ငဝ်ႈၵမ်ႇၽႃႇ 39

ယူဝ်းသႅပ်ႈလႄႈမေးပေႃးတီႉၽႃႇ

1 ယူဝ်းသႅပ်ႈၼၼ်ႉလႆႈၶၢမ်ႇတၢင်းဢၼ်ဢဝ်လူင်းၵႂႃႇႁွတ်ႈထိုင်ၵႃႈတီႈမိူင်းဢေႇၵိပ်ႉတူႉလႄႈ ပေႃးတီႉၽႃႇၵူဝ်ႇရမ်ႇတေႃႇမူးဢၼ်ပဵၼ်ဢမၢတ်ႈ ၶုၼ်ႁေႃၶမ်းၽႃႇရေႃး ၵူၼ်းဢေႇၵိပ်ႉတူႉၵေႃႉၼိုင်ႈ သိုဝ်ႉဢဝ်မၼ်းၵႃႈၼႂ်းမိုဝ်းၵူၼ်းဢီႉသမေႇလႃႉ ဢၼ်ဢဝ်မၼ်း လူင်းၵႂႃႇ ၵႃႈတီႈၼၼ်ႈၸိူဝ်းၼၼ်ႉဢေႃႈ။- 2ထႃႇဝရႃႉၽြႃးမီးယူႇလူၺ်ႈၵၼ်တင်းယူဝ်းသႅပ်ႈလႄႈ မၼ်းၵျၢမ်ႇပွင်ၸိူဝ်ႉၼင်ႇႁိုဝ်ၵေႃႈ ၸၢင်ႈပျေႉၸုမ်ႇဢေႃႈ။ မၼ်းလႆႈယူႇၵႃႈၼႂ်းႁိူၼ်းၸဝ်ႈမၼ်း ၵူၼ်းဢေႇၵိပ်ႉတူႉၼၼ်ႉဢေႃႈ။- 3ၸဝ်ႈမၼ်းၵေႃႈႁူႉႁၼ်လွင်ႈဢၼ်ထႃႇဝရႃႉၽြႃးမီးယူႇလူၺ်ႈၵၼ်တင်းမၼ်းလႄႈ ႁႂ်ႈတၢင်းၵျၢမ်ႇတၢင်းပွင်မၼ်း ၸၢင်ႈပျေႉၸုမ်ႇ ၵႃႈၼႂ်းၵႃႈဢၼ်မၼ်းႁဵတ်းၵူႈၸိူဝ်ႉၵူႈပိူင်ၼၼ်ႉဢေႃႈ။- 4ပိူဝ်ႈၼႆလႄႈ ယူဝ်းသႅပ်ႈထူပ်းၵျေးၸူးသိုဝ်ႈၼႃႈတႂ်ႈတႃၸဝ်ႈမၼ်းလႄႈ၊ ၶၢမ်ႇတၢင်းၸႂ်ႉတၢင်းသွႆ ပၢႆတိၼ်ပၢႆမိုဝ်း ၸဝ်ႈမၼ်းယူႇဢေႃႈ။ ၸဝ်ႈမၼ်းၵေႃႈ ၶၢၼ်းမၼ်းဝႆႉၵႃႈၼႂ်းဢရႃႇၵေႃႉဢၼ်ဢုပ်ႉႁိူၼ်းလႄႈ ဢဝ်ဢုၵ်ႉၸႃႇၵႃႈမီးတင်းသဵင်ႈတင်းလူင် ဢၢပ်ႈပၼ်ၵႃႈၼႂ်း မိုဝ်းမၼ်းဢေႃႈ။- 5ၸႃႉၸဵမ်ၶိင်ႇၵႃႇလႃႉမိူဝ်ႈဢၼ်ၸဝ်ႈမၼ်း ႁႂ်ႈမၼ်းဢုပ်ႉႁိူၼ်းဢိၵ်ႇတင်းဢုၵ်ႉၸႃႇ ၵႃႈမီးတင်းသဵင်ႈတင်းလူင် ၸိူဝ်ႉၼင်ႇၼၼ် ၼၼ်ႉလႄႈ၊ ထႃႇဝရႃႉၽြႃးပၼ်တၢင်းလီတီႈႁိူၼ်း ၵူၼ်းဢေႇၵိပ်ႉတူႉၼၼ်ႉ ၵွပ်ႈပိူဝ်ႈယူဝ်းသႅပ်ႈၼၼ်ႉဢေႃႈ။ တၢင်းလီမင်ႇၵလႃႇထႃႇဝရႃႉၽြႃးၼၼ်ႉ ႁွတ်ႈထိုင်ၵႃႈၼိူဝ်ဢုၵ်ႉၸႃႇ ၵႃႈဢၼ်ၸဝ်ႈမၼ်းမီး ၵႃႈၼႂ်းႁိူၼ်း ဢိၵ်ႇတင်း ၵႃႈၼႂ်းတူင်ႈၼႃးဢေႃႈ။- 6ၸဝ်ႈမၼ်းၼၼ်ႉ ဢဝ်ဢုၵ်ႉၸႃႇ ၵႃႈမီးတင်းသဵင်ႈတင်းလူင် ဢၢပ်ႈပၼ်ၵႃႈၼႂ်းမိုဝ်းယူဝ်းသႅပ်ႈသေလႄႈ ၼွၵ်ႈသေတၢင်းၵိၼ်တၢင်းၶူပ်းဢၼ်တူဝ်မၼ်းၵိၼ်ၶူပ်းၼၼ်ႉ၊ မၼ်းယင်းဢမ်ႇႁူႉဢမ်ႇမၢတ်ႈလွင်ႈဢၼ်ဢုၵ်ႉၸႃႇမၼ်း တၢင်ႇၸိူဝ်ႉတၢင်ႇဢၼ် ယင်းမီးၼၼ်ႉလႄႈယူႇဢေႃႈ။ ယူဝ်းသႅပ်ႈၼၼ်ႉႁၢင်ႈၽၢင်ယဵၼ်ႇလႄႈ ၼိူဝ်ႉၼင်ၵေႃႈ ႁၢင်ႈလီဢေႃႈ။

