Hechos 14

Iconio puurud̶e panad̶a

1Iconio puurud̶e ãchiba waubadau kĩra Pablo maud̶e Bernabeba judiorã araa ãbua imibadau ded̶e ed̶a wãsid̶au. Ãchiba jaradea panuu kakua ãrea judiorã maud̶e griegorãba Jesusd̶e ijãasid̶au. 2Maamina judiorã Jesús ijãad̶akaurãba judiowãerãmaa chi ãbarã ʉ̃rʉbena kachirua kʉ̃risiabiasid̶au. 3Maamina Pablo maud̶e Bernabé aria aribia panasid̶au. Dachi Mechiuba kariba b̶uu sõd̶eeba ijãa panuud̶eeba ichi ʉ̃rʉbena wapeawẽa jaradeabachid̶au. Maud̶e Dachi Mechiuba ãchi aid̶asii ẽbẽrarãba ne poyaa waud̶akau waud̶amera. Maka kuitaabiasii ichi sõbiad̶eeba ãchiba jaradea panuu biawãra. 4Maamina mau puurud̶ebenarãba aꞌawaraa kʉ̃risia nureasii. Chi nuree judiorã baara panasid̶au maud̶e chi waabenarã Pablo maud̶e Bernabé baara panasid̶au. 5Judiorã maud̶e judiowãerã chi puurud̶ebena karrarã ome bed̶ea deasid̶au Pablo maud̶e Bernabé puꞌuabiad̶aped̶a mooba b̶ata bead̶ai baita. 6Maamina mau kuitaasid̶aud̶e Licaonia druad̶aa miru wãsid̶au. Listra puurud̶aa maud̶e Derbe puurud̶aa wãsid̶au. Joma mau Licaonia druad̶e nibasid̶au. 7Aria chi bed̶ea bia Jesús ʉ̃rʉbena jarabachid̶au.

Listra puurud̶e panad̶a

8Listra puurud̶e ẽbẽra chi naweba adaud̶ad̶eed̶ebena jʉ̃rʉ bʉʉ nii b̶uasii. Maka poyaa nibaka basii. 9Mau ẽbẽraba ũri akʉ b̶uasii Pabloba Jesús ʉ̃rʉbena berreamaa b̶uu. Pabloba maumaa ichiaruud̶e kuitaasii ichiba biawãra ijãa b̶uu Jesusba ichi poyaa aribiabii. 10Maud̶eeba Pabloba ichimaa jĩwa jarasii:

—¡Jiraduse! ¡Jipa akʉ nub̶eese!

Ara makʉd̶e ichi jĩidruped̶a nibad̶e wãsii. 11Pabloba waud̶a unusid̶aud̶e mau puurud̶ebenarãba Licaonia bed̶ead̶e jĩwa jara kopaneesid̶au:

—¡Dachi Akõre ome dachimaa ẽbẽra kĩra ed̶aa neesid̶au!

12Ãchiba Bernabé Zeus abachid̶au maud̶e Pablo Hermes abachid̶au, ichi chi bed̶ea jarabariid̶eeba.#14:12 Zeus. Latín bed̶ead̶e «Júpiter» abadau. Hermes. Latín bed̶ead̶e «Mercurio» abadau. Chi Listra puurud̶ebenarãmaarã, Zeus maud̶e Hermes Dachi Akõre kĩra nibasid̶au.

13Listra puuru kĩraare Zeus de mechiu kub̶uasii. Mamauba chi Zeus paareba paka maud̶e nepono chi puurud̶e ed̶a wãbadaumaa adoesii. Ichiba maud̶e chi waabenarã baarauba mau paka baa dea kʉ̃risia panasid̶au Pablo maud̶e Bernabé baita. 14Maamina chi Jesusba bʉid̶arã Bernabé maud̶e Pabloba mau kuitaasid̶aud̶e ãchi paru anab̶ari jʉ̃badau kõekuad̶aped̶a ẽbẽrarã tãed̶e pira wãd̶aped̶a naka jĩwa jarasid̶au:

