ယေႇၸၵျေႇလႃႉ 37

ထုင်ႉႁူၺ်ႈလုပ်ႇႁႅင်ႈ

1လႆႈသမ်ႉ မိုဝ်းထႃႇဝရႃႉၽြႃး မီးယူႇၵႃႈၼိူဝ်ၵဝ်လႄႈ ဢဝ်ဝီႉၺိၺ်ႇ ထႃႇဝရႃႉၽြႃး ဢဝ်ၵဝ်ဢွၵ်ႇၵႂႃႇ ၵႃႈတီႈၼွၵ်ႈသေလႄႈ ဢဝ်ၵဝ်ဝႆႉ ၵႃႈၼႂ်းၵၢင်ပၢင်ႇႁူၺ်ႈလႄႈ ၵႃႈတီႈၼၼ်ႈ တဵမ်ဝႆႉတင်းလုပ်ႇတင်းလၢဝ်ႈဢေႃႈ။- 2မၼ်းၸဝ်ႈ ႁႂ်ႈၵဝ်ပႆလဵပ်ႈၵႂႃႇ ၵႃႈတီႈႁိမ်းႁွမ်းလုပ်ႇ ၸိူဝ်းၼၼ်ႉဢေႃႈ။ ၵႃႈတီႈၼိူဝ်ၼႃႈပၢင်ႇႁူၺ်ႈၼၼ်ႉ မီးလုပ်ႇမီးလၢဝ်ႈၼမ်ၼႃႇလႄႈ ဢွၼ်ၵၼ် ပဵၼ်ဢၼ်ႁႅင်ႈႁွင်ၼႃႇလူင်လၢင်ဝႆႉဢေႃႈ။- 3မၼ်းၸဝ်ႈၵေႃႈ ထၢမ်ၵဝ်လႄႈဝႃႈ၊ လုၵ်ႈၵူၼ်းဢိူၺ်း၊ လုပ်ႇၸိူဝ်းၼႆႉ တၵ်းလိပ်းလႆႈႁိုဝ်။ ဝႃႈၼင်ႇၼႆသေယဝ်ႉ၊ ၵဝ်လဝ်ႊလၢတ်ႈလႄႈဝႃႈ၊ ၸဝ်ႈထႃႇဝရႃႉၽြႃး တီႈၶႃႈ၊ ၸဝ်ႈႁဝ်းႁူႉတီႈၶႃႈဢေႃႈ၊ ဝႃႈၼင်ႇၼႆဢေႃႈ။- 4မၼ်းၸဝ်ႈၵေႃႈ မီးဢမိင်ႉတီႈၵဝ်လႄႈဝႃႈ၊ မႂ်းႁဵတ်းပရေႃးၽႅတ်ႈ သေလႄႈ ႁေႃးလၢတ်ႈၵႃႈၼိူဝ်လုပ်ႇၼိူဝ်လၢဝ်ႈ ၸိူဝ်းၼႆႉလႄႈဝႃႈ၊ လုပ်ႇဢၼ်ႁႅင်ႈဢၼ်ႁွင်ၶဝ်ဢိူၺ်း၊ သူဢွၼ်ၵၼ် ထွမ်ႇငိၼ်းဢမိင်ႉ ထႃႇဝရႃႉၽြႃး တႃႉ။- 5ၸဝ်ႈထႃႇဝရႃႉၽြႃး မီးဢမိင်ႉတီႈလုပ်ႇတီႈလၢဝ်ႈ ၸိူဝ်းၼႆႉလႄႈဝႃႈၸမ်ႉ၊ တူၺ်းလူး။ ၵဝ်တၵ်းသႂၢင်းၸႂ်သႂ်ႇ ၵႃႈၼႂ်းသူလႄႈ သူတၵ်းလႆႈဢသၢၵ်ႈလိပ်းဢေႃႈ။- 6ၵဝ်တၵ်း သႂၢင်းသႂ်ႇပၼ်ဢဵၼ်ၵႃႈၼိူဝ်သူလႄႈ ႁႂ်ႈၼိူဝ်ႉမုၼ်းၶိုၼ်ႈၵႃႈၼိူဝ်သူဢေႃႈ။ ၵဝ်တၵ်းႁႂ်ႈၼင်ႁူမ်ႇသုမ်ႇသူလႄႈ သႂၢင်းၸႂ်သႂ်ႇပၼ်သေယဝ်ႉ၊ သူတၵ်းလႆႈဢွၼ်ၵၼ် ဢသၢၵ်ႈလိပ်းလႄႈ ႁူႉလွင်ႈဢၼ်ၵဝ်ပဵၼ် ထႃႇဝရႃႉၽြႃးဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆလႄႈ၊- 7ၵဝ်ႁဵတ်း ပရေႃးၽႅတ်ႈ ၸွမ်းၵႃႈၼင်ႇဢၼ် မၼ်းၸဝ်ႈသင်ႇလၢတ်ႈဝႆႉ ၼၼ်ႉဢေႃႈ။ ၼႂ်းမိူဝ်ႈဢၼ် ၵဝ်ယင်းတိုၵ်ႉႁဵတ်း ပရေႃးၽႅတ်ႈ ယူႇၼၼ်ႉၸိုင်၊ မီးသဵင်ဢၼ်လင်ဢၼ်မေႃးလႄႈ တၢင်းဢၼ်သၼ်ႇဢၼ်ဝႆၵေႃႈ မီးဢေႃႈ။ လုပ်ႇၸိူဝ်းၼၼ်ႉ ဢၼ်ၼိုင်ႈလႄႈဢၼ်ၼိုင်ႈ တီႈၽႂ်တီႈမၼ်း သုတ်ႉၸူးၶၢႆႉၸူးၵၼ်ဢေႃႈ။- 8ၼႂ်းမိူဝ်ႈဢၼ် ၵဝ်ယင်းတိုၵ်ႉလူတူၺ်းယူႇၼၼ်ႉ၊ ဢဵၼ်တင်းလၢႆ ပေႃႇမႃးၵႃႈၼိူဝ်ၶဝ်လႄႈ ၼိူဝ်ႉၵေႃႈမုၼ်းၶိုၼ်ႈၵႃႈၼိူဝ်ၶဝ်လႄႈ ၼင်ၵေႃႈသုမ်ႇႁူမ်ႇၶဝ်ဝႆႉဢေႃႈ။ ၵူၺ်းၵႃႈဢမ်ႇပႆႇမီးၸႂ်။- 9မၼ်းၸဝ်ႈၵေႃႈ မီးဢမိင်ႉတီႈၵဝ်လႄႈဝႃႈ၊ လုၵ်ႈၵူၼ်းဢိူၺ်း၊ ႁဵတ်းပရေႃးၽႅတ်ႈ တီႈလူမ်းတႃႉ။ ႁဵတ်းပရေႃးၽႅတ်ႈ သေလႄႈ ႁေႃးလၢတ်ႈတီႈလူမ်းလႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၸႂ်ဢိူၺ်း၊ လုၵ်ႉသေ ၵႃႈၼႂ်းလူမ်းသီႇၼႃႈသီႇၽၢႆႇ ၸိူဝ်းၼၼ်ႉ မႃးလႄႈ ပဝ်ႇသႂ်ႇၵႃႈၼိူဝ်တူဝ်တၢႆ ၸိူဝ်းၼႆႉ ႁႂ်ႈၶဝ်ဢသၢၵ်ႈလိပ်းတႃႉ၊ ဝႃႈၼင်ႇၼႆလႄႈ၊- 10ၵဝ်ႁဵတ်းပရေႃးၽႅတ်ႈ ၸွမ်းၵႃႈၼင်ႇဢၼ် မၼ်းၸဝ်ႈသင်ႇလၢတ်ႈဝႆႉ ၼၼ်ႉလႄႈ လူမ်းၶဝ်ႈၵႃႈၼႂ်းၶဝ်သေယဝ်ႉ၊ ၶဝ်ၼၼ်ႉ ဢွၼ်ၵၼ်ဢသၢၵ်ႈလိပ်းလႄႈ ပဵၼ်ပူဝ်ႇပႃႇဢၼ်ၼမ်ၼႃႇလူင်လၢင် ယူႇသေလႄႈ ၸုၵ်းယူႇၵႃႈၼိူဝ်တိၼ်ၶဝ်ဢေႃႈ။- 11မၼ်းၸဝ်ႈၵေႃႈ မီးဢမိင်ႉတီႈၵဝ်လႄႈဝႃႈ၊ လုၵ်ႈၵူၼ်းဢိူၺ်း၊ လုပ်ႇၸိူဝ်းၼႆႉပဵၼ် ၵူၼ်းမဵဝ်းဢီႉသရေႇလႃႉတင်းလၢႆဢေႃႈ။ တူၺ်းလူး။ ၶဝ်ၸၢင်ႈဢွၼ်ၵၼ်လၢတ်ႈလႄႈဝႃႈ၊ လုပ်ႇႁဝ်း တင်းလၢႆ မီးတၢင်းဢၼ်ႁႅင်ႈၵႂႃႇႁွင်ၵႂႃႇယဝ်ႉ။ ႁဝ်းၼႆႉဢမ်ႇမီးတီႈဢၼ် မုင်ႈထႃႈမွင်းထႃႈ။ ႁဝ်းၼႆႉသုမ်းၸွမ်းယဝ်ႉ၊ ဝႃႈၼင်ႇၼႆဢေႃႈ။- 12ပိူဝ်ႈၼႆလႄႈ မႂ်းႁဵတ်းပရေႃးၽႅတ်ႈ သေလႄႈ ႁေႃးလၢတ်ႈတီႈၶဝ်လႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵူၼ်းၵဝ်တင်းလၢႆၶဝ်ဢိူၺ်း၊ ၵဝ်တၵ်းၽုၺ်ႇပိုတ်ႇႁူးၶုမ်ပႃႇႁဵဝ်ႈသူ တင်းလၢႆလႄႈ ဢဝ်သူဢွၵ်ႇသေၵႃႈၼႂ်းႁူးၶုမ်ပႃႇႁဵဝ်ႈသူ ၸိူဝ်းၼၼ်ႉလႄႈ ဢဝ်သူ သူင်ႇႁွတ်ႈ ၵႃႈၼႂ်းမိူင်းဢီႉသရေႇလႃႉဢေႃႈ။- 13ၵူၼ်းၵဝ်တင်းလၢႆၶဝ်ဢိူၺ်း၊ မိူဝ်ႈဢၼ် ၵဝ်ၽုၺ်ႇပိုတ်ႇႁူးၶုမ်ပႃႇႁဵဝ်ႈသူ ၸိူဝ်းၼၼ်ႉလႄႈ ဢဝ်သူဢွၵ်ႇသေၵႃႈၼႂ်းႁူးၶုမ်ပႃႇႁဵဝ်ႈသူ ၸိူဝ်းၼၼ်ႉၸိုင်၊ သူတၵ်းလႆႈႁူႉလွင်ႈဢၼ် ၵဝ်ပဵၼ်ထႃႇဝရႃႉၽြႃးဢေႃႈ။- 14ၵဝ်တၵ်းဢဝ် ဝီႉၺိၺ်ႇၵဝ်သႂၢင်းသႂ်ႇပၼ် ၵႃႈၼႂ်းသူႁႂ်ႈသူဢသၢၵ်ႈလိပ်းလႄႈ ၶျႃးတီႈယူႇသူပၼ် ၵႃႈၼႂ်းမိူင်းဢၼ်သူယူႇ ၵဝ်ႇၵဝ်ႇၼၼ်ႉဢေႃႈ။ သူတၵ်းလႆႈႁူႉလွင်ႈဢၼ်ၵဝ် ထႃႇဝရႃႉၽြႃး လၢတ်ႈဝႆႉယဝ်ႉလႄႈ ႁဵတ်းၸွမ်းဢေႃႈ၊ ထႃႇဝရႃႉၽြႃး မီးဢမိင်ႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

မိူင်းယူႉတႃႉလႄႈမိူင်းဢီႉသရေႇလႃႉတၵ်းပဵၼ်မိူင်းလဵဝ်ၵၼ်ၶိုၼ်း

15လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊- 16လုၵ်ႈၵူၼ်းဢိူၺ်း၊ မႂ်းဢဝ်ၶွၼ်ႉလႅမ်ႈၼိုင်ႈ လႄႈ ဢဝ်ၵႂၢမ်းဢၼ်ဝႃႈ၊ ပုၼ်ႈမဵဝ်းယူႉတႃႉ ဢိၵ်ႇတင်း ၵူၼ်းမဵဝ်းဢီႉသရေႇလႃႉတင်းလၢႆ ဢၼ်ႁူမ်ႈၵၼ်ပွင်းၵၼ်တင်းမၼ်း ၼၼ်ႉဢေႃႈ၊ ဝႃႈၼင်ႇၼႆၼၼ်ႉ တႅမ်ႈသႂ်ႇဝႆႉၵႃႈၼိူဝ်မၼ်းတႃႉ။ လႆႈသမ်ႉဢဝ်ၶွၼ်ႉလႅမ်ႈၼိုင်ႈလႄႈ ဢဝ်ၵႂၢမ်းဢၼ်ဝႃႈ၊ ပုၼ်ႈမဵဝ်းယူဝ်းသႅပ်ႈ ဢိၵ်ႇတင်း ၵူၼ်းမဵဝ်းဢီႉသရေႇလႃႉတင်းလၢႆ ဢၼ်ႁူမ်ႈၵၼ်ပွင်းၵၼ်တင်းမၼ်း ၼၼ်ႉဢေႃႈ။ ပဵၼ်ၶွၼ်ႉဢေႇၽရိမ်ႇယဝ်ႉ၊ ဝႃႈၼင်ႇၼႆၼၼ်ႉ တႅမ်ႈသႂ်ႇဝႆႉၵႃႈၼိူဝ်မၼ်းတႃႉ။- 17ဢဝ်သွင်လႅမ်ႈၼၼ်ႉ ႁွမ်းၵၼ်ဝႆႉ ႁႂ်ႈပဵၼ်လႅမ်ႈလဵဝ်ၵူၺ်းပုၼ်ႈမႂ်းတႃႉ။ တၵ်းပဵၼ်လႅမ်ႈလဵဝ်ၵူၺ်းၵႂႃႇ ၵႃႈၼႂ်းမိုဝ်းမႂ်းဢေႃႈ။- 18ပေႃးၵူၼ်းမဵဝ်းလဵဝ်ၵၼ်တင်းမႂ်း ၸိူဝ်းၼၼ်ႉ ထၢမ်လႄႈဝႃႈ၊ တၵ်းဢမ်ႇလၢတ်ႈလွင်ႈဢၼ် ႁဵတ်းၸိူဝ်ႉၼင်ႇႁိုဝ်ၼၼ်ႉ တီႈႁဝ်းႁိုဝ်။ ဝႃႈၼင်ႇၼႆၸိုင်၊- 19မႂ်းလၢတ်ႈတီႈၶဝ်လႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ တူၺ်းလူး။ ၵဝ်တၵ်း ဢဝ်ၶွၼ်ႉယူဝ်းသႅပ်ႈ ဢၼ်ဢေႇၽရိမ်ႇ ဢိၵ်ႇတင်း မဵဝ်းၸိူဝ်ႉၶိူဝ်းဢီႉသရေႇလႃႉ ဢၼ်ႁူမ်ႈၵၼ်ပွင်းၵၼ်တင်းမၼ်းယိပ်းၵမ်ၼၼ်ႉ ႁွမ်းၵၼ်တင်းၶွၼ်ႉယူႉတႃႉသေလႄႈ ႁႂ်ႈပဵၼ် ၶွၼ်ႉလႅမ်ႈလဵဝ်ၵူၺ်းလႄႈ တၵ်းပဵၼ်လႅမ်ႈလဵဝ်ၵႂႃႇ ၵႃႈၼႂ်းမိုဝ်းမႂ်းဢေႃႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆတႃႉ။- 20ၶွၼ်ႉဢၼ်မႂ်းတႅမ်ႈသႂ်ႇဝႆႉ ၸိူဝ်းၼၼ်ႉ တၵ်းလႆႈမီးယူႇၵႃႈၼႂ်းမိုဝ်းမႂ်း သိုဝ်ႈၼႃႈတႂ်ႈတႃၶဝ်ဢေႃႈ။- 21မႂ်းသမ်ႉလၢတ်ႈတီႈၶဝ်လႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်းႁွင်ႉဢဝ် ၵူၼ်းမဵဝ်းဢီႉသရေႇလႃႉတင်းလၢႆ ဢွၵ်ႇသေ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း တီႈဢၼ် ၶဝ်ႁွတ်ႈထိုင်ၼၼ်ႉလႄႈ ႁႂ်ႈၶဝ်လုၵ်ႉသေၵႃႈတီႈ ၵူႈတီႈၵူႈလႅၼ်မႃးၸူႉၵၼ်တုမ်ၵၼ် သေလႄႈ ဢဝ်ၶဝ်သူင်ႇႁွတ်ႈ ၵႃႈၼႂ်းမိူင်းဢၼ်ၶဝ်ယူႇ ၵဝ်ႇၵဝ်ႇၼၼ်ႉဢေႃႈ။- 22ၵဝ်တၵ်း ႁႂ်ႈၶဝ်ပဵၼ်ၵူၼ်းမဵဝ်းလဵဝ်ၵူၺ်း ၵႃႈၼိူဝ်လွႆဢီႉသရေႇလႃႉတင်းလၢႆ ၵႃႈၼႂ်းမိူင်းၼၼ်ႉလႄႈ ၶုၼ်ႁေႃၶမ်းပႃးလဵဝ်ၵူၺ်း တၵ်းလႆႈဢုပ်ႉပိူင်ႇၸၢမ်ႇၸႃးၶဝ်ဢေႃႈ။ ၵမ်းလိုၼ်း ၶဝ်ဢမ်ႇလႆႈပဵၼ် ၵူၼ်းသွင်ၸိူဝ်ႉသွင်မဵဝ်း။ ၵမ်းလိုၼ်း ၶဝ်ဢမ်ႇလႆႈပဵၼ် သွင်သိုင်ႇသွင်မိူင်း လႃးလႃး။- 23ၵမ်းလိုၼ်း ၶဝ်ဢမ်ႇလႆႈ ႁႂ်ႈတူဝ်ၶဝ်ၵူဝ်ႈၵိူၵ်ႇလူၺ်ႈ ရုၵ်ႈထူႉသၢင်းထူႉၶဝ်၊ လွင်ႈတၢင်းဢၼ်လီႁင်ႈဢဵတ်ႇသဵတ်ႇၶဝ်၊ လွင်ႈတၢင်းဢၼ်ပူၼ်ႉ ဢၼ်လိူဝ်ၶဝ်ၼၼ်ႉ။ ၵဝ်တၵ်း ၵႄႇသႄႇၼုၵ်ႈဢဝ် ၶဝ်ဢွၵ်ႇသေ ၵႃႈၼႂ်းတီႈယူႇတီႈသဝ်း ၵႃႈမီးတီႈဢၼ် ၶဝ်ၽိတ်းပိူင်ႈၸိူဝ်းၼၼ်ႉလႄႈ ႁႂ်ႈၶဝ်မူတ်းသႂ်ဢေႃႈ။ ၶဝ်တၵ်းပဵၼ်ၵူၼ်းၵဝ်လႄႈ ၵဝ်တၵ်းပဵၼ် ၽြႃးပဵၼ်ၸဝ်ႈ ၶဝ်ဢေႃႈ။- 24ၶႃႈၵဝ်တႃႇဝိတ်ႈ တၵ်းပဵၼ် ၶုၼ်ႁေႃၶမ်းၶဝ်လႄႈ ၶဝ်ၵႃႈမီးၼၼ်ႉ တၵ်းမီးၵေႃႉဢၼ်လဵင်ႉသူဝ်းထိင်းသူဝ်း