7ဝၢႆးၼၼ်ႉမေးၸဝ်ႈမၼ်းၼၼ်ႉဢဝ်တႃထိမ်ႇၸူးသိူင်ႇၸူးယူဝ်းသႅပ်ႈလႄႈလၢတ်ႈဝႃႈ၊ ၼွၼ်းလူၺ်ႈၵၼ်တင်းၵဝ်သေၵမ်း၊ ဝႃႈၼင်ႇၼႆဢေႃႈ။- 8မၼ်းၵေႃႈထဵင်ပႅတ်ႈလႄႈလၢတ်ႈတီႈမေးၸဝ်ႈမၼ်းၼၼ်ႉလႄႈဝႃႈ၊ တူၺ်းၶႃႈလူး၊ ၸဝ်ႈၵဝ်ၶႃႈဢမ်ႇႁူႉလူၺ်ႈလွင်ႈ ဢုၵ်ႉၸႃႇၵႃႈဢၼ်မီးတီႈၵဝ်ၶႃႈၵႃႈၼႂ်းႁိူၼ်းၼႆႉလႄႈ ဢဝ်ဢုၵ်ႉၸႃႇၵႃႈဢၼ်မီးတီႈမၼ်းၸဝ်ႈ ဢၢပ်ႈပၼ်ၵႃႈၼႂ်းမိုဝ်းၵဝ်ၶႃႈယဝ်ႉ။- 9ၵႃႈၼႂ်းႁိူၼ်းၼႆႉၵေႃႈ၊ ၵေႃႉဢၼ်ယႂ်ႇသေၵဝ်ၶႃႈၼႆႉ ဢမ်ႇမီးယဝ်ႉ။ လိူဝ်သေၸဝ်ႈၼၢင်း ဢၼ်ပဵၼ်မေးမၼ်းၸဝ်ႈၼၼ်ႉၼႆႉ၊ မၼ်းၸဝ်ႈ ဢမ်ႇႁႄႉဢမ်ႇၶႅၼ်ၵႃႈသင်တီႈၵဝ်ၶႃႈ။ ပေႃးပဵၼ်ၸိူဝ်ႉၼင်ႇၼႆၸိုင်၊ ၵဝ်ၶႃႈတၵ်းႁဵတ်းဢမူႉဢၼ်ဢပႅတ်ႈယႂ်ႇၼႆႉလႄႈၽိတ်းပိူင်ႈၽြႃးပဵၼ်ၸဝ်ႈလႆႈၸိူဝ်ႉၼင်ႇႁိုဝ်ၶႃႈ၊ ဝႃႈၼင်ႇၼႆသေဢေႃႈ။- 10ပိၵ်ႉသမ်ႉမၼ်းၼၼ်ႉတိုၵ်းယူင်းၸူဝ်းဢဝ်ယူဝ်းသႅပ်ႈၸိူဝ်ႉၼင်ႇၼၼ် ၵူႈဝၼ်းသေၵေႃႈ၊ မၼ်းယင်းဢမ်ႇထွမ်ႇဢမ်ႇဢဝ်ၵႂၢမ်းမၼ်းၼၼ်ႉလႄႈ ဝႄႈပႅတ်ႈ ဢမူႉတၢင်းဢၼ်ယူႇလူၺ်ႈၼွၼ်းလူၺ်ႈၵၼ်တင်းမၼ်းၼၼ်ႉဢေႃႈ။- 11ဝၼ်းၼိုင်ႈ မၼ်းၶဝ်ႈၵႃႈၼႂ်းႁိူၼ်းႁႂ်ႈလႆႈလူတူၺ်းၵၢၼ်ငၢၼ်းမၼ်းလႄႈ၊ မိူဝ်ႈဢၼ်ၵူၼ်းၸၢႆးၵႃႈတီႈႁိူၼ်းၼၼ်ႉ ဢမ်ႇမီးသေၵေႃႉသေၵူၼ်းၼၼ်ႉၸိုင်၊- 12မၼ်းၼၼ်ႉတိုတ်ႉၸၼ်ဢဝ်ၶူဝ်းၼုင်ႈမၼ်းလႄႈလၢတ်ႈဝႃႈ၊ ၼွၼ်းလူၺ်ႈၵၼ်တင်းၵဝ်သေၵမ်း၊ ဝႃႈၼင်ႇၼႆသေယဝ်ႉ၊ မၼ်းလွၼ်ႈပႅတ်ႈၶူဝ်းၼုင်ႈမၼ်းဝႆႉ ၵႃႈၼႂ်းမိုဝ်းမၼ်းၼၼ်ႉသေလႄႈ လႅၼ်ႈပၢႆႈဢွၵ်ႇၵႂႃႇၵႃႈၼွၵ်ႈသေဢေႃႈ။- 13မိူဝ်ႈဢၼ်မၼ်းၼၼ်ႉ ႁူႉႁၼ်လွင်ႈဢၼ်မၼ်းလွၼ်ႈပႅတ်ႈၶူဝ်းၼုင်ႈမၼ်းဝႆႉ ၵႃႈၼႂ်းမိုဝ်းသေလႄႈ လႅၼ်ႈပၢႆႈဢွၵ်ႇၵႂႃႇၼၼ်ႉၸိုင်၊- 14ႁွင်ႉဢဝ်ၵူၼ်းၸၢႆးၵႃႈတီႈႁိူၼ်းမၼ်းၼၼ်ႉၸိူဝ်းၼၼ်ႉလႄႈ လၢတ်ႈတီႈၶဝ်လႄႈဝႃႈ၊ တူၺ်းလူး၊ ၸဝ်ႈၼၼ်ႉ ဢဝ်ၵူၼ်း ႁေႇပြႄးၵေႃႉၼႆႉ သႂၢင်းဝႆႉႁႂ်ႈမၼ်းလႆႈႁဵတ်း ဢမ်ႇၼပ်ႉဢမ်ႇၶၢၼ်းတီႈႁဝ်းယဝ်ႉလူင်ပႄႇ။ မၼ်းၶဝ်ႈမႃး ႁႂ်ႈလႆႈႁဵတ်း တၢင်းဢၼ်ၼွၼ်းလူၺ်ႈၵၼ်တင်းၵဝ်လႄႈ ၵဝ်လႆႈႁဵတ်းတင်းသဵင်ဢၼ်ယႂ်ႇၼႃႇ ႁွင်ႉသႅၼ်ႇဢေႃႈ။- 15မိူဝ်ႈဢၼ်မၼ်းငိၼ်း ၵဝ်ႁဵတ်းတင်းသဵင်ဢၼ်ယႂ်ႇၼႃႇႁွင်ႉသႅၼ်ႇၼၼ်ႉၸိုင်၊ မၼ်းလွၼ်ႈပႅတ်ႈၶူဝ်းၼုင်ႈမၼ်းဝႆႉ ၵႃႈတီႈႁိမ်းၵဝ်ၼႆႉလႄႈ လႅၼ်ႈပၢႆႈဢွၵ်ႇၵႂႃႇၵႃႈၼွၵ်ႈသေဢေႃႈ၊ ဝႃႈၼင်ႇၼႆဢေႃႈ။- 16မၼ်းၼၼ်ႉ ဢဝ်ၶူဝ်းၼုင်ႈၼၼ်ႉဝႆႉ ၵႃႈတီႈႁိမ်းတူဝ်ၸဝ်ႈၵဝ်ႇ တေႃႇထိုင်ႁွတ်ႈၸဝ်ႈမၼ်းၶိုၼ်းမႃးၵႃႈတီႈႁိူၼ်းဢေႃႈ။- 17မၼ်းၼၼ်ႉ မွၵ်ႇလၢတ်ႈၵႂၢမ်းၸိူဝ်ႉၼင်ႇၼႆလႄႈဝႃႈၸမ်ႉ၊ ၶႃႈဢၼ်ပဵၼ်ၵူၼ်းႁေႇပြႄး ဢၼ်ၸဝ်ႈႁဝ်းသႂၢင်းဝႆႉၼၼ်ႉ ၶဝ်ႈမႃးႁႂ်ႈလႆႈႁဵတ်း ဢမ်ႇၼပ်ႉဢမ်ႇၶၢၼ်းတီႈၵဝ်ၶႃႈၶႃႈဢေႃႈ။- 18မိူဝ်ႈဢၼ်ၵဝ်ၶႃႈႁဵတ်းတင်းသဵင်ဢၼ်ယႂ်ႇၼႃႇ ႁွင်ႉသႅၼ်ႇၼၼ်ႉၸိုင်၊ မၼ်းလွၼ်ႈပႅတ်ႈၶူဝ်းၼုင်ႈမၼ်းဝႆႉ ၵႃႈတီႈႁိမ်းၵဝ်ၶႃႈလႄႈ လႅၼ်ႈပၢႆႈဢွၵ်ႇၵႂႃႇ ၵႃႈၼွၵ်ႈသေၶႃႈဢေႃႈ၊ ဝႃႈၼင်ႇၼႆဢေႃႈ။

19ၸဝ်ႈမၼ်းၼၼ်ႉ ငိၼ်းၵႂၢမ်းဢၼ်မေးမၼ်းလၢတ်ႈလႄႈဝႃႈ၊ ၶႃႈၸဝ်ႈႁဝ်းၼၼ်ႉႁဵတ်းတီႈၵဝ်ၶႃႈ ၸိူဝ်ႉၼင်ႇၼႆၶႃႈယဝ်ႉ၊ ဝႃႈၼင်ႇၼႆၼၼ်ႉသေယဝ်ႉ၊ ၸႂ်မႆႈၶႆႈၸႃႉလႄႈ၊- 20ဢဝ်ယူဝ်းသႅပ်ႈ ၵႂႃႇၶင်ဝႆႉၵႃႈၼႂ်းထွင်ႇ တီႈဢၼ်ၵူၼ်းဢၼ်ၶုၼ်ႁေႃၶမ်းၶျုၵ်ႈဝႆႉတင်းလၢႆယူႇၼၼ်ႉလႄႈ မၼ်းလႆႈယူႇၵႃႈၼႂ်းထွင်ႇဢေႃႈ။- 21ၵူၺ်းၵႃႈ ထႃႇဝရႃႉၽြႃးမီးယူႇလူၺ်ႈၵၼ်တင်းယူဝ်းသႅပ်ႈလႄႈ ဢဵတ်းလူႁဵတ်းၵျေးၸူးတီႈမၼ်းလႄႈ ႁႂ်ႈမၼ်းလႆႈၼႃႈလႆႈတႃ ၵႃႈတီႈထွင်ႇမူးဢေႃႈ။- 22ပိူဝ်ႈၼႆလႄႈ ထွင်ႇမူးၼၼ်ႉ ဢဝ်ၶဝ်ၸိူဝ်းဢၼ် လႆႈၶၢမ်ႇတၢင်းဢၼ်ၶျုၵ်ႈဝႆႉ ၵႃႈတီႈထွင်ႇၼၼ်ႉတင်းသဵင်ႈတင်းလူင် ဢၢပ်ႈပၼ် ၵႃႈၼႂ်းမိုဝ်း ယူဝ်းသႅပ်ႈလႄႈ မၼ်းပဵၼ်ၵေႃႉဢၼ်လႆႈၸီႇယၢင်ႇ လွင်ႈတၢင်းၵႃႈဢၼ်ၶဝ်ႁဵတ်းၵႃႈၼႂ်းထွင်ႇ တင်းသဵင်ႈတင်းလူင်ဢေႃႈ။- 23လိုၼ်းၼၼ်ႉထွင်ႇမူး ဢမ်ႇၶိုၼ်းဝၢႆႇလူဝၢႆႇတူၺ်းလွင်ႈတၢင်းဢၼ် ဢၢပ်ႈဝႆႉၵႃႈၼႂ်းမိုဝ်းမၼ်းၼၼ်ႉ။ လွင်ႈမၼ်းၸမ်ႉ ထႃႇဝရႃႉၽြႃး မီးယူႇလူၺ်ႈၵၼ်တင်းမၼ်းလႄႈ ႁႂ်ႈၵႃႈဢၼ်မၼ်းၵျၢမ်ႇပွင် သၢင်ႈႁဵတ်းၼၼ်ႉပျေႉၸုမ်ႇၼၼ်ႉဢေႃႈ။

Currently Selected:

ငဝ်ႈၵမ်ႇၽႃႇ 39: CBMS

Highlight

Copy