2 ၵေႃးရိၼ်ႇထူႉ 3

တမၢၼ်ႇၸဝ်ႈပွင်ၵၢၼ်ၸွမ်းပတီႉၺိၺ်ႇတြႃးဢၼ်မႂ်ႇ

1ႁဝ်းသမ်ႉယွင်ႈယေႃးတူဝ်ၸဝ်ႈၵဝ်ႇ ၵႃႈတီႈၽၢႆႇၼႃႈသူႁိုဝ်။ ဢမ်ႇၼၼ်လႄႈ ႁဝ်းလူဝ်ႇလိၵ်ႈဢၼ်ယွင်ႈဢၼ်ယေႃး၊ဢၼ်ပိူၼ်ႈတၵ်းပၼ်တီႈသူလႄႈ သူတၵ်းပၼ်တီႈပိူၼ်ႈၼၼ်ႉထႅင်ႈ၊မိူၼ်ၸိူဝ်ႉၼင်ႇၵူၼ်းၵမ်ႈၽွင်ႈႁိုဝ်။- 2သူပဵၼ်လိၵ်ႈႁဝ်း၊ဢၼ်တႅမ်ႈဝႆႉၵႃႈၼိူဝ်ႁူဝ်ၸႂ်ႁဝ်း၊လိၵ်ႈဢၼ်ၵူၼ်းတင်းသဵင်ႈတင်းလူင် ၸၢင်ႈႁူႉလႄႈၽတ်းၼၼ်ႉဢေႃႈ။- 3ပဵၼ်ၸိူဝ်ႉၼင်ႇႁိုဝ်ဝႃႈၼႆၸမ်ႉ၊ သူပဵၼ်လိၵ်ႈၸဝ်ႈၶရိၸ်ႈ ဢၼ်ႁဝ်းပွင်ႁဵတ်း၊ဢၼ်ဢဝ်တင်းၼမ်ႉမိုၵ်ႉတႅမ်ႈဝႆႉဢမ်ႇၸႂ်ႈ၊ ဢဝ်တင်းဝီႉၺိၺ်ႇၽြႃးပဵၼ်ၸဝ်ႈ၊ ဢၼ်ဢသၢၵ်ႈလိပ်းယူႇၼၼ်ႉတႅမ်ႈဝႆႉ၊ ဢၼ်ယင်းဢမ်ႇတႅမ်ႈဝႆႉၵႃႈၼိူဝ်မၢၵ်ႇႁိၼ်ၽႅပ်ႉ တႅမ်ႈဝႆႉၵႃႈၼိူဝ်ႁူဝ်ၸႂ်ၽႅပ်ႉ၊ဢၼ်ပျေႉၸုမ်ႇတၢင်းၼိူဝ်ႉၼၼ်ႉ၊ထၢင်ႇထၢင်ႇသႃးသႃးဢေႃႈ။

4ႁဝ်းမီးတၢင်းဢၼ်တူၵ်းၵၢင်ၸႂ်၊ၸိူဝ်ႉၼင်ႇၼၼ်၊ၵႃႈတီႈၽၢႆႇၼႃႈၽြႃးပဵၼ်ၸဝ်ႈ၊ၵွပ်ႈပိူဝ်ႈၸဝ်ႈၶရိၸ်ႈဢေႃႈ။- 5ၼႂ်းဝႃႈၼၼ်သေၵေႃႈ၊ႁဝ်းဢိင်တၼ်းၶူဝ်းတူဝ်ၸဝ်ႈၵဝ်ႇသေလႄႈ တၢတ်ႈၼိူင်ႇလႆႈႁႂ်ႈလႆႈၸွမ်းၼင်ႇဢလူဝ်ႇ၊တူဝ်ၸဝ်ႈၵဝ်ႇၵျၢမ်ႇပွင်၊သေၸိူဝ်ႉသေပိူင်ဢမ်ႇၸႂ်ႈ၊ႁဝ်းဢိင်ၽြႃးပဵၼ်ၸဝ်ႈသေလႄႈ တၢတ်ႈၼိူင်ႇလႆႈဢေႃႈ။- 6မၼ်းၸဝ်ႈၼၼ်ႉ ပၼ်တၼ်းၶူဝ်း၊ႁႂ်ႈႁဝ်းတၢတ်ႈၼိူင်ႇလႆႈ ႁႂ်ႈလႆႈပဵၼ်သြႃႇပတီႉၺိၺ်ႇတြႃးဢၼ်မႂ်ႇဢေႃႈ၊ မိူဝ်ႈဢၼ်ဝႃႈၼင်ႇၼႆၸိုင် ဢမ်ႇၶႂ်ႈဝႃႈတြႃးၵျၢမ်းၵဝ်ႇ၊ၶႂ်ႈဝႃႈတြႃးဝီႉၺိၺ်ႇၸဝ်ႈဢေႃႈ၊ တြႃးၵျၢမ်းၵဝ်ႇၼၼ်ႉ၊ၸၢင်ႈဢဝ်ဢသၢၵ်ႈတၢႆဢေႃႈ၊တြႃးဝီႉၺိၺ်ႇၸဝ်ႈၸမ်ႉ၊ၸၢင်ႈႁႂ်ႈလိပ်းဢေႃႈ။

