaradea panuu ãrea biꞌia ũrisiid̶eeba ijãasii.

Pisidia druad̶aa wãped̶aad̶a

13Pablo maud̶e ichi ome nibad̶a Pafos puurud̶ebena Panfilia druad̶aa jãbad̶e wãsid̶au. Aria puurud̶e neesid̶au. Maamina Juan Marcosba ãchi b̶ʉiped̶a Jerusalend̶aa waya wãsii.#13:13 Mau Juan Marcos waya wãd̶a Pabloba biꞌiwãe b̶uu unusii. Hechos 15:38.

14Ãchi Perged̶e panaped̶a wãsid̶au Antioquía puurud̶aa. Mau puuru Pisidia druad̶e b̶uu. Aria bari panabadau ewarid̶e judiorã araa ãbua imibadau ded̶e ed̶a wãd̶aped̶a akʉ paneesid̶au. 15Maabae chi mechiurãba chi Moisesba b̶ʉd̶a maud̶e Dachi Akõre baita berreabadaurãba b̶ʉped̶aad̶a jĩwa ed̶a jarasid̶au. Maabae Pablo maud̶e Bernabé akʉ panuumaa naka jarad̶e wãbiasid̶au:

—Ãbarã, machiba dai aid̶ad̶ai baita bed̶ea jarad̶ai uru panuubʉrã, jarásturu.

16Maud̶e Pablo jiraduped̶a juaba jarasii joma chũpead̶amera. Maabae jarasii:

—Israeld̶ebena maud̶e judiowãerã Dachi Akõre wapea nureerã, ũrísturu: 17Israeld̶ebena Dachi Akõreba dachi nabẽraed̶ebenarã jʉrʉ adausii. Ãchi Egipto druad̶e ãibena druad̶ebena kĩra panasid̶aud̶e Dachi Akõreba puuru mechiu neebiasii. Maabae ichi poyaad̶eeba ãchi Egipto druad̶ebena adaukuasii.#Éxodo 1:7; 12:51. 18Mau maad̶akare ãchi drua sirua wãꞌãe b̶uud̶e Dachi Akõreba ãchi 40 años dauchia jãadua b̶uasii.#13:18 Dauchia jãadua b̶uasii. Griego bed̶ead̶e chi b̶ee kartad̶e naka b̶ʉ kub̶uu: nu b̶uasii. Números 14:34. 19Maabae Canaán druad̶e Dachi Akõreba 7 puuru poyaabipeda ãchi drua dachi nabẽraed̶ebenarãmaa deasii.#Josué 11:15-23. 20Egiptod̶aa wãped̶aad̶ad̶ebena ab̶a ãchi drua adauduud̶aa 450 años b̶uasii.#13:20 Griego bed̶ead̶e nau sid̶a jara b̶uu «Maabae 450 año panuud̶e Dachi Akõreba ichi puurumaa ãchi juezrã deabachii».

»Mau maad̶akare Dachi Akõreba ichi puurumaa juezrã deabachii ab̶a Dachi Akõre baita berreabarii Samuel ewarid̶aa.#Jueces 2:16-19. 21Mau ewarid̶e ãchiba Dachi Akõremaa chi chuburia id̶isid̶au ẽbẽra ab̶a ãchi rey bamera. Maud̶eeba Dachi Akõreba Quis warr Saúl b̶usii.#1 Samuel 8:1-9; 10:23-25. Mau Saulo Benjamind̶ebena need̶a basii. Cuarenta años israeld̶ebenarã rey b̶uasii. 22Maamina Dachi Akõreba Saulo ãyaa wãbiped̶a David b̶usii ãchi rey b̶uamera. David ʉ̃rʉbena Dachi Akõreba naka jarasii: “Mʉʉba Isaí warr David biꞌia unu b̶uu. Mʉʉba waubii kʉ̃ria b̶uu ichiba joma waumera”.#1 Samuel 13:14; Salmos 89:20; Isaías 44:28.

23»Maabae Dachi Akõreba naed̶e jarad̶a kĩra wausii. Ichiba Davidd̶ebena neeped̶aad̶ad̶ebena ab̶a b̶usii israeld̶ebenarã Dachi Karibabarii b̶uamera.#2 Samuel 7:12-16; Salmos 132:11-13,17. Mau ẽbẽra Jesusbʉ. 24Mau Jesús neei naed̶e Juanba joma israeld̶ebenarãmaa jaradea b̶uasii ãchi kachirua ida b̶ud̶aped̶a Dachi Akõremaa need̶amera. Chi maka wauduu ichiba boro eakuabachii. 25Ichi biui ewari ʉ̃rʉ ba b̶uasiid̶e Juanba jarasii: “Machiba mʉ ¿kai kʉ̃risia panuma? Mʉ Dachi Akõreba Dachi Karibabarii deai jarad̶awãema.#Juan 1:20. Maamina chi mʉare neei mʉ audeara chi mechiu nii. Mauba jʉ̃rʉd̶e jʉ̃barii mʉ mau enai baita biꞌiwãe b̶uu”.#Lucas 3:16.

26»Machi ãbarã Abrahamd̶ebena neeped̶aad̶arã maud̶e machi judiowãerã Dachi Akõre wapea nuree, Dachi Akõreba dachimaa mau bed̶ea dachi karibai ʉ̃rʉbena bʉisii.#13:26 Dachimaa. Griego bed̶ead̶e chi b̶ee kartad̶e b̶ʉ kub̶uu: machimaa. 27Jerusalend̶ebenarãba maud̶e ãchi karrarãba Jesús dachi Karibabarii kuitaad̶aabasii. Dachi Akõre baita berreabadaurãba b̶ʉped̶aad̶a bari panabadau ewaricha jĩwa ed̶a jarabadamina ichi ʉ̃rʉbena b̶ʉped̶aad̶a kuitaad̶aabasii. Maumaarã Jesús beabisid̶aud̶e mau bed̶eaba jara b̶uu biawãra wausid̶au. 28Mauba ab̶a bid̶a kãare kachirua waud̶a unud̶aabasmina ãchiba Pilatomaa jarasid̶au beamera. 29Dachi Akõre kartad̶e ichi bead̶ai ʉ̃rʉbena b̶ʉped̶aad̶a joma mau maad̶akare ichi cruzd̶ebena ed̶aa adaud̶aped̶a jau b̶usid̶au. 30Maamina Dachi Akõreba ichi chokae jiradubisii. 31Mau maad̶akare Jesusba ichi baara Galilead̶ebena Jerusalend̶aa wãped̶aad̶arãmaa ichi b̶es ãrea unubiasii. Mau ẽbẽrarãba ichi ʉ̃rʉbena joma israeld̶ebenarãmaa berrea panuu.

32-33»Ara mau kĩra daiba nau bed̶ea bia jara panuu: Dachi Akõre dachi nabẽraed̶ebenarãba ome bed̶ea deasii maud̶e dachi, ãchid̶ebena neeped̶aad̶arã ewarid̶e mau bed̶ea dead̶a joma wausii. Jesús chokae jiradubisii salmo omed̶e b̶ʉ kub̶uu kĩra. Naka jara b̶uu:

“Bichi mʉ Warrbʉ. Id̶i bichi mʉ Warr aaruu”.#13:32-33 Griego bed̶ead̶e naka b̶ʉ kub̶uu: Id̶i mʉ bichi akõre basii. Salmos 2:7. Mau salmod̶e berrea b̶uu Dachi Akõreba ichi Warr israeld̶ebenarã chi Mechiu b̶ʉd̶a ʉ̃rʉbena.

34»Dachi Akõreba Jesús biu b̶uad̶a chokae jiradubisii waya biurãamera. Mau ʉ̃rʉbena ichi kartad̶e naka jarasii:

“Mʉʉba chi Davidmaa karibai jarad̶a machi ome biawãra waui”.#Isaías 55:3.

35Maud̶eeba waabena salmod̶e nau jara b̶uu:

“Mʉ, chi bichi baita bari trajabarii jipa nii bichiba ida b̶eraabiibai”.#Salmos 16:10.

36»David chokae b̶uasiid̶e Dachi Akõreba ichid̶eeba wausii ichiba kʉ̃ria b̶uad̶a kĩra. Maabae David biud̶akare jau b̶usid̶au ichi nabẽraed̶ebenarã jau b̶uped̶aad̶amare. Maabae ichi b̶eraasii. 37Maamina Dachi Akõreba chokae jiradubid̶a b̶eraabasii.

