ၵလႃႇတီႉ 1
1
1ၵဝ်ပေႃးလူႉဢၼ်ပဵၼ်တမၢၼ်ႇၸဝ်ႈ၊ဢၼ်ဢမ်ႇၸၢပ်ႈသႅင်ႇၵၼ်တင်းၵူၼ်း၊ ဢၼ်ယင်းဢမ်ႇမီးဢၶႂၢင်ႉၵူၼ်းလႄႈ မီးတင်းဢၶႂၢင်ႉ ယေႇသူႉၶရိၸ်ႈ ဢိၵ်ႇတင်းဢၶႂၢင်ႉပေႃႈၸဝ်ႈ၊ဢၼ်ဝႃႈၽြႃးပဵၼ်ၸဝ်ႈဢၼ်ႁႂ်ႈၸဝ်ႈၼၼ်ႉ၊လုၵ်ႉၵႃႈတၢင်းတၢႆၶိုၼ်းလိပ်းၼၼ်ႉၼႆႉ၊- 2ဢိၵ်ႇတင်းပီႈၼွင်ႉၵႃႈဢၼ်မီးယူႇလူၺ်ႈၵၼ်တင်းၵဝ် တင်းသဵင်ႈတင်းလူင်ၸိူဝ်းၼႆႉ ပၼ်ငိၼ်းၵႂႃႇ တီႈၸိူဝ်းၸဝ်ႈတင်းလၢႆဢၼ်မီးၵႃႈၼႂ်းမိူင်းၵလႃႇတီႉဢေႃႈ။- 3ႁႂ်ႈသူႉၵျေးၸူး၊ဢိၵ်ႇတင်းတၢင်းၼိမ်ဢၼ်ပဵၼ်မႃးၵႃႈတီႈပေႃႈၸဝ်ႈ ဢၼ်ဝႃႈၽြႃးပဵၼ်ၸဝ်ႈ ဢိၵ်ႇတင်းၸဝ်ႈႁဝ်းယေႇသူႉၶရိၸ်ႈၼၼ်ႉ၊- 4ဢဝ်တူဝ်ၸဝ်ႈၵဝ်ႇ၊ဢၢပ်ႈပၼ်ၵွပ်ႈပိူဝ်ႈဢပႅတ်ႈႁဝ်း၊ႁႂ်ႈလႆႈ ၶျွတ်ႈဢဝ်ႁဝ်း၊ၵႃႈၼႂ်းပိတ်ႉၸူႉပၢၼ်ႇၽဝႃႉဢၼ်ႁၢႆႉမိူၵ်ႈၼႆႉ မႅၼ်ႈၼင်ႇဢလူဝ်ႇၽြႃးပဵၼ်ၸဝ်ႈ ဢၼ်ဝႃႈၸဝ်ႈပေႃႈႁဝ်းၼၼ်ႉ၊ မီးၼိူဝ်သူသေၵမ်းလူၺ်ႈ။- 5ႁႂ်ႈမုၼ်ၽုင်းမၼ်းၸဝ်ႈၼၼ်ႉ၊ ယႂ်ႇၼႃႇၵူႈၵမ်ႇၽႃႇသိုပ်ႇသိုပ်ႇတၢမ်းတၢမ်း သေၵမ်းလူၺ်ႈတီႈၶႃႈ၊ ဢႃႇမိၼ်ႇ။
ၶၢဝ်ႇတြႃးသိူဝ်းပျေႃႇတၢင်ႇဢၼ်
6ၵဝ်မီးတၢင်းဢၼ်ဢၢမ်း လွင်ႈဢၼ်သူၽၢတ်ႇယၢၼ်ၵၼ်တင်း၊ၵေႃႉဢၼ်ဢိင်ၵျေးၸူးၸဝ်ႈၶရိၸ်ႈသေလႄႈ ႁွင်ႉဢဝ်သူၼၼ်ႉ၊ၶၼ်ၶၼ်ၽႂ်းၽႂ်းထၢၼ်ႇၼႆႉလႄႈ ႁပ်ႉတုင်းဢဝ်တြႃးသတၢင်းသိူဝ်းပျေႃႇတၢင်ႇၸိူဝ်ႉတၢင်ႇဢၼ် ဢၼ်ဢမ်ႇၸႂ်ႈတြႃးသတၢင်းသိူဝ်းပျေႃႇၼၼ်ႉ၊ၼႃႇလူင်လၢင်ဢေႃႈ။- 7မီးၵူၼ်းၵမ်ႈၽွင်ႈ၊ဢၼ်ၸၢင်ႈယႃႉယူၵ်ႉသူလႄႈ ၶႂမ်ႈပိၼ်ႈ တြႃးသတၢင်းသိူဝ်းပျေႃႇၸဝ်ႈၶရိၸ်ႈပႅတ်ႈၼၼ်ႉဢေႃႈ။- 8ၼႂ်းဝႃႈၼၼ်သေၵေႃႈ လိူဝ်သေတြႃးသတၢင်းသိူဝ်းပျေႃႇ ဢၼ်ႁဝ်းႁေႃးလၢတ်ႈတီႈသူၼၼ်ႉ၊ ပေႃးႁဝ်းႁေႃးလၢတ်ႈ တြႃးသတၢင်းသိူဝ်းပျေႃႇတၢင်ႇၸိူဝ်ႉတၢင်ႇဢၼ်လႄႈသင်၊ ပေႃးတမၢၼ်ႇၵၢင်ႁၢဝ်ဢၼ်လုၵ်ႉသေၵႃႈတီႈ မိူင်းၵၢင်ႁၢဝ်မႃးၼၼ်ႉ ႁေႃးလၢတ်ႈလႄႈသင်၊ ႁႂ်ႈၵေႃႉဢၼ်ႁေႃးလၢတ်ႈၼၼ်ႉ ၶၢမ်ႇတၢင်းဢၼ်မၼ်းၸဝ်ႈ ၵိၼ်ႇဝႃႈသေၵမ်းလူၺ်ႈ။- 9ၸိူဝ်ႉၼင်ႇဢၼ်ၵဝ်ဝႃႈဝႆႉဢၼ်ဝႃႈလိူဝ်သေ တြႃးသတၢင်းသိူဝ်းပျေႃႇဢၼ်သူလႆႈၶၢမ်ႇဢဝ်ယဝ်ႉၼၼ်ႉ၊ ပေႃးသေၵေႃႉသေၵူၼ်း ႁေႃးလၢတ်ႈတြႃးသတၢင်းသိူဝ်းပျေႃႇတၢင်ႇၸိူဝ်ႉတၢင်ႇဢၼ်ၸိုင်၊ ႁႂ်ႈၵေႃႉၼၼ်ႉၶၢမ်ႇတၢင်းဢၼ်မၼ်းၸဝ်ႈၵိၼ်ႇဝႃႈသေၵမ်းလူၺ်ႈ၊ ဝႃႈၼင်ႇၼႆၼၼ်ႉ၊ တေႃႈလဵဝ်ၼႆႉၵဝ်သမ်ႉထၢပ်ႈထႅင်ႈလႄႈဝႃႈလူးၵွၼ်ႇဢေႃႈ။- 10လွင်ႈမၼ်းၸမ်ႉ တေႃႈလဵဝ်ၼႆႉၵဝ်ၸွမ်းဢလူဝ်ႇၵူၼ်းႁိုဝ်။ ၸွမ်းဢလူဝ်ႇၽြႃးပဵၼ်ၸဝ်ႈႁိုဝ်။ ၵဝ်ၵျၢမ်ႇႁႃႁႂ်ႈလႆႈထုၵ်ႇၸႂ်ၵူၼ်းႁိုဝ်။ ပေႃးၵဝ်ယင်းထုၵ်ႇၸႂ်ၵူၼ်းယူႇၸိုင်၊ ၵဝ်ဢမ်ႇၸႂ်ႈၶႃႈၸဝ်ႈၶရိၸ်ႈယဝ်ႉ။
ပေႃးလူႉပဵၼ်တမၢၼ်ႇၸဝ်ႈမႃး
