Hechos 11

Pedroba ãbarã Jerusalend̶ebenarãmaa berread̶a

1Mau maad̶akare Jesusba bʉid̶arãba maud̶e waabenarã ãbarã Judea druad̶e nureeba ũrisid̶au judiowãerãba Dachi Akõre bed̶ea ijãasid̶au. 2Maud̶eeba Pedro Jerusalend̶aa wãsiid̶e chi nuree ãbarã judiorãba#11:2 Ãbarã judiorãba. Mau ewarid̶e judiorã chi mukĩra kakua tõobadaurã abachid̶au, maud̶e chi judiowãerã chi mukĩra kakua tõod̶akaurã abachid̶au. ichi ome kĩru berreasid̶au. 3Naka jarasid̶au:

—¿Sakãe bichi judiowãerã ded̶e ed̶a wãped̶a jãarã ome ko b̶uasma?

4Maabae Pedroba ichi makad̶a ãchimaa joma nebʉrʉsii.

5—Jope puurud̶e b̶uasiid̶e mʉʉba Dachi Akõremaa ʉtaa id̶i b̶uasii. Maud̶e ẽeboro waib̶ʉa kĩra b̶uu Dachi Akõreba mʉ daumaa unubisii. Mau miducha jʉ̃karaba jʉ̃ b̶uu bajãad̶ebena ed̶aa mʉʉmaa neesii. 6Mʉʉba biꞌia ichiasii kãare ed̶a b̶uu kuitaai baita. Didiwaraa ãnimararã panasid̶au, jʉ̃rʉ kimare nuree, jeed̶a ursu nuree maud̶e ibanarã. 7Maka b̶uud̶e mimi ũrisii. Mau mimiba mʉʉmaa jarasii: “Pedro, jiraduse. Beaped̶a kose”. 8Maamina mʉʉba jarasii: “Mʉ Mechiu, ¡makawãema! Chi daiba kod̶aabai panuu chiko maebʉrã chi bichi daad̶e biꞌiwãe b̶uu mʉʉba mau kokau”. 9Maud̶e bajãad̶ebena chi mimiba mʉʉmaa waya jarasii: “Chi Dachi Akõreba biꞌia b̶ud̶a mau miadaa b̶uu arã́se”. 10Maka berrearuu mʉʉba b̶es õbea ũrisii. Maabae chi ẽeboro waya bajãad̶aa wãsii.

11»Maka b̶uud̶e ẽbẽra õbea mʉ b̶uu ded̶e neesid̶au. Ãchi jaradea ua b̶uabariiba Cesarea puurud̶ebena mʉʉmaa bʉisii. 12Dachi Akõre Jauriba mʉ maarã baara wãabai a kʉ̃risiawẽa wãbisii. Cesarea puurud̶e need̶aped̶a dai ãchi jaradea ua b̶uabarii ded̶e ed̶aa wãsid̶au. Nau 6 ãbarã mʉ baara panasid̶au. 13Mau ẽbẽraba daimaa nebʉrʉsii ángel ichi ded̶e b̶uu unusii. Mauba ichimaa jarasii: “Jope puurud̶aa ẽbẽrarã bʉikase Simón, ara mau Pedro abadau jʉrʉd̶e wãd̶amera. 14Mauba jarai saka Dachi Akõreba bichi maud̶e bichi ded̶ebenarã karibai”.

15»Mʉ mau berrea b̶uud̶e Dachi Akõre Jauri ãchimaa neesii dachimaa naed̶e need̶a kĩra.#Hechos 2:1-4. 16Maud̶e chi Dachi Mechiuba jarad̶a mʉʉba kĩrabasii: “Biawãra Juanba baniaba ẽbẽrarã boro easii, maamina Dachi Akõreba ichi Jauri machimaa deai”.#11:16 Dachi Akõreba ichi Jauri machimaa deai. Griego bed̶ead̶e naka b̶ʉ kub̶uu: Dachi Akõreba machi ichi Jauriba boro eai. Lucas 3:16. 17Dachi Mechiu Jesucristod̶e ijãa panuud̶eeba Dachi Akõreba dachimaa ichi Jauri deasii. Ichi Jauri ãchimaa deasiid̶eeba ¿mʉʉba saka ichiba waud̶a ʉ̃rʉbena kachirua jaraima?

18Jerusalend̶ebena ãbarãba mau ũrisid̶aud̶e waa kachirua jarad̶aabasii, maumaarã Dachi Akõremaa naka biꞌia berreasid̶au:

—¡Biawãra Dachi Akõreba judiowãerã karibasii ãchi kachirua ida b̶ud̶aped̶a ichimaa need̶amera! ¡Maka ewaricha ichi baara chokae panad̶ai!

Ãbarã Antioquía puurud̶ebena

19Esteban biud̶akare ẽbẽrarãba chi Jesusd̶e ijãabadaurã kachirua waud̶ai baita wãraasid̶au. Maud̶eeba ãbarã Jerusalend̶ebena miru wãurisid̶au. Fenicia druad̶aa, Chipre islad̶aa maud̶e Antioquía puurud̶aa wãsid̶au. Ãchi wãaduucha chi bed̶ea Jesús ʉ̃rʉbena ab̶a judiorãmáburu jarabachid̶au. 20Maka panuud̶e chi nuree Jesusd̶e ijãabadaurã Chipred̶ebena maud̶e Cirene puurud̶ebena Antioquiad̶e panad̶e wãsid̶au. Maarãba griegorãmaa chi bed̶ea bia Dachi Mechiu Jesús ʉ̃rʉbena jara kopaneesid̶au. 21Dachi Mechiuba ichi poyaad̶eeba ãchi aid̶akuasii. Maud̶eeba ãchiba jara panuu ãreaba ijãasid̶au. Ãchiba chi naed̶e kachirua kʉ̃risia badaped̶aad̶a ida b̶ud̶aped̶a Jesucristod̶e ijãa kopaneesid̶au.

22Ãbarã Jerusalend̶ebenarãba mau kuitaasid̶aud̶e Bernabé Antioquiad̶aa bʉisid̶au. 23-24Mau Bernabé ẽbẽra jipa nibasii. Jesusd̶e ãrea ijãa nibasii; Dachi Akõre Jaurid̶eeba nibasii. Bernabé Antioquiad̶e neesiid̶e unusii Dachi Akõreba ichi sõbiad̶eeba ãbarã kariba b̶uu. Maud̶eeba ichi ãrea kĩrajʉʉsii. Maud̶e ichiba jomaurãmaa jarabachii sõd̶eeba ewaricha Dachi Mechiud̶e biawãra ijãad̶amera. Maka b̶uud̶e ãreaba Dachi Mechiud̶e ijãasid̶au.

25Mau maad̶akare Bernabé Tarso puurud̶aa Saulo jʉrʉd̶e wãsii. Unusiid̶e Antioquiad̶aa adoesii. 26Aria año ab̶a ijãabadaurã baara paneesid̶au, maud̶e ãrea ẽbẽrarãmaa Jesucristo ʉ̃rʉbena jaradeabachid̶au. Mau Antioquía puurud̶e ẽbẽrarãba chi Jesusd̶e ijãabadaurã “cristiano” abachid̶au. Mau chi nabena ewari basii maka trʉ̃aped̶aad̶a.

27Mau ewarid̶e Dachi Akõre baita berreabadaurã Jerusalend̶ebena Antioquiad̶aa wãsid̶au. 28Ab̶a Agabo abadau ʉkʉ nub̶eeped̶a Dachi Akõre Jaurid̶eeba jarasii joma nau druad̶e jarrba waud̶ai neei. Mau jarrba biawãra neesii Claudio Romad̶ebena chi aude mechiu basiid̶e.#11:28 Mau Claudio Romad̶ebena chi aude mechiu nii basii año 41d̶ebena ab̶a 54d̶aa. Año 46d̶e Judea druad̶e jarrba ãrea basii. 29Maud̶eeba Jesusd̶e ijãabadaurã Antioquiad̶e panuu bed̶ea deasid̶au chi nejarra ãbarã Judea druad̶e nuree baita urubʉid̶ai baita. Ãchicha poyaa deaduu kĩra dead̶ai asid̶au. 30Mau chi nejarr peped̶aad̶akare, Bernabé maud̶e Saulomaa urubʉisid̶au chi Judead̶ebena ijãabadaurã nubadaurã baita.

Currently Selected:

Hechos 11: cmi

Highlight

Compare

Copy