15—Machiba, ¿sakãe jãka wau panuma? Dai biawãra ẽbẽrarãbʉ, machi kĩra. Machimaa jarad̶e nee panuu chi biawãe b̶ee ida b̶ud̶aped̶a Dachi Akõre chokae nii ijãad̶amera. Mau Dachi Akõreba bajãa, nau iujãa, mar maud̶e joma mamed̶a duanuu wausii. 16Naed̶e Dachi Akõreba ichi adua nuree puurumaa ara ãchiba wau kʉ̃ria panuu ida waubiabachii. 17Maamina ewaricha biꞌia wau b̶uud̶eeba ichiba kuitaabi b̶uu ichi biawãra nii. Ichiba bajãad̶ebena kui neebibarii maud̶e ne uu nub̶uu chaubiabarii. Maka ichiba dachi b̶i jãwaa kobiabarii maud̶e sõd̶e kĩrajʉʉbiabarii.

18Pablo maud̶e Bernabeba maka jara panasid̶amina mau ẽbẽrarãba beraa ãchimaa paka baa deasid̶au.

19Listrad̶e panuud̶e waabenarã judiorã Antioquía puurud̶ebena maud̶e Iconio puurud̶ebena neesid̶au.#14:19 Mau Antioquía Pisidia druad̶e b̶uu. Hechos 13:44-51. Iconio puuru. Hechos 14:1-6. Ãchiba Listrad̶ebenarãmaa Pablo ʉ̃rʉbena kachirua kʉ̃risiabiasid̶au. Maud̶eeba jomaurãba Pablo mooba b̶atasid̶au. Ichi biusii kʉ̃risiasid̶aud̶eeba puuru awara erta adoesid̶au.#2 Corintios 11:25. 20Maabae Jesusd̶e ijãabadaurã Pablomaa araa ãbua imisid̶aud̶e, maka panuud̶e ichi jiradusii. Jiraduped̶a waya puurud̶aa wãsii. Norema Bernabé ome Derbe puurud̶aa wãsid̶au.

21Derbe puurud̶e Pablo maud̶e Bernabeba chi bed̶ea bia Jesús ʉ̃rʉbena jarasid̶aud̶e ãreaba ijãasid̶au. Mau maad̶akare Listra puurud̶aa, Iconio puurud̶aa maud̶e Antioquiad̶aa waya wãsid̶au. 22Puurucha ãbarã aid̶abachid̶au Jesusd̶e biꞌia ijãad̶amera. Ãchiba Jesusd̶e ijãa panuu ida b̶urãad̶amera naka jarabachid̶au: «Ãrea biꞌiwãe panad̶ai panuu, Dachi Akõre juad̶e panad̶ai baita, ichid̶irã baara». 23Puurucha ãbarã tãed̶e chi ijãabadaurã nubadaurã#14:23 Ijãabadaurã nubadaurã. 1 Timoteo 3:1-7. b̶usid̶au. Maabae Dachi Akõremaa ʉtaa id̶id̶aped̶a, chiko kod̶akau ewari waud̶aped̶a chi Dachi Mechiud̶e ijãa panuurã ichi juad̶e b̶usid̶au.

Siria druad̶e b̶uu Antioquiad̶aa waya wãped̶aad̶a

24Mau maad̶akare Pisidia druare wãsid̶au Panfilia druad̶aa needuud̶aa. 25Dachi Akõre bed̶ea Perge puurud̶e jaradead̶aped̶a Atalía puurud̶aa wãsid̶au. 26Maad̶akare jãbad̶e Siria druad̶ebena Antioquiad̶aa waya wãsid̶au. Mau puurud̶ebena ãbarãba ãchi naed̶e bʉi panasid̶au Dachi Akõreba kʉ̃ria b̶uu waud̶amera maud̶e Dachi Akõre juad̶e b̶usid̶au ichi sõbiad̶eeba aid̶amera. 27Need̶aped̶a ãbarã araa ãbua imisid̶au. Maud̶e nebʉrʉsid̶au joma Dachi Akõreba ãchid̶eeba waud̶a. Jarasid̶au saka Dachi Akõreba wausii judiowãerã bid̶a Jesusd̶e ijãad̶amera. 28Aria Jesusd̶e ijãabadaurã baara ewari ãrea paneesid̶au.

Currently Selected:

Hechos 14: cmi

Highlight

Compare

Copy