Hechos 12

Pedro jʉ̃a b̶uad̶a awara wãd̶a

1Mau ewarid̶e chi rey Herodesba chi nuree ãbarã jidaubiaped̶a kachirua waubiasii.#12:1 Mau Herodes «Agripa chi nabena» abadau. Ab̶aburu nau Hechos capítulo 12d̶e unu b̶uu. Herodes chi Mechiu ãicheke basii. Judiorã druad̶ebena rey basii año 41d̶ebena ab̶a 44d̶aa. Ichi warr sid̶a «Agripa» trʉ̃ jarabachid̶au. Hechos 25:13; 26:32. 2Juan ãba Santiago espadaba beabisii.#12:2 Santiago ara mau «Jacob» abadau. Marcos 10:35-40. 3Herodesba unusii judiorã mau kakua kĩrajʉʉsid̶au. Maud̶eeba Pedro sid̶a jidaubisii. Maka wausii pan ẽesãabibariiwãe kobadau ewarid̶e.#Éxodo 12:1-27. 4Pedro jidaubiped̶a jʉ̃abisii. Maabae kokoroarã 16 adoeped̶a kimãrecha Pedro nubiasii. Herodesba kʉ̃risia b̶uasii Pascua ewari wãꞌãed̶akare, Pedro nebʉra jarai jomaurã daad̶e. 5Pedro jʉ̃abaud̶e jidau uru panuumisa ãbarãba Dachi Akõremaa ãrea ʉtaa id̶i panasid̶au ichi karibamera.

6Herodesba chi Pedro nebʉra jarai naed̶e, mau ẽsabud̶e Pedro kokoroarã ome panuu ẽsa kãi b̶uasii. Kaena omeeba jʉ̃ b̶uasii. Chi jʉ̃abadaumare poraa chi nuree kokoroarãba nu panasid̶au. 7Maka b̶uud̶e Dachi Mechiud̶e angelba Pedromaa unubisii. Mauba chi jʉ̃abadaumare ʉ̃d̶aa nub̶eebisii. Mauba Pedro orr wauped̶a ʉ̃rʉmabisii. Maud̶e jarasii: «Isa jiraduse».

Makaaruud̶e Pedro juad̶e kaena jʉ̃ b̶uu ena b̶aesid̶au. 8Maabae chi angelba jarasii:

—Paru jʉ̃se. Jʉ̃rʉd̶e jʉ̃barii sid̶a jʉ̃se.

Pedroba maka wausiid̶e chi angelba jarasii:

—Bichiba paru anab̶ari jʉ̃barii jʉ̃ped̶a mʉ baara neese.

9Ara makʉd̶e Pedro chi ángel baara wãsii, maamina ichiba adua b̶uasii chi angelba wau b̶uu biawãra maka b̶uu. Dachi Akõreba ichi daumaa mau unubisii a kʉ̃risia b̶uasii. 10Maka b̶uud̶e kokoroarã chi naa nu panuu maud̶e chi mawãare nu panuumare wãyaa wãsid̶au. Maka wãd̶aped̶a chi poraa mechiu jiorr waud̶amaa neesid̶au. Needuud̶e mau poraa ichi du ab̶a ewa wãsii. Maabae wãsid̶au. Awara waparaa wãaduud̶e chi ángel Pedro ome b̶uad̶a wãꞌãesii.

11Maabáeburu Pedroba kuitaasii Dachi Akõreba ichi daumaa mau unuubasii. Ichi du ab̶a jarasii: «Jãabae ʉ̃raburu mʉʉba kuitaasii Dachi Mechiuba biawãra ángel bʉiped̶a mʉ Herodes juad̶ebena kariba b̶uasii. Chi judiorãba mʉ kachirua wau kʉ̃ria panad̶ad̶ebena biawãra kariba b̶uasii».

12Pedroba biawãra karibasii kuitaasiid̶e Juan nawe María deemaa wãsii. Mau Juan, ara mau Marcos abachid̶au. María ded̶e ãrea ãbarãba ãbua Dachi Akõremaa ʉtaa id̶imaa panasid̶au. 13Maud̶e Pedroba poraa awareeba iusii. Maabae ãwera ab̶a de nubarii Rode abadau neesii kai maka nii kuitaayua. 14Rodeba Pedro mimi kuitaasiid̶e, kĩrajʉʉsii. Maamina chi poraa ewaabasii. Maumaarã, ed̶a waa pira wãped̶a ãbarãmaa jarasii Pedro awara nii. 15Maud̶e jomaurãba Rodemaa jarasid̶au:

—Bichi kĩrawãe b̶uu.