ၵေႃႉလဵဝ်ၵူၺ်းဢေႃႈ။ ၶဝ်တၵ်းဢွၼ်ၵၼ်ၸွမ်း သဵၼ်ႈတၢင်းဢၼ်ၵဝ်ၸီႇယၢင်ႇဝႆႉၸိူဝ်းၼၼ်ႉလႄႈ ပႂ်ႉၵမ်ပႂ်ႉၵျၢင်ႉ ထုင်းၽိင်ႈတြႃးၵဝ် ၸိူဝ်းၼၼ်ႉ သေလႄႈ ႁဵတ်းၸွမ်းဢေႃႈ။- 25ၶဝ်တၵ်းလႆႈဢွၼ်ၵၼ်ယူႇ ၵႃႈၼႂ်းမိူင်းဢၼ်ၵဝ်ပၼ် တီႈၶႃႈၵဝ်ယႃႇၵုပ်ႈလႄႈ ပူႇသူမွၼ်ႇသူယၢမ်ႈယူႇၼၼ်ႉဢေႃႈ။ ၶဝ်ဢိၵ်ႇတင်း လုၵ်ႈလၢၼ်ၶဝ် သိုပ်ႇသိုပ်ႇတၢမ်းတၢမ်း ၸိူဝ်းၼၼ်ႉ တၵ်းလႆႈဢွၼ်ၵၼ်ယူႇ ၵႃႈၼႂ်းမိူင်းၼၼ်ႉ သေႇသေႇလႄႈ ၶႃႈၵဝ်တႃႇဝိတ်ႈၵေႃႈ တၵ်းလႆႈဢုပ်ႉပိူင်ႇၸၢမ်ႇၸႃးၶဝ်ယူႇ သေႇသေႇဢေႃႈ။- 26လိူဝ်သေၼၼ်ႉ ၵဝ်တၵ်း ႁဵတ်းပတီႉၺိၺ်ႇမိၵ်ႉသႃႇႁႃယႃႉ လူၺ်ႈၵၼ်တင်းၶဝ်လႄႈ ပတီႉၺိၺ်ႇၼၼ်ႉ တၵ်းပဵၼ် ပတီႉၺိၺ်ႇ ၼိၵ်ႈၸႃႉ ထႃႇဝရႃႉၽြႃးဢေႃႈ။ ၵဝ်တၵ်းၶျႃးတီႈယူႇတီႈသဝ်းၶဝ်ပၼ်လႄႈ ႁႂ်ႈၶဝ်ယႂ်ႇၽႄႈၼမ်ၵိုၼ်းမႃးလႄႈ ဢဝ်ထႃႇၼႃႉ တီႈမူတ်းၸၢင်ႇၵဝ် ဝႆႉၵႃႈၼႂ်းၶိုင်ႈၵၢင်ၶဝ်ယူႇ တႃႇသေႇဢေႃႈ။- 27ပိၵ်ႈမၢၼ်ႇၵဝ်ၵေႃႈ တၵ်းမီးယူႇတီႈၶဝ်လႄႈ ၵဝ်တၵ်းပဵၼ် ၽြႃးပဵၼ်ၸဝ်ႈၶဝ်လႄႈ ၶဝ်ၵေႃႈတၵ်းပဵၼ်ၵူၼ်းၵဝ်ဢေႃႈ။- 28ၼင်ႇၼၼ်လႄႈ မိူဝ်ႈဢၼ်ထႃႇၼႃႉတီႈမူတ်းၸၢင်ႇၵဝ် တႄႇယူႇၵႃႈၼႂ်း ၶိုင်ႈၵၢင်ၶဝ်ယူႇတႃႇသေႇၼၼ်ႉ၊ ၵူၼ်းၵူႈၸိူဝ်ႉၵူႈမဵဝ်း တၵ်းလႆႈ ႁူႉလွင်ႈဢၼ်ၵဝ် ထႃႇဝရႃႉၽြႃး ႁႂ်ႈမဵဝ်းဢီႉသရေႇလႃႉ မူတ်းၸၢင်ႇဢေႃႈ၊ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

Currently Selected:

ယေႇၸၵျေႇလႃႉ 37: CBMS

Highlight

Copy