2 ၵေႃးရိၼ်ႇထူႉ 6

1ႁဝ်းပဵၼ်ၵေႃႉဢၼ်ပွင်ႁဵတ်းဢမူႉၸဝ်ႈ လူၺ်ႈၵၼ်တင်းမၼ်းၸဝ်ႈလႄႈ တိုၵ်းယူင်းၸူဝ်းဢဝ်သူလႄႈဝႃႈ၊သူယႃႇပေၶၢမ်ႇၵျေးၸူးၽြႃးပဵၼ်ၸဝ်ႈလၢႆလၢႆလွၵ်ႇလွၵ်ႇ၊ဝႃႈၼင်ႇၼႆဢေႃႈ။- 2မႅၼ်ႈၼင်ႇပျႃႇတိၵ်ႈၸဝ်ႈဢၼ်မီးဝႆႉလႄႈဝႃႈ၊ၵဝ်ထွမ်ႇဢဝ်ၵႂၢမ်းမႂ်းၼႂ်းၶိင်ႇၵႃႇလႃႉဢၼ်လီၼိတ်ႈသၢၵ်ႈထုၵ်ႇၸႂ်ၼၼ်ႉယဝ်ႉ၊ၵဝ်ၸွႆႈထႅမ်မႂ်း ၼႂ်းၶိင်ႇမိုဝ်ႉဝၼ်းတၢင်းဢၼ်ၵႄႇၶျွတ်ႈဢဝ်ၼၼ်ႉယဝ်ႉ၊ ဝႃႈၼင်ႇၼႆၼၼ်ႉ၊ တေႃႈလဵဝ်ၼႆႉ ပဵၼ်ၶိင်ႇၵႃႇလႃႉဢၼ်လီၼိတ်ႈသၢၵ်ႈထုၵ်ႇၸႂ်ဢေႃႈ၊ တေႃႈလဵဝ်ၼႆႉပဵၼ်ၶိင်ႇမိုဝ်ႉဝၼ်းတၢင်းဢၼ်ၵႄႇၶျွတ်ႈဢဝ်ဢေႃႈ။- 3ၼင်ႇႁိုဝ်ဢၶႂၢင်ႉဢၼ်ႁဝ်းႁေႃးလၢတ်ႈတြႃးၼၼ်ႉ တၵ်းလႆႈၵၢင်းလွတ်ႈတင်း တၢင်းဢၼ်တၢင်ႇဢပႅတ်ႈၸိုင် ႁဝ်းဢမ်ႇႁဵတ်းလွင်ႈတၢင်းဢၼ် တၵ်းတိူဝ်ႉမႅၼ်ႈလႄႈလူမ်ႉၼၼ်ႉ၊ သေၸိူဝ်ႉသေပိူင်။- 4ႁဝ်းႁဵတ်းႁႂ်ႈလွင်ႈဢၼ်ႁဝ်းပဵၼ်ထမ်ႇမႃႉသြႃႇ ဢၼ်ၽြႃးပဵၼ်ၸဝ်ႈၶၢၼ်းဝႆႉၼၼ်ႉ လႆႈထၢင်ႇသႃးၼႂ်းလွင်ႈတၢင်းၵူႈၸိူဝ်ႉၵူႈပိူင်ဢၼ်ဝႃႈ ၼႂ်းတၢင်းဢၼ်ယိူၼ်ႉၶၢမ်ႇၼႃႇလူင်လၢင်၊ ၼႂ်းတၢင်းဢၼ်ၶၢမ်ႇတၢင်းဢၼ်ၼိၵ်ႈၸၢၵ်ႈငႅၼ်းသႄး၊ ၼႂ်းတၢင်းဢၼ်ယၢၵ်ႈဢၼ်ၽၢၼ်၊ၼႂ်းတၢင်းဢၼ်ထူပ်းၽေးဢူႉပၢတ်ႈ၊ ဢၼ်ဢမ်ႇလွတ်ႈလႆႈ၊- 5ၼႂ်းတၢင်းဢၼ်ၶၢမ်ႇတၢင်းဢၼ်ပေႃႉဢၼ်ယႅၼ်ႉ၊ ၼႂ်းတၢင်းဢၼ်တူၵ်းၵႃႈၼႂ်းထွင်ႇ၊ ၼႂ်းတၢင်းဢၼ်ပိူၼ်ႈႁဵတ်းဢူၼ်ဢဵၼ်မေႃးမႄးၵၼ်၊ ၼႂ်းတၢင်းဢၼ်ႁဵတ်းၵၢၼ်ႁဵတ်းငၢၼ်း၊ ၼႂ်းတၢင်းဢၼ်ယင်းဢမ်ႇၼွၼ်းလႄႈပႂ်ႉယူႇ၊ ၼႂ်းတၢင်းဢၼ်ဢိုပ်းဢၼ်ယၢၵ်ႈ၊- 6ၼႂ်းတၢင်းဢၼ်ႁူဝ်ၸႂ်မူတ်းသႂ်၊ ၼႂ်းတၢင်းဢၼ်မီးပိင်ႇၺႃႇ၊ ၼႂ်းတၢင်းဢၼ်ၸႂ်ယႂ်ႇၸႂ်ယၢဝ်း၊ ၼႂ်းတၢင်းဢၼ်ႁဵတ်းၵျေးၸူး၊ ၼႂ်းတၢင်းဢၼ်ၶၢမ်ႇဢဝ်ဝီႉၺိၺ်ႇဢၼ်မူတ်းၸၢင်ႇၸဝ်ႈ၊ ၼႂ်းတၢင်းဢၼ်ယင်းဢမ်ႇႁဵတ်းၸိူဝ်ႉၼင်ႇႁၢင်ႈႁၵ်ႉလႄႈႁၵ်ႉ၊- 7ၼႂ်းတၢင်းဢၼ်ႁေႃးလၢတ်ႈသမ်ႇမႃႇတြႃး၊ ၼႂ်းတၢင်းဢၼ်ၼႄပျႃးတၼ်းၶူဝ်းၽြႃးပဵၼ်ၸဝ်ႈၸိူဝ်းၼၼ်ႉ၊ ၵွပ်ႈပိူဝ်ႈတၢင်းဢၼ်တိုဝ်းၼုင်ႈလၢၵ်ႈၼၢၵ်ႈၸုမ်ႇ၊ တၢင်းသိုဝ်ႈတေႃႇဝႆႉၵႃႈတီႈၽၢႆႇၶႂႃၽၢႆႇသၢႆႉ၊ ၵွပ်ႈပိူဝ်ႈတၢင်းဢၼ်သရေႇထၢင်ႇသႃး၊ ဢိၵ်ႇတင်းတၢင်းဢၼ်သရေႇယုတ်ႈယွမ်း၊- 8ၵွပ်ႈပိူဝ်ႈတၢင်းဢၼ်ၶၢမ်ႇတၢင်းဢၼ်ယွင်ႈယေႃး၊ ဢိၵ်ႇတင်းတၢင်းဢၼ်ၶၢမ်ႇတၢင်းဢၼ်သႄႉသွမ်းၸိူဝ်းၼႆႉလႄႈ၊ ပိၵ်ႉသမ်ႉပဵၼ်ၸိူဝ်ႉၼင်ႇၵေႃႉဢၼ်ပႅတ်ႉလႅၼ်သေၵေႃႈ၊ ပဵၼ်ၸိူဝ်ႉၼင်ႇၵေႃႉဢၼ်ၸိုဝ်ႈဢၼ်ၸႂ်ႈ၊- 9ပိၵ်ႉသမ်ႉပဵၼ်ၸိူဝ်ႉၼင်ႇၵေႃႉဢၼ်ၽူႈလႂ်ဢမ်ႇႁူႉသေၵေႃႈ၊ ပဵၼ်ၸိူဝ်ႉၼင်ႇၵေႃႉဢၼ်ႁူင်ႁၢင်း၊ ပိၵ်ႉသမ်ႉပဵၼ်ၸိူဝ်ႉၼင်ႇၵေႃႉဢၼ်ၶၢမ်ႇတၢႆသေၵေႃႈ၊ ပဵၼ်ၸိူဝ်ႉၼင်ႇၵေႃႉဢၼ်ဢသၢၵ်ႈလိပ်း၊ ပိၵ်ႉသမ်ႉပဵၼ်ၸိူဝ်ႉၼင်ႇၵေႃႉဢၼ်လႆႈၶၢမ်ႇ၊ တၢင်းဢၼ်သင်ႇသွၼ်သုင်းမႃႉသေၵေႃႈ၊ ပဵၼ်ၸိူဝ်ႉၼင်ႇၵေႃႉဢၼ်ၵၢင်းလွတ်ႈတင်း၊ တၢင်းဢၼ်ဢဝ်တၢႆ၊- 10ပိၵ်ႉသမ်ႉပဵၼ်ၸိူဝ်ႉၼင်ႇၵေႃႉဢၼ်ၸႂ်လဵၵ်ႉ ၸႂ်ဢူၼ်ႈသေၵေႃႈ၊ ပဵၼ်ၸိူဝ်ႉၼင်ႇၵေႃႉဢၼ်သိူဝ်းပျေႃႇသေႇသေႇ၊ ပိၵ်ႉသမ်ႉပဵၼ်ၸိူဝ်ႉၼင်ႇၵူၼ်းယၢၵ်ႈၵူၼ်းၽၢၼ်သေၵေႃႈ၊ ပဵၼ်ၸိူဝ်ႉၼင်ႇၵေႃႉဢၼ်ၸၢင်ႈႁႂ်ႈပိူၼ်ႈမၢၵ်ႈပိူၼ်ႈမီး၊ ပိၵ်ႉသမ်ႉပဵၼ်ၸိူဝ်ႉၼင်ႇၵေႃႉဢၼ်ဢမ်ႇပိူင်ႇသေၸိူဝ်ႉသေပိူင်သေၵေႃႈ၊ ပဵၼ်ၸိူဝ်ႉၼင်ႇၵေႃႉဢၼ်ပိူင်ႇတင်းသဵင်ႈတင်းလူင်ၼၼ်ႉယူႇဢေႃႈ။