Maamina ichiba mau biawãra asii. Maud̶e ãchiba jarasid̶au:

—Maka b̶uubʉrã mau ángel Pedrod̶ebʉ.#12:15 Chi nuree judiorãba kʉ̃risiasid̶au ãchicha ara ãchi ángel uru nuree, maud̶e chi ẽbẽra biud̶akare mau neebarii. Mau ángel ara ãchi kĩra nii.

16Maka panuud̶e Pedroba akabichia dud̶auba b̶uasii. Chi poraa ewasid̶aud̶e ãchiba unusid̶au biawãra Pedro maka nii. Mau ʉ̃rʉbena kuitaa kʉ̃risiad̶aabasii. 17Maamina Pedroba ichi juaba jarasii chũpead̶amera. Maabae joma nebʉrʉsii sakaburu Dachi Mechiuba ichi jʉ̃a b̶uad̶a aid̶asii. Joma nebʉrʉped̶a jarasii:

—Joma mau Santiagomaa maud̶e waabena ãbarãmaa jarásturu.#12:17 Mau Santiago Jesús ãbabʉ. Santiago ara mau «Jacob» abadau. Karta Santiago abadau mau Santiagoba b̶ʉsii.

Maad̶akare Pedro ãyaa wãsii.

18Ewarisiid̶e kokoroarã pera ororoa nub̶eesii, kuitaad̶aabasiid̶eeba Pedro samaa wãsii. 19Herodesba ichi jʉrʉbiasii, maamina chi kokoroarãba unud̶aabasii. Herodesba ãchimaa mau ʉ̃rʉbena ãrea id̶iped̶a joma kenabiasii. Mau maad̶akare Herodes Judead̶ebena Cesarea puurud̶aa b̶uad̶e wãsii.

Herodes biud̶a

20Mau ewarid̶e chi rey Herodes Tirod̶ebenarã ome maud̶e Sidond̶ebenarã ome kĩramaa b̶uasii. Maarã ichi ome sõbia panad̶ai kʉ̃ria panasid̶au, ichi druad̶ebena chiko nedobachid̶aud̶eeba. Maud̶eeba ãchi bed̶ea dead̶aped̶a ãbua wãsid̶au ichi ome biꞌia berread̶ai baita. Naed̶e Blasto abadaumaa wãsid̶au. Mau Blasto chi Herodes baita trajabarii chi mechiu basii. Maud̶e ãchiba jara panuu Blastomaa ijãabid̶aped̶a ichid̶eeba Herodesmaa chi chuburia id̶isid̶au biꞌia berread̶ai baita.

21Herodesba ewari jarad̶a neesiid̶e, ichi paru bia jʉ̃ped̶a, chi rey ãkaud̶e sĩu b̶uad̶e wãped̶a maabae puurud̶ebenarãmaa berreamaa b̶eesii. 22Maka b̶uud̶e ãchiba jĩwa jarabachid̶au: «¡Cha berrea b̶uu ẽbẽrawãema, maumaarã ab̶a Dachi Akõrebʉ!»

23Ara makʉd̶e Dachi Mechiud̶e ángel ab̶aba Herodes ẽpermabisii, jãuba Dachi Akõremaa bia berreabasiid̶eeba. Maabae ichi ãsurraba ko beasid̶au.

24Chi Dachi Mechiu bed̶ea kaitawẽ jaradead̶e wãbachid̶au maud̶e ãreaba mau ijãasid̶au.#12:24 Dachi Mechiu Bed̶ea. Griego bed̶ead̶e naka b̶ʉ kub̶uu: Dachi Akõre bed̶ea.

25Bernabeba maud̶e Sauloba Jerusalend̶e chi nejarra ãbarã baita dead̶aped̶a waya wãsid̶au. Juan, ara mau Marcos abadau, adoesid̶au.

Currently Selected:

Hechos 12: cmi

Highlight

Compare

Copy