2 ၵေႃးရိၼ်ႇထူႉ 11
11
တမၢၼ်ႇၸဝ်ႈဢၼ်သွၼ်ၽိတ်းသွၼ်ပိူင်ႈ
1ၵဝ်မီးဢလူဝ်ႇ၊ၶႂ်ႈႁႂ်ႈသူယိူၼ်ႉၶၢမ်ႇ၊တၢင်းဢၼ်ၵဝ်မိူၵ်ႈလပ်းသိင်ႇၼၼ်ႉ၊ၵမ်းဢွၼ်ႇၼိုင်ႈဢေႃႈ၊ၵူၺ်းၵႃႈသူယိူၼ်ႉၶၢမ်ႇယူႇဢေႃႈ။- 2လွင်ႈမၼ်းၸမ်ႉ၊ ၵွပ်ႈပိူဝ်ႈဢၼ်၊ၵဝ်ဢဝ်သူဢၢပ်ႈပၼ်တီႈၽူဝ်ၵေႃႉလဵဝ် ႁႂ်ႈလႆႈဢဝ်သူသၢၵ်ႈၵၢပ်ႈတီႈၸဝ်ႈၶရိၸ်ႈ မိူၼ်ၸိူဝ်ႉၼင်ႇ၊ၵၼ်ႇၺႃႇလုၵ်ႈယိင်းသၢဝ်၊ဢၼ်ပျေႉၸုမ်ႇတင်းသီႇလႃႉၼၼ်ႉယဝ်ႉလႄႈ ၵဝ်မီးတင်းတၢင်းဢၼ်၊မႆႈၸႂ်ၶီၸႂ်ၸွမ်းၼင်ႇဢလူဝ်ႇၽြႃးပဵၼ်ၸဝ်ႈၼၼ်ႉသေလႄႈ ပႂ်ႉလူပႂ်ႉတူၺ်းသူယူႇဢေႃႈ။- 3ၵဝ်ၵူဝ်ၸႂ်သူတၵ်းလူႉလႄႈ၊တၢင်းဢၼ်ပႃးတင်းႁူဝ်ၸႂ်သဵင်ႈသဵင်ႈ၊ႁၵ်ႉၸဝ်ႈၶရိၸ်ႈၼၼ်ႉ၊တၵ်းႁၢႆၵႂႃႇ မိူၼ်ၸိူဝ်ႉၼင်ႇဢၼ်၊ငူးဢဝ်တင်းပရီႉယႄႇတူဝ်ၸဝ်ႈၵဝ်ႇသေလႄႈ၊ပႅတ်ႉလႅၼ်ဢေးဝႃႉၼၼ်ႉဢေႃႈ။- 4ပေႃးၵေႃႉဢၼ်ႁွတ်ႈမႃးတီႈသူၼၼ်ႉ၊ႁေႃးလၢတ်ႈယေႇသူႉတၢင်ႇပႃးဢၼ်ႁဝ်း၊ဢမ်ႇပႆႇတွၼ်ႉႁေႃးလၢတ်ႈၼၼ်ႉလႄႈသင်၊ပေႃးသူလႆႈၶၢမ်ႇဢဝ်ဝီႉၺိၺ်ႇၸဝ်ႈတၢင်ႇပႃး ဢၼ်သူဢမ်ႇပႆႇတွၼ်ႉလႆႈၶၢမ်ႇဢဝ်ၼၼ်ႉလႄႈသင်၊ပေႃးသူထွမ်ႇဢဝ်ၵႂၢမ်းတြႃးသတၢင်းသိူဝ်းပျေႃႇတၢင်ႇပႃး ဢၼ်သူဢမ်ႇပႆႇတွၼ်ႉလႆႈထွမ်ႇဢဝ်ၼၼ်ႉလႄႈသင်၊ သူလီယိူၼ်ႉၶၢမ်ႇၵေႃႉၼၼ်ႉဢေႃႈ။- 5ၵဝ်ဢမ်ႇတူၵ်းတႅမ်ႇသေ၊ၶဝ်ၸိူဝ်းဢၼ်ႁဵတ်းၸိူဝ်ႉၼင်ႇႁၢင်ႈတမၢၼ်ႇၸဝ်ႈ၊ဢၼ်ယႂ်ႇၼႃႇၼၼ်ႉဝႃႈၼႆ၊ၵဝ်မီးသၽေႃးဢေႃႈ။- 