11ပီႈၼွင်ႉၶဝ်ဢိူၺ်း၊ ၵဝ်ပၼ်ငိၼ်းၵႂႃႇ လွင်ႈဢၼ်တြႃးသတၢင်းသိူဝ်းပျေႃႇဢၼ်ၵဝ်ႁေႃးလၢတ်ႈၼၼ်ႉ၊ဢမ်ႇၸႂ်ႈတြႃးၵူၼ်း။- 12ၵဝ်ဢမ်ႇလႆႈၶၢမ်ႇဢဝ်ၵႃႈတီႈၵူၼ်း၊ လိူဝ်သေပျႃႇတိၵ်ႈယေႇသူႉၶရိၸ်ႈၼၼ်ႉ၊ ၵဝ်ဢမ်ႇလႆႈၶၢမ်ႇဢဝ်ၼႄးဢူႉပတေႇ၊တၢင်ႇတီႈတၢင်ႇလႅၼ်ၼၼ်ႉတီႈသူဢေႃႈ။- 13ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ သူလႆႈႁူႉလႆႈငိၼ်းလွင်ႈဢၼ်ၵဝ်ယူႇၼႂ်းၽႃႇသႃႇယူႉတႃႉ မိူဝ်ႈဢွၼ်ၼႆႉၼၼ်ႉလႄႈ ၵမ်ၵျၢင်ႉ တၢင်းၵမ်တၢင်းၵျၢင်ႉဢၼ်ဝႃႈ တၢင်းဢၼ်ၼိၵ်ႈၸၢၵ်ႈငႅၼ်းသႄး ယႃႉပႅတ်ႈၸိူဝ်းၸဝ်ႈၽြႃးပဵၼ်ၸဝ်ႈၼႃႇသေ တၢင်းဢၼ်တႅၵ်ႈတူၺ်းလႆႈ၊- 14ဢိၵ်ႇတင်း လွင်ႈဢၼ်ၵဝ်ႁႅင်းယႂ်ႇၼႃႇလူင်လၢင် ၼႂ်းၼႄးဢူႉပတေႇမိူဝ်ႈၵွၼ်ႇ ဢၼ်ၵဝ်လႆႈၶၢမ်ႇဢဝ် ၼႂ်းမိုဝ်းပူႇမွၼ်ႇၼၼ်ႉယူႇသေလႄႈ ၵႆႉၸွမ်းၽႃႇသႃႇယူႉတႃႉၼႃႇသေၵူၼ်းၼမ်ၼႃႇ ဢၼ်ဢသၢၵ်ႈပဵင်းၵၼ်တင်းၵဝ် ၼႂ်းၸိူဝ်ႉၶိူဝ်းၵဝ်ၼၼ်ႉယဝ်ႉ။
15ၵူၺ်းၵႃႈ မိူဝ်ႈဢၼ်ၽြႃးပဵၼ်ၸဝ်ႈ ဢၼ်လိူၵ်ႈၵဵပ်းဢဝ်ၵဝ် ၽႄဝႆႉၸႃႉၸဵမ်မိူဝ်ႈ ၼႂ်းတွင်ႉမႄႈလႄႈ ႁွင်ႉဢဝ်ၵဝ်ၵွပ်ႈၵျေးၸူးၸဝ်ႈၼၼ်ႉ၊- 16ၸွမ်းၼင်ႇဢလူဝ်ႇမၼ်းၸဝ်ႈ ၼႄပျႃးလုၵ်ႈမၼ်းၸဝ်ႈတီႈၵဝ် ႁႂ်ႈၵဝ်လႆႈႁေႃးလၢတ်ႈတြႃးသတၢင်းသိူဝ်းပျေႃႇလုၵ်ႈမၼ်းၸဝ်ႈ ၵႃႈၼႂ်းၵူၼ်းတၢင်ႇၸိူဝ်ႉတၢင်ႇၶိူဝ်းတင်းလၢႆၼၼ်ႉၸိုင်၊ ၵဝ်ဢမ်ႇတိူင်ႇပၢင်ႇၵၼ်တင်းၼိူဝ်ႉတင်းလိူတ်ႈ။- 17ၵႃႈတီႈဝဵင်းယေႇရူႉသလႅမ်ႇ တီႈၶဝ်ၸိူဝ်းဢၼ်ပဵၼ်တမၢၼ်ႇၸဝ်ႈ ဢွၼ်တၢင်းၵဝ်ၼၼ်ႉၵေႃႈ၊ ၵဝ်ဢမ်ႇၵႂႃႇၸူး။ ၵဝ်ၵႂႃႇၵႃႈတီႈမိူင်းဢရေႇပျႃႉၵမ်းလဵဝ်လႄႈ သမ်ႉၶိုၼ်းမိူဝ်းၵႃႈတီႈဝဵင်းထမ်ႇမသႅတ်ႉဢေႃႈ။