11ၵူၼ်းၵေႃးရိၼ်ႇထူႉၶဝ်ဢိူၺ်း၊ သူပ်းႁဝ်းၼႆႉၽုၺ်ႇဝႆႉမီးယူႇတီႈသူဢေႃႈ။- 12ႁူဝ်ၸႂ်ႁဝ်းၵေႃႈယႂ်ႇၵႂၢင်ႈဢေႃႈ၊ သူၵိတ်ႇၵႅပ်ႈၼႂ်းႁဝ်းဢမ်ႇၸႂ်ႈ၊ သူၵိတ်ႇၵႅပ်ႈၼႂ်းမႅတ်ႈတႃႇၵရူႉၼႃႇတူဝ်ၸဝ်ႈၵဝ်ႇၵူၺ်းဢေႃႈ။- 13သူမီးၸႂ်ဢၼ်ယႂ်ႇၵႂၢင်ႈ ႁႂ်ႈလႆႈတွပ်ႇတႅၼ်းၶိုၼ်းၵျေးၸူးႁဝ်းတႃႉ၊ မိူဝ်ႈဢၼ်ဝႃႈၸိူဝ်ႉၼင်ႇၼႆၸိုင်၊ ၶႂ်ႈဝႃႈၸိူဝ်ႉၼင်ႇဢၼ်ၵဝ်ဝႃႈတီႈလုၵ်ႈလၢင်းတူဝ်ၸဝ်ႈၵဝ်ႇဢေႃႈ။

