ငဝ်ႈၵမ်ႇၽႃႇ 40

ယူဝ်းသႅပ်ႈၽုၺ်ႇၼႄတၢင်းၼွၼ်းၽၼ်ၵူၼ်းၼႂ်းထွင်ႇ

1ဝၢႆးၼၼ်ႉ ဝုၼ်ႇသၢၵ်ႈၵွၵ်းၵိၼ်ၸဝ်ႈတင်းဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈဢၼ်မီးၵႃႈတီႈၶုၼ်ႁေႃၶမ်း ဢေႇၵိပ်ႉတူႉၼၼ်ႉ မီးတၢင်းဢၼ်ၽိတ်းပိူင်ႈ ၵႃႈတီႈၸဝ်ႈၶဝ်ၶုၼ်ႁေႃၶမ်းဢေႇၵိပ်ႉတူႉၼၼ်ႉဢေႃႈ။- 2ၶုၼ်ႁေႃၶမ်းၽႃႇရေႃးၸႂ်မႆႈၶႆႈၸႃႉတီႈ ၶုၼ်မၼ်းၸဝ်ႈသွင်ၵေႃႉဢၼ်ဝႃႈဝုၼ်ႇသၢၵ်ႈၵွၵ်းၵိၼ်ၸဝ်ႈတင်းဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈ ၸိူဝ်းၼၼ်ႉလႄႈ၊- 3ဢဝ်သွင်ၶႃၶျုၵ်ႈဝႆႉၵႃႈၼႂ်းႁိူၼ်း ၵူဝ်ႇရမ်ႇတေႃႇမူးဢၼ်ဝႃႈ ထွင်ႇတီႈဢၼ်ယူဝ်းသႅပ်ႈ လႆႈၶၢမ်ႇတၢင်းဢၼ်ၶျုၵ်ႈဝႆႉၼၼ်ႉဢေႃႈ။- 4ၵူဝ်ႇရမ်ႇတေႃႇမူးၼၼ်ႉ ဢဝ်သွင်ၶႃဢၢပ်ႈပၼ်တီႈယူဝ်းသႅပ်ႈလႄႈ ယူဝ်းသႅပ်ႈလႆႈလူလႆႈတူၺ်းသွင်ၶႃဢေႃႈ။ သွင်ၶႃၼၼ်ႉ ၵေႃႈ၊ လႆႈၶၢမ်ႇတၢင်းဢၼ်ၶျုၵ်ႈဝႆႉၶိင်ႇၵႃႇလႃႉႁိုင်ၼႃႇဢေႃႈ။

5သွင်ၶႃဢၼ်ဝႃႈ ဝုၼ်ႇသၢၵ်ႈၵွၵ်းၵိၼ်ၸဝ်ႈတင်းဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈၶုၼ်ႁေႃၶမ်းမိူင်းဢေႇၵိပ်ႉတူႉ ဢၼ်လႆႈၶၢမ်ႇတၢင်းဢၼ်ၶျုၵ်ႈဝႆႉ ၵႃႈၼႂ်းထွင်ႇသွင်ၵေႃႉၼၼ်ႉ ၼွၼ်းၽၼ်ႁၼ်တၢင်းဢၼ် ၽၼ်ႁၼ်ဢၼ်ပျေႉၸုမ်ႇ တင်းဢထိၵ်ႈပႄႇ ဢၼ်ၸၢပ်ႈသႅင်ႇၵၼ်တင်းတူဝ်ၸဝ်ႈၵဝ်ႇ ႁင်းၽႂ်ႁင်းမၼ်းဢေႃႈ။- 6ထိုင်ႁွတ်ႈၶိင်ႇၵၢင်ၼႂ်သေယဝ်ႉ၊ ယူဝ်းသႅပ်ႈၶဝ်ႈၵႂႃႇၸူး ၵႃႈတီႈၶဝ်လႄႈ၊ မိူဝ်ႈဢၼ်လူတူၺ်းၶဝ်ၸိုင်၊ ႁၼ်လွင်ႈဢၼ် ၼႃႈၶဝ်ႁဵဝ်ႇၸွပ်ႈယူႇၼၼ်ႉလႄႈ၊- 7ထၢမ်တီႈဝုၼ်ႇၶုၼ်ႁေႃၶမ်းၽႃႇရေႃး ဢၼ်လႆႈၶၢမ်ႇတၢင်းဢၼ် ၶျုၵ်ႈဝႆႉလူၺ်ႈၵၼ်တင်းမၼ်း ၵႃႈၼႂ်းႁိူၼ်းၸဝ်ႈမၼ်းၸိူဝ်းၼၼ်ႉလႄႈဝႃႈ၊ ဝၼ်းမိူဝ်ႈၼႆႉႁဵတ်းသင်လႄႈ ၼႃႈသူၸဝ်ႈ ႁဵဝ်ႇၸွပ်ႈယူႇၼင်ႇႁိုဝ်ၶႃႈ၊ ဝႃႈၼင်ႇၼႆဢေႃႈ။- 8ၶဝ်ၼၼ်ႉၵေႃႈလၢတ်ႈလႄႈဝႃႈ၊ ႁဝ်းလႆႈၼွၼ်းၽၼ်ႁၼ်ယဝ်ႉ။ ၵေႃႉဢၼ်တၵ်းၽုၺ်ႇဢွၵ်ႇၼႄပျႃးဢထိၵ်ႈပႄႇမၼ်းဢမ်ႇမီး၊ မိူဝ်ႈဢၼ်ဝႃႈၼင်ႇၼႆၸိုင်၊ ယူဝ်းသႅပ်ႈၵေႃႈလၢတ်ႈတီႈသွင်ၶႃၼၼ်ႉလႄႈဝႃႈ၊ ဢၼၢၵ်ႈဢထိၵ်ႈပႄႇမၼ်းတင်းလၢႆၸိုင် ၸၢပ်ႈသႅင်ႇၵၼ်တင်း ၽြႃးပဵၼ်ၸဝ်ႈဢမ်ႇၸႂ်ႈႁိုဝ်။ ပိူဝ်ႈၼႆလႄႈ ၶႅၼ်းတေႃႈမွၵ်ႇလၢတ်ႈလွင်ႈမၼ်းပၼ်တီႈၵဝ်ၶႃႈသေၵမ်း၊ ဝႃႈၼင်ႇၼႆဢေႃႈ။