38Maud̶eeba ãbarã, nau kuitásturu: machiba kachirua waubadau Dachi Akõreba Jesusd̶eeba perdonai. 39Moisesba b̶ʉd̶ad̶e b̶ʉ kub̶uu Dachi Akõreba chi dachiba kʉ̃riaduu kachirua waubadau kĩrabaabai. Maamina joma Jesusd̶e ijãaduu ichiba jipa panuu abarii. Mau machimaa jara panuu. 40Kauwa panásturu chi Dachi Akõre baita berreabadaurãba b̶ʉped̶aad̶a machi ome makarãamera. Naka b̶ʉsid̶au:

41“Machiba, chi Dachi Akõreba jara b̶uu ida b̶ubadaurã, ¡ichiásturu! ¡Perásturu! ¡Biústuru!

Mʉʉba machi ewarid̶e ne kachirua waui.

Mau ab̶auba machimaa jaraaruu sid̶a ijãad̶aabai”».#Habacuc 1:5.

42Pablo maud̶e Bernabé judiorã araa ãbua imibadau ded̶ebena wãaduud̶e ẽbẽrarãba chi chuburia id̶isid̶au chi ab̶abena bari panabadau ewari neeruud̶e mau ʉ̃rʉbena berread̶amera.#13:42 Ẽbẽrarãba. Griego bed̶ead̶e chi b̶ee kartad̶e b̶ʉ kub̶uu: judiowãerã nureeba. 43Chi araa ãbua duanad̶a wãꞌãesiid̶e ãrea judiorã maud̶e chi griegorã judiorã kĩra panabadaurã Pablo maud̶e Bernabé baara wãsid̶au. Ãchiba mau ẽbẽrarãmaa ãrea jarasid̶au Dachi Akõreba ichi sõbiad̶eeba ãchi kariba b̶uu ijãa panad̶amera.

44Chi ab̶abena bari panabadau ewarid̶e neeruu, puuru beraa joma araa ãbua imisid̶au chi judiorã araa imibadau ded̶e, Dachi Mechiu bed̶ea ũrid̶ai baita. 45Maamina chi judiorã karrarãba ẽbẽrarã ãrea ãchi ded̶e unusid̶aud̶e Pablo kakua sõd̶e jiwaa duaneesid̶au. Pabloba jaradea b̶uud̶e ãchiba seta abachid̶au maud̶e Pablo ʉ̃rʉbena kachirua berreabachid̶au. 46Mau Pabloba maud̶e Bernabeba wapeawẽa ãchimaa naka jarasid̶au:

—Biawãra daiba machimaa Dachi Akõre bed̶ea naa jarad̶ai panasid̶au. Maamina machiba mau bed̶ea ida b̶u panuud̶eeba maud̶e machimaarã ewaricha Dachi Akõre ome chokae b̶uai kʉ̃riad̶awẽed̶eeba, daiba judiowãerãmaa mau bed̶ea jarad̶e wãd̶ai. 47Daiba maka waud̶amera Dachi Mechiuba naka jarasii:

“Mʉʉba bichi ʉ̃d̶aa kĩra b̶usii judiowãerãba mʉ ʉ̃rʉbena kuitaad̶amera.

Bichiba joma nau druad̶e nureerãmaa kuitaabiai chi mʉʉba karibai ʉ̃rʉbena”».#Isaías 49:6.

48Judiowãerãba mau ũrisid̶aud̶e kĩrajʉʉsid̶au. Ara makʉd̶e chi Dachi Mechiu bed̶ea biꞌia b̶uu asid̶au. Chi Dachi Akõreba ewaricha ichi baara chokae nuread̶ai duanud̶aba ijãasid̶au. 49Maabae Dachi Mechiu bed̶ea joma mau druad̶e jarasid̶au.

50Maamina judiorãba Dachi Akõre wapea nuree wẽrarã chi mechiurãmaa maud̶e mukĩra chi mechiurãmaa jarasid̶au Pablo maud̶e Bernabé kachirua waud̶amera. Maka ãchi puurud̶ebena duabʉisid̶au. 51Mau Pabloba maud̶e Bernabeba puurud̶ebena ioro jora ãchi jʉ̃rʉd̶ebena neapesid̶au Dachi Akõreba kastikai unubiad̶ai baita. Maabae Iconio puurud̶aa wãsid̶au. 52Maamina chi Jesusd̶e ijãabadaurã Antioquiad̶e panuu ãrea kĩrajʉʉ panasid̶au maud̶e Dachi Akõre Jaurid̶eeba panasid̶au.

Currently Selected:

Hechos 13: cmi

Highlight

Compare

Copy