ပၼ်သတီႉလွင်ႈၵူၼ်းဢမ်ႇမီးၽြႃးတြႃး

14ယႃႇပေႁူမ်ႈၵၼ်တင်း ၶဝ်ၸိူဝ်းဢၼ်ဢမ်ႇယုမ်ႇမၢတ်ႈၼၼ်ႉသေလႄႈ ႁၢပ်ႇၵၢၼ်းဢၼ်ဢမ်ႇထုၵ်ႇၶတ်းၵၼ်၊ လွင်ႈတၢင်းဢၼ်မႅၼ်ႈတြႃးတၵ်းႁပ်ႉတုင်းဢဝ် လွင်ႈတၢင်းဢၼ်ဢမ်ႇမႅၼ်ႈတြႃးလႆႈၸိူဝ်ႉၼင်ႇႁိုဝ်။ ဢၼ်လႅင်း၊ တင်း ဢၼ်လပ်းသိင်ႇ၊ တၵ်းသိူၵ်ႈသမ်ႇၵၼ်လႆႈၸိူဝ်ႉၼင်ႇႁိုဝ်။- 15ၸဝ်ႈၶရိၸ်ႈတင်းပေႇလျႃႇလႃႉ တၵ်းထုၵ်ႇၵၼ်လႆႈ ၸိူဝ်ႉၼင်ႇႁိုဝ်။ ၵေႃႉဢၼ်ယုမ်ႇမၢတ်ႈ၊ တင်းၵေႃႉဢၼ်ဢမ်ႇယုမ်ႇမၢတ်ႈ၊ တၵ်းမီးတၢင်းဢၼ် ႁဵတ်းၵေႃႉႁူမ်ႈၵၼ်လႆႈၸိူဝ်ႉၼင်ႇႁိုဝ်။- 16ပိၵ်ႈမၢၼ်ႇၽြႃးပဵၼ်ၸဝ်ႈ၊ တင်းရုၵ်ႈထူႉ ၸၢပ်ႈသႅင်ႇၵၼ်လႆႈၸိူဝ်ႉၼင်ႇႁိုဝ်။ မႅၼ်ႈၼင်ႇဢၼ်ၽြႃးပဵၼ်ၸဝ်ႈ၊ မီးဢမိင်ႉလႄႈဝႃႈ၊ ၵဝ်တၵ်းၵိင်းဝၢပ်ႈယူႇၵႃႈၼႂ်းၶဝ်ဢေႃႈ၊ ၵဝ်တၵ်းလႄႇၵႂႃႇလႄႇမႃးယူႇၵႃႈၼႂ်းၶဝ်လႄႈ ပဵၼ်ၽြႃးပဵၼ်ၸဝ်ႈၶဝ်ဢေႃႈ၊ ၶဝ်ၵေႃႈတၵ်းပဵၼ်ၵူၼ်းၵဝ်ဢေႃႈ၊ ဝႃႈၼင်ႇၼႆၼၼ်ႉ၊ သူပဵၼ်ပိၵ်ႈမၢၼ်ႇ ၽြႃးပဵၼ်ၸဝ်ႈဢၼ်ဢသၢၵ်ႈလိပ်းယူႇဢေႃႈ။- 17ပိူဝ်ႈၼႆလႄႈ ဢၼ်ထႃႇဝရႃႉၽြႃးသမ်ႉ မီးဢမိင်ႉထႅင်ႈလႄႈဝႃႈၸမ်ႉ သူဢွၵ်ႇသေၵႃႈၼႂ်းၶဝ်လႄႈ ယူႇတၢင်ႇတီႈတၢင်ႇလႅၼ်တႃႉ။ ယႃႇပေဢဝ်မိုဝ်းတိူဝ်ႉ လွင်ႈတၢင်းဢၼ်ဢမ်ႇမူတ်းသႂ်ၼၼ်ႉ၊ ပေႃးႁဵတ်းၸိူဝ်ႉၼင်ႇၼၼ်ၸိုင်၊ ၵဝ်တၵ်းႁပ်ႉတုင်းဢဝ်သူဢေႃႈ။- 18တၵ်းပဵၼ် ပေႃႈသူဢေႃႈ။ သူၵေႃႈတၵ်းပဵၼ်လုၵ်ႈလၢင်းၵဝ်ဢေႃႈ ဝႃႈၼႆ၊ထႃႇဝရႃႉၽြႃး ဢၼ်ပျေႉၸုမ်ႇတင်းဢၼၼ်ႇတႃႉတၼ်းၶူဝ်းၼၼ်ႉ မီးဢမိင်ႉဢေႃႈ။

Currently Selected:

2 ၵေႃးရိၼ်ႇထူႉ 6: CBMS

Highlight

Copy

Compare