18ဝၢႆးၼၼ်ႉ မိူဝ်ႈဢၼ်ပူၼ်ႉသၢမ်ပီႊယဝ်ႉၼၼ်ႉၸိုင်၊ ၵဝ်ၵႂႃႇၵႃႈတီႈဝဵင်းယေႇရူႉသလႅမ်ႇ၊ ႁႂ်ႈလႆႈမိုတ်ႈၵိုဝ်းၵၼ်တင်းၵေႇၽႃႉလႄႈ ယူႇလူၺ်ႈၵၼ်တင်းမၼ်းသိပ်းႁႃႈဝၼ်းဢေႃႈ။- 19လိူဝ်သေမၼ်း ဢိၵ်ႇတင်းယႃႇၵုပ်ႈၼွင်ႉၸၢႆးၸဝ်ႈၽြႃးၼၼ်ႉ၊ ၵဝ်ဢမ်ႇထူပ်းဢမ်ႇႁၼ်တမၢၼ်ႇၸဝ်ႈ တၢင်ႇတီႈတၢင်ႇပႃးသေၵေႃႉသေၵူၼ်း။- 20လွင်ႈတၢင်းဢၼ်ၵဝ်တႅမ်ႈပၼ်ငိၼ်းၵႂႃႇတီႈသူ ၸိူဝ်ႉၼင်ႇၼႆၼၼ်ႉၸမ်ႉ၊ ၵဝ်ဢမ်ႇသုင်းဢမ်ႇလၢတ်ႈၵႂၢမ်းမူႉသႃႇဝႃႈၼႆ၊ ၵဝ်ဝႃႈၵႃႈတီႈၽၢႆႇၼႃႈၽြႃးပဵၼ်ၸဝ်ႈဢေႃႈ။- 21ဝၢႆးၼၼ်ႉ၊ ၵဝ်ၵႂႃႇၵႃႈတီႈမိူင်းသူႉရီႉတင်းမိူင်းၵီႉလီႉၵီႉသေလႄႈ၊- 22ၸိူဝ်းၸဝ်ႈဢၼ်ၶၢမ်ႇဢဝ်ၽႃႇသႃႇၸဝ်ႈၶရိၸ်ႈ ၵႃႈၼႂ်းမိူင်းယူႉတႃႉတင်းလၢႆၼၼ်ႉ ယင်းဢမ်ႇႁူႉၸၵ်းၼႃႈၵဝ်လႄႈယူႇဢေႃႈ။- 23ၶဝ်လႆႈငိၼ်းပိူၼ်ႈဝႃႈ၊ ၵေႃႉဢၼ်ယၢမ်ႈၼိၵ်ႈၸၢၵ်ႈငႅၼ်းသႄးႁဝ်းၼၼ်ႉ တေႃႈလဵဝ်ၼႆႉတူဝ်ၸဝ်ႈၵဝ်ႇ ႁေႃးလၢတ်ႈတြႃးတၢင်းယုမ်ႇမၢတ်ႈ ဢၼ်တူဝ်ၸဝ်ႈၵဝ်ႇယၢမ်ႈယႃႉပႅတ်ႈမိူဝ်ႈဢွၼ်ၼႆႉၼၼ်ႉယူႇဢေႃႈ၊ ဝႃႈၼင်ႇၼႆၵူၺ်းလႄႈ၊- 24ယွင်ႈယေႃးၽြႃးပဵၼ်ၸဝ်ႈၵွပ်ႈပိူဝ်ႈလွင်ႈၵဝ်ဢေႃႈ။
Currently Selected:
ၵလႃႇတီႉ 1: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