6ပိၵ်ႉသမ်ႉၵဝ်ပဵၼ်ၵူၼ်းရိူင်း၊ၼႂ်းတၢင်းဢၼ်လၢတ်ႈၵႂၢမ်းသေၵေႃႈ၊ၵဝ်ပဵၼ်ၵူၼ်းရိူင်းၼႂ်းပိင်ႇၺႃႇဢမ်ႇၸႂ်ႈ၊ၼႂ်းလွင်ႈတၢင်းၵူႈၸိူဝ်ႉၵူႈပိူင် ႁဝ်းလႆႈၼႄပျႃးတူဝ်ၸဝ်ႈၵဝ်ႇထၢင်ႇသႃးၵႃႈတီႈၽၢႆႇၼႃႈ၊ၵူၼ်းတင်းသဵင်ႈတင်းလူင်ၵွပ်ႈပိူဝ်ႈသူဢေႃႈ။
7ၵဝ်မီးဢပႅတ်ႈၼႂ်းလွင်ႈဢၼ်ၵဝ်၊ၶျႃးတႅမ်ႇတူဝ်ၸဝ်ႈၵဝ်ႇ ႁႂ်ႈလႆႈယုၵ်ႉယွင်ႈသူ၊ၵွပ်ႈပိူဝ်ႈဢၼ်ၵဝ်ယင်းဢမ်ႇၶၢမ်ႇဢမ်ႇဢဝ်၊တၢင်းဢၼ်သူတၵ်းတႅၼ်းပၼ်ၵျေးၸူးလႄႈႁေႃးလၢတ်ႈတြႃးသတၢင်းသိူဝ်းပျေႃႇၽြႃးပဵၼ်ၸဝ်ႈတီႈသူၼၼ်ႉႁိုဝ်။- 8ၵဝ်ၶၢမ်ႇဢဝ်ၸရိပ်ႈ၊ဢၼ်ၸိူဝ်းၸဝ်ႈတၢင်ႇတီႈပၼ်ၼၼ်ႉလႄႈ၊ႁွတ်ႈထိုင်တၢင်းဢၼ်လႆႈႁိမ်ဢဝ်ႁူင်ႇဢဝ်တီႈၶဝ်ၼၼ်ႉ၊ႁႂ်ႈလႆႈပွင်ႁဵတ်းဢမူႉသူယဝ်ႉလူင်ပႄႇ။- 9မိူဝ်ႈဢၼ်ၵဝ်ယင်းမီးလူၺ်ႈၵၼ်တင်းသူလႄႈ လူဝ်ႇထႅင်ႈသေၸိူဝ်ႉသေပိူင်ၼၼ်ႉၸိုင်၊ၵဝ်ဢမ်ႇဢဝ်ၸရိပ်ႈတီႈၽူႈလႂ်၊လွင်ႈမၼ်းၸမ်ႉပီႈၼွင်ႉဢၼ်လုၵ်ႉသေၵႃႈတီႈမိူင်းမႃႇၵေႇတေႃးၼီႉ မႃးၸိူဝ်းၼၼ်ႉ၊ပၼ်ၵႃႈဢၼ်ၵဝ်လူဝ်ႇထႅင်ႈၼၼ်ႉယူႇဢေႃႈ၊ၵဝ်ယင်းဢမ်ႇယႃႉယူၵ်ႉသူသေဢိတ်းလႄႈယူႇမႃးယဝ်ႉ၊ၵမ်းလိုၼ်းၵေႃႈတၵ်းႁဵတ်းတင်းသတီႉသေလႄႈယူႇ လူးၵွၼ်ႇဢေႃႈ။
10ၵွပ်ႈပိူဝ်ႈဢၼ်သဵတ်ႈၸႃႇတြႃးၸဝ်ႈၶရိၸ်ႈ၊ မီးၼႂ်းၵဝ်လႄႈၵႃႈၼႂ်းမိူင်းဢၶႃႇယႃႉၼၼ်ႉ၊ၽူႈလႂ်ဢမ်ႇလႆႈႁႄႉလႆႈၶႅၼ်၊လွင်ႈတၢင်းဢၼ်ဢုပ်ႇဝၢဝ်းၸိူဝ်ႉၼင်ႇၼႆၼၼ်ႉ။- 11ၵွပ်ႈပိူဝ်ႈၸိူဝ်ႉၼင်ႇႁိုဝ် ၵဝ်ဢမ်ႇႁၵ်ႉသူႁိုဝ်။ ၽြႃးပဵၼ်ၸဝ်ႈႁူႉယူႇဢေႃႈ။- 