9မိူဝ်ႈၼၼ်ႉဝုၼ်ႇသၢၵ်ႈၵွၵ်းၵိၼ်ၸဝ်ႈ မွၵ်ႇလၢတ်ႈတၢင်းဢၼ်မၼ်းၽၼ်ႁၼ်ၼၼ်ႉတီႈယူဝ်းသႅပ်ႈလႄႈဝႃႈၸမ်ႉ၊ ၼႂ်းတၢင်းဢၼ်ၵဝ်ၽၼ်ႁၼ်ၼၼ်ႉ၊ ၵႃႈတီႈၽၢႆႇၼႃႈၵဝ်မီးၶိူဝ်းမၢၵ်ႇၸပိတ်ႈဢေႃႈ။- 10ၵႃႈတီႈၶိူဝ်းမၢၵ်ႇၸပိတ်ႈၼၼ်ႉမီးၵိင်ႇသၢမ်ၵိင်ႇဢေႃႈ။ ၵႃႈတီႈၵိင်ႇၸိူဝ်းၼၼ်ႉ၊ ပဵၼ်မိူၼ်ၸိူဝ်ႉၼင်ႇၵူႇမွၵ်ႇဝႆႉဢေႃႈ။ ဢၼ်ၵီႈၵေႃႈၵီႈယူႇဢေႃႈ။ ပုၵ်ႉမၢၵ်ႇမၼ်းတင်းလၢႆၵေႃႈ ပဵၼ်မၢၵ်ႇၸပိတ်ႈဢၼ်သုၵ်းယူႇဢေႃႈ။- 11ၵဝ်ယိပ်းၵမ်ဢဝ်ၵွၵ်းၶုၼ်ႁေႃၶမ်းၽႃႇရေႃးလႄႈ ဢဝ်မၢၵ်ႇၸပိတ်ႈၼၼ်ႉမိပ်ႇသႂ်ႇၵႃႈၼႂ်းၵွၵ်းမၼ်းၸဝ်ႈၼၼ်ႉသေယဝ်ႉ၊ လႆႈသၢၵ်ႈပၼ်ၵႃႈၼႂ်းမိုဝ်းၶုၼ်ႁေႃၶမ်းၽႃႇရေႃးဢေႃႈ၊ ဝႃႈၼင်ႇၼႆဢေႃႈ။- 12ယူဝ်းသႅပ်ႈၵေႃႈလၢတ်ႈတီႈမၼ်းလႄႈဝႃႈ၊ ဢၼၢၵ်ႈဢထိၵ်ႈပႄႇမၼ်းၸမ်ႉ၊ ၵိင်ႇသၢမ်ၵိင်ႇၼၼ်ႉပဵၼ်သၢမ်ဝၼ်းဢေႃႈ။- 13ပေႃးလႆႈသၢမ်ဝၼ်းယဝ်ႉ၊ ၶုၼ်ႁေႃၶမ်းၽႃႇရေႃး တၵ်းၶိုၼ်းယုၵ်ႉယွင်ႈႁူဝ်ၸဝ်ႈလႄႈ ၶိုၼ်းပၼ်ဢရႃႇၸဝ်ႈၸိူဝ်ႉၼင်ႇပၵ်းၵဝ်ႇ ပိူင်ၵဝ်ႇၼၼ်ႉဢေႃႈ။ ၸဝ်ႈသမ်ႉတၵ်းလႆႈၶိုၼ်းသၢၵ်ႈၵွၵ်းၶုၼ်ႁေႃၶမ်းၽႃႇရေႃး ၵႃႈၼႂ်းမိုဝ်းမၼ်းၸဝ်ႈၼၼ်ႉ မိူၼ်ၸိူဝ်ႉၼင်ႇ ပၵ်းၵဝ်ႇ ပိူင်ၵဝ်ႇ မိူဝ်ႈဢၼ်ၸဝ်ႈလႆႈပဵၼ် ဝုၼ်ႇသၢၵ်ႈၵွၵ်းၵိၼ်ၸဝ်ႈမိူဝ်ႈဢွၼ်ၼႆႉၼၼ်ႉဢေႃႈ။- 14မိူဝ်ႈဢၼ်ၸဝ်ႈလႆႈၵတ်းယဵၼ်ၶျၢမ်းသႃႇၼၼ်ႉၸိုင်၊ ၶႅၼ်းတေႃႈၶုၵ်းၸႂ်လႆႈၶႆႈၸႂ်ထူပ်းၵဝ်ၶႃႈလႄႈ ႁဵတ်းၵျေးၸူးတီႈၵဝ်ၶႃႈ သေၵမ်းၶႃႈ။ လဝ်ႊလၢတ်ႈလွင်ႈၵဝ်ၶႃႈတီႈၶုၼ်ႁေႃၶမ်းၽႃႇရေႃးလႄႈ ၼုၵ်ႈဢဝ်ၵဝ်ၶႃႈဢွၵ်ႇသေၵႃႈတီႈႁိူၼ်းၼႆႉသေၵမ်းၶႃႈ။- 15ၶဝ်လၵ်ႉဢဝ်ၵဝ်ၶႃႈ ၵႃႈၼႂ်းမိူင်းႁေႇပြႄး ပုၼ်ႉမႃး ဢမၢၼ်ႇၶၼ်ပဵၼ်ဢေႃႈ။ ၵႃႈတီႈမိူင်းၼႆႉၵေႃႈ၊ ၵဝ်ၶႃႈယင်းဢမ်ႇမီးဢပႅတ်ႈ ၵႃႈသင်လႄႈ ၶဝ်ဢဝ်ၵဝ်ၶႃႈ ၶင်ဝႆႉၵႃႈၼႂ်းထွင်ႇၶႃႈယဝ်ႉ၊ ဝႃႈၼင်ႇၼႆဢေႃႈ။

16ဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈၼၼ်ႉၵေႃႈ၊ ႁူႉႁၼ်လွင်ႈဢၼ်ဢထိၵ်ႈပႄႇၼၼ်ႉလီၼၼ်ႉသေယဝ်ႉ၊ လၢတ်ႈတီႈ ယူဝ်းသႅပ်ႈလႄႈဝႃႈ၊ ၵဝ်ၵေႃႈလႆႈၼွၼ်းၽၼ်ႁၼ်လႄႈ တူဝ်ၸဝ်ႈၵဝ်ႇလႆႈဢဝ်ပဵတ်ႈသၢမ်လုၵ်ႈဢၼ်ပႃးတင်းၶဝ်ႈမုၼ်းၽိူၵ်ႇၼၼ်ႉ တဵင်ႇၵႃႈၼိူဝ်ႁူဝ်ၶႃႈဢေႃႈ။- 17ၼႂ်းပဵတ်ႈလုၵ်ႈၼိူဝ်သုတ်းၼၼ်ႉ မီးတၢင်းၵိၼ်တၢင်းၶူပ်းဢၼ်လႆႈၼိုင်ႈဢဝ် ၵူႈၸိူဝ်ႉၵူႈပိူင်ပုၼ်ႈဢၼ်ၶုၼ်ႁေႃၶမ်းၽႃႇရေႃး တၵ်းၵိၼ်ၼၼ်ႉလႄႈ ၼူၵ်ႉတင်းလၢႆၵေႃႈဢွၼ်ၵၼ်ဢဝ်ၵႃႈၼႂ်းပဵတ်ႈဢၼ်ၵဝ်တဵင်ႇၵႃႈၼိူဝ်ႁူဝ်ၼၼ်ႉသေလႄႈ ၵိၼ်ဢေႃႈ၊ ဝႃႈၼင်ႇၼႆဢေႃႈ။- 18ယူဝ်းသႅပ်ႈၶိုၼ်းလၢတ်ႈလႄႈဝႃႈ၊ ဢၼၢၵ်ႈဢထိၵ်ႈပႄႇမၼ်းၸမ်ႉ၊ ပဵတ်ႈသၢမ်လုၵ်ႈၼၼ်ႉပဵၼ်သၢမ်ဝၼ်းဢေႃႈ။- 19လႆႈသၢမ်ဝၼ်းသေယဝ်ႉ၊ ၶုၼ်ႁေႃၶမ်းၽႃႇရေႃးတၵ်းယုၵ်ႉယွင်ႈႁူဝ်ၸဝ်ႈၽၢတ်ႇယၢၼ်သေလႄႈ ဢဝ်ႁွႆႈဝႆႉၵႃႈတီႈတူၼ်ႈမႆႉဢေႃႈ။ ၼူၵ်ႉတင်းလၢႆၵေႃႈ၊ တၵ်းဢွၼ်ၵၼ်သၵ်းၵိၼ်ၼိူဝ်ႉၸဝ်ႈဢေႃႈ၊ ဝႃႈၼင်ႇၼႆဢေႃႈ။