7ပေႃးတြႃးတၢင်းတၢႆ ဢၼ်ဢဝ်တူဝ်လိၵ်ႈ၊ဢႅၵ်ႉၶရႃႇတႅမ်ႈဝႆႉၼၼ်ႉ၊ ပျေႉၸုမ်ႇတင်းမုၼ်ၽုင်းဢႃႇၼူႉၽေႃႇ တေႃႇထိုင်ႁွတ်ႈထၼ်ႈပေႃး၊ ၵူၼ်းဢီႉသရေႇလႃႉတင်းလၢႆ ဢမ်ႇတူၺ်းၼႃႈမူဝ်းသေႇ ၸေးၸေးၸွတ်ႇၸွတ်ႇလႆႈ ၵွပ်ႈပိူဝ်ႈသၢႆဢရွင်ႇ၊ဢၼ်ဢွၵ်ႇၵႃႈတီႈၼႃႈမၼ်းဢၼ်ဝႃႈ သၢႆဢရွင်ႇဢၼ်ၸၢင်ႈႁၢႆၵႂႃႇၼၼ်ႉၸိုင်၊- 8တြႃးဝီႉၺိၺ်ႇၸဝ်ႈၼႆႉ၊ယဵင်ႈၶႅၼ်းတၵ်းပျေႉၸုမ်ႇ တင်းမုၼ်ၽုင်းဢႃႇၼူႉၽေႃႇဢမ်ႇၸႂ်ႈႁိုဝ်။- 9ပေႃးတြႃးဢၼ်ၸၢင်ႈၸီႇယၢင်ႇဢပႅတ်ႈၼၼ်ႉ၊မီးမုၼ်ၽုင်းဢႃႇၼူႉၽေႃႇၸိုင်၊ တြႃးဢၼ်ၸၢင်ႈႁႂ်ႈသိုဝ်ႈတေႃႇၼႆႉ တၵ်းယဵင်ႈၶႅၼ်းပျေႉၸုမ်ႇတင်း၊မုၼ်ၽုင်းဢႃႇၼူႉၽေႃႇဢေႃႈ။- 10ၵွပ်ႈပိူဝ်ႈဢၼ်မုၼ်ၽုင်း၊ ဢၼ်ပဵၼ်မႃးၵမ်းလိုၼ်းၼႆႉ၊ယဵင်ႈၶႅၼ်းယႂ်ႇမျၢတ်ႈၼႃႇလႄႈ လွင်ႈတၢင်းဢၼ်ယၢမ်ႈမီး၊မုၼ်ၽုင်းမိူဝ်ႈဢွၼ်တၢင်းၼၼ်ႉၼၼ်ႉ၊ဢမ်ႇလႆႈမီးမုၼ်ၽုင်း။- 11ပေႃးလွင်ႈတၢင်းဢၼ်ၸၢင်ႈႁၢႆၵႂႃႇၼၼ်ႉ၊မီးမုၼ်ၽုင်းၸိုင် လွင်ႈတၢင်းဢၼ်တႄႇဝႆႉမီးယူႇၼႆႉ၊ယဵင်ႈၶႅၼ်းတၵ်းမီးမုၼ်ၽုင်းဢေႃႈ။- 12ၵွပ်ႈပိူဝ်ႈဢၼ်မီးတၢင်းဢၼ်မုင်ႈထႃႈမွင်းထႃႈၸိူဝ်ႉၼင်ႇၼႆလႄႈ ႁဝ်းဢမ်ႇမီးတၢင်းဢၼ်သိူင်ႇဝႆႉမႅပ်ႉဝႆႉလႃးလႃး၊ ႁေႃးလၢတ်ႈလႅင်းလႅင်းဢေႃႈ။- 13ႁဝ်းဢမ်ႇႁဵတ်းၸိူဝ်ႉၼင်ႇဢၼ်မူဝ်းသေႇႁူမ်ႇသုမ်ႇၼႃႈတူဝ်ၸဝ်ႈၵဝ်ႇဝႆႉ ႁႂ်ႈၵူၼ်းဢီႉသရေႇလႃႉတင်းလၢႆ ဢမ်ႇလႆႈတူၺ်းလႆႈႁၼ် တီႈသုတ်းတီႈၵွႆ လွင်ႈတၢင်းဢၼ်ၸၢင်ႈႁၢႆၵႂႃႇၼၼ်ႉ၊ၸေးၸေးၸွတ်ႇၸွတ်ႇၼၼ်ႉ။- 