12ၵႃႈၼင်ႇဢၼ်ၵဝ်ႁဵတ်းမႃးယဝ်ႉၼၼ်ႉ၊ၵဝ်တၵ်းႁဵတ်းႁႂ်ႈၶဝ်ၸိူဝ်းဢၼ်ၶႂ်ႈလႆႈဢၶႂၢင်ႉၼၼ်ႉ တၵ်းဢမ်ႇလႆႈဢၶႂၢင်ႉဢိၵ်ႇတင်းႁႂ်ႈၶဝ်ၼၼ်ႉ လႆႈပဵၼ်ထၢင်ႇထၢင်ႇသႃးသႃး ၵႃႈၼႂ်းလွင်ႈတၢင်းဢၼ်ဢုပ်ႇဝၢဝ်းၼၼ်ႉ၊မိူၼ်ၸိူဝ်ႉၼင်ႇၵဝ်ၼၼ်ႉသေႇသေႇလူးၵွၼ်ႇဢေႃႈ။- 13လွင်ႈမၼ်းၸမ်ႉ၊ ၶဝ်ၸိူဝ်ႉၼင်ႇၼၼ်ၼၼ်ႉ ပဵၼ်တမၢၼ်ႇၸဝ်ႈဢၼ်ဢမ်ႇၸိုဝ်ႈဢမ်ႇၸႂ်ႈဢေႃႈ၊ ႁဵတ်းၸိူဝ်ႉၼင်ႇႁၢင်ႈတမၢၼ်ႇၸဝ်ႈၶရိၸ်ႈလႄႈပဵၼ်ၵေႃႉဢၼ်ပွင်ႁဵတ်းဢမူႉ၊ ဢၼ်ၸၢင်ႈပႅတ်ႉၸၢင်ႈလႅၼ်ဢေႃႈ။- 14လွင်ႈတၢင်းၼႆႉၸိုင်၊ပဵၼ်ဢၼ်လီဢၢမ်းဢမ်ႇၸႂ်ႈ။ ၸႃႇတၢၼ်ႇၵေႃႈၸၢင်ႈႁဵတ်းၸိူဝ်ႉၼင်ႇႁၢင်ႈတမၢၼ်ႇၵၢင်ႁၢဝ်ဢၼ်လႅင်းၼၼ်ႉယူႇဢေႃႈ။- 15ပိူဝ်ႈၼႆလႄႈ၊ပေႃးသြႃႇမၼ်းတင်းလၢႆၼၼ်ႉ ႁဵတ်းၸိူဝ်ႉၼင်ႇႁၢင်ႈသြႃႇ၊ဢၼ်ႁေႃးလၢတ်ႈတြႃးတၢင်းဢၼ်သိုဝ်ႈတေႃႇၸိုင် တၵ်းမီးတီႈလၢတ်ႈၸိူဝ်ႉၼင်ႇႁိုဝ်။ တီႈသုတ်းတီႈၵွႆ ပုၼ်ႉၶဝ်တၵ်းလႆႈၶၢမ်ႇဢၵျူဝ်းဢပႅတ်ႈ ၸွမ်းၼင်ႇၵႃႈဢၼ်တၢင်းၵမ်တၢင်းၵျၢင်ႉ၊ဢၼ်ၶဝ်ၵမ်ၵျၢင်ႉမီးၼၼ်ႉဢေႃႈ။
ၽေးတုၵ်ႉၶႃႉဢၼ်တမၢၼ်ႇၸဝ်ႈပေႃးလူႉလႆႈၶၢမ်ႇ
16ၵဝ်သမ်ႉဝႃႈထႅင်ႈၸမ်ႉ၊ယႃႇပေႁႂ်ႈၽူႈလႂ်ထၢင်ႇၵဝ်ပဵၼ်ၵူၼ်းယွင်ႇ၊ဢမ်ႇၼၼ်ၵေႃႈ၊ၼင်ႇႁိုဝ်ၵဝ်တၵ်းမီးဢၶႂၢင်ႉ၊ဢၼ်ၵဝ်တၵ်းလႆႈဢုပ်ႇဝၢဝ်းဢိတ်းဢွၼ်ႇၼိုင်ႈၸိုင် မၢတ်ႈၵဝ်ပဵၼ်ၸိူဝ်ႉၼင်ႇၵူၼ်းယွင်ႇလႄႈ၊ဢွၼ်ၵၼ်ယိူၼ်ႉၶၢမ်ႇတႃႉ။- 17ၼႂ်းၵႂၢမ်းဢၼ်ၵဝ်လၢတ်ႈၼႆႉ၊ၵဝ်လၢတ်ႈၸွမ်းၸဝ်ႈၽြႃးဢမ်ႇၸႂ်ႈ၊ၵဝ်ဢုပ်ႇဝၢဝ်းယူႇႁတ်းႁတ်းႁၢၼ်ႁၢၼ်မိူၼ်ၸိူဝ်ႉၼင်ႇ၊ၵူၼ်းယွင်ႇလႄႈလၢတ်ႈဢေႃႈ။- 