20လိုၼ်းၼၼ်ႉ လႆႈသၢမ်ဝၼ်းသေယဝ်ႉ၊ ၼႂ်းၶိင်ႇဝၼ်းဢၼ်ၶုၼ်ႁေႃၶမ်းၽႃႇရေႃးၵိူတ်ႇလဵင်ႉမႃးၼၼ်ႉ၊ မၼ်းၸဝ်ႈၶၢမ်ႇပွႆးဢၸႅၼ်ႇ ပုၼ်ႈၶႃႈပုၼ်ႈၵူၼ်းမၼ်းၸဝ်ႈတင်းသဵင်ႈတင်းလူင်ယူႇသေလႄႈ ယုၵ်ႉယွင်ႈႁူဝ်ဝုၼ်ႇသၢၵ်ႈၵွၵ်းၵိၼ်ၸဝ်ႈတင်းႁူဝ်ဝုၼ်ႇသၢၵ်ႈ တၢင်းၵိၼ်တၢင်းၶူပ်းၸဝ်ႈ ၸိူဝ်းၼၼ်ႉၵႃႈၼႂ်းၶႃႈၼႂ်းၵူၼ်းမၼ်းၸဝ်ႈလႄႈ၊- 21ဢဝ်ဝုၼ်ႇသၢၵ်ႈၵွၵ်းၵိၼ်ၸဝ်ႈ သမ်ႉၶၢၼ်းဝႆႉၼႂ်းဢရႃႇၵဝ်ႇမၼ်း မိူၼ်ၸိူဝ်ႉၼင်ႇမိူဝ်ႈဢွၼ်တၢင်းၼၼ်ႉလႄႈ မၼ်းၵေႃႈ လႆႈသၢၵ်ႈ ၵွၵ်းၵႃႈၼႂ်းမိုဝ်း ၶုၼ်ႁေႃၶမ်းၽႃႇရေႃး မိူၼ်ၸိူဝ်ႉၼင်ႇပၵ်းၵဝ်ႇပိူင်ၵဝ်ႇၼၼ်ႉ၊- 22ဢိၵ်ႇတင်း ဢဝ်ဝုၼ်ႇသၢၵ်ႈတၢင်းၵိၼ်တၢင်းၶူပ်းၸဝ်ႈၼၼ်ႉ ႁွႆႈဝႆႉမႅၼ်ႈၸွမ်းၵႃႈၼင်ႇဢၼ်ယူဝ်းသႅပ်ႈလႆႈၽုၺ်ႇဢွၵ်ႇ ၼႄပျႃး ဢၼၢၵ်ႈဢထိၵ်ႈပႄႇဝႆႉ တီႈၶဝ်ၼၼ်ႉဢေႃႈ။- 23ၵူၺ်းၵႃႈ ဝုၼ်ႇသၢၵ်ႈၵွၵ်းၵိၼ်ၸဝ်ႈၼၼ်ႉ ယင်းဢမ်ႇၶုၵ်းၸႂ်လႆႈၶႆႈၸႂ်ထူပ်းယူဝ်းသႅပ်ႈလႄႈ လူင်လိုမ်းမၼ်းသေလႄႈယူႇဢေႃႈ။

Currently Selected:

ငဝ်ႈၵမ်ႇၽႃႇ 40: CBMS

Highlight

Copy