1 Tesalonicenses 4

Saka nibad̶ai panuu Dachi Akõreba biꞌia unumera

1Mau awara ãbarã, daiba machimaa jaradeasid̶au saka Dachi Akõre daad̶e nibad̶ai panuu ichiba biꞌia unumera. Dachi Mechiu Jesús trʉ̃d̶e daiba machimaa chi chuburia id̶i panuu, ara mau kĩra nibad̶amera. Biawãra machiba maka waumaa panuu, maamina biꞌia wáusturu.

2Daiba Dachi Mechiu Jesusd̶ebena jaradeaped̶aad̶a machiba kuitaa panuu. 3Dachi Akõreba kʉ̃ria b̶uu machi ichi baita biꞌia nuread̶amera. Maud̶eeba machi kakuaba barikiu kachirua waurã́sturu. 4Machi kakua jipa kuitaa panad̶ai duanásturu Dachi Akõre daad̶e maud̶e ẽbẽrarã daad̶e biꞌia panad̶amera.#4:4 Machi kakua. Griego bed̶ead̶e naka b̶ʉ kub̶uu: machi choko. Waabenarã baita mau bed̶eaba jara b̶uu «machi kima». 5Nau kakuaba kachirua wau kʉ̃ria b̶uu waurã́sturu Dachi Akõre unud̶akaurãba waubadau kĩra. 6Maud̶éburu dachi ãbarãmaa kachirua waurã́sturu maud̶e seta sid̶a waurã́sturu. Joma mau Dachi Mechiuba kastikai, daiba machimaa jaraped̶aad̶a kĩra. 7Dachi Akõreba dachi jʉrʉ adaubasii kachiruad̶e panad̶amera, maumaarã jʉrʉ adausii ichi baita jipa panad̶amera. 8Chi mau mʉʉba jaradead̶a ida b̶u b̶uuba ẽbẽraba jarad̶a ida b̶uwẽa b̶uu, maumaarã Dachi Akõreba jara b̶uu ida b̶u b̶uu. Ara mau Dachi Akõreba ichi Jauri machimaa deasii kachiruaswãe panad̶amera.

9Mau awara machi saka ãbarã ome chiya kʉ̃riad̶ai panuu ʉ̃rʉbena, mʉʉba nau kartad̶e ¿kãare b̶ʉima? Ara Dachi Akõréburu machimaa mau jaradeasii. 10Machiba joma ãbarã Macedonia druad̶ebena mau kĩra kʉ̃ria panuu. Maamina ãbarã, daiba machimaa chi chuburia id̶i panuu aude chiya kʉ̃ria panad̶amera. 11Maud̶e jʉrʉ́sturu jomaurã ome jirukaraayuwãe duanad̶ai baita. Waabenarã nebʉrad̶e panarã́sturu. Machi juaba trajásturu daiba jaraped̶aad̶a kĩra. 12Maka nureebʉrã, machiba esed̶aud̶ayuswãe panad̶ai waabenarãba machimaa ne kaebea dead̶ai. Maud̶e makaburu Jesusd̶e ijãad̶akaurãba machi biꞌia unud̶ai.

Jesús waya neei ʉ̃rʉbena

13Ãbarã, daiba kʉ̃ria panuu machiba Jesusd̶e ijãabadaurã biuped̶aad̶a ʉ̃rʉbena kuitaad̶amera. Maka machi kĩra nomaad̶aabai Dachi Akõred̶e ijãad̶akaurã kĩra nomaabadau kĩra. Ãchi kĩra nomaabadau chi biuped̶aad̶a saka duanad̶ai kuitaad̶awẽed̶eeba.#4:13 Biuped̶aad̶a. Griego bed̶ead̶e naka b̶ʉ kub̶uu: kãi topanuu. 14Maamina dachiba Jesús biu b̶uad̶ad̶ebena chokae jiradud̶a ijãa panuu. Maud̶eeba kuitaa panuu Jesusd̶e ijãabadaurã biuped̶aad̶a Dachi Akõreba joma chokae jiradubiaped̶a ichi baara uad̶oi.

15Mau baita Dachi Mechiuba jarad̶a daiba machimaa jaraaduu: Dachi Mechiu neeruud̶e dachi, chi wabid̶a chokae nuree chi biuped̶aad̶a naa ichimaa wãd̶aabai. 16Maumaarã Dachi Mechiu bajãad̶ebena neei. Berrearuu jĩwa ũrid̶ai, ángel chi mechiu sid̶a berrearuu ũrid̶ai, maud̶e Dachi Akõre kachu jĩwa chaaruu ũrid̶ai. Maud̶e chi Cristod̶e ijãabadaurã biuped̶aad̶a naa chokae jiradud̶ai. 17Ara makʉd̶e dachi, chi chokae nuree, maarã ome ãbua ʉtaa wãd̶ai Dachi Mechiu baara jʉ̃rʉarad̶e unud̶ai baita. Maka Dachi Mechiu ome ewaricha duanad̶ai. 18Mau bed̶eaba machi chiya kĩrajʉ́sturu.

Currently Selected:

1 Tesalonicenses 4: cmi

Highlight

Copy

Compare