18ပိူဝ်ႈဢၼ်ၵူၼ်းၼမ်ၼႃႇ၊ဢုပ်ႇဝၢဝ်းၼႂ်းလွင်ႈတၢင်းဢၼ်ၸၢပ်ႈသႅင်ႇၵၼ်တင်းလေႃးၵႃႉၼႆႉလႄႈ၊ၵဝ်ၵေႃႈတၵ်းဢုပ်ႇဝၢဝ်းဢေႃႈ။- 19ၵွပ်ႈပိူဝ်ႈဢၼ်သူ ပဵၼ်ၵေႃႉဢၼ်လၵ်းလႅမ်လႄႈ သူမီးတင်းၸႂ်ၸေႇတၼႃႇသေလႄႈ ယိူၼ်ႉၶၢမ်ႇၵူၼ်းယွင်ႇတင်းလၢႆဢေႃႈ။- 20ပေႃးပိူၼ်ႈတၢင်ႇၵေႃႉ ႁဵတ်းတၢင်းဢၼ်ႁႂ်ႈသူၶၢမ်ႇႁဵတ်းၶႃႈ၊ တၢင်းဢၼ်ၶၢႆၵိၼ်သူ၊တၢင်းဢၼ်ၵၢင်လႄႈတီႉလႆႈသူ၊ တၢင်းဢၼ်ယွင်ႈယေႃးတူဝ်ၸဝ်ႈၵဝ်ႇ၊ တၢင်းဢၼ်တူပ်းၵႅမ်ႈသူၸိူဝ်းၼၼ်ႉၸိုင်၊သူယိူၼ်ႉၶၢမ်ႇယူႇဢေႃႈ။
21ၵဝ်မၢတ်ႈပဵၼ်တၢင်းဢၼ်သႄႉဢၼ်သွမ်းလႄႈ လၢတ်ႈလႄႈဝႃႈႁဝ်းဢမ်ႇမီးႁႅင်း၊ဝႃႈၼင်ႇၼႆဢေႃႈ၊ ၵူၺ်းၵႃႈပေႃးသေၵေႃႉသေၵူၼ်း၊ဢိင်လွင်ႈတၢင်းဢၼ်လႂ်သေဢမ်ႇဝႃႈ၊ၵဝ်ၵေႃႈဢိင်လွင်ႈတၢင်းဢၼ်ၼၼ်ႉသေလႄႈ မီးတၢင်းဢၼ်ႁတ်းႁၢၼ်ဢေႃႈဝႃႈၼႆ၊ ၵဝ်ဝႃႈမိူၼ်ၸိူဝ်ႉၼင်ႇၵူၼ်းယွင်ႇဢေႃႈ။- 22ၶဝ်ၼၼ်ႉပဵၼ်ၵူၼ်းႁေႇပြႄးႁိုဝ်။ ၵဝ်ၵေႃႈပဵၼ်ဢေႃႈ၊ ၶဝ်ၼၼ်ႉပဵၼ်ၵူၼ်းဢီႉသရေႇလႃႉႁိုဝ်။ ၵဝ်ၵေႃႈပဵၼ်ဢေႃႈ၊ ၶဝ်ၼၼ်ႉပဵၼ်ၸိူဝ်ႉၶိူဝ်းဢႃႇပြႃႇႁၢမ်ႇႁိုဝ်။ ၵဝ်ၵေႃႈပဵၼ်ဢေႃႈ။- 23ၶဝ်ၼၼ်ႉပဵၼ်ထမ်ႇမႃႉသြႃႇၸဝ်ႈၶရိၸ်ႈႁိုဝ်။ ၵဝ်ယဵင်ႈၶႅၼ်းပဵၼ်ဢေႃႈဝႃႈၼႆ၊ ၵဝ်ဝႃႈမိူၼ်ၸိူဝ်ႉၼင်ႇၵူၼ်းယွင်ႇဢေႃႈ၊ ၵဝ်ပဵၼ်ၵေႃႉဢၼ်ယဵင်ႈၶႅၼ်းပွင်ႁဵတ်းဢမူႉ ဢၼ်ယၢပ်ႇၸႂ်ၽိုတ်ႇၸႂ်ၼႃႇလူင်လၢင်ဢေႃႈ၊ ပဵၼ်ၵေႃႉဢၼ်ယဵင်ႈၶႅၼ်းလႆႈၶၢမ်ႇတၢင်းဢၼ်ထုပ်ႉဢၼ်ယႅၼ်ႉ၊ ဢိၵ်ႇတင်းတၢင်းဢၼ်ၶင်ဝႆႉၵႃႈၼႂ်းထွင်ႇဢေႃႈ၊ ပဵၼ်ၵေႃႉဢၼ်ထူပ်းၽေးတၢင်းတၢႆၶိူဝ်းၶိူဝ်းယႂ်းယႂ်းဢေႃႈ။- 24ၵဝ်လႆႈၶၢမ်ႇႁွႆးတၢမ်ႇယႅၼ်ႉ၊သီႇသိပ်းယွမ်းၵမ်းၼိုင်ႈ ၵႃႈၼႂ်းမိုဝ်းၵူၼ်းယူႉတႃႉတင်းလၢႆၼၼ်ႉမႃးတေႃႇထိုင်ႁွတ်ႈ၊ႁႃႈပွၵ်ႈယဝ်ႉ။- 25ၵဝ်လႆႈၶၢမ်ႇတၢင်းဢၼ်ဢဝ်ၶွၼ်ႉဝၢႆယႅၼ်ႉ၊တေႃႇထိုင်ႁွတ်ႈသၢမ်ပွၵ်ႈ၊ တၢင်းဢၼ်ဢဝ်မၢၵ်ႇႁိၼ်ထိမ်ႈ၊ပွၵ်ႈၼိုင်ႈမႃးယဝ်ႉ၊တၢင်းဢၼ်ႁိူဝ်းသၢင်းၽေႃးလူႉ၊တေႃႇထိုင်ႁွတ်ႈသၢမ်ပွၵ်ႈၼၼ်ႉၵေႃႈ၊ ၵဝ်လႆႈၶၢမ်ႇမႃးယဝ်ႉ၊ ၵဝ်လႆႈယူႇၵႃႈၼႂ်းၼမ်ႉပၢင်ႇလၢႆႇ၊ဝၼ်းၼိုင်ႈလႄႈၶိုၼ်းၼိုင်ႈမႃးယဝ်ႉ။- 26ၵဝ်တႄႇသႃႉၸႃႇရီႇလႄႇလဵပ်ႈ၊ဢမ်ႇႁူႉလၢႆၽဝ်ႇလၢႆပွၵ်ႈမႃးယဝ်ႉ၊ၵဝ်လႆႈၶၢမ်ႇၽေးဢၼ်ၶၢမ်ႈၼမ်ႉႁွင်ႈၼမ်ႉၵႄး၊ ၽေးဢၼ်ၸူၼ်ယႃႉၸူၼ်တိုၵ်း၊ ၽေးဢၼ်ၸိူဝ်ႉၶိူဝ်းတူဝ်ၸဝ်ႈၵဝ်ႇႁဵတ်း၊ ၽေးဢၼ်ၵူၼ်းတၢင်ႇၸိူဝ်ႉတၢင်ႇၶိူဝ်းႁဵတ်း၊ ၽေးဢၼ်ထူပ်းၵႃႈၼႂ်းဝၢၼ်ႈၼႂ်းဝဵင်း၊ ၽေးဢၼ်ထူပ်းၵႃႈၼႂ်းထိူၼ်ႇၼႂ်းၶိူဝ်း၊ ၽေးပၢင်ႇလၢႆႇ၊ ၽေးဢၼ်ၶဝ်ၸိူဝ်းဢၼ်ႁဵတ်းမိူၼ်ၸိူဝ်ႉၼင်ႇႁၢင်ႈပီႈၼွင်ႉၼၼ်ႉႁဵတ်း၊- 27ဢိၵ်ႇတင်းတၢင်းဢၼ်ပွင်ႁဵတ်းဢမူႉ၊ဢၼ်ယၢပ်ႇၸႂ်ၽိုတ်ႇၸႂ်ၼႃႇ၊တၢင်းဢၼ်တူဝ်ၵႃႇယႃႉၸဵပ်းသႅပ်ႇၼႃႇ၊တၢင်းဢၼ်ယင်းဢမ်ႇလႆႈလပ်းလႆႈၼွၼ်းလႄႈ၊ ပႂ်ႉယူႇဢမ်ႇႁူႉလၢႆၽဝ်ႇလၢႆပွၵ်ႈ၊ တၢင်းဢၼ်ဢိုပ်းတၢင်းၵိၼ်တၢင်းၶူပ်း၊ တၢင်းဢၼ်ယၢၵ်ႇၼမ်ႉ၊ တၢင်းဢၼ်ၵမ်တၢင်းၵိၼ်ဢမ်ႇႁူႉလၢႆၽဝ်ႇလၢႆပွၵ်ႈ၊ တၢင်းဢၼ်လႆႈၶၢမ်ႇတၢင်းဢၼ်ၵတ်းဢၼ်ၼၢဝ်၊ တၢင်းဢၼ်ဢမ်ႇမီးၶူဝ်းမီးလဵင်းၸိူဝ်းၼၼ်ႉမႃးယဝ်ႉ။- 28လိူဝ်သေဢမူႉၽၢႆႇတၢင်းၼွၵ်ႈၸိူဝ်းၼၼ်ႉ ၵဝ်လႆႈၶၢမ်ႇတၢင်းဢၼ်ႁွတ်ႈထိုင်ၵႃႈၼိူဝ်ၵဝ်၊ ၵူႈဝၼ်းတႃႇသေႇဢမ်ႇထၢတ်ႇဢၼ်ဝႃႈ တၢင်းဢၼ်လူတူၺ်းၸိူဝ်းၸဝ်ႈတင်းလၢႆ ဢိၵ်ႇတင်းတၢင်းဢၼ်မႆႈၸႂ်ၶီၸႂ်ၸိူဝ်းၼၼ်ႉဢေႃႈ။- 29ၽူႈလႂ်ႁဵဝ်ႇၸွပ်ႈလႄ ၵဝ်ဢမ်ႇႁဵဝ်ႇၸွပ်ႈ၊ ၽူႈလႂ်မီးတၢင်းဢၼ်ၽိတ်းပိူင်ႈလႄႈ ၵဝ်ဢမ်ႇမႆႈၸႂ်ၶီၸႂ်။- 30ပေႃးၵဝ်ယင်းဢမ်ႇဢုပ်ႇဝၢဝ်းလႄႈဢမ်ႇလႆႈယူႇဢမၢၼ်ႇၶၼ်ပဵၼ်ၸိုင်၊ ၵဝ်တၵ်းဢဝ်လွင်ႈဢၼ်ၵဝ်ႁဵဝ်ႇၸွပ်ႈၼၼ်ႉၵူၺ်းလႄႈဢုပ်ႇဝၢဝ်းဢေႃႈ။- 31ၵဝ်ဢမ်ႇလၢတ်ႈမူႉသႃႇဝႃႈၼႆ၊ ၽြႃးပဵၼ်ၸဝ်ႈပေႃႈၸဝ်ႈႁဝ်းယေႇသူႉၶရိၸ်ႈ ဢၼ်မီးမင်ႇၵလႃႇထႃႇဝရႃႉၼၼ်ႉ ႁူႉယူႇဢေႃႈ။
32ၵႃႈတီႈဝဵင်းထမ်ႇမသႅတ်ႉၼၼ်ႉ ၼႂ်းမိူဝ်ႈဢၼ်ၶုၼ်ဢၼ် ၶုၼ်ႁေႃၶမ်းဢရေႇတႃႉ ၶၢၼ်းဝႆႉၼၼ်ႉမီးဢလူဝ်ႇ ၶႂ်ႈတီႉဢဝ်ၵဝ်လႄႈ ပႂ်ႉဝဵင်းထမ်ႇမသႅတ်ႉၼၼ်ႉယူႇၼၼ်ႉၸိုင်၊- 33ၵဝ်လႆႈၶၢမ်ႇတၢင်းဢၼ်ဢဝ်သႂ်ႇၵႃႈၼႂ်းပဵတ်ႈ၊ယွၼ်ႇတူၵ်းသေၵႃႈၼႂ်းႁူးလၢင်းတဵၼ် ၵႃႈၼိူဝ်လမ်းဝဵင်းလႄႈ လႆႈပၢႆႈလွတ်ႈသေၵႃႈၼႂ်းမိုဝ်းၶုၼ်ၼၼ်ႉဢေႃႈ။
Currently Selected:
2 ၵေႃးရိၼ်ႇထူႉ 11: CBMS
Highlight
Copy
Compare
Share
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship
