1 Tesalonicenses 5
5
Dachi Mechiuba kastikai ewari
1Ãbarã, mʉʉba nau kartad̶e b̶ʉwẽma sakaed̶aa mau ewari neei, 2machiba ãrea kuitaa panuud̶eeba Dachi Mechiuba kastikai ewari maka neei nechiru ẽsabud̶e neebarii kĩra. 3Ẽbẽrarãba naka jara panad̶ai: «Joma jirukaraayuwãe panuu, perad̶awẽa panuu». Maka panuud̶e maarã joma baribai ewari neei wẽra warr bara nii barikiu ewarid̶e pirabari kĩra. Maud̶e maarã mirud̶aabai.
4Maamina ãbarã, machi pãriud̶e panuuwãema. Maud̶eeba Dachi Mechiuba kastikad̶e neeruu ewarid̶e machi perad̶aabai nechiru neeruud̶e perabadau kĩra. 5Joma machi ʉ̃d̶aad̶ebenarã maud̶e ãyadaabenarã. Dachi ẽsabud̶ebenawãema maud̶e pãriud̶ebenawãema. 6Maud̶eeba dachi kãi duanuuwãema waabenarã kãi duanuu kĩra, maumaarã dau ʉb̶ʉa panad̶ai panuu maud̶e kĩrabia panad̶ai panuu. 7Chi kãi duaneebadaurã ẽsabud̶e kãi duaneebadau maud̶e chi itua biu nureerã ẽsabud̶e itua dobadau. 8Maamina dachi chi ãyadaabenad̶eeba kĩrabia nuread̶ai panuu. Cristod̶e ijãa panad̶ai panuu, waabenarã kʉ̃ria nuread̶ai panuu maud̶e Dachi Akõreba kastikai bad̶ad̶ebena karibai esed̶au panad̶ai panuu. Maka ara dachi biꞌia nu panad̶ai, kokoroaba ichi borod̶e chaarea b̶uu jʉ̃barii kĩra, maud̶e kakuad̶e jʉ̃barii chaarea jʉ̃barii kĩra. 9Dachi Akõreba dachi iubasii kastikai baita, maumaarã iusii Dachi Mechiu Jesucristod̶eeba karibad̶amera. 10Ichi dachi kakua biusii. Maud̶eeba dachi chokae panuubʉrã maebʉrã biuped̶aad̶abʉrã, ichi neeruud̶e ichi ome ãbua chokae panad̶ai. 11Maud̶eeba chiya kĩrajʉ́sturu. Maud̶e chiya aid̶ásturu biꞌia ijãad̶ai baita machiba wau panuu kĩra.
Pabloba ãbarãmaa kaad̶e jaradead̶a
12Mau awara ãbarã, daiba chi chuburia id̶i panuu chi ãbarã machi tãed̶e Dachi Akõre traju waubadaurã ãrea wapead̶amera. Ãchi Dachi Mechiu Jesucristod̶eeba machi saka nibad̶ai jarabadau maud̶e jaradeabadau. 13Ãchi ʉ̃rʉbena biꞌia kʉ̃risiásturu. Maarãba wau panuu kakua ãrea kʉ̃riásturu. Jomaurã ome biꞌia duanásturu.
14Ãbarã, daiba chi chuburia id̶i panuu chi machi tãed̶e koꞌoa nureerãmaa kĩra ʉb̶ʉa berread̶amera. Chi sõd̶e kĩra nomaa nuree kĩrajʉʉbísturu, maud̶e chi poyaa dauchia jãadua nuread̶awẽa nuree maud̶e chi sõd̶e meserãa wãꞌãe nuree aid̶ásturu. Jomaurã ome dauchia jãadua panásturu. 15¡Ũrísturu! Ab̶auba machi kachirua wauruubʉrã mau arab̶au kachirua waurã́sturu. Mau kãyabãra ewaricha machi chiya biꞌia wáusturu. Jomaurã ome biꞌia wáusturu.
16Jomad̶e kĩrajʉʉ panásturu. 17Ida b̶ud̶ayuwãe Dachi Akõremaa ʉtaa id̶i panásturu. 18Jomad̶e Dachi Akõremaa ichíturu kid̶ibai a panásturu. Mau Dachi Akõreba kʉ̃ria b̶uu, machi Jesucristod̶e ijãabadaud̶eeba.
19Dachi Akõre Jauriba wau b̶uu ida b̶urã́sturu.#5:19 Griego bed̶ead̶e mau naka b̶ʉ kub̶uu: Dachi Akõre Jauri aoko kiirã́sturu. 20Dachi Akõre baita berreabariiba jara b̶uu ida b̶urã́sturu. 21Joma mau kauwa ũrísturu, maamina ab̶a chi biáturu ijã́sturu. 22Kachirua ab̶a bid̶a waurã́sturu.
23Mʉʉba kʉ̃ria b̶uu Dachi Akõreba machi jomad̶e ichi baita biꞌia panabiayu. Mauba dachi jirukaraayuwãe panabiabarii. Mʉʉba kʉ̃ria b̶uu Dachi Akõreba machi jauri, machi kʉ̃risia maud̶e machi kakua ãrea biꞌia nu b̶uayu. Maka Dachi Mechiu Jesucristo neeruud̶e machi ab̶a bid̶a kachirua a jarad̶ayuswãe panad̶ai. 24Chi machi Iud̶aba joma maka waui, ichiba bed̶ea deasiid̶eeba.
Pabloba nau kartad̶e aanama b̶ʉd̶a
25Ãbarã, dai baita Dachi Akõremaa ʉtaa id̶ísturu.
26Biawãra kʉ̃riad̶eeba joma ãbarãmaa biꞌia berreásturu.#5:26 Biawãra kʉ̃riad̶eeba. Griego bed̶ead̶e naka b̶ʉ kub̶uu: kĩedarr ʉ̃yásturu.
27Mʉʉba Dachi Mechiud̶eeba jaraaruu: nau karta joma ãbarã daad̶e ed̶a jarásturu.
28Mʉʉba kʉ̃ria b̶uu Dachi Mechiu Jesucristoba ichi sõbiad̶eeba machi aid̶a b̶uamera.
Currently Selected:
1 Tesalonicenses 5: cmi
Highlight
Copy
Compare
Share
Want to have your highlights saved across all your devices? Sign up or sign in
© 2021, Wycliffe Bible Translators, Inc. All Rights Reserved