14ႁူဝ်ၸႂ်ၶဝ်ၼၼ်ႉၵႅၼ်ႇၶႅင်ဢေႃႈ၊လွင်ႈမၼ်းၸမ်ႉ၊ႁၢၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉလႄႈ ယၢမ်းမိူဝ်ႈဢၼ်ၽတ်းထမ်ႇမႃႉၵျၢမ်းလိၵ်ႈ ဢၼ်ၵဝ်ႇၼၼ်ႉၸိုင် လွင်ႈတၢင်းဢၼ်ႁူမ်ႇသုမ်ႇၼၼ်ႉ ယင်းဢမ်ႇၽုၺ်ႇပိုတ်ႇလႄႈ မီးဝႆႉယူႇဢေႃႈ၊လွင်ႈတၢင်းဢၼ်ႁူမ်ႇသုမ်ႇဝႆႉၼၼ်ႉၸမ်ႉ၊လႆႈႁၢႆၵႂႃႇၵွပ်ႈပိူဝ်ႈၸဝ်ႈၶရိၸ်ႈၵူၺ်းဢေႃႈ။- 15ႁၢၼ်ႉတေႃႇထိုင်ႁွတ်ႈမိူဝ်ႈလဵဝ်ၼႆႉၵေႃႈ၊ ယၢမ်းမိူဝ်ႈဢၼ်ၽတ်းၵျၢမ်းလိၵ်ႈမူဝ်းသေႇၼၼ်ႉၸိုင်၊ လွင်ႈတၢင်းဢၼ်ႁူမ်ႇသုမ်ႇၼၼ်ႉ ယင်းႁူမ်ႇသုမ်ႇႁူဝ်ၸႂ်ၶဝ်ဝႆႉယူႇလူးၵွၼ်ႇဢေႃႈ။- 16ၼႂ်းဝႃႈၼၼ်သေၵေႃႈ မိူဝ်ႈဢၼ်ၶၢႆႉသေလႄႈ မႃးၸူးၵႃႈတီႈၸဝ်ႈၽြႃးၸိုင်၊ လွင်ႈတၢင်းဢၼ်ႁူမ်ႇသုမ်ႇဝႆႉၼၼ်ႉ တၵ်းႁၢႆၵႂႃႇဢေႃႈ။- 17ဢၼ်ဝႃႈၸဝ်ႈၽြႃးၼၼ်ႉ၊ ၶႂ်ႈဝႃႈဝီႉၺိၺ်ႇၸဝ်ႈဢေႃႈ၊ တီႈဢၼ်ဝီႉၺိၺ်ႇၸဝ်ႈၽြႃးမီးၼၼ်ႉ၊ မီးၵတ်းယဵၼ်ၶျၢမ်းသႃႇတၢင်းဢၼ်လွတ်ႈဢေႃႈ။- 18ႁဝ်းၵႃႈမီးၼႆႉၽုၺ်ႇပိုတ်ႇၽႃႈဢၼ်ႁူမ်ႇသုမ်ႇၼႃႈပႅတ်ႈသေယဝ်ႉ၊ ႁၼ်မုၼ်ၽုင်းၸဝ်ႈၽြႃး မိူၼ်ၸိူဝ်ႉၼင်ႇဢၼ်တူၺ်း ၵႃႈၼႂ်းၸမ်ႈၼၼ်ႉလႄႈ မီးတၢင်းဢၼ်ၶၢႆႉပုတ်ႈၸွမ်းၼင်ႇ ပုင်ႇႁၢင်ႈမၼ်းၸဝ်ႈ မုၼ်ၽုင်းပႃးၼိုင်ႈယဝ်ႉပႃးၼိုင်ႈ၊ ထၢပ်ႈထႅင်ႈၵႃႈၼင်ႇဢၼ်ဝီႉၺိၺ်ႇၸဝ်ႈၽြႃး၊ပွႆႇမုၼ်ၽုင်းၸဝ်ႈၼၼ်ႉဢေႃႈ။

Currently Selected:

2 ၵေႃးရိၼ်ႇထူႉ 3: CBMS

Highlight

Copy

Compare