ယေႇၸၵျေႇလႃႉ 38

ၵႂၢမ်းပရေႃးၽႅတ်ႈႁေႃးၶတ်းၵၼ်တင်းၶုၼ်ၵေႃးၵႃႉ

1လႆႈသမ်ႉ ၼုၵ်ႈၵပၢတ်ႈ ထႃႇဝရႃႉၽြႃး ႁွတ်ႈမႃးတီႈၵဝ်လႄႈဝႃႈၸမ်ႉ၊- 2လုၵ်ႈၵူၼ်းဢိူၺ်း၊ မႂ်းဝၢႆႇၼႃႈမႂ်းတေႃႇၶုၼ်ၵေႃးၵႃႉ မိူင်းမႃႇၵေႃးၵႃႉ ဢၼ်ပဵၼ်ၶုၼ်မိူင်းရေႃးသႃႉ၊ မိူင်းမႄႇသႅၵ်ႉ၊ မိူင်းတူႉပလႃႉၼၼ်ႉ လႄႈ ႁဵတ်းပရေႃးၽႅတ်ႈယူႇၽၢႆႇၼိုင်ႈတင်းမၼ်းသေလႄႈ၊- 3ႁေႃးလၢတ်ႈလႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၶုၼ်ၵေႃးၵႃႉ ဢၼ်ပဵၼ်ၶုၼ်မိူင်းရေႃးသႃႉ၊ မိူင်းမႄႇသႅၵ်ႉ၊ မိူင်းတူႉပလႃႉၸိူဝ်းၼၼ်ႉ ၼႆႉဢိူၺ်း၊ ၵဝ်ယူႇၽၢႆႇၼိုင်ႈတင်းမႂ်းဢေႃႈ။- 4ၵဝ်တၵ်းႁႂ်ႈမႂ်းဝၢႆႇၶိုၼ်းဢေႃႈ။ ၵဝ်တၵ်းဢဝ်ၶေႃလဵၵ်း ၵွင်ႉလုပ်ႇၵၢင်းမႂ်း သေလႄႈ ဢဝ်မႂ်းဢိၵ်ႇတင်းမုၵ်ႉၵူၼ်းၸိူဝ်းၵူၼ်းမႂ်း၊ မႃႉမႂ်း၊ႁူဝ်ႁၢၼ်ၵူၼ်းသိုၵ်းၶီႇမႃႉမႂ်း ဢၼ်သုင်းသွင်ႇ လၢၵ်ႈၼၢၵ်ႈၸုမ်ႇၵူႈၸိူဝ်ႉၵူႈမဵဝ်း၊ ဢၼ်ပဵၼ်ပူဝ်ႇပႃႇ ဢၼ်ယႂ်ႇၼမ်ၼႃႇလႄႈ ပႃးၶိူင်ႈႁႄႉ လၢၵ်ႈၼၢၵ်ႈလူင်၊ ၶိူင်ႈႁႄႉလၢၵ်ႈၼၢၵ်ႈဢွၼ်ႇ သေလႄႈ ယိပ်းၵမ်လၢပ်ႇၵမ်လႅဝ်း ၸိူဝ်းၼၼ်ႉမႃးဢေႃႈ။- 5ၵူၼ်းမိူင်းပေႇရသီႉ၊ ၵူၼ်းမိူင်းၵူႉသႃႉ၊ ၵူၼ်းမိူင်းၽူႉတႃႉ ဢၼ်ယိပ်းၵမ်ၶိူင်ႈႁႄႉလၢၵ်ႈၼၢၵ်ႈလႄႈ တိုဝ်းမွၵ်ႇႁူဝ်လဵၵ်း ႁင်းၽႂ်ႁင်းမၼ်းၵႃႈမီး၊- 6ၵေႃးမႃႇ ဢိၵ်ႇတင်း တပ်ႉမၼ်းၵႃႈမီး၊ မဵဝ်းတေႃႇၵမႃႉ ဢၼ်ပဵၼ်ၵူၼ်းမိူင်းတၢင်းႁွင်ႇ ဢိၵ်ႇတင်း တပ်ႉမၼ်းၵႃႈမီး၊ မူႇၽုင်မုၵ်ႉၸိူဝ်းၵူၼ်းၼမ်ၼႃႇၼၼ်ႉ တၵ်းဢွၼ်ၵၼ် ၸွမ်းလူၺ်ႈၵၼ်တင်းမႂ်းမႃးဢေႃႈ။- 7မႂ်းပွင်မႄးပွင်ႁႅၼ်းဝႆႉတႃႉ။ မႂ်းဢိၵ်ႇတင်း မုၵ်ႉၵူၼ်းၸိူဝ်းၵူၼ်းၵႃႈဢၼ် ၸူႉၵၼ်တုမ်ၵၼ်တီႈမႂ်းၸိူဝ်းၼၼ်ႉ ဢွၼ်ၵၼ် ပွင်မႄးပွင်ႁႅၼ်းတူဝ်သူဝႆႉလႄႈ ပႂ်ႉၶဝ်ယူႇတႃႉ။- 8ပူၼ်ႉၶိင်ႇၵႃႇလႃႉမိုဝ်ႉဝၼ်းၵႂႃႇႁိုင်ၼႃႇသေယဝ်ႉ၊ မႂ်းတၵ်းလႆႈ မီးဢၶႂၢင်ႉဢၼ်လႆႈဢုပ်ႉပိူင်ႇဢေႃႈ။ ၼႂ်းၶူပ်ႇပီႊမိူဝ်ႈၵမ်းလိုၼ်းပုၼ်ႉ၊ မႂ်းတၵ်းလႆႈၶီႇသိုၵ်းၸူးၵႃႈတီႈမိူင်းဢၼ် လွတ်ႈတင်းၽေးလၢပ်ႇၽေးလႅဝ်း၊ ၵူၼ်းဢၼ်လႆႈၶၢမ်ႇတၢင်းဢၼ် ၼုၵ်ႈဢဝ်ဢွၵ်ႇသေ ၵႃႈၼႂ်းမဵဝ်းၵူၼ်းဢၼ်ၼမ်ၼႃႇၼၼ်ႉ သေလႄႈ မႃးၵႃႈၼိူဝ်လွႆဢီႉသရေႇလႃႉ ဢၼ်လႆႈပဵၼ် ဢၼ်သဵတ်ႇဢၼ်ယဵၼ်ယူႇ သေႇသေႇ ၼၼ်ႉဢေႃႈ။ ၵူၺ်းၵႃႈ ၶဝ်ပဵၼ်ဢၼ်လႆႈၶၢမ်ႇတၢင်းဢၼ်ၼုၵ်ႈဢွၵ်ႇသေ ၵႃႈၼႂ်းမဵဝ်းၵူၼ်းၼမ်ၼႃႇ ၼၼ်ႉလႄႈ ၶဝ်ၵႃႈမီးၼၼ်ႉတၵ်းလႆႈယူႇလူင်ႉလီ လွတ်ႈလီဢေႃႈ။- 9မႂ်းတၵ်းယုၵ်ႉၶိုၼ်ႈ သေလႄႈ မႃးၸိူဝ်ႉၼင်ႇၽူၼ်လူင်လူမ်းလူင်လႄႈ မႂ်းဢိၵ်ႇတင်းတပ်ႉမႂ်းၵႃႈမီး တင်းမဵဝ်းၵူၼ်းၼမ်ၼႃႇ ဢၼ်ပႃးတီႈမႂ်းၸိူဝ်းၼၼ်ႉ တၵ်းပဵၼ်ၸိူဝ်ႉၼင်ႇ ၽႃႉမိုတ်းၽူၼ်ဢုမ်းၵႃႈၼႂ်းမိူင်း ၼၼ်ႉဢေႃႈ။- 10ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ မိုဝ်ႉဝၼ်းၼၼ်ႉ မႂ်းတၵ်း ၶုၵ်းၸႂ်လႆႈၶႆႈၸႂ်ထူပ်း ၵူႈၸိူဝ်ႉၵူႈပိူင်လႄႈ ၵျၢမ်ႇပွင်တၢင်းၵျၢမ်ႇတၢင်းပွင်ဢၼ်ဢမ်ႇလီယူႇ သေလႄႈ လၢတ်ႈလႄႈဝႃႈ၊- 11ၵဝ်တၵ်းၶီႇၶိုၼ်ႈၸူး ၵႃႈတီႈမိူင်း ဢၼ်ဝၢၼ်ႈၼွၵ်ႈၼႃးပၢင်ႇၼမ်ၼႃႇ ၼၼ်ႉဢေႃႈ။ ၵဝ်တၵ်းၶိုၼ်ႈၸူးၵႃႈတီႈမိူင်းၶဝ်ၸိူဝ်းဢၼ် ယင်းဢမ်ႇမီးလမ်းဝဵင်း၊ ဢမ်ႇမီးၵိူၼ်ႇၽၵ်းတူ တင်းၽၵ်းတူသေလႄႈ ပဵၼ်ဢၼ်တဵတ်ႇလီၼိမ်လီလႄႈ ယူႇလူင်ႉလီလွတ်ႈလီၼၼ်ႉ၊- 12ႁႂ်ႈလႆႈသိမ်းဢဝ်ဢုၵ်ႉၸႃႇၶဝ်လႄႈ ႁိမ်ႁူင်ႇဢဝ်ၶူဝ်းလဵင်းၶဝ် ဢိၵ်ႇတင်း ႁႂ်ႈလႆႈတိုၵ်းတေႃး ၵႃႈတီႈဢၼ်မိူဝ်ႈဢွၼ်ၼႆႉၼၼ်ႉ ပဵၼ်ဢၼ်သဵတ်ႇဢၼ်ယဵၼ်လႄႈ မိူဝ်ႈလဵဝ်ၼႆႉမီးၽူႈမီးၵူၼ်းၼၼ်ႉ ဢိၵ်ႇတင်း ၵႃႈတီႈၶဝ်ၸိူဝ်းဢၼ်ဢွၵ်ႇသေ ၵႃႈၼႂ်းၵူၼ်းၵူႈၸိူဝ်ႉၵူႈမဵဝ်း မႃးၸူႉၵၼ်တုမ်ၵၼ်လႄႈ မၢၵ်ႈမီး တရိၵ်ႈသၢၼ်ႇ ဢိၵ်ႇတင်း ဢုၵ်ႉၸႃႇတင်းလၢႆလႄႈ ယူႇၵႃႈၼႂ်းမိူင်းၼၼ်ႉ ၸိူဝ်းၼၼ်ႉဢေႃႈ။- 13ၵူၼ်းမိူင်းသေးၽႃႉ၊ ၵူၼ်းမိူင်းတေႇတၼ်ႇ၊ ၸဝ်ႈၵုၼ်ႇၸဝ်ႈသိၼ်တႃႇသူႉ၊ သၢင်ႇသီႈၼုမ်ႇၵႃႈမီးၼၼ်ႉ တၵ်းဢွၼ်ၵၼ်ထၢမ်တီႈမႂ်း လႄႈဝႃႈ၊ ၸဝ်ႈႁဝ်းၼႆႉမႃးႁႂ်ႈလႆႈ ႁိမ်ဢဝ်ႁူင်ႇဢဝ် ဢုၵ်ႉၸႃႇပိူၼ်ႈၶႃႈႁိုဝ်။ ၸဝ်ႈႁဝ်း ႁႂ်ႈၶဝ်ၸိူဝ်းဢၼ်ႁူမ်ႈဢၼ်ပွင်းၸဝ်ႈႁဝ်းၼၼ်ႉ ၸူႉၵၼ်တုမ်ၵၼ် ႁႂ်ႈလႆႈသိမ်းဢဝ်ဢုၵ်ႉၸႃႇပိူၼ်ႈလႄႈ ဢဝ်ငိုၼ်းၶမ်း ဢိၵ်ႇတင်း တရိၵ်ႈသၢၼ်ႇ တင်းဢုၵ်ႉၸႃႇ တင်းလၢႆလႄႈ ႁိမ်ဢဝ်ၼမ်ၼႃႇလူင်လၢင်ၵႂႃႇၶႃႈႁိုဝ်။ ဝႃႈၼင်ႇၼႆဝႆႉယဝ်ႉ၊ ဝႃႈၼင်ႇၼႆတႃႉ။- 14ပိူဝ်ႈၼႆလႄႈ လုၵ်ႈၵူၼ်းဢိူၺ်း၊ မႂ်းႁဵတ်းပရေႃးၽႅတ်ႈ သေလႄႈ ႁေႃးလၢတ်ႈတီႈၵေႃးၵႃႉလႄႈဝႃႈ၊ ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းမိူဝ်ႈဢၼ်ၵူၼ်းၵဝ် ၵူၼ်းမဵဝ်းဢီႉသရေႇလႃႉ ယူႇတဵတ်ႇလီၼိမ်လီၼၼ်ႉ မႂ်းတၵ်းဢမ်ႇႁူႉႁိုဝ်။- 15မႂ်းဢိၵ်ႇတင်း မဵဝ်းၵူၼ်းၼမ်ၼႃႇလူၺ်ႈၵၼ်တင်းမႂ်း၊ ၵႃႈပဵၼ်ႁူဝ်ႁၢၼ်ၵူၼ်းသိုၵ်းမႃႉ၊ မုၵ်ႉၵူၼ်းၸိူဝ်းၵူၼ်းဢၼ်ယႂ်ႇၼမ်ၼႃႇ လူင်လၢင်၊ ပူဝ်ႇပႃႇဢၼ်ႁႅင်းယႂ်ႇၼႃႇလူင်လၢင် ၸိူဝ်းၼၼ်ႉ တၵ်းၶီႇဢွၵ်ႇသေၵႃႈတီႈ ၼႃႈတၢင်းႁွင်ႇမႃးဢေႃႈ။- 16မႂ်းတၵ်းၶိုၼ်ႈလႄႈ မႃးတိုၵ်းတေႃးၵူၼ်းၵဝ် ၵူၼ်းမဵဝ်းဢီႉသရေႇလႃႉတင်းလၢႆ မိူၼ်ၸိူဝ်ႉၼင်ႇ ၽႃႉမိုတ်းၽူၼ်ဢုမ်းမိူင်းၼၼ်ႉဢေႃႈ။ ၵႃႈၼႂ်းၶိင်ႇၵႃႇလႃႉမိုဝ်ႉဝၼ်းၵမ်းလိုၼ်းပုၼ်ႉ၊ ၵဝ်တၵ်းဢဝ်မႂ်းမႃးယူႇ ၽၢႆႇၼိုင်ႈတင်းမိူင်းၵဝ် ႁႂ်ႈၵူၼ်းၵူႈၸိူဝ်ႉၵူႈမဵဝ်း လႆႈႁူႉမႂ်း၊ ၵေႃးၵႃႉဢိူၺ်း၊ ၼႂ်းမိူဝ်ႈဢၼ်ၵဝ်ႁွတ်ႈထိုင် တၢင်းဢၼ်ယွင်ႈယေႃး သိုဝ်ႈၼႃႈတႂ်ႈတႃၶဝ် ၵွပ်ႈပိူဝ်ႈမႂ်းၼၼ်ႉဢေႃႈ။- 17ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ မႂ်းပဵၼ်ၵေႃႉဢၼ်ၵဝ်ဢဝ်ၶႃႈၵဝ် ပရေႃးၽႅတ်ႈ မဵဝ်းဢီႉသရေႇလႃႉ ဢၼ်ႁဵတ်းပရေႃးၽႅတ်ႈ သေလႄႈ ႁေႃးလၢတ်ႈလွင်ႈဢၼ်ၵဝ် တၵ်းဢဝ်မႂ်းၶီႇသိုၵ်းမႃးယူႇၽၢႆႇၼိုင်ႈ တင်းၶဝ်ၼၼ်ႉလႄႈ ႁေႃးလၢတ်ႈဝႆႉ ၼႂ်းၶိင်ႇၵႃႇလႃႉမိုဝ်ႉဝၼ်းဢွၼ်ၼႆႉ ႁိုင်ၼႃႇၸိူဝ်းၼၼ်ႉ သေလႄႈ ပျႃႇတိၵ်ႈဝႆႉမိူဝ်ႈၵွၼ်ႇဢွၼ်ၼႆႉၼၼ်ႉ ဢမ်ႇၸႂ်ႈႁိုဝ်။

ၽြႃးပဵၼ်ၸဝ်ႈပၼ်တၢမ်ႇၶုၼ်ၵေႃးၵႃႉ

18ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းၶိင်ႇၵႃႇလႃႉမိုဝ်ႉဝၼ်းဢၼ်ၵေႃးၵႃႉ မႃးတိုၵ်းတေႃး မိူင်းဢီႉသရေႇလႃႉၼၼ်ႉ၊ ဢၢႆႁႅင်း တေႃးသႃႉတၢင်းၸႂ်မႆႈၶႆႈၸႃႉၵဝ် တၵ်းႁုပ်ႇၶိုၼ်ႈၸူး ၵႃႈၼႂ်းၶူႈလင်ၵဝ်ဢေႃႈ။- 19ၵဝ် ပႃးတၢင်းဢၼ်ၵဝ် ဢမ်ႇယုမ်ႇမႂ်းၼၼ်ႉ ဢိၵ်ႇတင်း ၽႆးတေႃးသႃႉတၢင်းၸႂ်မႆႈၶႆႈၸႃႉၵဝ် သေလႄႈ လၢတ်ႈလႄႈဝႃႈ၊ ၼႂ်းမိုဝ်ႉဝၼ်းၼၼ်ႉ တၵ်းပဵၼ် တၢင်းဢၼ်သၼ်ႇၶွၼ်းဝႆ ဢၼ်ယႂ်ႇၼႃႇလူင်လၢင် ၵႃႈၼႂ်းမိူင်းဢီႉသရေႇလႃႉ ဢမၢၼ်ႇၶၼ်ပဵၼ်ဢေႃႈ၊ ဝႃႈၼင်ႇၼႆဢေႃႈ။- 20ပႃပၢင်ႇလၢႆႇ၊ ၼူၵ်ႉၼိူဝ်ၽႃႉၵၢင်ႁၢဝ်၊ တူဝ်ထိူၼ်ႇ၊ တရိၵ်ႈသၢၼ်ႇ ဢၼ်ၸၢင်ႈၵႂႃႇၸၢင်ႈၵၢၼ်း ၵႃႈၼိူဝ်လိၼ်၊ ၵူၼ်းၵႃႈဢၼ်မီး ၵႃႈၼိူဝ်ၼႃႈလိၼ်ၼၼ်ႉ တၵ်းဢွၼ်ၵၼ်သၼ်ႇဝႆ ၵႃႈတီႈၽၢႆႇၼႃႈၵဝ်လႄႈ လွႆတၵ်းဢွၼ်ၵၼ်မီးတၢင်းဢၼ် ၵိူၼ်ႇပင်းယူႇ၊ ၵႃႈတီႈဢၼ်သုင်ဢၼ်ၸၼ်း ၸိူဝ်းၼၼ်ႉ တၵ်းလူမ်ႉတူၵ်းယူႇ၊ လမ်းဢုတ်ႇ တင်းသဵင်ႈတင်းလူင် တၵ်းလူမ်ႉပင်းယူႇဢေႃႈ။- 21ၸဝ်ႈထႃႇဝရႃႉၽြႃး မီးဢမိင်ႉၸမ်ႉ၊ ၵဝ်တၵ်း သင်ႇလၢတ်ႈၵႂႃႇတီႈလၢပ်ႇတီႈလႅဝ်း ၵႃႈၼိူဝ်လွႆၵဝ် တင်းသဵင်ႈတင်းလူင် မႃးယူႇၽၢႆႇၼိုင်ႈတင်းမၼ်းလႄႈ ၵူၼ်းတင်းသဵင်ႈတင်းလူင် ၵေႃႉၼိုင်ႈလႄႈၵေႃႉၼိုင်ႈ တၵ်းဢဝ်လၢပ်ႇဢဝ်လႅဝ်း ၶႃႈၵၼ်ၽၼ်းၵၼ်ဢေႃႈ။- 22ၵဝ်တၵ်း ဢဝ်ၽေးၵႃႇလႃႉႁႃႈလႅင်မိူင်း၊ ၽေးတၢင်းဢၼ်ထွၵ်ႇလိူတ်ႈပႅတ်ႈၼၼ်ႉ ပၼ်တၢမ်ႇဢေႃႈ။ ၵဝ်တၵ်းႁႂ်ႈၼမ်ႉၽူၼ် ဢၼ်ထူမ်ႈႁူမ်ႇ၊ မၢၵ်ႇႁဵပ်းဢၼ်ယႂ်ႇ၊ ၽူၼ်ၽႆးဢၼ်လေႃးၵၼ်တင်းၵၢၼ်ႉၼၼ်ႉ တူၵ်းသႂ်ႇၵႃႈၼိူဝ်မၼ်း ဢိၵ်ႇတင်း တပ်ႉမၼ်း တင်းမဵဝ်းၵူၼ်းၼမ်ၼႃႇ ဢၼ်ပႃးတီႈမၼ်း ၸိူဝ်းၼၼ်ႉဢေႃႈ။- 23ၼင်ႇၼၼ်လႄႈ ၵဝ်တၵ်း ယွင်ႈယေႃးတူဝ်ၸဝ်ႈၵဝ်ႇလႄႈ ႁႂ်ႈတူဝ်ၸဝ်ႈၵဝ်ႇႁွတ်ႈထိုင် တၢင်းဢၼ်မူတ်းၸၢင်ႇ သေလႄႈ ၼႄပျႃးမုၼ်ၽုင်း တူဝ်ၸဝ်ႈၵဝ်ႇ ႁႂ်ႈထၢင်ႇသႃးသိုဝ်ႈၼႃႈတႂ်ႈတႃ မဵဝ်းၵူၼ်းၼမ်ၼႃႇလႄႈ ၶဝ်တၵ်းလႆႈႁူႉလွင်ႈဢၼ် ၵဝ်ပဵၼ်ထႃႇဝရႃႉၽြႃးဢေႃႈ၊ ဝႃႈၼင်ႇၼႆယဝ်ႉ၊ ဝႃႈၼင်ႇၼႆတႃႉ၊ ဝႃႈၼင်ႇၼႆဢေႃႈ။

Currently Selected:

ယေႇၸၵျေႇလႃႉ 38: CBMS

Highlight

Copy